Зубайданинг дадаси жарроҳ эди. У одамлардан ҳар бир операция учун хизмат ҳақига катта пул талаб қиларди. Ҳатто шароити оғир инсонлар, қўни-қўшнилари, қариндошларидан ҳам операция учун пул сўрарди. Беришмаса жарроҳлик амалиёти ўтказмаслигини айтиб, пўписа қиларди. Илҳом ака барча беморларидан норозиликлар, шикоятлар эшитарди. У бутунлай  обрўсини йўқотган, кўча-кўйда ҳам биров саломига алик олмасди. Илгари уни ҳамма кўрса дуо қиларди. Қўни-қўшнилар Илҳом ака билан узоқ суҳбатлашгиси келарди. Бугун эса...

Бу орада Зубайда бедаво дардга чалинди. Дадасининг бу ишларидан хабар топган Зубайданинг дардига яна дард қўшилди. Чунки, у шифокорларни жуда яхши кўрарди. Ўзи ҳам коллежни тамомлаб, тиббиёт институтига кирмоқчи эди. У дадасининг оқ халатига туширган қора доғни кунда эслаб, ундан нафратланарди. Наҳот энди унинг орзулари рўёга айланса?

Илҳом аканинг боши қотган. Кўпчиликнинг дардига дармон бўлиб, ўз фарзандининг дардига даво топа олмаётганидан эзилар эди. Шифокорларнинг айтишича, Зубайданинг олти ой умри қолганмиш. Илҳом ака Зубайданинг кўзларига боқса, ўзининг қилмишлари ёдига тушади.У энди бир умр ўзини кечира олмай яшайди.

   Дилобар Муҳаммадсолиева,

 Балиқчи тумани.

Қатра

Хушбўй гуллар исини таратиб, инсонлар кўнглини орзуларга тўлдирувчи баҳор майин шаббодасини елдирмоқда. Дарахтлар гўё куй басталаб, ижро қилаётгандай. Бутун борлиқ ана шу куйга жўр бўлаётгандай. Табиат ҳаммага  гўзаллик улашмоқда.

Баҳор ўзининг самимий кулгуси ила  қалблардан жой олувчи малакдир. Гўё келинчакдай гулларини рўмол қилиб олган. Ана шу рўмоли чиройига янада чирой қўшган. Унинг либосидаги ифор қалбларга қувонч бағишлайди. Дилларимизга хушнудлик олиб келувчи бу фаслдан бир сония ҳам ажралгим келмас. Уялганидан унинг юзи бўлмиш қир-адирлар лолазорга айланди. Қизариб, лов-лов ёнди. Сўнгра рўмол остидаги кокилларига мажнунтол новдаларидан сочпопук тақди.

Баҳор, сен бизнинг борлиқ узра ягонамизсан!

Жумагул МАЛИКОВА,

Андижон санъат коллежи ўқувчиси.

Избоскан туманидаги 34-умумтаълим мактабида ташкил этилган  "Уста Ҳабибуллоҳ ота" ўқувчи ёшларни қўллаб-қувватлаш жамғармаси ташаббуси билан мактаб ўқувчиларининг "Ёш китобхон" республика танлови ғолибаси, Президентимизнинг "Spark" автомобили сов-риндори бўлган фарғоналик Шарофатхон Исмоилова билан учрашув ташкил этилди.

Тадбирда мактаб директори М. Ҳусанова сўз олиб, ўтказилаётган маънавият, адабиёт байрами ҳамда Наврўзи олам билан барчани муборакбод этди.

Меҳмонлар, мактаб ўқитувчилари, маҳалла фуқаролар йиғинлари вакиллари, ўқувчилар ва уларнинг ота-оналари иштирокидаги ушбу тадбир таасссуротларга бой бўлди. Қизиқарли савол-жавоблар доирасида ўқувчилар танлов ғолибасидан, унинг ота-онасидан ўзларини қизиқтирган саволларга жавоблар олишди. Ўз ўрнида Ш. Исмоилова танлов жараёнидаги таассуротлари билан ўртоқлашар экан, инсон қанчалик кўп китоб ўқиса, билимли бўлса, ўз мақсадлари сари дадил олға интилиши мумкинлиги, қолаверса, Юртбошимиз соврини унга қувонч, ёрқин онларни тақдим этиш билан бирга, зиммасига юксак масъулият  юклаганлигини таъкидлади. 

Маълумки, "Уста Ҳабибуллоҳ ота" ўқувчи ёшларни қўллаб-қувватлаш жамғармаси томонидан мазкур умумтаълим мактабининг 1-10 синфларида таҳсил олаётган ўқиш ва жамоат ишларида ўрнак кўрсатган, фаол, аълочи ўқувчиларига ойлик стипендия таъсис этилган. Тадбир доирасида март ойининг стипендиялари ҳам 10 нафар ўқувчига тантанали равишда топширилди. Шу ўринда мазкур лойиҳани ҳар жиҳатдан қўллаб-қувватлаётган туманхалқ таълими бўлими, мактаб маъмурияти, Ёшлар иттифоқи туман бўлими мутасаддиларига, шунингдек,  мазкур хайрли лойиҳага ҳомий сифатида амалий ёрдам кўрсатаётган саховатли инсонлар, хусусан, А. Абидов, Х. Эшматовга ўз миннатдорчилигимизни билдирамиз.

