(29-сон)

2017 йил - Халқ билан мулоқот ва инсон манфаатлари йили

Мустақил тараққиёт йилларида мамлакатимизнинг барча жойларида бўлгани каби Хонобод шаҳрида ҳам катта ҳажмдаги қурилиш, бунёдкорлик ишлари амалга оширилди. Янги-янги корхоналар, ижтимоий соҳа объектлари, стадионлар, савдо ва хизмат кўрсатиш шохобчалари барпо этилди, кўчалар таъмирланди. Натижада шаҳар янада ободонлашиб, ўзгача  қиёфага эга бўлди.

Шаҳар аҳолисининг турмуш фаровонлиги ҳам кундан-кунга ортиб бормоқда. Айниқса, юртимиз мустақиллигининг 26 йиллик тўйини ўтказишга тайёргарлик кўрилаётган шу кунларда одамлардаги шижоат, интилиш, уларнинг дунёқараши, кайфиятидаги ўзгаришларни кўрган кишининг кўнгли тоғдай кўтарилади. Айниқса, Муҳтарам юртбошимиз Шавкат Мирзиёев вилоятимизга ташрифи доирасида шаҳримизга келиб, шаҳарни янада ривожлантириш, аҳоли дам оладиган курорт шаҳарга айлантириш, қатор лойиҳаларни амалга ошириш юзасидан тавсия, топшириқ ва маслаҳатлар берди. Президентимизнинг ана шу эътибори  шаҳримиз аҳолисини янада улкан марралар сари илҳомлантирди.

Шаҳар хотин-қизлар қўмитаси, унинг ташкилот, корхона ва муассасалардаги    52 бошланғич ташкилотлари томонидан Хонободда яшаётган 20 минг нафардан зиёд хотин-қизларнинг ҳуқуқ ва манфаатларини ҳимоя қилиш, турмуш фаровонлигини ошириш, мавжуд ҳаётий муаммоларини бартараф этиш бўйича кенг кўламли, тизимли ишлар олиб борилмоқда. Хусусан, ҳамкор ташкилотлар билан биргаликда маҳаллалар, ҳар бир оилада ижтимоий-маънавий муҳит барқарорлигини таъминлаш, аҳолини қийнаётган муаммоларни ўрганиш ва ижобий ҳал этиш, касаначилик, хотин-қизлар, оилавий тадбиркорликни ривожлантириш     орқали  ёшларимиз бандлигини таъминлаш масалаларига алоҳида эътибор қаратилмоқда.

Маҳалла фуқаролар йиғинлари қошидаги доимий комиссиялар иши самарали ташкил этилаётганлиги барча йўналишлар бўйича ижобий натижаларга эришишимизда муҳим омил бўлмоқда.

Тўғри, ишларимиз яхши, ютуқларимиз бор. Лекин бундан хотиржамликка берилмаслигимиз керак. Айниқса, оилаларни мустаҳкамлаш, ажримларга йўл қўймаслик, ёшларни оилавий ҳаётга тайёрлаш, эрта ва қариндошлар ўртасидаги никоҳларнинг олдини олиш борасидаги ишларимизни янада кучайтиришимиз муҳимдир.

Жорий йилнинг биринчи ярмида шаҳримизда 50 дан ортиқ янги оила барпо бўлди. 31 та ажрим рўйҳатга олиниб, ўтган йилга нисбатан 2 тага камайди. Жанжалкаш, муаммоли оилалар сони ҳам бирмунча камайди. Ажрашиш арафасида турган 46 оила яраштирилди. Шундай бўлса-да, фаолиятимизга танқидий ёндошиб, бу борадаги ишларимиз кўлами ва сифатини янада оширишга ҳаракат қиляпмиз.

