Бир келинчакнинг кўзи ёриди. Паҳлавондек ўғил туғилди. Қайнона, қайнотасининг хурсандлигини кўрсангиз эди! Улар ҳамиша     бахтли ҳаёт кечириши, ота-онасига йўлдош бўлишини тилаб, набирага Бахтиёр, дея исм қўйишди.

Фарзанд кўрган ёш отанинг боши осмонга етди. У ҳар куни келиб, она-боладан хабар олар, қувончини турмуш ўртоғи билан баҳам кўрарди.

Чақалоқни туғруқхонадан олиб чиқиш катта тантанага айланиб кетди. Шу куни хонадон ҳар икки қудалар, амак-ю тоғалар, аммаю холалар билан тўлди. Ёш она фарзандининг таваллуди барчага қувонч улашаётганидан мамнун эди.

Орадан кунлар ўтди. Келинчак ўзига келгач, яна уй юмушларига киришди. У бахтидан масрур бўлиб жуда-жуда очилиб кетди. Шунинг учунми, энг яқин дугонаси кичкинтойни кўргани келганида, очиқ чеҳра билан кутиб олди. Улар тўкин дастурхон атрофида анча гаплашиб ўтиришди.

Дугонасининг гап орасида умр йўлдоши унга нима совға қилганини сўраганида, келинчак аввалига ҳайрон бўлди. Кейин аста жавоб берди:

- Ҳеч нарса совға қилмадилар... Ахир, ҳамма нарсам бор-ку. Шу фарзандим мен учун энг катта сийлов, дугонажон...

- Наҳотки?! - Ҳайратланди меҳмон. - Сенинг қадринг шуми? Ҳеч йўқса, биттагина тилла зирак бўлса ҳам тақиб қўймадими? Менинг эрим қизимни туққанимда, билакузук олиб берганди...

Дугона кетди. Лекин, у  айтган сўзлар келинчакнинг фикри-ўйини қамраб олди. "Рост-да, қадрим йўқми менинг? Нега эрим менга нимадир совға қилмади? Қўли тош остидамиди?" Юрса-турса ҳам, боласини ҳар кўрганда ҳам шу ҳақда ўйлайдиган бўлиб қолди. Эр-хотиннинг ўша кунги суҳбати дилхиралик билан якунланди.

- Жоним, мен эндигина институтни битириб, ишга кирдим, - дея ётиғи билан тушунтирди эр. - Кейинроқ ҳаммаси бўлади. Ке, арзимаган нарсага жанжаллашмайлик...

Келинчак эса уни тушунишни истамади. Совға можароси кейин ҳам давом этди. Шунчаки тортишув, қадрини пеш қилишлар авжга чиқавергач, кунларнинг бирида йигитнинг тилидан ҳатто Аршни ҳам титратгувчи сўз  чиқди.

Оила бузилди. Ҳали бахт нималигини билмай туриб, жажжи Бахтиёрнинг зиммасига отасизлик, етимлик доғи тушди. Келинчак ёшлик қилиб, катта хатога йўл қўйганини кеч англади. Аммо, ғишт қолипдан кўчган эди!

Муаммо нимадан бошланган эди ўзи? Ҳа, дугонасининг ташрифидан... Бир оғиз сўз фожеаси ёш келин-куёвнинг гулдек турмушини бузиб юборди. "Бировнинг хонадонига кўрдек кириб, соқов каби чиқинг", деб шунга айтсалар керак-да!

Нажмиддин Икромий.

(39-сон) Ҳаётий қатралар

Сабохон тўнғич қизини чиқарди. Ёлғиз қўл эса-да, кам қилмади. Бироқ, девор жавоннинг яхшисига кучи етмади. Маҳаллий ҳунармандларникини олиб берди. Бу қудага ёқмабди. Қизининг юзига солибди.

Тўй ташвишлари, кейинги борди-келдилардан ҳориган Сабохон буни кўтаролмай, диққатчиликдан қон босими ошиб, ётиб қолди.

- Наҳот, қудам тушунмаса?.. Тўйгача "борингизга барака, озни кўп ўрнида кўрамиз", деган эди-я... Отаси бўлгандаям бир навийди...

Эртасига иккинчи қизи кўмагида поликлиникага борди. Одам кўплигидан узоқ навбат кутиб қолди. Бир пайт ёнида ўтирган аёл ҳол сўраб, сўз қотди.

- Айланай, рангингизда ранг қолмабди, нима бўлди?

- Давлениям қурғур ошиб кетибди, опа...

- Сиқилгандирсиз-да, айланай. Энди, одам деган сал нарсага диққат бўлавермаслиги керак-да. Бу дунёнинг ташвишлари тугамайди...

Аёл унга тасалли бериш умидида гапираётганини тушунса-да, Сабохоннинг энсаси қотди. "Кийи-ниши жойида. Демак, ўзининг бошига тушган ташвишлар унинг учун бегона. Бундайлар  насиҳатгўйликни қотиришади-да..."

- Ҳа, энди, ташвишлариям бор бўлсин, опа. Ҳозир қиз чиқарганнинг ғами нима бўларди...