 Шунингдек, тадбирда Тошкент давлат аграр университети талабаси Холжўра Ҳабибуллаев ташаббуси билан мактабда ўтказилган "Энг яхши китобхон" танловида ғолиб бўлган 10 нафар ўқувчи ҳам эсдалик     совғалар билан тақдирланди.

Мадинабону ҲАБИБУЛЛАЕВА,

Ёшлар иттифоқи бошланғич ташкилоти "Маънавият"йўналиши сардори,

лойиҳа муаллифи.

Туманимизда ўтган йили "Қайноналар кенгаши" жамоатчилик тузилмаси ташкил этилган. Тузилма фаолиятининг дастлабки давридан бошлаб унга раҳбарлик қилиб келаман. Аслида мен қайноналар билан ишлаш, оилаларни мустаҳкамлаш, оилавий низоларнинг олдини олиш борасида қарийб 35 йиллик тажрибага эгаман.

Бу борадаги ишларни ўрганишимда менга онамнинг олиб борган ишлари, ўгиту насиҳатлари ибрат мактаби бўлган.

Айни кунда туманимиздаги 74 маҳалланинг барчасида "Қайноналар кенгаши" жамоатчилик тузилмаси самарали фаолият олиб бормоқда. Тузилма аъзоларининг маҳалла фаоллари, кўпни кўрган, катта ҳаётий тажрибага эга бўлган онахонлар кенг жамоатчилик вакиллари билан ҳамкорликда олиб бораётган ишлари самараси ўлароқ, фаолиятимизнинг барча йўналишларида ижобий натижаларга эришиб келяпмиз.

Ўзбек миллатида, биз яшаётган жаннатмакон заминда қадим-қадимдан меҳр ва оқибат биринчи ўринга қўйилган. Маҳалла аҳли ҳамма давр-ларда ҳам иноқ ва аҳилликда яшаганлар, оилалар билан боғлиқ муаммоларни биргаликда бартараф этганлар. Онахонларимиз келинларига қайнона бўлиб эмас, ўз онасидай "фарзандим" деб меҳр кўрсатиб келган. Ўзининг келинлари қолиб, бутун маҳалла келинларга бош бўлиб, уларни ҳаёт қийинчиликларини енгиб ўтишларига, янги оилада ўз ўринларини топишларига яқиндан ёрдам берганлар.  Халқимизнинг бу борада шаклланган юксак маданияти, анъана, урф-одат, тарбия мезонлари дунёнинг бирор бир халқида бўлмаса керак.

Лекин бугунги давр ўта шиддат билан ривожланмоқда. Айниқса, қизиққон ёшларимиз кундан-кунга фаровон ҳаёт сари интилар экан, юқоридаги каби қадим оилавий қадриятларимизни бироз унутгандай, ўз ҳуқуқ ва эркинликларини баъзи ҳолларда бошқача талқин этаётганликлари биз кексаларни ташвишга солмоқда. Фарзандларимиз тақдири, келажаги, албатта, биз учун муҳим. Шу боис ҳам мазкур жараёнда уларга имкон қадар кўмак беришимиз, уларни тўғри йўлга солишимиз лозим.

 Очиғини айтганда, баъзи бир янги ҳаёт остонасига эндигина қадам қўйган тажрибасиз ёшлар кекса оналаримиз бермоқчи бўлган панд-насиҳатни гўёки эркинликларига қўйилаётган чекловдай қабул қиладилар. Мана шундай узоқни кўра билмаслик, уқувсизлик ва    шошқалоқлик оқибатида айрим ёш келинчаклар тушган хонадонига мослаша олмай айрим кўнгилсизликлар юзага келмоқда. Таҳлиллардан кўриш мумкинки, пароканда бўлаётган оилаларда содир бўлаётган жанжал-тўполонларнинг аксарияти қайнона-келин можароларидан келиб чиқмоқда. Бундан кўринадики, бу борада қилишимиз лозим бўлган ишлар жуда кўп. Қайнона ва келинлар бир-бирларига нисбатан бағрикенг, сабрли бўлсалар ана шу оилада албатта, бахтли ҳаёт   барқарор бўлади.

Ҳар бир она, келин яхши билиб олсинки, меҳр ва эътибор, ширинсўзлик ҳар қандай муаммоларнинг оддий ечими ҳисобланади. Ўзга хонадонга яхши ниятлар билан кириб борган келин оиланинг қонун-қоидалари, ўзига хос анъаналарини албатта, қайнонасидан ўрганади. Агар оилавий муносабатларда қайнона одилона иш тутса, келин ҳам шундай тарбия топади. Қайноналик ҳам масъулият, ўзга бир оила муҳитида тарбия топган қизни ўз қизидек қабул қилиш, унга ғамхўрлик кўрсатиш ҳам катта фидойилик талаб қилади.

