Янги китоб

Инсоният азалдан ўсимликлар оламига қизиқиб, унинг фойдали томонлари, ўзига хос хусусиятларини излаб топишга интилиб келган. Турли касалликларни даволашда табиат неъматларидан фойдаланган.

Дарҳақиқат, табиат бағридаги неки неъмат бўлса, у инсон ва унинг манфаатига хизмат қилади. Юртимиз ҳудудидаги боғу-роғлар,       дала-даштлар, тоғу-адирларда шифобахш ўсимликлар, доривор гиёҳларнинг минглаб турлари мавжуд.

Мазкур янги китобда ҳам юртимиздаги доривор ўсимликларнинг шифобахшлиги ҳақида кўплаб      маълумотлар берилган. Буюк табиб Абу Али ибн Сино ва бошқа алломаларнинг қўлланмаларидан фойдаланилган.

Ҳаётда учраб турадиган аллергия, ангина, бел оғриғи, бронхит, захарланиш,  йўтал, камқонлик, шамоллаш, қон босимининг кўтарилиши, туз касалликлари, қабзият  ва шунга ўхшаш касалликларда табиат       инъом этган шифобахш неъматлардан қандай фойдаланиш кераклиги ҳақидаги тавсиялар берилган.

Халқ табобатидаги даволашнинг сир-асрорларини ўзида мужассам этган ушбу китобча китобхонларга манзур бўлиши, беморларни даволашда самара беришига ишонамиз.

"Иқбол" таҳририяти

Тилак

Жорий йил вилоятимиздаги касб-ҳунар коллежларини 94 та мутахассислик бўйича 11 минг 38 нафар ёшлар тамомламоқда. Уларнинг ҳар бири иқтисодиётнинг турли тармоқларида кадрларга бўлган эҳтиёжлар бўйича икки ва ундан ортиқ ихтисосликни эгалладилар. Битирувчиларнинг 1 минг 712 нафари имтиёзли диплом олишга муваффақ бўлди. Битирувчилар илк бор таълимнинг масофавий шаклидан фойдаланган ҳолда давлат имтиҳонларини онлайн тарзда топширдилар.

Қадрли битирувчилар! Сизларни келгусида катта ҳаёт йўли кутмоқда. Эртага тегишли синовлардан муваффақиятли ўтган йигит-қизлар олий таълим муассасаларида ўқишни давом эттирадиган бўлса, аксарият ёш мутахассислар мамлакатнинг равнақи йўлида ишлаб чиқариш корхоналари, ташкилот ва муассасаларга йўл олади, кимлардир тадбиркорлар қаторидан жой олади. Фурсатдан фойдаланиб, касб-ҳунар коллежларини муваффақиятли тамомлаб, ўрта махсус маълумотга эга бўлган барча ёшларимизни муборакбод этамиз!

Мустақил ҳаёт йўлини оғишмай танлашда, ота-боболар ва авлодлар анъаналарини изчил давом эттириш, олий таълим муассасаларига ўқишга кириш ҳамда мамлакатимиз тараққиётига муносиб ҳисса қўшишларингизда улкан муваффақиятлар тилаймиз!

Мадина МАМАЖОНОВА,

вилоят касбий таълимни ривожлантириш

ва мувофиқлаштириш бошқармаси мутахассиси.

TILAK

Ko’z tegmasin tinchlikka,

To’qlik, salomatlikka.

Dunyo chiroyli bo’lsin,

Olam nurlarga to’lsin.

Hech ham urush bo’lmasin,

Hech kim azob ko’rmasin.

Chaqaloqlar - bolalar,

Doim o’ynab, quvnasin.

Tariximiz o’lmasin,

Dushman ko’ngli to’lmasin.

Ko’z tegmasin elimga,

Ilhom kelsin dilimga.

Inobatxon MAMADXOJIYEVA,

Qo’rg’ontepa tumanidagi

3-umumta’lim maktabi o’quvchisi.

Volidangni avayla

Ona aziz, mo’’tabar,

Mehr berar dilbandga.

U - sadoqat timsoli,

Umr so’rar farzandga.

Volidangni avayla,

Nadomat qilmay turib.

Tarbiya qilgan seni,

Chiroyli ulg’aytirib.

Unutma, boshingga qo’y,

Kulsa baxting quyoshi.

Ona pok qalbimizning,

Bir umrlik yo’ldoshi.

Gullola RAHMONALIYEVA,

Jalaquduq tumani.

Jaholatga qarshi kurashib yasha

Jaholat yo’liga kirmasdan turib,

Ma’rifat yo’lida yuzma-yuz yurib.

