Оллоҳ бандаларига берган неъматларнинг ичида энг қадрли ва азизларидан бири бу - фарзанд неъматидир. Биз бандалар Роббимиз инъом этган неъматларга шукур қилмоғимиз ва уларни қадрламоғимиз даркор. Жумладан фарзанд неъматини ҳам.

Ўзбек халқи фарзанд неъматининг шукронаси ўлароқ, ҳалққа ош беради ва бу тадбирни ақиқа, суннат тўйи деб атайди.

Халқимизда: "Оллоҳ насиб қилса, фарзандли бўлишдан осони йўқ. Насиб қилмаса бозори йўқ" деган ҳикматли гап бор. Яъни Яратганнинг ўзи насиб этмаса, миллионлаб пул  сарфласангиз ҳам фарзандли бўлолмайсиз.

Бир дўстим бор. Уйланганига бир неча йил бўлди, ана шу йиллар давомида фарзандли бўлмади. У кўп шифокорларга мурожаат қилди, Аллоҳдан фарзанд беришини сўраб, дуодан тўхтамади. Яратганнинг изни ила муолажалар ёрдам бериб, ниҳоят у фарзандли бўлди. Шу ўринда бир мулоҳаза қилиб кўрайлик, дўстимнинг оиласига муолажа таъсир қилиб, натижа ижобий бўлибди, бироқ беҳисоб пуллар сарфласалар-да, фарзандли бўлолмай юрган қанча-қанча оилалар бор.

Азизлар, шундай экан, Аллоҳнинг ризқ-насибага, бераётган неъматларига, айниқса, фарзанд неъмати учун шукр қилайлик. Қўлимиздан келганича одамларга яхшилик қилишга, фарзандларимизга чиройли тарбия беришга ҳаракат қилайлик.

Унутмайлик, бизга қўша-қўша фарзанд берган Аллоҳ яна қайтариб олишга ҳам қодир зотдир. Қилаётган амалларимизда, тўю тантаналаримизда исрофгарчиликка йўл қўймайлик, Аллоҳ қайтарган ишларни бажаришдан уялайлик. Агар шу сабаб улфат-у, қариндошларимиз биз билан алоқани  узадиган бўлсалар, майли улар билан алоқани узайлик. Чунки исломда "Холиққа маъсият бўладиган ишда маҳлуққа бўйинсунилмайди", деган қоида бор. Яъни кимдир бизга "фалон ишни қил", дея кўрсатма берса, дарров шу ишни қилишга киришмасдан, аввал тафаккур қилайлик, бу иш шарият доирасидами ёки унга хилофми? Чунки Аллоҳ бизга ақл, тафаккур неъматни ҳам берган.

Шундай экан, бизга берилган барча неъматларнинг қадрига етиб, уларнинг шукронасини адо этайлик. Зеро, Аллоҳ таоло Қуръони каримда шундай марҳамат қилади: "Қасамки, агар шукр қилсангиз, албатта, сизга зиёда қилурман..." (Иброҳим сураси, 7-оят).

Зоҳиджон ХУРБОЕВ,

Андижон шаҳридаги Саййид Муҳйиддин махдум ўрта махсус ислом билим юрти талабаси.

Бутун халқимиз учун синов даври бўлган бугунги кунда ахил ва ҳамжихат бўлиб, коронавирус инфекцияси тарқалишининг олдини олиш, вирус балоси талофатларини камайтириш, синовли кунлардан эсон-омон ўтиб олишга ҳаракат қилишимиз муҳимдир.

Ҳар қандай яхши-ёмон иш, инсоният бошига ёғиладиган балолар яратганнинг амри билан юз беради. Бундан қочиб-қутилиб бўлмайди. Шундай бўлса-да, қатор ояту ҳадисларда Аллоҳ таолонинг ўзини асраган бандаларини асрашга ваъдаси бор.

Оиша розияллоҳу анҳо онамиздан шундай ривоят келтирилади: "Мен Росулуллоҳ соллоллоҳу алайҳи васалламдан тоъун (вабони энг юқори чўққига чиққан вақти) хақида сўрадим. Шунда Росулуллоҳ соллоллоҳу алайҳи васаллам у Аллоҳ таолони бандаларига олдин юборган азоби бўлиб, хоҳлаган бандасига юборар эди, лекин мўмин мусулмон бандаларига Аллоҳнинг раҳматидур кимки вабо тарқалган вақтда ўз шаҳрида ёки ўз уйида сабр қилиб, савоб умид қилган ҳолда ва унга Аллоҳ таоло ёзган нарсадан  бошқа нарса етмаслигига ишонган ҳолда ўтирса, унга шаҳиднинг ажри баробарида савоб берилади дедилар"(Имом Бухорий ривояти).