Тузилмамизнинг саъйи-ҳаракати билан юзлаб ажрашиш арафасида турган оилалар яраштирилди. Биргина жорий йилнинг ўтган даврида "Қайноналар кенгаши"га тушган оилавий низолар билан боғлиқ 10 мурожаатнинг 9 таси ижобий ҳал этилди. Албатта, бу ўз-ўзидан бўлгани йўқ. Маҳалла, қайноналар, айниқса, ҳозирги ёшлар билан ишлаш осон эмас. Бу йўналишда биз "Маҳалла" хайрия жамоат фонди туман бўлими, Яраштириш комиссиялари, диний маърифат ва маънавий-ахлоқий тарбия масалалари бўйича маслаҳатчилар, имом-хатиблар, отин-ойилар, профилактика инспекторлари билан ҳамкорликда фаолият олиб бораяпмиз. Бунга ҳам дунёвий, ҳам диний томондан сабоқлар бериш, оилаларда суҳбатлар уюштириш, тарғибот-ташвиқот ишлари ўтказиш орқали эришилмоқда.

 Шунингдек, Кенгашимиз аъзолари томонидан оила қуришга тайёрланаётган қизлар билан оилавий ҳаёт, келиннинг бурчлари, қайноналар, оиланинг бошқа аъзолари билан муносабатлари қандай бўлиши кераклиги хусусида суҳбатлар ташкил этилмоқда. Биз нафақат қайнона-келин муносабатлари, балки нотинч оилалардаги тотувликни, соғлом оилавий муҳитни мустаҳкамлаш, қўни-қўшничилик муносабатлари бузилган хонадонлар турмуш тарзини бар-қарорлаштириш борасида  ҳам зарур ишларни олиб             боряпмиз.

 Бугунги кунда туманимизда 79 мингдан зиёд оила истиқомат қилади. Уларнинг 30 фоизини ёш оилалар ташкил этади. Уларнинг муаммолари, эҳтиёж ва талабларига, айниқса, нотинч оилалар билан иш олиб боришга алоҳида эътибор қаратилмоқда. Оилавий муносабатларда муаммо юзага келган оилаларга маҳалладаги катта ҳаётий тажрибага эга бўлган онахонлар бириктирилмоқда. Бундан ташқари, тўй-ҳашамлар, маърака ва бошқа маросимларини ихчам, камчиқим қилиб ўтказиш борасида ҳам тегишли ишлар амалга оширилмоқда.  Эркаклар латта-путта, сеп-сидирғага кўп ҳам аралашмайди. Очиғини айтиш керак, тўйлардаги ортиқча олди-бердилар, маъзар беришда ҳаддан ошишлар, "мен сендан ўзаман" қабилидаги сеп-сидирғаларнинг бошида аёлларимиз турибди. Демак, тўй-ҳашамларни ихчам ўтказиш борасида энг аввало, аёллар билан, қайноналар билан ишлашимиз лозим. Чунки оила бюджетига зиён келтираётган ҳам, ўйлаб топилган турли тадбирларни, олди-бердиларни урф-одат, деб анъанага айлантираётган ҳам аёлларимиз бўляпти. Бу каби салбий ҳолатларни бартараф этиш учун астойдил ҳаракат қилишимиз зарур.

Яқинда иккита намунали тўй ўтказдик. Ортиқча дабдабасиз, олди-бердиларсиз ўтказилган бир кунлик тўй маросими муҳтарам Президентимизнинг тўй-маросимларни тартибга солиш борасидаги ўринли фикрларига жавоб бўлади, деб ўйлайман. Албатта, бу билан туманимизда барча оилалар тотув яшамоқда, маҳалла тинч-осойишта, оилаларни  мустаҳкамлаш борасидаги барча муаммолар барҳам топди, деб бўлмайди. Ҳали қиладиган ишларимиз кўп.

Оилаларда тинчлик ва осойишталик, соғлом ва бар-қарор муҳитни таъминлаш олдимизда турган энг муҳим вазифалардан бири. Зеро, аҳил ва мустаҳкам оила - юрт таянчи, унинг ишончли келажаги. Демак, фуқаролар йиғини қошидаги кенгашлар,   комиссиялар, барча фаоллар ҳамжиҳат бўлиб ҳаракат қилишимиз, ҳар бир оилада, маҳаллада соғлом маънавий муҳит ва   барқарорликни таъминлаш учун бор имкониятларимизни ишга солиб фаолият юритишимиз зарур.

 Мавлудахон АБДУРАҲМОНОВА,

 Асака тумани "Қайноналар кенгаши" жамоатчилик тузилмаси раиси.

ёҳуд эрта ва қариндошлар ўртасидаги никоҳнинг зарарлари хусусида

Оз бўлса-да, бугун ҳаётимизда эрта ва қариндошлар ўртасида тузилаётган никоҳлар натижасида ногирон болаларнинг туғилиши, ёш оналарнинг оғир хасталикларга мубтало бўлиши ҳолатлари кузатилмоқда. Бу билан боғлиқ муаммолар шубҳасиз, ҳар биримизни ташвишга солади. Умуман, эрта никоҳнинг аянчли оқибатлари ва унинг олдини олиш хусусида Избоскан тумани тиббиёт бирлашмаси бош гинекологи Малоҳатхон САЙФУТДИНОВА қуйидаги фикр ва мулоҳазалари билан ўртоқлашди. 