Adashgan insonni u yo’ldan burib,

Jaholatga qarshi kurashib yasha!

Hushyor bo’l, ogoh bo’l, jaholatdan qoch,

Yomon yo’ldan qaytgin, ko’zlaringni och.

Ma’rifat ziyosin har yerda sen soch,

Jaholatga qarshi kurashib yasha!

Ajdodlarimizning ruhi bo’lsin shod,

Yosh avlod tufayli yurt bo’lar obod.

Jaholat tugasin, bo’lsinda barbod,

Jaholatga qarshi kurashib yasha!

Yurtimizda shuncha o’zgarish, qara,

Qancha sharoitlar, seniki marra.

Hech bo’lmasa, do’stim sen shunga yara,

Jaholatga qarshi kurashib yasha!

Nodirabegim SOTVOLDIYEVA,

Qo’rg’ontepa tumani.

Onajonim

Men uchun olamda tengi yo’q inson,

Hayotimga ma’no berguvchi ilhom.

Yaratganning o’zi baxsh etgan in’om,

Siz uchun jamiki izzatu ikrom.

Siz mening farishtam, onajonimsiz,

Yolg’izim, yagonam, mehribonimsiz.

Allangizni eslash mushkuldir ammo,

Yodimda singlimga aytgan allangiz.

Sizsiz-dunyodagi eng go’zal mohtob,

Mening osmonimda porlagan oftob.

Siz mening farishtam, onajonimsiz,

Yolg’izim, yagonam, mehribonimsiz.

Nasibaxon IBROHIMOVA,

Andijon shahri.

Onam baxtli bo’lmog’i kerak

Nega osmon faryod chekmaysan,

Qara, onam ko’zlarida yosh.

Mendagi bu yurak yurakmas,

Otsang sinmas, bo’lib qolgan tosh.

Xazon bo’lib qolgan g’unchalar,

Ey Ollohim, sendan iltimos.

To’xta umr bir daqiqaga,

Ko’z yoshlarin artaman xolos.

Sochlarida oq farishtalar,

Men deb qalbi ozor chekkanda.

Uzoqlarga ketganman tashlab,

Sog’inch ila rayhon ekkanda.

Yosh qiz edim, yig’lab kelsam gar,

Ovutardi qo’limdan tutib.

Endi yana bedor tunlari,

Kechalari yo’llarim kutib.

Ne kun bugun, to’xtagin, hayhot!

Ortiq bardosh berolmas yurak.

Yur, ketamiz armon uzoqlab,

Onam baxtli bo’lmog’i kerak.

Muhayyo FARHOD qizi

Mehringiz oldida oftob ham shamdek...

Quyoshim, desam sizni tuyular kamdek,

Mehringiz oldida oftob ham shamdek.

Kamu-ko’st, armon ne, bilmadim ko’z yosh,

Baxtiyor ulg’aydim, halol yedim osh.

Tog’imsiz, suyanchiq bo’lib har lahza,

Qiynalsam qalbingiz bo’ladi larza.

Qalqonimsiz, meni har on asrovchi,

Yo’lboshchimsiz, to’g’ri yo’lga boshlovchi.

Har on porlaguvchi yulduzingiz bo’lay,

Faxringiz, iftixor, g’ururingiz bo’lay.

Zulfiyaning nurli izidan yurib,

Sizni baxtiyor etib, oy kabi to’lay.

Yulduzxon RAVSHANBEKOVA,

Jalaquduq tumani.

Sizlarni sog’indim, sinfdoshlarim!

Axil bo’lib hammamiz o’qidik birga,

Gohida kulishdim, goho urishdim.

Karantin paytida yetib qadrizga,

Sizlarni sog’indim sinfdoshlarim.

Bolalik bahori o’tdi siz bilan,

Nolishlar, janjallar, shirin so’z bilan.

Bir kun ko’rishamiz yorug’ yuz bilan,

Sizlarni sog’indim sinfdoshlarim.

Qalbimning to’ridan egallagan joy,

Aziz dugonalar, yuzlari shirmoy,

Meni sog’inyapsiz siz ham hoynahoy,

Sizlarni sog’indim sinfdoshlarim.

Sizga aytsam, maktabning boriga shukr,

Do’stu yaqinlarim diydoriga shukr.

Eslasam, bo’g’zimga kelar yoshlarim,

Sizlarni sog’indim sinfdoshlarim.

 Gullola SHERBOYEVA,

Izboskan tumani.

Yo’lga chiqdim...

Yo’lga chiqdim, kutib ol, hayot,

Ketyapman bag’ringga, nurlar tergani.