Хуллас, гап гапга уланди. Савол кетидан савол ёғилди. Бир соат қандай ўтгани ҳам билинмади.

Сабохон докторга кўриниб чиқса, ҳалиги аёл кетмаган экан. Хайр-хўшлашиб кетмоқчи эди, у шундай деди:

- Эртага яна келасиз-а? Унда мен сизни шу ерда кутаман...

Нега кутади, нима иши бор? Сабохон буни ўйлайдиган аҳволда эмасди.

Эртасига текширув таҳлилларини топшириб бўлгач, маҳалла шифокори хонаси томон бораркан, йўлакда кечаги аёлни учратди.

- Яхшимисиз, - сўрашди аёл эски қадрдонлардек. - Анча яхшисиз, айланай. Бугун одам оз экан, дарров кириб чиқинг, кейин...

Доктор ҳузуридан чиққач эса, аёл унинг қўлидан тутди.

- Ҳозир икковимиз бир жойга бориб келамиз, - деди у.

- Нега?..

- Негалигини кейин биласиз...

Ҳар нарсадан шубҳаланиб юрувчи Сабохон бу сафар индамай, унга эргашди. Поликлиника дарвозаси олдидаги енгил машинага ўтиришиб, бир оз юришгач, аёл унга юзланди.

- Қизингизни қайси маҳаллага бергансиз?

Бу саволнинг берилиши унга ғалати туюлса-да, қизи тушган маҳалла ва кўча номини айтди. Ҳайдовчи (аёлнинг ўғли бўлса керак) унинг жавобидан сўнг қўл телефонда кимгадир қўнғироқ қилиб, нимадир, деди.

Машина қудаси дарвозаси олдида тўхтади. Ҳайрону лол ўтирган Сабохонни аёл тушишга таклиф этди.

- Энди гап бундай, айланай, - деди аёл. - Ҳозир қудангизникига кирамиз. Мен қизингизнинг аммаси, ўғлим эса тоғаси бўлади. Тушундингизми?

Йўқ, Сабохон тушунмади. Бу аёлнинг амма каби катта саватда сарпо ва ўғлининг тоға ўрнида хорижий девор жавон (у юкланган машинани кейин кўрди) олиб келаётганини дабдурустдан тушунолмади.

Қуда чақирилмаган меҳмонларни қошларини чимирганча кутиб олди. Кейин эса муддаони  англаб ва усталар девор жавонни машинадан тушира бошлаганини кўриб, очилиб кетди. Сабохондан ноўрин гаплари учун узр ҳам сўради.

Қайтишда эса Сабохон аёлдан нима учун бундай қилганини сўради. Аёл эса Сабохоннинг ўнг қўлини кафтлари орасига олганча, мулойим оҳангда деди:

- Аллоҳ учун, айланай, Аллоҳ розилиги учун!..

(39-сон)

Ислом динида жамият ҳаётининг барча жабҳаларида адолат, тенглик, меҳрибонлик, раҳм-шафқат ғояларини жорий этиш буюрилади. Динимиз жамиятнинг меҳрга муҳтож қатламларидан бўлган етимлар ҳақида ҳамиша қайғу-ришга, уларга ғамхўрлик ва меҳрибонлик кўрсатишга чақиради.

"Етим" деб шариатда балоғат ёшига етмай отаси вафот этган сағир ва сағираларга айтилади. Ҳадиси шарифда "Балоғат ёшидан сўнг етимлик йўқ" дейилган. Қуръони карим оятлари, Пайғамбаримиз Муҳаммад (с.а.в.) ривоят қилган ҳадиси шарифларда етимларга қарашли молларни тасарруф қилишда исроф ёки хиёнатга йўл қўймаслик алоҳида таъкидланади.

Абу Умомадан ривоят қилинади: "Расулуллоҳ (с.а.в): "Ким Аллоҳ азза ва жалла учун бир етимнинг бошини силаса, қўли нечта сочининг устидан ўтса, унинг ҳаққига шунча ҳасанот ёзилади. Ким ўз ҳузуридаги етим қизга ёки болага яхшилик қилса, мен ўша одам билан жаннатда мана бундай бўламан" деб икки бармоқларини яқинлаштирдилар.

Етимга яхшилик қилиш, унинг бошини силаш, унга хайру-эҳсонлар ҳадя этишлик  нақадар улуғ  мақом, қанчалик буюк мартаба эканлигини юқоридаги ҳадисдан билиб олишимиз мумкин. Албатта, инсон бошидаги сочларнинг саноғига етиш қийин. Бироқ етим болага ҳеч қандай ёрдам беролмаса-да, унинг бошини силаб қўйишнинг ўзи беҳисоб савобга муносиб амал экан. Етимнинг бошини силаш билан бирга, уни тарбиялаган, едириб-ичирган, кийинтирган, бошпана берган, илму маърифат ўргатган кишига ёзиладиган ҳасанотларнинг миқдори эса беҳисобдир.

