ҚИШЛОҚ АЁЛЛАРИНИНГ МУАММОЛАРИ БАРТАРАФ ЭТИЛМОҚДА

Гулнорахон АБДУЛЛАЕВА,

Андижон вилояти ҳокимининг ўринбосари, Оила ва хотин-қизлар бошқармаси бошлиғи.

Мамлакатимизда Халқаро Қишлоқ аёллари куни муносабати билан ўтказилаётган ойлик доирасида Андижон вилоятида опа-сингилларимизни қўллаб-қувватлашга қаратилган кенг кўламли ишлар амалга оширилмоқда.

Айни кунда вилоят аҳолисининг қарийб ярмини хотин-қизлар ташкил этади. Уларнинг аксарияти эса қишлоқ ҳудудларида истиқомат қилади. Маълумки, кейинги йилларда юртимизда амалга оширилаётган ислоҳотлар замирида энг аввало, инсон қадрини улуғлаш, аҳолининг турмуш фаровонлигини юксалтириш, хусусан, хотин-қизларни қўллаб-қувватлашга қаратилган эзгу ишлар ётади. Буни биргина вилоятимизда жорий йилнинг ўтган даврида олиб борилган манзилли ишлар мисолида ҳам кўриш мумкин.

"Аёллар дафтари"га киритилган 63 минг нафар аёлнинг 57 минг 784 нафарига ёрдам кўрсатилиб, уларнинг муаммолари ижобий ҳал этилди. Жумладан, ижтимоий ҳимояга муҳтож, ишсиз 21 минг 737 нафар хотин-қизнинг   бандлиги таъминланди.

Тадбиркорлик қилиш истагидаги 9 минг 453 нафар эҳтиёжманд хотин-қизларнинг 8 минг 215 нафарига тадбиркорлик фаолиятларини йўлга қўйишлари учун Халқ банки, Агробанк ва "Микрокредитбанк" вилоят филиаллари томонидан 58 миллиард 389 миллион сўм миқдорида кредитлар ажратилди. 

Боқувчисини  йўқотган, эҳтиёжманд 13 минг 305 нафар хотин-қизга 12 миллиард 895 миллион сўм миқдорида моддий ёрдам кўрсатилди. Уй-жойини таъмирлашга муҳтож 428 нафар аёлнинг уй-жойи таъмирлаб  берилди. Уй-жойга муҳтож 101 нафар аёл уй-жой билан таъминланди, ижарада яшаётган аёлларнинг 501 нафарига 528 миллион сўм миқдорида ижара компенсацияси тўлаб берилди.

Қишлоқларда ўз томорқасидан унумли фойдаланиши учун ёрдам кўрсатилишини сўраган 388 нафар хотин-қизнинг барчасига ёрдам кўрсатилди. Бунинг учун 756 миллион сўм миқдорида маблағ сарфланди.

Бундан ташқари асосан, қишлоқларда истиқомат қилаётган 5 нафар олий ўқув юртида таҳсил олаётган аёлларга контракт тўловининг бир қисми қоплаб берилди. 48 нафар "Яйлов хўжалигини ривожлантириш" уюшмаси аъзоларига турли ускуналар харид қилиш, 164 нафар хотин-қизга енгил конструкцияли иссиқхона ўрнатиш, суғориш воситалари, уруғлик ва кўчат, 35 нафар хотин-қизга асбоб-ускуна сотиб олиш учун субсидиялар берилди.

Мутахассислиги бўйича камида беш йил меҳнат стажига эга бўлган, лекин олий маълумотга эга бўлмаган 2 минг 580 нафар хотин-қизнинг имтиёз асосда олий таълим муассасаларига ўқишга киришларига кўмаклашиш мақсадида белгиланган мезонлар асосида уларнинг 2 минг 401 нафарига тавсиянома берилди. Тавсиянома олганларнинг аксарияти қишлоқ ҳудудида яшаётган хотин-қизлардир.