Eng oniy onlarning oliy lahzasin,

Qalbdagi nasimla bezab qaytgani.

Quchog’ing to’ldirib ketaman qo’rqma,

Bir kun qaytish bordir baribir Haqqa.

Sening ko’ksingdagi olmoslaringni,

Tanitib ketaman bir bedor xalqqa.

Yo’lga chiqdim, olismi, qisqa,

So’zlaydi qismatga bitganin falak.

Bilaman, huv qizil botayotgan ishq,

Chorlayotir oxir yetgayman ufqqa.

Kutib olasanmi, ayt menga, hayot?,

Tunlarga bosh qo’yib uxlagim bordir.

Bilaman, kunlarning ko’zida yongan,

Bir dard bor o’sha dard bo’ynimga dordir.

Ketayapman...

Men yo’lga chiqdim...

Yelkalab olganman bir dunyo sabr,

Senga kelmoqlik hech bo’lmadi oson,

Mendan ketib menda topsayding qadr..!

Mohlaroyim YULDASHXO’JAYEVA,

Izboskan tumani.

Yoshlarimiz yashasinlar bag’ri butun

Vatan uchun jonin fido etganlarni,

Duo qildim, oxirati obod bo’lsin.

Shahid bo’lib rost dunyoga ketganlarni,

Ul muborak qabrlari nurga to’lsin.

Ona yurtning tuprog’ini aziz bilib,

Jang maydondan aslo ortga qaytmadilar.

Hatto sovuq, ochlikka ham sabr qilib,

Vatan sirin dushmanlarga aytmadilar.

Dovyuraklar, elning mardu maydonlari,

Siz borsizki urush aslo bo’lmagaydir.

Mard jangchilar xotirasi hech o’chmagay,

Yurtning asl o’g’lonlari o’lmagaydir.

Xotirani yodga olgan xalqim uchun,

Ta’zimdaman birodarlar, men ushbu kun.

Tilaklari shudir, biling, men G’ofurning,

Yoshlarimiz yashasinlar bag’ri butun.

G’ofur ABUBAKIROV,

bog’bon, Andijon tumani.

Yoz

Go’zal tusga kiradi,

O’t-o’lan maysazorim.

Ijod qilgim keladi,

Yozayin dilda borim.

Anjir, olma pishmoqda,

Nok, olxo’ri to’kilib.

Bobodehqon hosili,

Bo’ldi yerga egilib.

-Hamsoyaga beraylik!,

-Deydi onam ilinib.

Barakaning sababi

Turar shundoq bilinib.

Boriga shukr qilib,

Yo’qda sabr etaylik.

Yana ko’plab yozlarga,

O’ynab-kulib yetaylik.

Dilbaroy TURSUNOVA,

Jalaquduq tumani.

SO’NGGI SO’Z

Xayr, ko’rishmasmiz endi biz boshqa,

So’ngi bor boshingiz ko’ksimga qo’ydim.

Sochingiz yoyilib ketar to’lqinday,

Unda yot qo’llarning isini tuydim.

Meni azoblamang, ixtiyor sizda,

Oy boring va qaytmang aslo men tomon.

Yuragimni tilmang endi, azizam,

Xiyonat xanjarin zarblari yomon.

Men yomon bo’ldimmi, shudir bor-yo’g’im,

O’shal yaxshingizni ko’rarmiz hali.

Osmonlarda uchib yuribsiz. Ammo,

Yerga qo’nmoqning ham keladi gali!

Karimjon IKROMOV,

Muhammad Yusuf ijod maktabi bitiruvchisi.

    O’TINCh

Garchi ko’zlarimdan tomchilasa yosh,

Sizni unutmoqqa yetmasa bardosh.

Yig’ladim, o’kindim, ammo topmadim,

Endi porlarmikan boshimda quyosh.

Panohim edingiz yonimda har dam,

Charchadim dunyoning yolg’onlaridan.

Yig’ladim, kechiring, yana yig’ladim,

Endi kelmaydi, deb yonimga otam.

Dadajon, yig’loqi qizni kechiring,

Yurak og’rig’i-yu, dardin o’chiring.

Faqatgina sizdan bitta o’tinchim,

Sog’indim, bir bora tushimga kiring!

Gulbora KAMOLOVA,

Oltinko’l tumani.

Жараён

Коронавирус пандемияси туфайли юртимизда карантин эълон қилинган. Барчамиз яхши биламизки, карантин талаб ва қоидаларига амал қилишга барча мажбурдир.