Ушбу ҳадиси шарифдан маълум бўладики, вабо хасталигига ўхшаш турли касалликлар тарқалган вақтда ўша юрт фуқароларига касалликдан ўзларини эҳтиёт қилишлик, асрашлик учун зарур  чоралар кўришлари, энг асосийси, ўз шаҳри ва ўз уйларида қолишликлари ҳамда у бандага тақдирда Аллоҳ таоло ёзган нарсадан бошқа нарса етмаслигига эътиқод ила ишониш кераклиги айтилади.  Агар мана шу амални адо этиб, яъни ҳар бир банда ўз шаҳрида, ўз уйида сабр билан ўтириб, савоб умидида бўлса, ўша киши шаҳидларга бериладиган ажрга эга бўлишлиги зикр этилади.

Шундай экан, ҳар биримиз ҳозирги синов кунларида хукуматимиз томонидан жорий этилган қоидаларга, карантин тартибларига риоя этишимиз, уйдан чиқмасликка ҳаракат қилишлигимиз зарур. Агар зарурат юзасидан уйдан чиқсак ҳам албатта, ҳимоя ниқобларини тақиб юришлигимиз лозим.

Коронавирус инсониятнинг касалликни чеклаш бўйича имкониятлари чекланганлигини, умуман, Яратганнинг турли офату балолари олдида ожиз эканлигини эслатиб қўйди. Шундай экан, бу кунлар биз учун жиддий имтиҳон эканлигини англаб, ҳамжиҳат бўлиб иш тутайлик, сабрли бўлайлик. Тавба қилиб, Аллоҳ таолодан ушбу балони тезроқ даф этишини сўраб дуо қилайлик.

Абдуҳалил ҲАМРАҚУЛОВ,

Андижон шаҳридаги  "Ат-Термизий" жоме масжиди имоми.

Кечинма

Анча бўлди, онамни кўрганим йўқ. Унинг иссиқ бағрига бош қўйиб ҳароратли меҳрини туймаганимга ҳам деярли бир ой бўляпти. Авваллари, онамни соғинсам, шартта уйдан чиқиб, болаларимни олмай ҳам ўзим кетаверардим. Ҳозир эса...

Ҳеч нарса бўлмайди, бир зумгина дийдорига тўйиб келаман дейману, шайтонга хай бераман.

Мана неча ойдирки, бутун дунё янги юқумли касаллик исканжасида. Олимлар унга тождор вирус деб ном ҳам қўйиб қўйишган. Қиш чилласида бошланган бу бало бутун ер юзини эгаллаб улгурди. Нима ҳам қила олардик, Оллоҳдан беизн бандага тикон ҳам кирмас. Демак, бунда ҳам бир ҳикмат бор. Демак, биз бандалар шунга муносибмиз.

Ахир бандаси эмасми, муштипар онаю отасини қариялар уйига обориб жойлаган?

Биз инсон боласи эмасми, юрагида бир ҳайвончалик раҳму шафқат уйғонмай, боласини ўрмонга ташлаган, сувга отган?

Ахир биз эмасми, табиатнинг жонини суғуриб, унинг бойликларини ўмарган, ўзини ҳалокат ёқасига олиб келган?

Ўз қизини, ўз синглисини хўрлаб,фаҳш ботқоғига ботган ҳам - биз.

Ўз миллатдоши, қўшнисини пул учун мусофирликда сотган ҳам - биз.

Жойнамозга бош қўймасдан, бўкиб ичиб, думалаб ётган ҳам биз.

Арзимаган дунёвий жанжал сабаб ўз жигарига пичоқ кўтарган ҳам биз.

Балким, бугун барча гуноҳларимиз учун шу фоний дунёдаёқ шу тариқа товон тўлаётгандирмиз.

Билмадим. Бироқ, билганим шуки, шу митти, кўзга кўринмас вирус кўзларимизни мошдек очиб қўйди.

Неча йиллаб йўқламаган ёри биродарларимиз ёдимизга тушди, бир-биримизга саломатлик, эзгулик тилаб йўқлашни бошладик. Топган бойлигимиз Яратганнинг иродаси олдида бир чақа эканлигини ҳис қила бошладик. Хайр-саховат ёдимизга тушди.