Вилоятимизда Халқаро Қишлоқ аёллари куни муносабати билан ўтказилаётан ойлик доирасида юқоридаги йўналишлар бўйича амалга оширилган ишлар кўлами янада кенгайди. Ойликни ўтказиш бўйича вилоят оила ва хотин-қизлар бошқармаси ҳамда қатор ташкилотлар ҳамкорлигида вилоят, туман ва шаҳарлар кесимида чора-тадбирлар режаси ишлаб чиқилди. Унга кўра, вилоятдаги 866 маҳалланинг барчасида опа-сингилларимизни қўллаб-қувватлаш, уларнинг ижтимоий фаоллигини оширишга, муаммоларини бартараф этишга қаратилган маънавий-маърифий, маданий ва спорт тадбирлари, шунингдек, тиббий кўриклар ўтказилмоқда.

Мазкур тадбирларни ўтказишда вилят, туман, шаҳар ва маҳаллаларда ташкил этилган "Оқила аёллар" ҳаракати аъзолари, фуқаролар йиғинларида иш олиб бораётган хотин-қизлар фаоллари, "Бувижонлар мактаби", "қизлар давраси" жамоатчилик кенгашлари аъзолари жонбозлик кўрсатмоқда.

"Менинг қишлоғим", "Менинг онам - қишлоғим файзи", "Кексаларни улуғлаш - муқаддас бурч", "Қишлоғимиз - ёшлар нигоҳида", "Аёлларга айтар сўзим бор...", "Сиз улуғсиз, сиз муқаддассиз муҳтарама аёл!", "Саломатлик учун 5 минг қадам", "Дастурхон атрофида дилдан суҳбат", "Сиз борсиз менинг бахтим бутун, онажон!", "Балли қизлар",  "Фаровон оила келажак пойдевори", "Қадриятларимиз - бебаҳо бойлигимиз" деб номланган маънавий-маърифий, маданий ва спорт тадбирларига кўпни кўрган кекса онахонлар, ўз даврида самарали меҳнат қилиб, юртимиз равнақига муносиб ҳисса қўшган меҳнат фахрийлари, "Аёллар дафтари", "Ёшлар дафтари"га киритилган эҳтиёжманд опа-сингилларимиз қамраб олинмоқда.

Қишлоқларда яшаб, турли соҳаларда самарали меҳнат қилаётган,  фарзандлар тарбияси билан шуғулланаётган опа-сингилларимизни қўллаб-қувватлаш, уларнинг оғирини енгил қилишга кўмаклашиш, ўз ҳаётларидан рози бўлиб яшашларини таъминлаш албатта, зиммамиздаги энг муҳим вазифалардан ҳисобланади. Ана шундан келиб чиқиб, ойлик доирасида қатор туманларда эҳтиёжманд аёлларга субсидия асосида тикув машиналари берилди. Биргина Асака туманида 48 нафар эҳтиёжманд аёл 76 дона тикув машинаси олиб, шу орқали доимий даромад топиш имконига эга бўлди.

Қишлоқларда оила муқаддаслигини, ўзига хос мезон ва қадриятларини улуғлаб, узоқ йиллар давомида оилалар тотувлигини, ёш оилалар мустаҳкамлигини таъминлашга муносиб ҳисса қўшиб, кўпларга ибрат бўлиб келаётган ёши улуғ онахонларга ҳурмат-эҳтиром ва моддий ёрдамлар кўрсатилмоқда.  Масалан, Қўрғонтепа тумани Гулистон маҳалласида яшовчи онахонлар - Арофатхон Жумабоева ҳамда Муяссархон Холматовага моддий ёрдам кўрсатилди.

Ойлик доирасида Избоскан туман оила ва хотин-қизлар бўлими ташаббуси билан хотин-қизларга ҳуқуқий ёрдам кўрсатиш, уларни ҳар томонлама қўллаб-қувватлаш мақсадида ўтказилган сайёр қабул давомида турли масалалар бўйича мурожаат қилган хотин-қизнинг 11 нафарининг муаммоси жойида ижобий ҳал этилди.

Марҳамат туманидаги Ўқчи маҳалла фуқаролар йиғинида кекса онахонлар, уй бекалари иштирокида юқори кўтаринкилик билан ўтказилган стол тенниси, шахмат ва шашка мусобақалари аёлларимизнинг янги-янги қирраларини кашф этди.