Мутахассислар, шифокорлар томонидан коронавирус ўта хавфли ва тез юқувчи хасталик эканлиги бот-бот айтилишига, унинг келиб чиқиши ва юқишининг олдини олиш бўйича қатор тадбирлар амалга оширилаётганига қарамасдан айрим юртдошларимиз эътиборсиз ва бепарволик, умумманфаатларига ҳурматсизлик билан қараб, белгиланган қоидаларга амал қилмаслик ҳолатларини содир этмоқда.

Жалақудуқ туманида яшовчи, тумандаги   "Турғунов Диёрбек" хусусий корхонаси раҳбари Диёрбек Турғунов аввал  маъмурий жавобгарликка тортилганлигига қарамасдан май ойида карантин вақтда миллий таомлар тайёрлаб, хўрандаларнинг тўпланиб овқатланишига шароит яратиб бериб, карантин қоидаларини бузган.

Унинг ушбу хатти-ҳаракати масъул идоралар ходимлари томонидан тўхтатилиб, унга тегишли чора кўрилди. Хусусан, Жалақудуқ тумани маъмурий судида ушбу ҳолат юзасидан очилган маъмурий иш кўриб чиқилди.

 Суд ҳуқуқбузарга нисбатан жазо тайинлашда унинг  шахсини, мулкий аҳволини ҳисобга олиб, айбидан пушаймонлигини, оилавий шароитини, бир нафар вояга етмаган фарзанди борлигидан келиб чиқиб,                  Д. Турғуновга  жарима жазоси тайинланди. Суд қарорига кўра, у карантин қоидаларини бузганлиги учун энг кам иш ҳақининг 30  баравари, яъни 6 миллион 690 минг  сўм жарима тўлайди.

Азиз юртдошлар! Жамиятда белгиланган тартибларга, айниқса, карантин қоидаларига амал қилишга барчамиз мажбурмиз. Кимда-ким ушбу қоидаларга панжа ортидан қараса, албатта қонунлар доирасида жазоланади. Лекин шу юртнинг фуқароси сифатида сизу биз зиммамиздаги бурч ва вазифаларни онгли равишда адо этишга ўрганишимиз лозим. Бу энг тўғри ва оқилона йўлдир.

Беҳзодбек АБДУНАЗАРОВ,

Жалақудуқ тумани маъмурий суди раиси.

Мутахассис минбари

Коронавирус пандемияси туфайли юртимизда жорий этилган карантин даврида барчадан уйда қолиш талаб этилмоқда. Барча таълим муассасалари қатори мактабгача таълим ташкилотлари фаолияти ҳам вақтинча тўхтатилиб, тарбияланувчилар ота-оналари бағрида, уйларида қолмоқда. 

 Болажонлар таълимнинг илк босқичига оид билимларни олишида узилиш бўлмаслиги учун мактабгача таълим ташкилотлари томонидан таълим-тарбия ишларини масофадан олиб борилиши йўлга қўйилди. Бу борада бизнинг 7- мактабгача таълим ташкилоти томонидан ҳам қатор ишлар олиб борилмоқда. 

Муассасамиз раҳбари Саида Хўжаева ташаббуси билан  барча тарбиячиларимиз         таълим-тарбия ишларини онлайн асосида ташкил этди. Онлайн машғулотлар  Президентимиз томонидан илгари сурилган "Бешта муҳим ташаббус"га чамбарчас боғланган ҳолда олиб борилмоқда.

Карантин бўлишига қарамай, бу борадаги ишларни давом эттирилаётгани нафақат болажонларимизни, балки уларнинг ота-оналарини ҳам қувонтирмоқда. Ташкилотимиз ходимлари ота-оналар орқали болажонлар билан онлайн мулоқотни йўлга қўйиб, кичкинтойларга таълим-тарбия беришда давом этмоқда. Хусусан, турли саналар муносабати билан онлайн тадбирлар, танловлар, телефон орқали болажонлар билан қизиқарли савол-жавоблар ўтказилди. Тадбирлар мавзусига оид видеороликлар, маълумотлар тақдим этилди.

Аксарият тарбияланувчиларимиз онлайн мулоқотларга қизиқиш билан қараб, машғулотларда фаол иштирок этди. Бу билан фарзандларимиз таълим-тарбиясида узилиш бўлишига асло йўл қўйилмаяпти. Ташкилотимиз тарбиячилари томонидан карантин муддати тугагунга қадар онлайн машғулотлар давом эттирилади.

Жорий йил 1 июлдан нодавлат, 1 августдан эса давлат мактабгача таълим ташкилотлари фаолияти тикланиши хақидаги хабарлар, айниқса, биз    тарбиячиларни беҳад қувонтирмоқда. Чунки биз болажонларни, муассасамизни жуда-жуда соғиндик.