- Ўзбекистонда никоҳ ёши қизлар учун ўн етти ёш, деб белгиланган бўлса-да, қизларни бу ёшда турмушга бериш қатор муаммоларни келтириб чиқариши мумкин. Қолаверса, бу ёшда қизларимиз жисмонан оилавий ҳаётга тўлақонли тайёр бўлмайди. Шифокорлар, олимлар томонидан ўтказилаётган кўплаб    тадқиқотлар, ҳаётий мисоллар ана шу фикрнинг нечоғлик тўғри эканлигини кўрсатмоқда. Буни яқиндагина ўзим гувоҳ бўлган бир воқеа мисолида ҳам айтиб ўтишим мумкин.

Бир танишимиз кекса онаси оғир хасталиги туфайли набирасининг никоҳ тўйини кўриб қолсин, деб эндигина ўн етти ёшга тўлган қизини турмушга узатди. Тўй дабдаба билан бўлиб ўтди. Минг афсуски, оғир хасталаниб ётган кекса буви, ҳатто набираси тўйининг қандай тарзда бўлиб ўтганини билгани ҳам йўқ. Лекин қувонч билан ўтган тўй ортидан бу оилага қатор ташвишлар ёғилди.

Қиз ёш бўлгани боис унинг янги оилага кўникиши қийин кечди. Қайнонани келиннинг тажрибасизлиги, рўзғор юмушларини бажаришда йўл қўяётган хатолари зада қилди. Ачинарлиси, қанчалик ҳаракат қилмайлик, оила қуришга жисман ва руҳан тайёр бўлмаган қизнинг ҳомиласи нобуд бўлди. Эндиликда ёшгина келиннинг саломатлиги анча оғирлашди, узоқ вақт мунтазам даволанишни тақозо этмоқда. Фарзанди бошига тушган бу кўргиликлар ота-онани ҳам қийин аҳволга солиб қўйди.

Шу ўринда савол туғилади. Бунга йўл қўймаслик мумкин эдими? Албатта, мумкин эди. Ота-она мулоҳаза билан иш тутганида, тиббий саводхонлиги етарли бўлганида, шифокорларнинг фикрларига қулоқ тутганларида эди, бундай кўнгилсизликларнинг олди олинган бўларди. Ҳар бир ота-она фарзандини бахтли бўлишини орзу қилади. Лекин фақат истак билангина орзуга эришиб бўлмайди. Афсуски, айрим юртдошларимиз фарзандлари тақдирига юзаки қараётганликлари, ўзлари истамаган ҳолда уларни қийин аҳволга солиб қўяётганликлари бор гап.

Шифокор сифатида ҳам касбий, ҳам ҳаётий тажрибамдан келиб чиқиб айтишим мумкинки, қизларнинг 20-22 ёшдан, йигитларни эса 24-26 ёшдан оила қуришларини мақсадга мувофиқ деб биламан. Чунки йигит ва қизлар айнан ана шу ёшларида оила қўрғонини барпо этишга ҳар томонлама тайёр бўлади.

Яна шуни таъкидлашим керакки, эрта турмушга чиққан қизларда ҳомиладорлик оғир кечиши жуда кўп кузатилган. Ҳомиладорлик даврида турли патологик, экстрагенитал касалликлар кучайиши, йўлдош етишмовчилиги, суяклар тизимида турли салбий оқибатлар юзага келиши кузатилади. Бу ҳолат ҳомиланинг нуқсонли ривожланишига сабаб бўлади, она ва бола саломатлигига салбий таъсир кўрсатади.

Шу ўринда нафақат эрта, балки қариндошлар ўртасидаги никоҳлар ҳам ана шундай салбий оқибатларга олиб келади. Аниқроқ айтадиган бўлсам, бундай никоҳлар натижасида кўпроқ ногирон болаларнинг туғилиши кузатилади.

Яқинда ҳомиладор бир аёл қабулимда бўлди. Учинчи фарзандини кутаётган экан. Асаблари таранглашган, унда кучли руҳий зўриқиш аломатлари яққол сезилиб турибди. Суриштириб билсам, ўз холасига келин бўлган бу аёлнинг 4 ёшга тўлаётган иккинчи фарзандининг ўнг оёғи яхши ривожланмай қолган экан. Учинчи фарзандим ҳам бирор нуқсон билан туғилмасмикан, деган ҳадик уни қаттиқ ташвишга солаётганини айтиб йиғлади. Аёлга қўлимиздан келадиган зарур барча тиббий ёрдамлар кўрсатилди. Лекин тиббиёт ҳам яқин қариндошлар ўртасидаги никоҳ натижасида туғиладиган болани қандай бўлишини аниқлаб бериши анча қийин.

Яқин қариндошлар ўртасида никоҳланиш зарарли эканлиги, бу нарса илмий асосланганлиги ва қайта-қайта айтилишига қарамасдан, орамизда қуда бўлишни истаётган опа-сингиллар, яқин қариндошларнинг учраб туриши бу борадаги тарғибот ва тушунтириш ишларини янада кучайтириш зарурлигини тақозо этади.