Етимни таомга чақириш ва унга ўз таомидан едириш ҳам катта савоб амаллардан саналади. Абдуллоҳ ибн Умар (р.а.) қачон таом еса, ёлғиз емас, олдига бир етимни таклиф қилиб, у билан бирга таомланар эди. Ҳар таомда дастурхонга, албатта бева-бечоралар, фақир-мискинларни ҳам таклиф қиларди. Бир куни таом келтирилгач, одатича етим болани чақиришни сўради. Қараса, етим бола йўқ экан. Бироз кутиб туриб, сўнг таомни ўзи еди. Таклиф қилинган етим бола эса    овқат тугаганда келиб қолди. Шунда ибн Умар (р.а.) унга ҳам овқат келтиришни буюрди. Бироқ овқат қолмаган экан. Шунда Абдуллоҳ ибн Умар болага асал билан толқон олиб келишларини буюрди. Сўнг болага: "Ма, буни ол. Аллоҳга қасамки, кам бўлмадинг", деб чиройли муомала қилди. Ибн Умар (р.а.) овқатга кечикиб келган етим болани таомсиз қолдирмасликка ҳаракат қилди. Унинг кўнглини олишга уринди.

Тарихдан маълумки, иккинчи жаҳон уруши йилларида халқимиз оиласидан, ватанидан  айрилган кўплаб етим болаларни ўз қарамоғига олган. Қийинчиликларга қарамай, уларни камситмасдан, ўкситмасдан ўз фарзандлари қаторида едириб-ичирган, тарбия-лаган. Халқимизнинг етимпарварлиги, болажонлиги тарихга муҳрланган. Яратганнинг беҳисоб ажру савобларига етказадиган миллатимизнинг ана шу ўзига хос қадриятини қалбларимизга жо қилайлик.

Ҳаётимиз давомида атрофимиздаги етим-есирларга меҳрибонлик, раҳм-шафқат кўрсатайлик, айниқса, меҳрибонлик уйларидаги кўнгли ўксик норасидалар холидан хабар олайлик, уларга қўлимиздан келганча ёрдам ва   шафқат кўрсатайлик. Аллоҳ барчаларимизни ана шундай улуғ савоб амалларни адо этиб, икки дунё саодатига мушарраф бўлишлигимизни насиб этсин.

Абдурашид ҚОДИРОВ,

Избоскан туманидаги "Умар ибн Ҳаттоб" жомеъ масжиди имоми.

Жасур СУЛТОНОВ,

имом ноиби.

(39-сон) мулоҳаза

Кейинги йилларда мамлакатимизда Президентимиз ташаббуси билан юртимиз тараққиётини юксалтириш, халқимиз турмуш фаровонлигини яхшилашга қаратилган қатор фармон ва қарорлар қабул қилинди. Уларнинг ижросини таъминлаш борасида амалга оширилаётган ишлар самараси ўлароқ, ҳаётимиз тобора яхшиланиб бормоқда, одамларни қийнаб келаётган кўплаб муаммолар бартараф этилмоқда.

Минг афсуски, жамиятимизда урчиб бораётган турли иллатлар ана шундай чиройли ҳаётимизга соя солаётганидан ҳам кўз юмиб бўлмайди. Хусусан, халқимизнинг гўзал удумларидан бири - тўйлар билан боғлиқ кераксиз урф ва маросимларнинг пайдо бўлганлиги тўй қилаётган аҳолининг аксарият қисмини қийин аҳволга солиб қўймоқда.

Бу ҳақда гап кетганда, "ҳар ким ўзи топган даромадни ўзи истагандек сарф қилади-да" дейдиганлар ва уларни маъқуллайдиганлар дарров топилади. Бироқ ҳаётнинг шундай мезонлари борки, унга ҳар бир киши, бой бўладими, камбағалми, албатта риоя этиши лозим.

Ўзимиз, айниқса, аёлларимиз ўйлаб топаётган "янги-янги ихтиролар", очкўзлигимиз, манманлигимиз, шуҳратпарастлигимиз, нафсимизнинг қулига айланиб қолаётганлигимиз ортидан келаётган иллатлар на миллий, на диний қадриятларимизга мос келади. Ўйлаб топилаётган ана шундай кераксиз удум ва бидъатлар одамларни мушкул аҳволга солиш билан бирга уларнинг бошига ташвиш ва мусибатлар келтирмоқда.

Кўплаб ота-оналар "Ҳамма қилаётган урфни биз ҳам қиламиз, одамлар гапирмасин, фарзандим тенгдошлари олдида ўксимасин, бир кунлик тўй ўтади кетади" деган хато фикр билан иш тутиб, ўзларини ўзлари қийин аҳволга солиб қўймоқда.  Бу эса фарзандлар тарбиясига ҳам салбий таъсир кўрсатмоқда. Фарзандларимиз онгида тўйимизни ота-онамиз биз истагандай қилиб ўтказиб бериши керак, деган тушунча шаклланмоқда. Халқнинг кўзи учун ўтказилаётган бундай маросимлардан ҳеч қандай манфаат йўқ, фақат қарз-ҳавола бўлиб қолаётганлигимиз, дабдабабозликлар ортидан келаётган муаммолар умримизни, асабларимизни емираётгани аниқ. 