Шаҳзода НУРДИНОВА,

Избоскан туманидаги 7- ДМТТ тарбиячиси.

Ўлмас қадриятларимиз

Маънавиятимизнинг ўзаги - миллий анъаналаримиз оила бағрида, маҳалла остонасида, нуроний онахонларимизнинг болажонларга айтадиган эртакларию дуогўй момоларимизнинг ўланларида шаклланиб, камол топган. Бинобарин, халқ оғзаки ижодини катта бўлагини ташкил қилувчи алла, эртак, достон, топишмоқ, лапар, ўлан ва бошқа кўплаб фольклор жанрларининг баркамол авлод тарбиясида аҳамияти юқори.

Бугун ҳар биримиз кундалик мулоқотда гоҳ билиб, гоҳ билмай кўплаб пурҳикмат нақлларни, маъноси кишини лол қолдирувчи маталларни, асрлар ардоғида сайқалланган иборалар, мақолларни қўллаймиз. Бундай ҳикматга бой қадриятларимиз замиридаги эзгу ғоялар ҳар бир авлод камолотига ҳхизмат қилгани сингари бугунги кунда ҳам ўзининг асл моҳиятини йўқотган эмас. Чақалоқ дунёга келган илк кунданоқ момоларимиз эзгуликка йўғрилган аллалар, эртаклар орқали меҳрини дилбандлари қалбига жо этишларининг боиси ҳам шунда. Оиладаги илк педагогик тарбия айнан шу жанрлар орқали болалик давримиздан бошлаб ҳар биримизнинг бадиий-эстетик савиямизни оширишда муҳим пойдевор вазифасини ўтайди.

Бола ота-онага қараганда, кексалардан эшитган афсона ва ривоятлар, мақол ва маталлар, эртак, латифаларни диққат билан тинглаши ва яхшироқ ёдда сақлаши табиий. Тарбиянинг илдизи, бобо ва бувиларнинг  набираларни тарбиялашдаги энг муҳим қуроли айнан халқ оғзаки ижодидир. Чунки, уларнинг баёнида воқеликлар бадиий тўқима ва сифатлар тўлақонли ифодалангани билан болага ёқади. Кексаларнинг содда ва  тушунарли тилдаги нутқи боланинг қаҳрамонларга ҳурматини оширади, уларга тақлид қилишга интилади.

Ўқувчиларга халқ оғзаки ижоди орқали шахсий сифатларни шакллантириш, уларда умуминсоний фазилатлар: ўғил болаларда жасурлик, ботирлик, қатъиятлилик, мураккаб вазиятларда тўғри қарор қабул қилиш ва ҳаракатланиш, қизларда эса   халқимиз аёлларига хос нафосат, гўзаллик, матонатлилик ҳислатларини қарор топтириш усуллари ҳам кичик ёшдан олаётган таълим - тарбиянинг асосини ташкил қилади.

Халқимиз бадиий тафаккурининг дурдонаси ҳисобланган халқ оғзаки ижоди ёш авлоднинг маънавий камолотида муҳим аҳамият касб этувчи боқий қадриятдир. Чунки, юксак технологиялар тараққий этгани сайин миллий ўзлик бешиги бўлган халқ оғзаки ижодига эҳтиёж ҳам ортиб, кучайиб бораверади.

Фарзанд тарбияси нафақат оила ва мактаб, балки маҳалла, қариндош-уруғ, бутун жамият зиммасидаги муҳим вазифадир. Эртак, ривоят, ҳикматга бой мақолларни эшитиб улғайган бола катталарни ҳурмат қилишни, атрофдаги воқеа ҳодисаларга синчков назар солишни, мулоҳаза юритишни ўрганади.

Келгусида унинг баркамол ва комил инсон бўлиб вояга етишувида мактаб, оила сабоқлари билан бир қаторда халқ оғзаки ижодининг ўрни ва роли ҳам каттадир.

Муҳайё САЛОҲИДДИНОВА,

Асака туманидаги 1-умумтаълим мактаби ўқитувчиси.

Педагог мулоҳазаси

Ҳар бир касб эгаси дастлаб, ўқитувчи қўлида таълим - тарбия олади. Етарли билимга эга, чиройли нутқ маданиятини эгаллаб улғайган ўқувчи келгусида ўзи танлаган касбнинг етук мутахассиси бўла олади. Ўқувчиларга она тилимизнинг биллурдек мусаффолиги, она тилига бўлган муҳаббат - халқимизга бўлган беқиёс муҳаббатимиз рамзи эканлиги сабоқлар давомида сингдириб борилади.