Муқаддас динимиз исломда ҳам яқин қариндошлар ўртасида оила қуришга рухсат этилмайди. Хусусан, Қуръони Каримда ҳам бу ҳақда оятлар келтирилади, шунингдек, қатор ҳадислар борки, уларни яхши билишимиз ва улардан ўзимизга тўғри хулоса чиқариб олишимиз лозим.

Оила-жамиятнинг асоси. Оилалар қанча мустаҳкам бўлса, жамият шунчалик равнақ топади. Айни кунда маънан етук, салоҳиятли, жисмонан бақувват ёш авлодни дунёга келтириш ва тарбиялаб вояга етказиш жамиятимиз олдида турган муҳим вазифалардан биридир. Бунинг учун ота-оналар, кенг жамоатчилик фарзандларимизни соғлом улғайишлари учун зарур барча ишларни бажаришимиз керак. Айниқса, эрта ва қариндошлар ўртасида никоҳларга йўл қўймаслик миллатимиз наслининг соф-лигини сақлаш, ногирон болалар туғилишининг олдини олишда муҳим аҳамият касб этади.

Минурахон БОЗОРОВА ёзиб олди.

Андижон байрам оFушида

Наврўз байрами муносабати билан сўлим ва хушманзара Боғи Бобурда ташкил этилган халқ сайли андижонликлар учун ҳақиқий шодиёнага айланди. Буюк шоир номи билан аталган боғи Бобурга икки юздан зиёд вилоят корхона ва ташкилотлари, идора ва муассасалари ходимлари, минглаб аҳоли вакиллари ташриф буюрдилар.

Байрам тадбирларида вилоятимиздаги таълим муассасалари жамоалари баҳорий таомлар кўргазмаларини тақдим этдилар. Туман ва шаҳар маҳаллаларидан келганлар эса миллий ўйинлар, халқ оғзаки ижоди ва саҳна кўринишлари билан тантаналарга файз киритишди.

- Бу йилги сайл  ҳар йилгидан бошқача, шукуҳли, ҳар бир лаҳзасида миллий урф-одат ва қадриятлар тўла акс этган ҳолда ўтказилаётганига гувоҳ бўлаяпмиз, - дейди Боғишамол даҳасида яшовчи Муборак Ибрагимова. - Халқона ўйинлар, фольклор санъатининг энг яхши намуналарига кенг ўрин берилмоқда. Ҳунармандлик кўргазмаларини кўриб, кўз қувнаяпти. Миллий таомларимиз, китоб кўргазмаларининг ташкил этилгани таҳсинга лойиқ. Баҳорни, Наврўзни соғинган диллар шўх қўшиқ ва лапарлардан яйради.

Боғда ташкил қилинган гавжум кўргазмалардан бири - китоб савдоси бўлди. Уни Бобур номидаги вилоят ахборот-кутубхона маркази, "Андижон китоб савдо", "Бекет", "Шарқ зиёкори" ҳамда якка тартибдаги тадбиркор "Ҳасанов Ҳусан" мутасаддилари уюштирдилар. Шунингдек, вилоят соғлиқни сақлаш тизимидаги даволаш-профилактика муассасалари кўргазмалари соғлом турмуш тарзи тарғиботига бағишланди. Улар томонидан ташкил этилган кўргазмалардан баҳорий ва парҳез таомлар жой олди.

Тушликка эса кўпдан буён овоза қилинаётган девзира гуручдан 2 тонналик ош дамланди. Вилоят ҳокимлиги ҳамда Ошпазлар ассоциацияси вилоят бўлими ташаббуси билан тайёрланган палов 12 нафар маҳоратли ошпаз томонидан пиширилди.

- Ошимизга 400 кг қўй гўшти, 150 кг ёғ, 50 кг думба ёғи, 400 кг сабзи, 400 кг гуруч ишлатилди, - дейди бош ошпаз, Андижон шаҳридаги "Нодира" ресторани ходими Хуршидбек Ҳасанов. - Кўпчиликнинг ризқи қўшилган таом пиширилаётганда Аллоҳ барака нурини ёғдириб, қозон атрофида фаришталар саловат айтиб туришаркан. Таомга ҳатто бошқа давлатлардан келган меҳмонларнинг ҳам ризқи қўшилган экан, шунинг учун ҳажми катта бўлгани билан пиширишда қийналмадик.

Байрамнинг асосий қисми - концерт дастури олдидан  вилоят ҳокими Шуҳратбек Абдураҳмонов бутун Андижон аҳлини Наврўзи олам билан муборакбод этди. Таниқли санъаткорлар, шаҳар ва туманларнинг фолькор жамоалари ижросидаги қўшиқ ва лапарлар, аскиячилар, турли миллат вакилларининг мусиқий чиқишлари, болажонларнинг беғубор рақсларига байрам иштирокчилари  жўр бўлдилар.

Боғи Бобурда бошланган Наврўз тантаналри Андижон шаҳридаги А.Навоий номли маданият ва истироҳат боғи, Болалар ва Ёшлар боғларида  ҳам юқори кўтаринкилик билан ўтказилди.

Муаззам ИБРОҲИМОВА,

"Иқбол" мухбири.