Тўй масаласида эркаклар, оталар бир сўзли бўлиши лозим. Кераксиз олди-берди, урфларнинг олдини олиш кўпроқ уларга боғлиқ. Хали кўп нарсаларни англаб етмайдиган ёш фарзандларимизни кўнглига қараш, аёлларимизнинг бемани хою-ҳавасларини ўйламай маъқуллашимиз яхши оқибатларга олиб келмайди. 

Ота-она бир қизига чиройли одоб бериб, соғлом, ҳунарли ва ўқимишли қилиб балоғатга етказиб, уни турмушга берса, янги хонадонда қиз куёвнинг, қайнона-қайнотанинг хизматидан ошиниб, оиладаги барча юмушларни адо этсаю, ўша хонадоннинг соҳибалари келинчакнинг ота-онасига турли солиқлар солиши, қилган бу нарсанг паст, модадан қолган  дейишлари юзсизлик, худбинликдан бошқа нарса эмас. 

Никоҳ ўқилаётган пайтда куёв келинни боқиш, кийинтириш, бетоб бўлса даволатиш, бошпана билан таъминлаш ва бошқа кўплаб мажбуриятларни зиммасига олади, ваъда беради. Куёв тўйдан олдин берган ваъдасини, виждон ва ғурурини унутиб "зўр урф одатларимиз бор-да" деб хотин тарафдан келадиган тансиқ таомлар, маъзарларни кутиб ўтириши уят ва шармандаликдир. Бу муқаддас ваъдани бузиш лафзсизлик саналади. Ушбу ҳолат динимиз кўрсатмаларига, қолаверса, инсонийликка ҳам хилофдир.

Танангизга ўйлаб кўринг, шу ҳолат эркакман, деб бош кўтариб юрган ғурурли йигитга мосми? Албатта йўқ. Ансинча шармандалик, очкўзлик, пасткашликдир. Бу борада биз ота-боболаримиз асрлар давомида сақлаб келган орият, ғурур ва андишани унутмаслигимиз лозим.

Азиз юртдошлар! Барчамиз ҳамжиҳат бўлиб, юқоридаги каби иллатларни йўқ қилишга уринмасак, эртага янада кўпроқ муаммолар бизни ташвишга солиши турган гап. Шундай экан, тўй қилишдан аввал кексаларимизнинг маслаҳатини олайлик, тўйларимизни ихчам, чиройли, ўзимизни ҳам, қудаларни ҳам қийнамайдиган тарзда ўтказайлик. Фарзандларимизга чиройли тўй қилишдан аввал уларга чиройли тарбия берайлик, оила ҳаётига тайёрлайлик, нима фойда, нима зарар эканлигини англаб етишларига кўмаклашайлик. Тўй-маросимларни тартибга солишни айнан ана шулардан, оиламиздан, аёлимизни тарбиялашдан бошласак, ишонаманки, албатта ўзимиз истаган натижага эриша оламиз. 

Илҳомжон РАҲМАТОВ, ҳуқуқшунос.

Асака тумани.

(39-сон) Бугуннинг гапи

Илгари "гап-гаштак" деган нарса фақат эркаклар орасида бўларди. Ҳозир ишлайдиган аёлдан тортиб, уйда ўтирадиганларигача "гап"га боради. Ҳар бир соҳа аёлларининг ўз давраси, ўз гапи бор. қайси кафе, ошхонага кирманг, "гап"чи аёллар билан тўла эканлигига гувоҳ бўласиз.

Синфдошлар "гап"и,    курсдошлар, бозорчилар, қўни-қўшнилар, қариндош-уруғлар, ҳатто эр дўстларининг  хотинлари ўзаро "гап" ташкил қилиб олган аёллар ҳам бор. Билмадим, бу балки яхшидир, лекин шахсан мен ана шундай гапларнинг яхши томонидан кўра, салбий жиҳатларини кўпроқ кўряпман.

Аёллар ойда бир марта бўладиган "гап"га алоҳида тайёргарлик кўради, уларнинг аксарияти гўзаллик салонига бормасдан ўтиришга бормайди, қолаверса,  у ерда маълум миқдорда пул йиғилади. Бериладиган маблағ оиладаги қайсидир харажатлар, фарзандларнинг еб-ичишидан қисқартириш ҳисобига бўлиши аниқ. Гапда мазза қилиб еб-ичиб, фақат ўз маишатини ўйлайдиган аёллар ҳам афсуски орамизда йўқ эмас. Буям майли-я, баъзи аёлларимизнинг гапларда "бўшалиб" кетишлари, ўзини тутиши, пардасиз гап-сўзлари кишини хайрон қилдиради. Бу каби ҳолатлар ўзбек аёли шаънига доғ туширади, холос.