Балиқчи туманидаги Сирмоқ, Дўстлик, Чароғон, Гўровон, Сарнавул маҳаллаларида опа-сингилларимиз ўртасида соғлом турмуш тарзи кўникмаларини кенг тарғиб этиш мақсадида ташкил этилган "Соғлом ҳаёт сари 5000 қадам" спорт тадбири аёлларимиз саломатлигини мустаҳкамлашга, руҳияти ва кайфиятини кўтаришга, "Китоб - маънавият сарчашмаси" деб номланган маънавий-маърифий тадбир эса, уларнинг маънавиятини, мутолаа маданиятини юксалтиришга хизмат қилди.

Шифокорлар Жалақудуқ туманидаги "Осуда ҳаёт", Бештол, Қўштерак маҳаллаларида яшаётган кекса авлод вакиллари хонадонларига ташриф буюриб, уларнинг саломатлигини кўрикдан ўтказдилар. Тиббий кўрикларда даволанишга муҳтож аёлларга тиббий муассаларда даволаниши учун йўлланмалар берилди.

Шаҳрихон туманидаги Қашқар, Назармаҳрам, Оқ олтин маҳаллаларида  "Қадриятларимиз - бебаҳо бойлигимиз" тадбири, "Балли қизлар" танлови ҳам миллий қадриятларимизни улуғлаш, ёшларимизнинг фаоллигини оширишга қаратилган ишларни янада юқори босқичга кўтаришга хизмат қилганлиги билан аҳамиятлидир.

Бир сўз билан айтганда, Халқаро Қишлоқ аёллари куни муносабати билан юқоридаги каби тадбирлар вилоятнинг ҳар бир қишлоқ, ҳар бир маҳалласида юқори кўтаринкилик билан бўлиб ўтмоқда. Ойлик доирасидаги ана шу тадбирларни ўтказишдан кўзланган асосий мақсад,  қишлоқларда яшаётган опа-сингилларимизнинг ижтимоий-сиёсий фаоллигини, турмуш фаровонлигини янада ошириш, муаммоларини бартараф этиш, энг асосийси,  ўз ҳаётларидан рози бўлиб яшашларини таъминлашга қаратилган.

Меҳру муҳаббати дунёларга тенг,

Сабри сарҳад билмас, кўнгли шунча кенг,

Бунча марҳаматли, бунча бағри кенг,

Аёл, сенинг боринг бахтдир аслида!

Олима, шифокор, муаллима сен,

Ердан зар ундириб шимарасан енг,

Ижод дунёсида хассосдирсан энг,

Аёл, сенинг боринг бахтдир аслида!

Бир қўлингда бешик, бир қўлда олам,

Дейсан: "Юртга қалқон бўлолгин, болам",

Излари гул-чаман, қошлари қалам,

Аёл, сенинг боринг бахтдир аслида!

Пойингга поёндоз ошиқлар ори,

Лек қалбингда пинҳон дилинг изҳори,

Фақат сенга бахшдир қадрнинг бори,

Аёл, сенинг боринг бахтдир аслида!

Акрамжон МАМАТОВ

Ўзбекистон касаба уюшмалари Федерацияси раҳбарлигидаги республика комиссияси ва унинг таркибидаги Ишчи гуруҳлар томонидан мамлакатимиз ҳудудларида "Аёллар дафтари"га киритилган хотин-қизлар муаммоларини ўрганиш, тизимли ҳал этиш ва уларга амалий ёрдам кўрсатиш борасида кенг кўламли ишлар амалга оширилмоқда.

Мазкур жараёнда хотин-қизлар муаммоларини ҳал этиш, уларни ижтимоий қўллаб-қувватлашга қаратилган ишларни самарали амалга оширишда намунали ва тизимли фаолият олиб бораётган масъул ва мутасаддилар  ўртасида "Энг намунали иш бeрувчи аёл", "Энг яхши маҳалла раиси", "Энг яхши ҳоким ёрдамчиси", "Энг яхши хотин-қизлар фаоли", "Энг яхши ёшлар етакчиси" ҳамда "Энг яхши сектор раҳбари" рeспублика танлови ўтказилмоқда.