Фарзандлар тарбиясию, улар олдидаги масъулиятларимиз унут бўлганди. Тирикчилик, рўзғор ташвиши билан банд эдик гўё.

Балким, Поки парвардигор, меҳрсиз, эътиборсиз ўсаётган гўдакларга раҳм қилгандир. Унинг қудратини қарангки, ҳозир ҳаммамиз болаларимизни қанотимиз остига олиб ўтирибмиз.

Ўзим-чи?! Авваллари, дам олиш кунларини орзиқиб кутардим. Энди эса, ишлаб юрган кунларимнинг қадрига етаяпман.

Ишхонамда ўрик дарахти кўп. Бу йил ўрикларнинг қийғос гуллаганини кўролмадим.

Наҳот баҳорни шу тўрт девор ичида кузатиб, лолақизғалдоқлар гуллаган дамларни ўтказиб юборсак...

Инсон ҳамма нарсага кўникади, дейишади. Айниқса аёлларни Оллоҳим осон мослашувчан, барча шароитга кўнувчан қилиб яратган. Уйдан чиқмаганимга икки хафта бўлди, зерикканим йўқ. Болаларим уйга анча мослашиб қолишди. Куннинг биринчи ярмида дарс қилиб, компьютер ўйнашса, иккинчи ярмида телевизор кўришади. Менга уй ишларида ёрдам беришади. Баъзан ўтириб бирга шахмат-шашка ўйнаймиз. 

Аммо, сокин ва ҳамжиҳат оилавий ҳаётимда биргина кемтик бор. Онамни жуда соғиндим. У ўртанча акам билан ота ҳовлимда яшайди. Ҳар шанба йўлимга кўз тутишини ҳам яхши биламан. Агар банд бўлиб телефон қилолмасам, ҳол-аҳвол сўраб йўқлагувчим, касал бўлиб қолсам шифокорим, ҳали ҳам шеърларимнинг илк ўқувчиси, хушхабарларни илк етказувчи хабарчим, ака-опаларим билан боғлаб турувчи мустаҳкам риштам, ҳеч кимга айтолмаган сирларимни бўлишгувчи сирдошим, йиллар силсиласида синалиб, менинг ҳаётимда қолган ягона дўстим - Онам ёнимда эмас.

Ҳа, мен онамни кўргани бормаяпман. Ва карантин тугаб, бу бало даф бўлмагунча, бормоқчи ҳам эмасман. Чунки, унинг ёши 80 дан ошган. Бу қуриб кетгур вирус ёши улуғларни ёмон кўраркан. Олишгани ҳам шу кексалар, ёпишгани ҳам шу кексалар. Олисдаги акам ҳар телефон қилганида онамни эҳтиёт қилишимизни, уйдан чиқармаслигимизни бот-бот таъкидлайди. Касбим тақозоси сабаб турфа одамлар билан мулоқотда бўлдим. Шунинг учун соғинсам-да, онамнинг хавфсизлигини ўйлаб у кишини кўргани бормаяпман. Оёқларим қишлоғимга қараб тортқилайди. Юрагим дийдорсари талпинади. Гарчи доим телефонда хабарлашиб турсакда, унинг нуроний юзига боққим, ажин қоплаган иссиқ юзларини силагим, қўлларидан ўпгим келади. Ўзим туғилиб ўсган ҳовлида, отам эккан ўрикнинг тагидаги сўрида бирга чой ичиб суҳбатлашишни қўмсайман. Бироқ...

Ўша кун албатта келади, мен бунга ишонаман.

Карантин тугаши билан биринчи қиладиган ишим қишлоққа, онамнинг ёнига чопиб бориш бўлади. Ва мен унга эриш туюлиб, шу пайтгача айтолмаган гапим -  яхши кўришимни айтаман.

Онажон, мен сиз учун уйда қолдим, сиз мен учун ўзингизни асранг! Сизнинг хавфсизлигингиз, соғлигингиз мен учун соғинчимдан ҳам ортиқроқ. Сизни яхши кўраман!

Муаззам СОБИРЖОН қизи

ФИКР

Коронавирус пандемияси туфайли эълон қилинган карантин шароитида умумтаълим мактаблари ўқувчилари учун онлайн дарслар ташкил этилганлиги мамлакатимизда ёшлар келажагига, уларнинг камолотига кўрсатилаётган эътиборнинг ёрқин бир намунасидир.