МарҲаматда Наврўз шодиёнаси

Наврўз байрами тантаналари Марҳамат туманида ҳам кўтаринкилик, шоду хуррамликда ўтказилди. Туман марказидаги марказий ўйингоҳ, маданият ва истироҳат боғи фарзандларини сайлга, Наврўз шодиёналаридан баҳраманд бўлишга етаклаб келган оилалар билан гавжум бўлди.

Бир томонда ёш     ҳунармандларнинг сопол буюмлари, зар дўппилари, рассомларнинг табиатни, ёшликни тасвирлаган суратлари, ёш тадбиркорлар томонидан ишлаб чиқарилаётган маҳсулотлар намуналари, яна бир томонда миллий таомларимиздан кўк чучвара, қатлама, сомса, сумалагу ҳалим. Сайлга ташриф буюрган аҳоли баҳорий таомлардан баҳраманд бўлиш билан бирга, унинг фойдали хусусиятлари ҳақида ҳам маълумотларга эга бўлдилар. Дорбозлару, полвонлар карнай-сурнай садолари остида ўз санъатларини намойиш этган бўлсалар маҳаллий аҳоли хўроз уриштириш, кураш каби миллий анъаналаримиз жозибасидан завқ олди. Тумандаги умумтаълим мактаблари ўқувчилари эса қалби қайноқ шоир Муҳаммад Юсуф шеърларини ўқиш бўйича баҳру байт мусобақасини ўтказишди.

- Ялпизларга суянган, қизғалдоқларни пешонасидан ўпган шоир Муҳаммад Юсуф баҳорни, гулларни жуда яхши кўрарди, табиатни маҳорат-ла мадҳ этарди, - дейди ўқувчи Руҳшона Шоиржонова. - Шоир туғилиб ўсган гўшада баҳорни, шоирни эсласак, унинг руҳини шод айлаган бўламиз. Шеърий мусоҳабамиз ғоят қизғин ўтди. Томоша қилган одамлар орасида ҳам шеърият ихлосмандлари кўп экан, баҳру байтимизга қўшилишди.

Гулбаҳор УММАТОВА,

Марҳамат туманидаги 23-умумтаълим мактаби ўқитувчиси.

Байрам шаҲрихонликларга чексиз қувонч улашди

Дилларга кўтаринкилик, шижоат олиб келган Наврўз шодиёналари шаҳрихонликлар томонидан ҳам катта тантана ва шодиёналар билан нишонланди. Туман марказидаги маданият ва истироҳат боғида корхона, ташкилот, муассаса ва маҳалла фуқаролар йиғинларидан иборат жамоалар баҳорий таомлар, пишириқлар билан дастурхон безадилар. Турли хил кўргазмалар ташкил этилиб, ҳар бир жамоа ўз йўналишида баҳорни тасвирлашга уринди.

Байрамга алоҳида ҳозирлик кўрган кичкинтойларнинг ғайрат-шижоати ўзгача. Улар миллий ўйинларимиздан бўлган варрак учириш, арқон тортиш мусобақаларида беллашиб, ўзларининг эпчил, чаққон ва бақувват бўлиб вояга етаётганликларини намойиш этдилар. Баҳорни, Наврўзойни тараннум этувчи қўшиқлари ҳам байрам иштирокчиларига хуш кайфият улашди.

 - Азал-азалдан Шаҳрихон уста ҳунармандлар, тадбиркорлар юрти ҳисобланган, - дейди "Андижонлик" маҳалласида яшовчи дўппидўз Ёрқиной Тўйчиева. - Бугунги Наврўз кўргазмалари ҳам асосан миллий ҳунармандчилик буюмлари - пичоқлар, бешиклар, махси-кавушларга, туманимиздаги тадбиркорлар томонидан ишлаб чиқарилган маҳсулотларга бойлиги билан ажралиб турди. Баҳорий илиқлик, байрам дастурхонининг тўкин-сочинлиги одамларнинг кайфиятига кўтаринкилик бағишлади.

Байрам тадбирида хушовоз хонандалар, бадиий жамоалар ҳамда ёш истеъдод эгалари ўзларининг куй-қўшиқлари, рақс ва саҳна кўринишлари билан барчага олам-олам қувонч улашди.

Озода ОЛИМОВА,

жамоатчи мухбир.

Қорасувлик болажонлар яйраб ўйнашди

Эрта тонгдан янграган карнай-сурнай садолари барчани оммавий сайлга чорлади. Қорасувликлар 2018 йил     Наврўзини, баҳорни дилда қувонч билан, орзу умидлар рўёби сифатида қарши олдилар. Эрталабдан шаҳар Маданият ва истироҳат боғининг бош дарвозаси олдида карнай- сурнай, ноғоралар садоси барчани Наврўз сайлига чорлади.