 Тил авлодларни авлодларга, асрларни асрларга боғлайди. Шунинг учун ҳам ҳеч бир ходиса ёки восита тилнинг ўрнини боса олмайди. Она тилида тўғри, мукаммал сўзлай олишнинг энг муҳим омили эса ўқувчиларни китоб мутолаасига ўргатишдир.

Китоб мутолааси кишини комиллик сари етаклаши, унинг тафаккур хазинасини бойитиши, зеҳнини ўткир, теран мушоҳадали қилиши ҳақиқат. Китоб - инсон томонидан кашф қилинган энг буюк ихтиро ҳисобланади.

Мактабда бошланғич синф ўқувчиларига дарс бераман. Ўқувчиларимни синфдан  ташқари китоб ўқишга қизиқтириш, янги бадиий адабиётлар билан таништириш мақсадида қўшимча машғулотларда янги педагогик усул ва технологиялардан фойдаланишга алоҳида эътибор қаратаман. Оғзаки ва ёзма давра суҳбати, китоблар кўргазмасини ташкил қилиш, ўқилган китобларга шарҳ ёзишга ўргатиш, ифодали ўқиш мусобақалари, адабий ўйин ва викториналар, адабий эрталиклар ўтказиш, ижодий учрашувлар ташкил қилиш - ўқувчиларни "ёш китобхонлар"га айлантирган. Давра суҳбатларида ўқилган китобдан бир ўқувчи лавҳа ёки матн айтса, иккинчи ўқувчи уни давом эттириб, бу сатрлар муаллифи ёки қайси қахрамонга тегишли эканлигини айтиб, мунозаларни давом эттиради.

Кичик ёшдаги болалар ўқишдан кўра, эшитишни кўпроқ маъқул кўрадилар. Шунинг учун китобдан парчаларни кўпинча ўзим ўқиб бераман. Ўқиш жараёнида интонацияга, ўқиш техникасининг юқори бўлишига, асар мазмуни болаларга тез сингишига эътибор бераман. Бунга жавобан, болалар ҳам яхши ўқишга интилишади. Агар ўқилган асар сўзлаб берилса, болалар китоб мазмунини теранроқ тушуниб олади ва ўзи ҳам сўзлаб беришни ўрганади.

Халқимиз - олийжаноб, гўзал қадриятлар, шарқона урф - одатларга эга халқ. Бундай халқнинг маданияти ҳам юксак бўлмоғи лозим. Бу эса болаликдан олаётган таълим - тарбияга, атроф - муҳит таъсирига ҳам боғлиқ.

Онлайн тарзда сабоқ олган ўқувчиларим, уларнинг ота - оналари билан мунтазам боғланаман. Ўқувчилар уйда қолиб ҳам сабоқ олиш шароитига кўникканлар. Қандай китоб ўқиётгани, таассуротлари ҳақида телефон орқали тўлиб - тошиб сўзлайдилар, маслаҳат сўрайдилар.

Ота-оналарнинг фарзандларига уйда мўъжазгина кутубхона қилиб бераётганликларини эшитиб, хурсанд бўламан. Демак, билимга бўлган интилиш кучли бўлса, ҳеч қандай тўсиқ унинг йўлига ғов бўла олмайди. Маънавий хуружлардан, "оммавий маданият" ниқоби остида кириб келаётган турли иллатлар таъсиридан болаларимизни ҳимоялашнинг асосий омили китобга меҳр қўйишдир.

Бола қалбида ватанга муҳаббат, юртга садоқат, меҳр - оқибат, аждодларимизга ҳурмат туйғуларини шакллантиришга кўмаклашадиган энг яхши восита ҳам китобдир.  Ўқувчилар қанчалик кўп китоб ўқиса, сўз бойлиги юксалади, она тилининг жозибасини тушунади, ҳаётга бўлган меҳри ортади.

Дилфузахон ЖУМАБОЕВА,

Марҳамат туманидаги 29 -умумтаълим мактаби ўқитувчиси.

Ёшлар фикри

Географиядан дарс бўлаётганди. Эшик очилиб синфга меҳмонлар кириб келди. Улар вилоят халқ таълими бошқармасидан текширувчилар экан. Мен доска ёнида ўтган дарс мавзусини гапираётган эдим. Текширувчилардан бири менга қараб, "Давом этинг" деди.

Мен бироз ўзимни ростлаб, мавзуни давом эттирдим. Ҳаяжоним кучли эди, ҳатто, нима деяётганимни ҳам сезмасдим. Сўзлаётган мавзуим ҳам ниҳоясига етди. Энди ўрнимга ўтирмоқчи эдим, текширувчилардан бири "тўхтанг!" деб қолди.