Вилоятимиз марказида анжуман бўлди, унда  пойтахтдан, қўшни вилоятлардан ҳам меҳмонлар иштирок этди.. Улар билан тушлик қилгани чиқдик. Ёзнинг жазирамаси бўлгани боис, шаҳардаги шинам ошхоналардан бирига кирдик. Ошхонада тўда-тўда бўлиб ўтирган "гап"чи аёллар жуда кўп эди, уларнинг шарофати билан ошхонада бўш жой қолмаганди. Бироз навбат кутиб турдик, меҳмонларнинг олдида хижолат бўлдик. Аёлларнинг ғала-ғовуридан, шовқинидан бемалол гаплашиб, тинчгина овқатланиб ҳам бўлмасди.

Ана шундай ўтиришларни кузатиб ўйланиб қоламан! Бу каби беўхшов маишатлар опа-сингилларимизга керакми ўзи, деган савол мени қийнайди. Яқин дугоналар дийдорлашиб, чиройли суҳбатлар қуриб ўтирсалар бошқа гап эди. Аксарият бундай ўтиришларни кузатсангиз, ўтиришдан муддао гўё еб-ичиш, кимларнингдир устидан иғво қилиш, фисқу-фасоддан иборатдай.

Аёл менинг назаримда хонадоннинг фариштаси. У кўча-кўйда, турли кафе ва ресторанларда маишат қилиб, ўзини кўз-кўз қилиб юриши керак эмас. Опа-сингилларимиз ўзимиз англамаган ҳолда ҳаётимизга иллат бўлиб кирган бу каби ҳолатларга чек қўйишлари керак. Бу маънавиятимизга, фарзандларимиз тарбиясига, ўзбек аёлининг шаъни, қадр-қиммати, ўзлигига путур етказади.

Аёл - нозик ҳилқат, маъсума, у улуғ тарбиячи. Ҳар бир аёл - у ишлайдими, уй бекаси бўладими,  энг аввало, болаларига парвона бўлиб, оиласининг мустаҳкамлигини таъминлаши, хонадонини обод қилиб ўтириши керак. Балки фикр-ларим нотўғридир, аммо нима бўлганда ҳам аёлнинг ўрни уйда, оилада, асло "гап-гаштак"ларда эмас.

Бу масала хусусида опа-сингилларимизнинг ўзлари, муҳтарам газетхонларимиз ўз фикр-мулоҳазалари билан ўртоқлашсалар яхши бўларди.

ҳамрохон МАМАТҚУЛОВА,

Жалақудуқ тумани.

(39-сон) Фермер аёлларимиз

- дейди улуFнорлик фермер Майрамхон Шарипова

Асли Шаҳрихондан бўлган Майрамхон Шарипованинг Улуғнорга келиб, иш бошлаганига қарийб ўн етти йил бўлди. Бугун уни кўпчилик нафақат Улуғнор туманида, балки вилоятимиздаги илғор фермер аёллардан бири сифатида яхши билади. Унинг раҳбарлигидаги "Шаҳрихонлик Зайнура" фермер хўжалиги ҳар йили давлатга пахта, ғалла ва пилла топшириш режасини ортиғи билан бажариб келмоқда.

- Болалигимдан ерга меҳрим бўлакча, деҳқончиликка қизиқишим баланд бўлган, - дейди Майрамхон Шарипова. - Қишлоқ хўжалиги институтига ўқишга киришни орзу қилар эдим. Мактабни битирган йилим дадам оламдан ўтди. Бу йўқотиш менга каттиқ таъсир қилди, қолаверса, онамни ёлғиз ташлаб кетолмадим. Шу билан ўқиш ҳақидаги орзуим армонга айланди. Лекин деҳқончиликдан кўнгил узолмадим.

Жамоа хўжалигида табелчи бўлиб ишладим. Тажрибали, кўпни кўрган деҳқонлардан дала ишларининг ўзига хос томонларини, одамлар билан ишлашни ўргандим. Бу орада турмушга чиқдим. Далада ишлаш иштиёқи мени асло тарк этмасди. Турмуш ўртоғим, қайнона-қайнотамга озроқ ер олиб деҳқончилик қилсак, деган ниятимни айтганимда, улар мени қўллаб-қувватлашди. Деҳқончилик учун ер беришларини сўраб, мутасаддиларга мурожаат қилганимда, "Агар ниятингиз жиддий бўлса, Улуғнордан ер олиб, деҳқончилик қилинг", деб маслаҳат беришган. Ўшанда ота-оналаримизнинг дуосини олиб, турмуш ўртоғим билан Улуғнорга келиб иш бошлаганмиз, шу ерда яшаб қолдик. Шукрки, меҳнатларимиз ортидан кам бўлмадик, ҳурмат-эътибор топдик.

Ҳа, қатъий ишончи, интилиши, ҳалол меҳнати билан Майрамхон эл орасида ардоғ топди. Улуғнорда  дастлаб 20 гектар майдонда деҳқончилик қилди. Пахта ва буғдойдан яхши ҳосил олди. Меҳнатсеварлиги, ишни тўғри ташкил этиши, аъзоларни аниқ мақсад сари етаклай олиши унинг ютуқларида муҳим омил бўлди. Йиллар давомида ташаббускор ва шижоатли фермернинг тажрибаси юксалди, ишлари юришди, одамларнинг, раҳбарларнинг унга бўлган ишончи ортди. Унга ажратилган ер майдони, фаолияти кенгайди.