 Инсон ҳамиша бахтли бўлиш учун интилиб яшайди. Унга эришиш учун эса астойдил ҳаракат қилиши зарур. Тан олишимиз керак, интилганга бугун юртимизда барча шароитлар яратиб берилган. Ҳар бир киши ўз бахтини оилада ҳам, ўқишда, ишда, маҳаллада, шахсий ҳаётида ҳам барпо этишга қодир. Агар тарихга назар ташлайдиган бўлсак аждодларимизни мана шундай дориломон кунларни кўриш учун заҳмат ва машаққат чекканига, лекин унга эриша олмасдан армон билан ўтганига гувоҳмиз. Ўз бахти, фарзандларининг келажаги учун интилишларга не-не тўсиқлар бўлмади дейсиз? Лекин  халқимиз ана шу тўсиқларнинг барчасини енгиб ўтди. Бундан шундай хулоса қилишимиз мумкинки, бахтли ҳаётимизнинг энг биринчи омили - бу юртимиздаги тинчлик-осойишталик, фаровон яшашимиз учун яратилган кенг имкониятлардир.

Минг афсуски, бугун орамиздаги айрим кишилар ана шу имконият ва шарт-шароитлардан оқилона фойдаланиш ўрнига ноқонуний йўлларга кириб, ўз бахтига, порлоқ эртаси томирига болта ураётганлиги ачинарлидир. Айниқса, баъзи бир ёшларимизнинг туриш-турмуши, феъл-атворига қараб, уларни енгил ҳаётга шунчалик муккасидан кетганлигидан хавотирга тушамиз. Улар ўз олдиларидаги арзимаган қийинчилик, машаққатдан қочиб, уни четлаб ўтишга уринаётганлиги, ҳаётга енгил-елпи қараётганликлари турли муаммоларни келтириб чиқармоқда Жумладан, шаҳримизда ҳам бундай ёшлар йўқ деб айта олмайман. Бу каби ёшлар доимий назоратга олинган, улар билан ички ишлар, тиббиёт, таълим тизими ходимлари, маҳалла фаоллари ҳамкорлигида зарур тарбиявий ишлар олиб борилмоқда.

Бундай ёшлар гуруҳи қаердан пайдо бўлмоқда? деган савол туғилиши табиий. Менимча, оилада, маҳаллада, таълим муассасасида улар билан етарли даражада иш олиб бора олмаётгандирмизки, улар юзага чиқмоқда. Бунинг учун ҳар биримиз айбдормиз. Шу ўринда ёшларимиздаги салбий иллатларнинг шаклланишига энг аввало, оиладаги носоғлом муҳит, ота-онанинг фарзандига, унинг тарбиясига лоқайд ва эътиборсиз қараётганлиги сабаб бўлаётганлигидан кўз юммаслигимиз керак.

Ҳар қандай инсон фарзанди бахти, камоли учун қайғуриб яшаши, ҳар қандай шароитда ҳам унинг одоб-аҳлоқи, таълим-тарбиясига алоҳида эътибор қаратиши, зиммасидаги масъулиятни унутмаслиги даркор. Шундагина фарзанди келажакда ота-онасига раҳмат олиб беради, чинакам роҳат-фароғатни бахш этади.

Оилада, маҳаллада эътибордан четда қолган бола кўнгил кўчасига кириб, хоҳлаган ишини қилишга ўрганади, билиб-билмасдан, тушиниб-тушунмасдан турли ножоиз йўлларга кириб кетади. Айниқса, қиз бола, унинг тарбияси жуда нозик масала. Бу борада нафақат ота-она, балки қўни-қўшни, кенг жамоатчилик икки ҳисса эътибор вак масъулиятни ошириши зарур. Бугун тасодифий танишув, кўнгил майлига берилиб иффатини йўқотиб, жамиятга, оиласи, маҳалласига иснод келтираётган ёш қизларимизнинг борлиги барчамизни жиддий ташвишга солади. Мана шундай ҳолатлар билан боғлиқ жараёнлар ўрганилиб, таҳлил қилинганда улар носоғлом оила, муҳитда ўсганлиги аён бўлди. Ота ичкиликка берилган, она мол-дунё ишқида, уйда доим уруш-жанжал, болалар ўз ҳолича. Айниқса, ажрашганлар оилаларнинг фарзандлари орасида ана шундай йўлга кириб кетиш ҳоллари кўпроқ учрайди.