Узайтирилган таътил кунларида ўқувчилар билим олишининг узлуксизлигини таъминлаш мақсадида телевидение орқали олиб борилаётган онлайн дарс машғулотларида мактабимиз ўқувчилари жуда фаол иштирок этмоқда. Ўқувчиларимиз ҳар бир дарсдан кейин ўтилган машғулот ҳамда уйга берилган вазифалар бўйича топшириқларни бажариб, телеграмм каналимизга жойлаб бормоқда. Хусусан, мен математика фани ўқитувчиси сифатида ҳар бир ўқувчининг каналимизга жойлаган уй вазифасини бирма-бир кўриб, текшириб  чиқяпман. Уларнинг хато ва камчиликлари бўйича ҳар бир ўқувчининг ўзига тушунтиришлар беряпман.

Очиғини айтганда, онлайн дарслар бу қадар оммалашиб кетишига, ўқувчиларнинг бу қадар фаол иштирок этишларига ишонмагандим. Ёшларимизнинг бу қадар фаоллиги биз педагогларни онлайн дарсларга, масофавий таълим беришга янада масъулият билан ёндашишга ундамоқда.

Муҳтарам Президентимиз халқимизга мурожаатида ўқувчи ва талаба ёшларга карата: "Азиз фарзандларим, уйда вақтингизни бекор ўтказманг! Онлайн дарсларни қунт билан ўзлаштиринг. Китоб ўқинг, билимингизни оширинг, бадантарбия ва жисмоний машқларни бир кун ҳам қолдирманг." - дея айтган сўзлари биз - педагоглар зиммасига янада катта масъулият юклайди.

Демак, биз онлайн дарсларда фаол иштирок этмаётган айрим ўқувчиларни ҳам дарсларга жалб этишга, уларнинг қизиқишини оширишга, ота-оналари билан мулоқот ўрнатиб, уларнинг бўш вақтларини мазмунли ўтказишларига ёрдам беришимиз лозим.  Асосий мақсадимиз, бугунги синовли кунларда фарзандларимизнинг билим олишдан, юксалишдан тўхтаб қолмаслигини таъминлашдан, бу борада Президентимизни қўллаб-қувватлашдан иборат бўлиши зарур.

Шу ўринда барча ўқувчилар, уларнинг ота-оналарига мурожаат қилмоқчиман. Бу каби саъй-ҳаракатларга бепарво бўлиш, фарзандингизнинг билим олишига эътиборсиз бўлиш ярамайди. Уларнинг онлайн дарсларни кузатиб бориши, уйда фойдали ишлар билан банд бўлиши, китоб ўқиши, шахсий гигена қоидаларига амал қилиши, бемақсад кўча-кўйга чиқмаслиги учун зарур чораларни кўришингиз, керак бўлса, фарзандингиз билан бирга ана шу машғулотларни бажаришингиз мақсадга мувофиқ бўлади.

Ишонаманки, бутун халқимиз ҳамжихат бўлиб, бугунги синовли кунлардан эсон-омон ўтиб оламиз. Биз карантин ҳамда инфекция тарқалишининг олдини олиш бўйича белгиланган тартибларга амал қилиш, фарзандларимиз таълим-тарбияси билан шуғулланиш орқали ушбу офатни даф этишга ўз ҳиссамизни қўшамиз.

М. ТЎЙЧИЕВА,

Қўрғонтепа туманидаги  49-умумтаълим мактаби ўқитувчиси.

Мулоҳаза

Бутун дунёга тарқалган коронавирус балоси Ўзбекистонни ҳам четлаб ўтмади. Бугун халқимиз мураккаб синовни бошидан кечирмоқда.

Ушбу фалокатдан қутилиш учун, карантин қоидаларига тўлиқ риоя қилиш, сабр - бардошли, интизомли бўлмоқ шарт. Буни чуқур англаган ҳолда биз ёши улуғ бобо, бувижонлар оилага, фарзанд, невараларга янаям яқин бўлишимиз, уларга ҳаёт сабоқларини беришимиз учун фурсатдир.

Мана шундай бир даврда  китоб ўқиш, уйда спорт билан шуғулланиш, пазандалик, уйни саранжом - саришта қилиш, бичиш - тикишга ўргатиш каби ишларни қизларимизга, ўғил болаларимизни бирон бир ҳунарга йўналтирсак, ҳовлидаги экин-тикин ишларини ўргатсак, мақсадга мувофиқ бўлади.

Китоб ўқиш - фарзандларимизда дунёқарашни, фикрлаш қобилиятини ривожлантиради. Бу бор, ҳақиқат. Китобхон юртни - асло енгиб бўлмайди. Болаларимизда ушбу фазилатларни намоён қилишларида ота - оналар, айниқса, бувижон ва бобожонларнинг ўрни беқиёсдир.