Албатта ана шу даража ва натижаларга эришиш осон кечмаган. Қанча-қанча қийинчилик, машаққатлар енгиб ўтилди.

- Фермерликни бошлаганимда кичик фарзандим хали икки ёшга ҳам тўлмаган эди, - дейди Майрамхон опа. - Фермерликка иштиёқим   баландлигидан, ҳатто "Хали болаларим кичкина-ку, қийналмасмиканман?" деб ҳам ўйламабман. Мана, ҳаммаси ортда қолди. Бугун ўғлим вояга етиб, ёнимга кирди. Хўжаликни     бошқаришни бошлади. Ўғлимдаям худди мен каби ташкилотчилик, тадбиркорлик, ўзи қизиққан йўлдан қатъий бориш  хусусияти бор.

 Жорий йилда хўжалик 80 гектар майдонда деҳқончилик қилди. Буғдойдан мўл ҳосил олиниб, давлатга ғалла топшириш шартнома режаси бажарилди. Бугун 55 гектар майдондаги пахта қийғос очилган. Умуман, фермер хўжалиги қатор йиллардан буён пахта режасини 110-120 фоизга бажариб келади. Бунда Абдураҳим Шарипов, Худойберди Шарипов, Қаҳрамон Назаров, Ўғилой Неъматова, Ҳасанбой Абдуллаев сингари сувчи, механизатор ва аъзоларимизнинг хизматлари ниҳоятда катта.

Шу кунларда йиғим-терим ишлари қизғин паллага кирган. Насиб қилса, қисқа кунлар ичида режа адо этилади.

Истиқлол Майрамхон опа сингари жуда кўп аёлларга кенг имкониятлар эшигини очиб берди. Айниқса, фермерларга берилаётган имкониятлар уларнинг салоҳиятини юзага чиқармоқда, юрт равнақи йўлида астойдил меҳнат қилишга ундамоқда.

Майрамхон опа нафақат тажрибали деҳқон, балки ибратли оиланинг бахтли бекаси ҳамдир. Турмуш ўртоғи билан 5 нафар фарзандни тарбиялаб вояга етказдилар, ўқитиб, уйли-жойли қилдилар. Оиладаги ҳамжиҳатлик, сидқидилдан меҳнат қилиш оиланинг тўкис ва фаровон ҳаёт кечиришига замин яратди. Самарали меҳнатлари, фермерликнинг ортидан ушбу оила кам бўлмади. Майрамхон опа болаликда қилган орзу-ниятларига эришди. Ер эгаси бўлди. Ҳамма ҳавас қилгудек оиласи, рўзғори бор.

-Ўйлаб қарасам, ҳаётда бир аёл қилиши мумкин бўлган барча ишларни бажарибман, - дейди қаҳрамонимиз. - Оилам тинч, фарзандларим бахтли. Уй-жой, машинамиз бор. Юрт равнақига ўз ҳиссамни қўшяпман, имкон қадар одамларга ёрдам беряпман. Эл-юрт орасида ўз ўрним, ҳурматим бор. Инсон, айниқса, аёл киши учун бундан ортиқ бахт бўлмаса керак!?

Ўрни келганда айтишим керакки, мана шундай юртда меҳнат қилишнинг, яшашнинг ўзи бир бахт. Шу боис ҳам мен ўзимни озод ва обод юртнинг бахтли аёлиман, деб ишонч билан айта оламан. Илоҳим юртимизга, тинч-осойишта ҳаётимизга  кўз тегмасин!

Қалбларида мана шундай шукроналик, юрт равнақи учун фидойи ва меҳнаткаш Майрамхон Шарипова сингари опа-сингилларимиз сафи кенгаяверсин.

Муаззам ИБРОҲИМОВА

(39-сон) Фестиваль

"Соғлом ва маънавий етук авлод - юрт келажаги" шиори остида ўтказилаётган "Болалар китоби" III республика фестивали Андижон шаҳридаги "Баркамол авлод" вилоят болалар ижодиёти марказидаги тадбир билан бошланди.

Вилоят ҳокимлиги, матбуот ва ахборот, маданият ҳамда халқ таълими  бошқармалари ҳамкорлигида ташкил этилган тадбирда таниқли ёзувчи-шоирлар, адабиётшунос олимлар, ёш ижодкорлар, ёшлар вакиллари иштирок этди.

Тадбирда мамлакатимизда китоб тарғиботи орқали маънавий-маърифий ишлар самарадорлигини, шунингдек, аҳоли, айниқса, ёшларнинг китобга ва китоб муто-лаасига бўлган қизиқишини ошириш, китоб маҳсулотлари чоп этиш ва тарқатиш фаолиятини қўллаб-қувватлаш борасида кенг кўламли ишлар амалга оширилаётганлиги таъкидланди.