- Мазкур танловларнинг Андижон вилояти туман ва шаҳар босқичлари шу йилнинг июль-август ойларида ўтказилди, - дейди Ўзбекистон касаба уюшмалари Федерациясининг Андижон вилояти кенгаши раиси Қодиржон Парпиев. - Танловларда маҳалла фуқаролар йиғинларининг 641 нафар хотин-қизлар фаоли, 94 нафар иш берувчи аёл, 540 нафар маҳалла фуқаролар йиғинлари раиси, 574 нафар ёшлар етакчиси, 572 нафар ҳоким ёрдамчиси иштирок этди.

Танловларнинг туман, шаҳар босқичлари ғолиблари ўртасида ўтказилган    вилоят босқичи якуний натижаларига кўра, Қўрғонтепа тумани ҳокими, 1-сектор раҳбари Элёрбек Набижонов "Энг яхши сектор раҳбари" танловида, Пахтаобод туманидаги "Dono bolajon quvonchi" нодавлат таълим муассасаси раҳбари Зиёдахон Жумабоева "Энг намунали иш берувчи аёл" танловида,  Асака туманидаги "Камолот" маҳалла фуқаролар йиғини раиси Фируза Раҳматова "Энг яхши маҳалла раиси" танловида, Марҳамат туманидаги "Дурафшон" маҳалла фуқаролар йиғини ҳоким ёрдамчиси Азизжон Холмирзаев "Энг яхши ҳоким ёрдамчиси" танловида, Қўрғонтепа туманидаги "Хонкўча" маҳалла фуқаролар йиғини хотин-қизлар фаоли Маъмурахон Мирзаева "Энг яхши хотин-қизлар фаоли" танловида, Асака  туманидаги "Бахрин" маҳалла фуқаролар йиғини ёшлар етакчиси Фарруҳбек Турсунов "Энг яхши ёшлар етакчиси" танлови ғолиби деб топилди. 

Танловлар ғолиб ва совриндорларини вилоят ҳокимининг ўринбосарлари, вилоят оила ва хотин-қизлар бошқармаси бошлиғи Гулнорахон Абдуллаева, Маҳалла ва оилани қўллаб-қувватлаш бошқармаси бошлиғи Муҳамаджон Нишонов ва бошқалар муборакбод этиб, уларга диплом ва эсдалик совғаларини топширдилар.

Маҳбубахон ИСРОИЛОВА,

жамоатчи мухбир.

Фаолиятни рақамлаштириш - суд ва бошқа органлар ҳужжатларини ижро этишнинг самарали механизмларини, Мажбурий ижро органлари фаолиятига халқаро стандартларни босқичма-босқич жорий этишнинг муҳим омилидир.

Мажбурийижро бюроси ташкил этилган пайтдан бошлаб, энг асосий эътибор соҳага ахборот-коммуникация технологияларини жорий этишга қаратилди.

Бунинг учун, “Mib Portal” ахборот дастурий таъминоти фаолиятга жорий этилиб,       35 та ташкилотларнинг 63 та йўналишдаги ахборот тизимларига интеграция қилинди.

Дастур орқали ижро ҳужжатларини тўғридан тўғри суд ва боқа органлардан қабул қилиш, мол-мулкини қидириш, тақиқларни қўйиш ва ечиш, томонларга хабарномалар юбориш, пул маблағларини тақсимлаш, инкассо қўйиш, мол-мулкни аукционга чиқариш ва бахолашга юбориш каби ҳаракатлар фақат электрон тарзда амалга оширилмоқда.

Натижада, 2022 йилнинг ўтган даврида Бюро иш юритувига қабул қилинган ижро ҳужжатларининг 90 фоиздан ортиғи суд ва бошқа ваколатли органлардан электрон қабул қилинди, тизим орқали сўровлар ва жавоблар онлайн тарзда амалга оширилиб, қоғозбозлик, маблағ ва ортиқча вақт сарфланиши олди олинди.