Кичик амфитеатрда 27-сон Болалар мусиқа ва санъат мактаби ёш истеъдодлари ўз санъатларини намойиш этдилар. Тасвирий санъат мутахассислиги ўқувчиларининг ижодий ишлари ҳам ташриф буюрганларнинг эътирофларига сазовор бўлди. Бу ўринда ёш мусаввир Г. Нуриддинова томонидан мато ва мойбўёқ ёрдамида яратган Бобур бобомизнинг сурат асари, М. Адҳамова томонидан яратилган Навоий бобомиз сурати, шунингдек, А. Нозимжонов ҳамда О. Шерматов мўйқаламига мансуб "Баҳор" суратлар кўргазмаси ҳам томошабинларда қизиқиш уйғотди. Бу ёш рассомларнинг маҳорат пиллапояларидан юксалиб боришларида устозлари М. Туробжонова, Г. Тешабоеванинг хизматлари салмоқлидир. 

Наврўз тантаналари доирасида ўтказилган кўргазма ва ярмаркалар, айниқса, китоб ярмаркаси китобхонлар учун ажойиб совға бўлди.

Палов тайёрлаш танловида шаҳар маҳаллаларининг энг моҳир ошпазлари иштирок этиб, ўз маҳоратларини  намойиш этдилар. Шунингдек, белбоғли кураш, шахмат мусобақаси ҳақиқий спорт байрамига айланиб кетди.

- Одамларнинг байрамона кайфияти, шижоатини кўриб,  беихтиёр қувонасан киши, - дейди шаҳар ҳокимининг ўринбосари, хотин-қизлар қўмитаси раиси Наргиза Холматова. - Бу албатта, тинчлик-осойишталик, озод ва обод юртимизда инсон омилига кўрсатилаётган эътиборнинг ёрқин намунасидир.

Миллий ўйинлар намойиши, кураш, варрак учириш мусобақалари, бадиий жамоаларнинг чиқишлари барчага манзур бўлди, шўх яллалар барчани рақсга чорлади.

- Байрамларда айниқса, болажонлар яйрашади, - дейди Қорасув тиббиёт бирлашмаси болалар шифокори Гулчеҳра Солиева. - Наврўзга етказганига шукроналар келтирамиз. Сумалак пишираётган онахонлар, баҳорда гул-гул очилган қизу жувонлар, мард ўғлонларимиз, умуман баҳорни соғинган халқимизни қутлуғ айём билан чин дилдан табриклаймиз. Баҳорий кайфият, офтобнинг тафти, байрам дастурхонларининг файзу баракаси, тинчлик-хотиржамлик барчага ҳамроҳ бўлсин!

Сирожиддин ҲАСАНОВ,

"Қорасув тонги" газетаси муҳаррири.

Наврўз байрами вилоятимизнинг барча туман ва шаҳарларида катта тантана, шоду хуррамлик билан нишонланди.

Асака туманида Наврўз байрами катта шодиёна билан нишонланди. Ўзгача шукуҳ билан кириб келган кўклам туманимиз аҳолиси, айниқса, хотин-қизлари учун омадли йиллардан бири бўлди. Байрам тантаналари тумандаги ҳар бир маҳалла, таълим муассасаси, меҳнат жамоаларида юқори кўтаринкилик билан ўтказилди.

Байрам арафасида туман ҳокимлиги, хотин-қизлар қўмитаси, "Маҳалла" ҳайрия жамоат фонди ва бошқа қатор ташкилотлар ҳамкорлигида кенг кўламли ободонлаштириш, кўкаламзорлаштириш ишлари амалга оширилди, ногирон, якка-ёлғиз яшовчи, ёрдамга муҳтож инсонлар ҳолидан хабор олиниб, уларга моддий ва маънавий ёрдам кўрсатилди.

Қўмита, "Аёллар" маслаҳат маркази фаоллари, маслаҳатчиларимиз, отинойиларимиз томонидан маҳаллаларда, оилаларда ижтимоий-маънавий муҳит барқарорлигини таъминлаш юзасидан фуқаролар билан суҳбатлар ўтказилди, қатор тадбирлар уюштирилди.  Ана шундай суҳбат ва тадбирлар давомида опа-сингилларимизнинг муаммолари ўрганилиб, уларга зарур маслаҳатлар берилди, амалий ёрдамлар кўрсатилди. Жумладан, айни кунда туманимизда истиқомат қилаётган 8 нафар юз ёшдан ошган онахонларимизни совға-саломлар билан йўқладик.

Жорий йилнинг ўтган уч ойи мобайнидаги ўрганишлар жараёнида ажрашиш арафасида турган 49 оила яраштирилди. Демак, шунча оилада тинчлик-хотиржамлик,    барқарорлик таъминланди. Бундан ташқари, кўплаб опа-сингилларимизга ўз хонадонларида тадбиркорликни йўлга қўйишлари учун банклардан кредитлар олишларига ёрдам кўрсатилди. Энди улар тикувчилик, иссиқхона қуриш,      паррандачилик, чорвачилик ва бошқа йўналишларда иш ташкил этиб, ўз оилаларига даромад олиб кириш имконига эга бўлдилар. Ҳозирда бошланғич ташкилотимиз етакчилари, ҳамкор ташкилотлар билан биргаликда Президентимизнинг жорий йил 2 февралдаги "Хотин-қизларни қўллаб-қувватлаш ва оила институтини мустаҳкамлаш соҳасидаги фаолиятни тубдан такомиллаштириш чора-тадбирлари тўғрисида"ги Фармонида белгиланган вазифалар ижросини таъминлаш бўйича кенг кўламли ишлар олиб борилмоқда.