Оғир синов кунларида биз катталар аввало, ўзимиз улар учун ибрат бўлмоғимиз керак. Зеро, намуна - бу энг яхши тарбиядир! Болажонларимизни соғлом турмуш тарзига эътибор бериб, гимнастика машқлар билан узлуксиз шуғуллантириш ва уларни доимий назорат қилиш биз катталар зиммасидаги вазифа.

Президентимизнинг халқимизга қилган мурожаатини таълим фахрийси, она, аёл сифатида ҳаяжон билан тингладим,  қалбим жунбушга келди. Давлатимиз раҳбарининг: "Азиз фарзандларим, уйда вақтингизни бекор ўтказманг! Онлайн дарсларини қунт билан ўзлаштиринг. Китоб ўқинг, билимингизни оширинг, бадантарбия ва жисмоний машқларни бир кун ҳам қолдирманг" деган гаплари ортида юрт эртаси ҳақида қайғуриш бор, ҳар бир инсон, айниқса, ҳар бир ўғил-қиз учун ғамхўрлик ҳисси бор.

Азал-азалдан ёши улуғлар миллатни сақлаб қолиш, қадриятларимизни авайлаб-асраш, тарбиянинг нозик томонларини фарзандларимизга сингдиришда катта аҳамият беришган. Баъзида боламизга ножўя ҳаракатлари учун ҳадеб танбеҳ бераверсак, у безиб қолади. Тўғрида у болада, эркалиги, инжиқлиги бор. "Болага мен сени жуда яхши кўраман, фақат нуқсонингни ёмон кўраман" деган гапларини айтсак ва шунга монанд фарзандларимиз тарбияси учун жон куйдирсак, бундан албатта ютамиз.

Бугунги қийинчиликлар, синов вақтинчалик эканини каттаю-кичик бирдек англаб, бардошли бўлайлик. Бу синовли кунлар албатта, ортда қолади, барчамиз ҳамжиҳатлик билан ҳаракат қилсак, уйимиздан чиқмасак вирус балосидан тезроқ қутуламиз.

Тўтихон ИСМОИЛОВА

Шаҳрихон тумани.

Муштарий ижодидан

     Беморларнинг ярим жонисиз,

Совинчи-ю, гоҳо ғамисиз,

Қийналса гар оғрир жонингиз,

Сиз - кўнгли пок нажоткорларсиз!

Юракларни бутун қилган ҳам,

Ожизларга малҳам бўлган ҳам,

Ҳатто, жонин фидо қилган ҳам,

Сиз - оқ кўнгилли шифокорларсиз!

Ширин сўз-ла шифолар берган,

"Байрам" деган кунни билмаган,

Хизматларин  миннат қилмаган,

Сиз - тоза кўнгил шифокорларсиз!

Айни дамда тиним билмаган,

Қамишлардан белни боғлаган,

Фақат элни, юртни уйлаган,

Сиз - жон фидо шифокорларсиз!

Ниятим: шифо топсин беморингиз,

Асло дард кўрмасин қўлларингиз,

Роҳатларга етказсин меҳнатингиз,

Сиз -  нияти пок шифокорларсиз!

Мадина МАМАЖОНОВА,

вилоят касбий таълимни ривожлантириш ва мувофиклаштириш бошқармаси ходимаси.

Касбининг фидойилари

Республика шошилинч тиббий ёрдам илмий маркази Андижон вилояти филиали Тез тиббий ёрдам бўлимига (103 хизмати) шу кунларда Андижон шаҳрининг ўзидан 700 тагача, бошқа ҳудудларни ҳисобга олганда 4 мингга яқин чақирув келиб тушмоқда.

Коронавирус пандемияси туфайли жорий этилган карантин шароитида фаолият олиб бораётган тиббиёт ходимлари, айниқса, тез тиббий ёрдам хизмати шифокорлари меҳнатини алоҳида эътироф этиш ўринлидир.

-      Бўлимда колл-марказ ташкил этилган бўлиб, 10 нафар диспетчер доимий равишда қўнғироқларни қабул қилмоқда, - дейди катта врач Зулҳумор Усупова. - Биз тезкор тиббий ёрдамга муҳтожларнинг хонадонларига бориб, биринчи муолажани кўрсатамиз. Коронавирус билан боғлиқ холатлар бундан мустасно. Белгилапнган тартибга кўра, инфекция юқтириб олганлик гумони билан қўнғироқ қилган фуқаролар яшаш ҳудудидаги поликлиникага мурожаат қилишлари лозим.  