Ахборот-коммуникация технологиялари кенг тарзда жорий этилиб, Бюро фаолиятига ошкоралик беришга қаратилмоқда, “MIB.UZ” расмий сайти ёки Android мобиль алоқа воситасидаги иловаси орқали:

- ўзларига нисбатан қарздорлик ёки қўйилган чекловлар бор ёки йўқлигини;

- қарздор ва ундирувчиларга Бюро органларига бормасдан, иш юритувдаги ижро ишлари бўйича қандай қарорлар қабул қилиш;

- тўловга қобилиятсиз шахслар ва ташкилотлар тўғрисидаги маълумотларни олиш имконияти яратилган;

- кўплаб эътирозга сабаб бўлаётган алимент ундируви соҳасини ҳам рақамлаштиришга эътибор қаратилди, алимент мажбуриятларини ижро этиш ва назорат қилишнинг ягона “E-Aliment” электрон ахборот тизими ишга туширилди.

Бундан ташқари, ижро жараёнида коррупцион ҳолатларни олдини олиш ва инсон аралашувини минималлаштириш мақсадида, жорий этилган “Smart ёрдамчи” электрон платформаси орқали қарздорнинг мол-мулкини аниқлаш ва уларга тақиқ қўйиш тўлиқ автоматлаштирилган, қарздорлик бартараф этилганидан сўнг, тақиқларни автомат ечиш ва бу ҳақда хабардор қилиш тизими жорий этилди.

        Ishonaman

Ishonaman, qaydadir meni,

Yaxshi so`zla eslaydi, albat.

Eslamasa hamki har kuni,

Yuragida bor ixlos, hurmat.

Ishonaman, gar kelsa omad,

Hursand bo`lar qaydadir, kimdir.

Yuragida bor mehr, shafqat,

Uchrashganda izhor etadir.

Ishonaman, qancha dillardan,

Oz bo`sa ham o`rin olganman.

 Yashayapman shu ishonch bilan,

So`zlariga guvoh bo`lganman.

Kimdir meni g`iybat qilsa ham,

Hurmat bilan eslaydi kimdir.

G`iybat so`zlar qilmaydi alam,

Yaxshi so`zlar uni yengadir.

Yashayapman shu ishonch bilan,

Shu ishonchim menga madadkor.

Shu ishonch bor doim baxtliman,

Shu ishonchim menga madadkor.

 G`ani MAJID

Hotira - muQaddas, Qadr - bebaho

Jangu jadal debon ketganlar qancha,

Bu kunga yetmagan, yetganlar qancha,

Millatning g`ururi, kelajagi deb,

El uchun jon fido etganlar qancha.

Jangohlarda shahid ketganlar qancha,

Jondan kechib, qon kechganlar qancha,

Tunu kun tinmasdan front ortida,

Hijron azobini yutganlar qancha.

Kibrni o`ziga or bilgan elim,

Qadriyatni qimsab, bor bilgan elim,

Vatanni yagona jon kabi sevib,

Iymonni pokiza yor bilgan elim.

Qo`rg`on ham qalqonmiz yurtning koriga,

Ming bora shukurkim, yo`g`u boriga,

Hurriyat nafasin to`yib simirib,

Yaraylik tosh bilib poydevoriga.

O`tganlar ruhini etaylik tavof,

Tiriklarni yo`qlab topaylik savob.

Abdurashid ERGASHEV,

 Asaka tumanidagi 26-umumta’lim maktabi iqituvchisi, Halq ta’limi a’lochisi.

Onajon

Onajonim sizni men,

Juda yaxshi ko`raman.

Mehringizga to`yolmay,

Ko`ksingizga bosh qo`yaman.

Onajonim baxtimga,

Sog` bo`ling, omon.

Mehringiz misli oftob,

Tugamaydi hech qachon.

Farangiz MASHRABJONOVA,

Asaka tumanidagi 48- umumta’lim maktabi 3- sinf o`guvchisi.

Muhabbat

Oshiq yurak qo`llarida

arzon bo`lgan muhabbat,

Chin sevginig yo`llarida

sarson bo`lgan muhabbat.

Yonib rashkning olovida

vayron bo`lgan muhabbat,

Kuyib ishqning yo`llarida

sarob bo`gan muhabbat.

Kuyib xajrning o`tida

ayro bo`lgan muhabbat,

Kezib ishqning ko`chasida,

gado bo`gan muhabbat.

Ko`rib ko`ngil bog`lariga,

nido bo`lgan muhabbat.

Kuyib xijron o`tida

ado bo`lgan muhabbat.