Таъкидлаш жоизки, фаолиятимизнинг барча йўналишларида айни кунда "Ниёзботир", "Қайрағоч", "Ҳамдўстлик", "Камолот" маҳаллаларида ишлар намунали йўлга қўйилган. Бу ишлар албатта, ўз-ўзидан бўлгани йўқ. Бу борада туман бош отинойиси Муқаддамхон Мамиталиева, Дилоромхон Фозилова, Ўктамхон Раҳмонова, Маҳбубахон Қодирова, Оминахон Ибрагимова сингари кўплаб фаолларимизнинг хизматлари катта.

Жорий "Фаол тадбиркорлик, инновацион ғоялар ва технологияларни қўллаб-қувватлаш йили"да ишларимизни юқори босқичга кўтариш учун бор имкониятларимизни ишга солиб астойдил меҳнат қиламиз. Мақсадимиз, туманимиз хотин-қизларининг яшаш шароитлари, турмуш фаровонлиги янада юксалсин.

Муқаддасхон ҚУРБОНОВА,

Асака тумани ҳокими ўринбосари, хотин-қизлар қўмитаси раиси.

Соғиниб-соғиниб титради тонглар,

Пурвиқор чўққилар тўкди ёшини.

Кўнгил кўклам истаб, ҳориган онлар,

Оҳиста кўтарди майса бошини.

Дарахтлар эгнида ярашиқ либос,

Сойларнинг юзида тиниқ табассум.

Бу ахир, гўзаллик, эзгуликка хос,

Бир тўйиб нафас ол, кўзларингни юм!

Ожиз майсаларми матонат рамзи?

Яшамоқ сирини ўргатиб қўйди.

Наврўз - аждодларнинг абадий қарзи,

У бизни, биз уни қанчалар суйдик!

Ҳар битта қадамда саодат сочиб,

Югурдинг. Шошилдинг. Билмадинг тиним.

Табиат қўйнидан кетсанг-да кўчиб,

Йил бўйи диллардан тополдинг қўним.

Кетасан... Ва қайтиб келасан такрор,

Зулфингга гул мисол тақилди бир сўз:

Минг битта малакнинг ҳуснисан, баҳор,

Бир дунё юракнинг соғинчи - Наврўз!

Шоҳсанам КАРИМОВА

Вилоят тарихи ва маданияти давлат музейида қорақолпоғистонлик таниқли мусаввир Ўзбекистон Бадиий академияси бадиий ижодкорлар уюшмаси аъзоси Сабур Қутлимуротовнинг шахсий кўргазмаси очилди.

Кўргазмадан мусаввирнинг тарихий ёдгорликлар, гўзал юрт манзаралари, ўзбек ва қорақалпоқ халқларининг ўзига хос турмуш тарзи, табиат гўзалликлари акс эттирилган 50 ортиқ асарлари ўрин олган.

Мусаввирнинг "Фил қалъа", "Аёз тепа", "Боғдаги асаларилар", "Амударё кемалари", "Хива", "Лаби ховуз", "Туя соғувчи". "Отарнинг қайтиши" сингари қатор асарлари кўргазма меҳмонларида катта таассурот қолдирди.

Кўргазма юртдошларимиз, айниқса, ёшлар қалбида тасвирий санъатга ҳурмат, гўзалликка ошуфталик, юртимиздаги тинчлик-осойишталикка шукроналик, она Ватанга муҳаббат туйғуларини мустаҳкамлашга хизмат қилади.

Барно ҲАЙДАРОВА

Андижон давлат тиббиёт     институтида нодавлат нотижорат ташкилотлари, оммавий ахборот воситалари ҳамда фуқаролик жамиятининг бошқа институтларининг давлат гранти танловига лойиҳалар тақдим этиш масаласига бағишланган семинар-тренинг бўлиб ўтди.

 Ўзбекистон Республикаси Олий Мажлиси ҳузуридаги нодавлат нотижорат ташкилотлари ва фуқаролик жамиятининг бошқа институтларини қўллаб-қувватлаш жамоат фонди маблағларини бошқариш бўйича парламент комиссияси, вилоят ҳокимлиги ҳамда Фуқаролик жамияти шаклланишини мониторинг қилиш  мустақил институти Андижон ҳудудий бўлими ҳамкорлигида ташкил этилган мазкур тадбирда жамоат фонди маблағларини  бошқариш бўйича парламент комиссияси аъзолари, вилоятдаги оммавий ахборот воситалари, нодавлат нотижорат ташкилотлари вакиллари иштирок этди.

Семинар-тренингда ОАВ, давлат ва нодавлат ташкилотлари ўртасида ижтимоий шерикликни кучайтириш юзасидан таклиф, фикр ва мулоҳазалар билдирилди, шунингдек, жорий йил учун эълон қилинган давлат грант танловларида иштирок этиш, лойиҳалар тайёрлаш ва тақдим этиш бўйича мутахассислар томонидан зарур маслаҳат ва тавсиялар берилди.

Иштирокчилар ўзларини қизиқтирган барча саволларга батафсил жавоблар олди.

М. ИБРОҲИМОВА