Олти юздан ортиқ ходимдан бир суткада 150 нафари        навбатчилик қилмоқда. Навбатчиликни ўтаётган шифокор ва ходимлар учун уч маҳал иссиқ овқат тайёрлаб берилмоқда. Бунинг учун зарур озиқ-овқат заҳираси  яратилган.

Бўлим шифокорлари, ҳамшира ва ҳайдовчилар карантин ҳамда коронавирус тарқалишининг олдини олиш бўйича белгиланган талабларига тўла риоя этган ҳолда фаолият олиб бормоқда. Бундан ташқари, врач-психиатрдан иборат иккита алоҳида бригада ҳам доимий иш юритмоқда, 36 та тез тиббий ёрдам машинаси куну тун ишламоқда.

Шифокорлари комбинезон, кўзойнак, қўлқоп ва ҳимоя ниқоблари билан таъминлаган. Бўлим хоналари ва ҳудуди ҳар икки соатда дезинфекция қилиниши йўлга қўйилган. Чақирувдан келган бригада алоҳида дезинфекция қилинади, махсус воситалар ёрдамида иситмалари ўлчанади. Улар кийиб борган комбинезонлар эса ёқиб юборилмоқда. Чақирувдан    қайтган транспорт воситаси ҳам дезинфекция қилиниб, ювилмоқда, ундан 3 соат мобайнида фойдаланилмайди.

-      Уй шароитида карантинга олинган беморлардан ҳам чақирувлар келиб тушмоқда, - дейди бўлим бошлиғининг ўринбосари Fайратбек Қамбаров. - Афсуски, улар хасталикни яшириб, қон босими ортганини, қорни оғриётганини рўкач қилиб кўрсатмоқдалар. Бригада манзилга етиб бориб, хонадонга кирганидагина асл сабаб ойдинлашмоқда. Бу эса шифокорларимиз ҳаётини хавф остига қўяди. Шу боис, бўлим шифокорлари орасида карантинга олинганлар бор. Шу ўринда фуқароларимизга яна бир бор эслатиб ўтмоқчиман: агар сизда коронавирус инфекциясига гумон туғилганда ўзингиз истиқомат қилаётган поликлиникага мурожаат қилишингиз керак.

Бўлим ходимлари карантин шароитида кучайтирилган тартибда фидойилик билан меҳнат қилмоқда.   

Фахриддин ИБАЙДУЛЛАЕВ   

Кўнгил битиклари

Хавфли вирус тарқалиши муносабати билан бир неча кундан буён уйда, оилам бағридаман.

Кеч келиб, эрта кетиб, иш билан машғул бўлганим туфайли, мени ҳар куни ишга кузатиб, ишдан қайтишимда меҳр билан қарши оладиган онам билан энди кўпроқ биргаман. Бир нарса менинг эътиборимни тортди: онам бир зум тиниб-тинчимас экан. Доим қандайдир юмуш билан банд, рўзғор икир-чикирлари: овқат тайёрлаш, кир чайиш, хонадон орасталигини таъминлаш, ҳовлининг бўш ерларига экилган гулу райҳонларни парваришлаш... Онам бу ишларни елиб-югуриб бажаради. Унинг бирор марта "уҳ" тортиб, "чарчадим", "ҳой, қарашворинглар" деган сўзларини эшитмабмиз.

Кўча юмушларидан бўшаб, уйда, онамнинг қошида бўлиш, фақат оқшом маҳали, эрталабки нонушта пайтида бир дастурхон атрофидагина йиғиладиган оила аъзолари - отам, опам, акам ва мен бир-биримиз билан бевосита ишларимиз, ўқишдаги ташвишлар, муаммо ва ютуқларимиз ҳақида суҳбатлашиб ўтиришга, онамнинг насиҳатлари, ибратомуз ҳикматларини тинглашга вақт етарли эди. Шунинг орасида онамнинг доим  куюниб юришлари, уй ишларидан бир зум тўхтамаётганини кузатиб оналаримиз нақадар фидойи эканликларини янада чуқурроқ ҳис этдим. Кўп вақти  ишда бўладиган опам ҳам энди онамнинг юмушларига қарашар, биз ота-болалар  ҳовлидаги ишлар - кўчатларни  суғориш, атрофда  таъмирланиши  лозим  бўлган  майда-чуйда  ишларни  бажаряпмиз. Бўш қолсак, китоб мутолаа қиляпмиз.