- Сиз ҳозир Ватикан давлати жаҳонда майдони жиҳатидан энг кичик давлатлардан бири, фойдали қазилмалар деярли қазиб олинмайди, яъни ҳеч қандай табиий қазилмалар йўқ, дедингиз, ахир фойдали қазилмалар ҳам давлат бюджетига фойда келтиради, у ерда йўқ бўлса аҳоли қашшоқлашади-ку?" - деди.

- Фақат фойдали қазилмагина давлатни бой қилмайди,   бошқа тармоқлар орқали ҳам ўзини тикласа бўлади. Шу жумладан, мамлакат бюджети қашшоқ бўлса ҳам, аҳоли      маънавий қашшоқ бўлмаса бас, негаки, маънавий фақир инсон жамиятни заҳарлайди" - деб жавоб бердим.

Шунда текширувчи "Сиз келажакда журналист бўлинг!" деб қолди.

Мен ҳам, устозим ҳам ҳайратдамиз.

"Ахир мен чиндан ҳам журналист бўлмоқчиман-ку, наҳотки шу соҳада мени кўра биладиган инсонлар ҳам бор?" - дея ўзимда йўқ мамнун бўлдим!

Бошқарма ходими "Агар, зўр журналист бўлиб етишсангиз, мени унутиб юборманг-а, ҳўпми, телевизорда сизни кўриб, мен шу қизни кўрганман, танийман! - деб хурсанд бўлай, дея чиқиб кетди. 

Шу кундан бошлаб журналистикага бўлган иштиёқим янада кучайди. Жорий йил бошида МY5 телеканали ташаббуси билан ташкил этилган "Ёш журналистлар мактаби" учун кастингда қатнашдим ва танловдан муваффақиятли ўтдим. Айни кунларда ушбу мактабнинг ўқувчисиман.

Менинг назаримда журналист мукаммал инсон бўлиши, ҳар қандай минимал имкониятдан максимал даражада фойдалана олиши лозим. Ҳақиқий журналистлар халқ ва давлат ўртасидаги кўприкдир. Уларнинг асосий вазифаси, аниқ ва тезкор хабар ва янгиликлардан жамиятни бохабар этиш, ҳиссиётларга берилмаган ҳолда, холислик асосида иш олиб боришдир. Нафақат телевидение, балки, радио, матбуот ва ижтимоий тармоқларда ҳам қандай фаолият олиб боришни билиши, халқчил ва адолатли бўлиши журналист учун фойда. Менинг асосий мақсадим, танлаган соҳам йўлида машаққатлардан чўчимай ҳаракат қилиб, таниқли эмас - севимли, адолат тарафдори бўлган журналист бўлиш.

Журналистикани танламоқчи бўлган ёшларга эса айтар гапим: Сиз шундай етук мутахассис бўлингки, кимдир келиб сизнинг ўрнингизни эгалламасин.

Моҳичеҳра МАМАТУРАЙИМОВА,

Марҳамат тумани.

Мактуб

"SABAH" газетаси Туркиянинг машҳур ва оммабоп нашрларидан бири. Газета ҳар тонгда ўз ўқувчиларига мамлакат ва жаҳондаги энг қайноқ хабарларни етказиб беради. Мазкур газетада фаолият юритаётган Бетул УСТА Туркияда меҳнат қилаётган ижодкор Дилдора Хушбақова орқали юртимиз журналистларига ўз табригини юборди. 

- Ўзбекистон ҳақида илиқ тасаввурга эгаман. Ўзбек халқи қардошларимиздир. Қадим тарихга эга юртингиз ва унинг меҳмондўст халқига ҳурматим баланд.

Газетанинг ташқи алоқалар бўлими ходими сифатида Ўзбекистондаги жараёнлар ҳамиша мени қизиқтириб келган. Кейинги пайтларда Ўзбекистон ва Туркия ўртасидаги ҳамкорлик алоқалари мустаҳкамланиб бораётгани, шахсан мени қувонтиради.

Мен Ўзбекистонга боришни, Самарқанд, Бухоро каби қадимий шаҳарларингизни зиёрат қилишни жуда-жуда хоҳлашимни билишингизни истар эдим.

Очиғи, таҳририятимизга ўзбекистонлик ижодкор кириб келганидан ҳайратландим, ҳам қувондим. Ундан юртингизда 27 июнь - Матбуот ва оммий ахборот воситалари ходимларининг касб байрами эканлигини эшитиб, Сизларга табригимни юборишни лозим топдим. Барчангизни ушбу байрам билан қутлаб, энг эзгу тилакларимни изҳор этаман.