Baxrinsa YULDASHEVA, Oltinko`l tumani.

Qizlarimga

 Olloh bergan buyuk ne`matlarimsiz,

Bebaho javohir, siz gavshcharimsiz.

Nargizim, Azimam, Dilbarim sizsiz,

Sizni dunyolarga alishmam aslo.

Bir-biridan go`zal lobar qizlarsiz,

Pokiza, pazanda, shirin so`zlarsiz.

Qalbingiz pok, doim rostni so`zlarsiz,

Sizni dunyolarga alishmam aslo.

Bir sizda turasiz mardona shaxdli,

Bilgansiz doimo vafodor axdli,

Orzuim doimo bilinglar baxtli,

Sizni dunyolarga alishmam aslo.

Sizlar mening asli suyangan tog`im,

Sizlar gulyuzligim, gullagan bog`im,

Siz bilan itgan vaқt eng baxtli chog`im,

Sizni dunyolarga alishmam aslo.

Mavludaxon ABDUQODIROVA, Qo`rg`ontepa tumani.

O`zbekiston

O`zbek azaldan kamtar, jonfido,

Jasur va mard o`g`lonlari bisyor, 

Har tong hur o`lkada aytilar alyor,

Shu yurtdan kuch olar jismu jonim,

Gulla, yashna, hur O`zbekistonim.

Seni madh etaman bor tanda jonim,

Ulug`dan ulug`san, qalbimda orim,

Mening ona yurtim, aziz tuprog`im,

Sen bilan porlagay baxtim, quyoshim,

Gulla, yashna, hur O`zbekistonim.

Yurtim osmoningda kuladi quyosh,

Tinchligingni tilar har keksa-yu yosh.

Farzandlaring doim bo`lar yelkadosh,

O`ttiz yoshing qutlug` bog`-u bo`stonim,

Gulla, yashna, hur O`zbekistonim.

Zubayda MADAMINOVA

Andijon tumanidagi 53- umumta’lim maktabi o`quvchisi.

Танлов

Андижон машинасозлик институтида "Қизлар одоби тарғиботчиси" танлови бўлиб ўтди.

Маҳалладаги уюшмаган ёшлар, айниқса, қизлар тарбияси, уларнинг маънавияти, дунёқарашини юксалтириш, фаоллигини ошириш борасидаги ишлар самарадорлигини кўтаришга кўмаклашиш мақсадида Андижон машинасозлик институтида "Қизлар одоби тарғиботчиси" гуруҳи тузилган.    Ушбу гуруҳ аъзоси бўлган фаол ва ташаббускор талаба қизлар Андижон шаҳридаги қатор маҳаллаларга "қизлар одоби тарғиботчиси" сифатида бириктирилган бўлиб, маҳалла қизлари билан бевосита иш олиб бормоқда.

Қизлар одоби тарғиботчилари дарслардан бўш вақтларида ўзларига бириктирилган маҳалла қизлари билан одоб-аҳлоқ, кийиниш, мулоқот маданияти, китоб ўқиш, соғлом турмуш тарғиботи, касб-ҳунар ва тадбиркорликка жалб этиш ва   бошқа қатор йўналишларда турли тадбирлар, суҳбатлар ўтказиб келмоқда.

Институт Хотин-қизлар маслаҳат кенгаши ташаббуси билан маҳаллаларда олиб борилаётган тарғибот ишлари самарадорлигини ошириш, тарғиботчи қизларни қўллаб - қувватлаш ва рағбатлантириш мақсадида ўтказилган "Қизлар одоби  тарғиботчиси" танловида беш нафар энг фаол тарғиботчи, талаба қиз иштирок этди.

Қатнашчилар миллий кадриятларимизни улуғлаш, миллий либосларимиз   тарғиботига оид саҳна кўринишлари, тарғибот ишларини самарали ташкил этишга оид савол-жавоб ва белгиланган бошқа шартлар асосида билим ва ташкилотчилик маҳоратини намойиш этди.

Танловнинг якуний натижаларига кўра, энг юқори балл тўплаган биотиббиёт муҳандислиги йўналиши талабаси Дурдона Турсунпўлатова  ғолиб деб топилди.