Яна бир жиҳат: уйда отамнинг мавқеи баланд, унинг ҳар бир қарорини ҳаммамиз, айниқса, онам ҳурмат қилади. Гарчи отам қайсидир фикрда янглишса, онам унга қарши  ҳеч қачон муносабат билдирмас, аксинча, тўғри маслаҳат берар, отамнинг қарорини  тўғрилар, анчайин  кескин  гапларига  юмшоқлик  билан  жавоб  берар, вазиятга  ойдинлик  киритар  эди. Шунинг  учун  ҳам  оиламизга  уриш,  жанжал ёт. Отам гапираётганида онам унинг кўзларига тик боқмас, "хўп", "майли", "шундоқ  қиламиз", "тўғри  айтасиз" сўзлари билан муносабат билдириб турарди. Отам ҳам, онам  ҳам айни дамда қутлуғ ёшдалар. Сочларига эндигина оқ оралай бошлагани, юзларида  ёшига муносиб ажинлар чизиқ торта бошлагани ҳам улар бир-бирларини ардоқлаб яшаганликларининг бир белгиси эмасмикин?!

Биз фарзандлар кўз ўнгида бир-бирини ҳамиша ҳурмат қилиши, айниқса, онамнинг сабр-тоқатли, тадбирли аёл  эканлиги, баъзан тажанг, қайсарлигимиз тутганида,  хушфеъллик билан иш тутиши, номаъқул гап-сўзларимиз учун дарров жазолашга ўтмаганининг ўзи бир мактаб. Гарчи оддий уй бекаси бўлса-да, оила ҳамжиҳатлигини, хотиржамлигини  таъминлашда онамнинг ўрни ниҳоятда катта. Кўча юмуши, хизматда ўзига хос муаммолар чиқиб туриши табиий. Баъзан кўчадаги гап-сўз, ишхонадаги муаммоларни, дард-ҳасратларимизни уйга келиб, ота-онамизга тўкамиз. Бизни эшитиб, онам маслаҳат, йўл-йўриқ кўрсатади. Ана шу  маслаҳатлар ҳаётда доимо менга ёрдам беради.

Онажонимнинг фарзандларини ҳаётда ўз ўрнини топиши, тинч яшаши, бахтли оила қуришини юрак-юракдан истаётгани унинг юз-кўзидан, гапларидан сезилади. Онамнинг уммонданда улкан меҳрини ҳис этиб, беихтиёр: "Орзунгизни амалга оширишга ваъда берамиз, чунки биз - сизнинг фарзандларингизмиз, онажон!" деган ўйларни дилимдан ўтказаман.

Бугун  уйда  қолганим, онажоним ўй-ташвишларини чуқурроқ англашимга, онамга   янада яқин бўлишимга  ёрдам  берди.

 Асадбек  ТУРСУНОВ,

Қўрғонтепа  тумани.

Маҳаллалар ҳаётидан

Бугунги оғир синовли кунларни бирдамлик билан енгиб келаётган халқимиз, хусусан, андижонликлар бир-бирига бўлган меҳр-оқибатни, якдилликни яна бир карра намоён этмоқда. Дунёни ларзага солган тожсимон вирус касаллиги туфайли жорий этилган карантинни маҳалламиз аҳли ваҳимасиз, уй ишлари билан ўз хонадонларида ўтказмоқда.  Албатта, айни кундаги вазият барчадан, айниқса, маҳалла етакчиларидан янада масъулиятли бўлишни талаб этмоқда.

Марҳамат туманидаги Гар-гар маҳалла фуқаролар йиғини раиси сифатида зиммамга юклатилган вазифаларни бекаму кўст адо этишга ҳаракат қиляпман.  Бугун тўй-хашамлар, байрам, тантаналар тўхтатилган. Бироқ вафот этган маҳалладошларимизни сўнгги манзилга кузатиш, ногирон, бева-бечоралар, кам таъминланган, ёрдамга муҳтож оилалар ҳолидан хабар олиб, уларга  имкон қадар кўмак бериб келяпмиз.

Ҳозирда дунё бўйлаб    тарқаган тожсимон вирус касаллигига чалинганлар ёки карантинга олинганлар Аллоҳга шукурлар бўлсинки, бизнинг маҳалламизда мавжуд эмас. Бу касалликни юқтириб олмасликлари бўйича аҳоли ўртасида керакли тушунчалар бериб борилмоқда. Карантин даврида уйдан чиқмай, яқинларини хавфга қўймай ўтирган маҳалладошларимдан жуда миннатдорман.