 - Фестиваль доирасида  китоб-лар ярмаркалари, тақдимоти, мушоиралар, ўқувчи ёшларнинг ёзувчи-шоирлар билан учрашувлари, китоб тарғиботига бағишланган турли танловлар ва бошқа қатор тадбирлар бўлиб ўтади, - дейди вилоят матбуот ва ахборот бошқармаси бошлиғи Абдуғулом Султонов. - Булардан кўзланган асосий мақсад, ёш авлодни китобга бўлган муҳаббатини ошириш, маънавиятини юксалтиришга кўмаклашишдир.

Китоб савдоси билан шуғулланувчи қатор ташкилотлар ҳамда З. М. Бобур номли вилоят ахборот-кутубхона маркази томонидан ташкил этилган китоблар кўргазмалари кўпчиликда катта қизиқиш уйғотди.

Ёш ижодкорларнинг янги китоб-лари тақдимотида ёш иқтидор соҳибларини қўллаб-қувватлаш борасида мамлакатимизда ибратли ишлар олиб борилаётганлиги, бунинг самараси ўлароқ, биргина жорий йилда республикамизнинг турли   наширётларида ўнга яқин андижонлик ёшларнинг янги китоблари чоп этилганлиги қайд этилди.

- Яқинда "Бувимнинг ўгитлари" номли илк китобим нашрдан чиқди, - дейди ижодкор ёшлардан бири, Андижон давлат университети қошидаги академик лицей ўқувчиси Садоқат Солижонова. - Бу албатта, Президентимиз раҳнамолигида биз ёшларга яратиб берилаётган кенг имкониятлар самарасидир. Бўлиб ўтаётган фестиваль биз ёшларни китобга бўлган меҳримизни янада оширмоқда.

Ўзбекистон Ёзувчилар уюшмаси вилоят бўлими ташаббуси билан ўтказилган ёш ижодкорлар мушоирасида Андижон шаҳридаги Муҳаммад Юсуф номли она тили ва адабиётига ихтисослаштирилган мактаб ўқувчилари ҳамда "Бобур издошлари" ёш ижодкорлар тўгараги аъзоларининг чиқишлари, шунингдек, вилоят қўғирчоқ театрида китоб тарғиботига бағишланган "Китоб - мўъжиза" деб номланган театрлаштирилган томоша ҳам барчада катта таассурот қолдирди.

З. М. Бобур номли вилоят ахборот-кутубхона марказида давлатимиз раҳбари Шавкат Мирзиёевнинг жорий йил 13 сентябрдаги "Китоб маҳсулотларини нашр этиш ва тарқа-тиш тизимини ривожлантириш, қитоб мутолааси ва китобхонлик маданиятини ошириш ҳамда тарғиб қилиш бўйича комплекс чора-тадбирлар дастури тўғрисида"ги қароридан келиб чиқадиган вазифаларга бағишлаган семинар ҳамда таниқли ижодкорларнинг ёшлар билан учрашуви бўлиб ўтди. Қизиқарли савол-жавоблар тарзида ўтган тадбирларда юқоридаги қарорнинг мазмун-моҳияти, китобнинг инсон ҳаёти ва жамият тараққиётидаги ўрни, роли ва аҳамияти ҳақида иштирокчиларга, хусусан, ёшларга кенг тушунчалар берилди. Фаол иштирок этган ўқувчиларга андижонлик адибларнинг китоблари совға қилинди.

Катта тантана билан ўтган "Болалар китоби" фестивали аҳоли, айниқса, ёшлар ўртасида китобхонлик, мутолаа маданиятини юксалтириш ва кенг тарғиб қилишга хизмат қилди.

Тадбирда вилоят ҳокимининг ўринбосари С.Исмоилов иштирок этди.

Фахриддин ИБАЙДУЛЛАЕВ

Суратда: китоб фестивали тадбирларидан лавҳа.

(39-сон)

Андижон шаҳар маиший хизмат касб-ҳунар коллежида "Ёшлар ташкилоти етакчилари фаолияти самарадорлигини ошириш - муҳим масала" мавзусида семинар бўлиб ўтди.

Коллеж маъмурияти ҳамда вилоят ўрта-махсус, касб-ҳунар таълими бошқармаси ҳамкорлигида Ўзбекистон Республикаси Президентининг жорий йил 5 июлдаги "Ёшларга оид давлат сиёсати самарадорлингини ошириш ва Ўзбекистон ёшлар иттифоқи фаолиятини қўллаб-қувватлаш тўғрисида"ги фармони ижросини таъминлаш, ёшлар ташкилоти етакчиларига кўмаклашиш мақсадида ташкил этилган тадбирда Ўзбекистон Ёшлар иттифоқи Андижон шаҳар кенгаши мутахассислари, коллеждаги гуруҳлар етакчилари, фаол ўқувчилар иштирок этиб, мазкур йўналишдаги ишларни янада юқори бос-қичга кўтариш юзасидан ўзаро фикр алмашдилар.