 Касбимиз инсоният учун муҳим ва керакли, қийматли ва долзарб касбдир. Инсонларнинг фаровон ҳаёти, адолат ва ҳақиқат учун холис бўлиб ижод қилиш фаолиятимизнинг биринчи ва энг муҳим мезонидир. Журналист, мухбир албатта, холис, ҳақиқатни кўра оладиган инсон бўлиши керак. Ана шу йўлда қатъий позицияда туриб фаолият юритаётган барча ўзбекистонлик ҳамкасбларга соғлик-саломатлик, ижодий ишлари давомли ва самарали бўлишини тилаб қоламан.

Насиб этса, вақтлар келиб, албатта, Ўзбекистонга бораман, Навоий, Ибн Сино, Бобур юртини зиёрат қиламан. Сиз билан ижодий ҳамкорлик ўрнатаман.

Ҳамиша соғ ва омон бўлинг!

Бетул УСТА, Туркия,

"Сабаҳ" газетаси.

Мушарраф Охунова кўплаб журналистларнинг устози,    соҳага узоқ йиллар меҳнати сингган заҳматкаш  журналист, адиба, серқирра ижодкордир. У Андижонга Фарғонанинг Марғилонидан келин бўлиб тушган. Шунгаям 50 йил бўлибди. У ҳазилкаш, каттаю кичик билан бирдек чиқишиб кетадиган ижодкор. Шу боис ҳам ҳамкасблар ҳалигача уни "Марғилоннинг Кумуши" деб ҳазиллашишади. Мушарраф опанинг батартиб, миллий руҳда  кийиниши, узун сочлари, ширин муомаласи бунга сабаб бўлган. 

Мушарраф опа болалигида журналист бўлишни орзу қилмаганини тан олади. Мусофирлик, она шаҳрининг соғинчи уни шоира қилди, ёзувчи, журналист қилди. Болалигида         шеърий машқлар қилиб юрган истеъдод соҳибаси чинакам ижод оламига шўнғиди. Аввалига болаларга атаб шеърлар, эртак ва ҳикоялар ёзди, сўнгра мақолалар ёзишга ўтди.

Ана шу тариқа ижод йўлига кирган М. Охунованинг ижод намуналари "Олтинкўл " газетаси саҳифаларида кўрина бошлади. У таҳририятга жамоатчи мухбир сифатида шаклланиб, қаламини чархлаб борди, ўқиш-ўрганиш, изланишдан чарчамади.

Журналист ўтган ярим асрлик ижодий фаолияти давомида вилоят, республика миқёсидаги матбуот нашрларида маънавий-маърифий, ижтимоий мавзуларда ёзган мақолалари, "Турмуш чорраҳасида" рукни остидаги ҳаётий лавҳалари, публицистик жанрдаги долзарб материаллари билан газетхонлар қалбидан жой олди. Унинг сатира ва юморга бой ҳажвиялари одамларни кулдирса, ҳаётий ҳикоялари йиғлатади, мақолалари барчани мулоҳазага, мушоҳадага чорлайди.

Мушарраф опа бу йил 71 ёшни қарши олади. Бироқ, ҳали ҳам ёзишдан тўхтагани йўқ. Ҳали ҳам бир даста қораламаларини юбориб туради. Республика газеталарига ҳам мақолалар жўнатишни канда қилмайди.  Унинг "Хотиннинг каттаси", "Қувонч", "Матонатга йўғрилган бардош", "Наврўз", "Кесилган сиртмоқ", "Болалигим гулбаҳор", "Сийрат", "Айиқполвон ҳақида эртак", "Аёл қадри" сингари қатор бадиий-публицистик китоблари чоп этилган.

- Ёш ўтиб,  қувватинг кетаркану, бироқ юракдаги чўғ ҳеч қачон сўнмас экан, - дейди Мушарраф Охунова. - Ҳалигача ижод қилиш иштиёқи билан ёнаман. Менимча ҳақиқий ижод кишиси, ёзиш амоли билан туғилган инсон умрининг охиригача  шундай яшаса керак. Мен ижоддаги умримдан розиман. Агар қайта туғилиш имконияти бўлганида, яна журналистикани, ижод оламини танлаган бўлардим.

Бугун Мушарраф Охунова пиру бадавлат онахон, ўнлаб невараларнинг бувиси, кўплаб журналистларга ўрнак мактаби. Биз касб байрами олдидан устоз Мушарраф опа Охуновага соғлик-саломатлик, баракали умр, ҳамиша азизу мукаррамликни тилаб қоламиз.

Муаззам ИБРОҲИМОВА