Маҳалламизда 4 минг 700 нафарга яқин аҳоли истиқомат қилади. 15 та кам таъминланган оила рўйхатга олинган. Юқорида таъкидлаганимдек, улар доимо эътиборимизда. Айниқса, бугунги карантин шароитида Хомийлик ёрдамларини кўрсатиш маркази орқали улар зарур озиқ-овқат маҳсулотлари билан таъминланмоқда. Бундан ташқари, ҳозирги кунга қадар маҳалладаги 22 та хонадонга бепул ниқоб, қўлқоп,  совун, исириқ ва газ балонлари етказиб берилди.

Вилоятимизнинг барча масканларида бўлгани каби туманимизда, шу билан бир қаторда, маҳалламизда ҳам кенг кўламли дизенфекциялаш ишлари олиб борилмоқда. Маҳалланинг барча кўчалари фермер хўжаликлар томонидан ажратилган тракторлар ёрдамида мунтазам дизенфекция қилиб борилмоқда. Шунингдек, ҳар бир хўжаликда ўз томорқасидан унумли фойдаланиш, зарур экинларни экиш бўйича ҳам тарғибот ишлари олиб борилмоқда. Туман ҳокимлиги, сектор раҳбарлари томонидан помидор, болғар қалампири, карам, бақлажон ва бошқа кўчатлар етказиб бериш ишлари ҳам йўлга қўйилган.

Бугунги карантин шароитида аҳолидан бўлаётган энг катта талаб: уз уйларида қолиши, сабабсиз кўчага чиқмасликлари, карантин қоидаларига амал қилишларидир. Бу борадаги ишларни ташкил этишда маҳалла профилактика нозири Донёрбек Иномовнинг алоҳида ўрни бор. Маҳаллада турли тадбирлар, маросимлар ўтказмаслик юзасидан маҳалла отинойиси Мастурахон Ботирова, хотин-қизлар билан ишлаш комиссияси раиси Гулнорахон Абдуллаева, маҳалла имоми томонидан карантин қоидаларига амал қилинган ҳолда зарур тушунтириш ишлари олиб борилмоқда. 

Ушбу кунларда барчамиз бир бўлмоғимиз, ўзимизни, яқинларимизнинг соғлиги, ҳаёти учун фақат уйда қолишимиз ва барчани шунга чақиришимиз лозим.

Зойиджон МИРЗАЕВ,

Марҳамат туманидаги  Гар-гар МФЙ раиси.

Андижон вилояти Хонобод шаҳрида мамлакатимизда коронавирус инфекцияси тарқалишининг олдини олишга қаратилган кечиктириб бўлмайдиган чора-тадбирларни амалга ошириш ҳамда санитария-эпидемиологик осойишталикни таъминлаш, аҳоли саломатлигини муҳофаза қилиш бўйича зарур ишлар тизимли равишда олиб борилмоқда. Мазкур жараёнда шаҳардаги барча корхона ва ташкилотлар фаол иштирок этмоқда.

Хонобод шаҳар уй-жой коммунал хизмат кўрсатиш бўлими томонидан Фавқулодда вазиятлар бошқармаси шаҳар бўлими, шаҳар санитария-эпидемиология осойишталик маркази бўлими ҳамда хусусий уй-жой мулкдорлари ширкатлари билан ҳамкорликда кўп қаватли уйларни, шунингдек, зинапоялар, лифтлар, уйлар  олдидаги болалар майдончаларини дезинфекция қилиш, коронавирус инфекция тарқалишининг олдини олишга қаратилган кечиктириб бўлмайдиган ишлар амалга оширилмоқда.

- Кўчамиздаги аксарият уйлар мутахассислар томонидан дезинфекция қилинди, - дейди Мустақиллик кўчасидаги кўп қаватли уйларнинг бирида яшовчи фуқаро Иродахон Аҳмедова. - Бизнинг саломатлигимиз, хавфсизлигимиз учун меҳнат қилаётган фидойи инсонлардан чексиз миннатдормиз.

Бўлим ходим ва мутахассислари кўп қаватли уйлар аҳолисига уйдан чиқмаслик, шахсий гигиена, карантин тартиб-қоидаларига қатъий амал қилишлари,  жамоат жойларида ҳимоя ниқобини тақиб юришлари лозимлиги тушунтирмоқда.

Фахриддин ИБАЙДУЛЛАЕВ