Тадбирда сўз олган коллеж директорининг маънавий-маърифий ишлар бўйича ўринбосари Баҳромжон Аҳмаджонов, коллеж ёшлар ташкилоти етакчиси Гулноза Сиддиқова ва бошқалар юқоридаги фармоннинг мазмун-моҳияти, гуруҳлар етакчиларининг вазифалари, ёшларнинг ижтимоий  фаоллигини оширишга қаратилган тарғибот тадбирларини самарали ташкил этиш ҳақида кенг маълумотлар бердилар.

Мавзу доирасида маърузалар ўқилиб, гуруҳлар етакчиларига зарур тавсия ва маслаҳатлар берилди. Иштирокчилар ўзларини қизиқтирган барча саволларга батафсил жавоб олдилар.

Тадбир етакчи ёшларнинг мавзуга оид билим, тушунча ва тажрибаларини бойитишга хизмат қилди.

Зулхумор АКБАРОВА

(39-сон)

Тадбиркорлар ва ишбилармонлар ҳаракати - Ўзбекистон Либерал-демократик партияси вилоят кенгаши томонидан "Халқ билан мулоқот ва инсон манфаатлари йили" Давлат дастури ижроси доирасида кенг кўламли ишлар амалга оширилмоқда. Жумладан, партия фаоллари, партиядан сайланган депутатлар жойларда ташкил этилган секторлар ишчи гуруҳлари билан  ҳамкорликда аҳоли вакиллари билан мулоқотлар ўтказмоқда, мавжуд муаммолар аниқланиб, улар имкон қадар ижобий ҳал этилмоқда.

Партиямиз, айниқса, хотин-қизларнинг   ижтимоий-сиёсий фаоллигини, маънавиятини юксалтириш, оила ва маҳалладаги маънавий муҳит барқарорлигини таъминлашдаги ролини ошириш, турли соҳаларда амалга оширилаётган ислоҳотлар жараёнида аёлларимизнинг иштирокини кучайтириш, уларни қийнаётган муаммоларни ҳал этиш, опа-сингилларимизни касаначилик, чорвачилик, ҳунармандликка жалб қилиш орқали бандлигини таъминлаш масалаларига ҳам алоҳида эътибор қаратмоқда.

Бўз туманида ўтказилган мулоқотлар давомида ҳам кўплаб муаммолар жойида ҳал этилди. Туманнинг Пиллакор маҳалласида истиқомат қилувчи  Марҳабо Райимбердиевага партиямиз фаоллари томонидан кўрсатилган амалий ёрдам ана шу йўналишдаги ишларга ёрқин бир мисолдир.  

Фуқаро Марҳабо Райимбердиева 1-гуруҳ ногирони. Ота-онаси оламдан ўтган, ҳозирда у опасининг қарамоғида яшайди. Имконияти чекланганлигига қарамай чеварлик ҳунарини пухта ўрганган. Шу боис у тикув машинаси олиб, ўзи яшаётган хонадонда чеварлик билан шуғулланиш, оиласига қўшимча даромад келтириш истагини айтиб, бу борада ёрдам берилишини сўраб мурожаат қилган.

O'zLiDeP вилоят  Кенгаши раиси, халқ депутатлари вилоят кенгаши депутати Тоҳиржон Толипов ташаббуси билан Марҳабо Райимбердиевага энг сўнгги русумдаги тикув машинаси олиб берилди.

- Кўрсатилган эътибордан ярим кўнглим тоғдек кўтарилди, - дейди М. Райимбердиева. - Партиянинг кўмаги туфайли ҳунарим орқали  оиламга  даромад келтириш имконига эга бўлганлигимдан беҳад хурсандман. Мана шундай хайрли ишларнинг бошида турган Президентимизга, менга кўмак кўрсатган барча инсонларга чексиз миннатдорчилик билдираман.

     Партиямиз томонидан амалга оширилаётган бу каби хайрли ишлар кўлами тобора ортиб бормоқда.

Умидахон ИСАЕВА,

O'zLiDeP вилоят кенгаши Аёлларнинг сиёсий фаоллигини, жамиятдаги ўрни ва мавқеини ошириш бўлими мудири.

(39-сон)

Ватан-остонамдаги муқаддас тупроқ,

Босган изларим сен, қиблагоҳим сен.

Сенла менга афсуслар бегона мутлоқ,

Ўтмиши қадим ва ҳур диёрим сен!

Пойингга тиз чўккан не-не буюклар,

Бағрида кимларни асраган жонсан.

Ўзлигинг унутма, ўтса ҳам асрлар,

Озодлик шамоли эсган ҳур маскан.

Борлигинг қўшмоқда умримга умр,

Яхши-ёмон кунда менга қалқонсан.

Бергансан гўдаклик онимдан меҳр,

Узолмасман қарзим, кечсам ҳам жондан.

Ватан-юрагимдан тошиб чиққан шеър,

Ватан-киндигимдан тўкилган қоним.

Майли, душманларинг нима деса дер,

Келажаги порлоқ, буюксан, юртим!

Гулруҳ ЖАББОРОВА, Избоскан тумани.