Қандай бўлмасин улар ҳам бизнинг фарзандимиз, уларни четга суриб қўйишимиз мумкин эмас. Қизларимизнинг ножўя йўлга киришларига сабаб бўлган омиллар чуқур ўрганилиб, келгусида яна шу каби ишлар такрорламаслиги учун зарур барча чоралар кўрилмоқда.

Халқимизда "Султон суягини хор қилмайди", деган доно нақл юради. Ҳар бир инсон ўзини султон, деб билади. Суяк бу - зурриёддир. Фарзандини мана шундай шармандали аҳволга келиб қолишида отанинг ҳам, онанинг ҳам бирдек айби бор.

Ажралишлар ортидан келадиган кўнгилсизликлар ҳадсиз-ҳисобсиз. У етказадиган моддий зарардан кўра, маънавий зарарнинг кўлами кенгроқ. Уни жойига келтириш учун баъзида асрлар камлик қилади. Бир инсоннинг шаъни, қадр-қиммати ер билан битта бўлса, бу унинг авлодлари пешонасида ҳам  тамғадек туради. Қаерда бўлмасин, ким у ҳақида сўрамасин, фалончининг боласи, невараси, деган маломат тоши бошини эгаверади. Бир қизнинг ибоси, ҳаёси нафақат бир оиланинг, балки бутун маҳалланинг, юртнинг ор-номуси эканлиги унутмаслигимиз лозим.

Оилаларда фарзандларни комил шахс бўлиб вояга етишида маҳалланинг таъсир кучини ошириш муҳим аҳамиятга эга. Энг аввало, оиланинг мустаҳкамлигига эришиш, ажралишларнинг олдини олишда бўлғуси келин-куёвлар ўртасида тушунтириш ишларини олиб бориш керак. Ҳаёт йўллари фақат текисликдан иборат эмаслиги, оилада вужудга келадиган барча муаммонинг ўз ечими борлиги, фақат бунинг учун вақт, сабр-қаноат, бардош кераклиги, оила муқаддас ришталиги уларнинг онгига сингдирилиши лозим. Ҳаётий тажрибаси бой бўлган пиру-бадавлатларимиз доимий равишда ўз насиҳатлари, ибратли умр йўлларидаги кўрган-кечирганлари асосида ёшларга маслаҳатлар бериб боришлари эса мазкур йўналишдаги ишлар самарадорлигини янада оширади.

Оила -жамиятнинг бир бўлаги. Жамиятнинг обод ва фаровон бўлиши эса аввало, оилаларнинг тинч ва тотувлигига боғлиқ. Зотан, аҳил оилада соғлом муҳит қарор топади. Соғлом муҳитдагина одоб-ахлоқли, меҳнатсевар, ўз халқининг миллий қадриятлари, урф-одатлари ва анъаналарига ҳурмат билан қарайдиган ёшлар камол топади. Биз бутун сайъи-ҳаракатларимизни ана шундай комил фарзандлар тарбиялашга қаратайлик. Шундагина биз ножўя ишлари билан жамиятимизга доғ тушираётган ёшларимизни тўғри йўлга сола оламиз.

Мухтасархон ХОШИМОВА,

Хонобод шаҳар ҳокимининг ўринбосари, хотин-қизлар қўмитаси раиси.

(29-сон)

болалар оромгоҳи

Вилоятимизда болаларнинг ёзги таътилни мароқли ўтказишлари учун болалар оромгоҳлари самарали фаолият кўрсатмоқда. Ҳусусан, Андижон шаҳридаги 22- умумтаълим мактаби қошида ташкил этилган "Қалдирғоч" номли болалар оромгоҳида ҳам болаларнинг мароқли дам олишлари учун барча шароитлар яратилган.

Мавжудахон Жўрабоева раҳбарлик қилаётган ушбу оромгоҳда турли хил спорт ҳамда фан тўгараклари ташкил этилган бўлиб, бу дам олаётган болаларнинг билимларини  бойитишга хизмат қилмоқда. Бундан ташқари , ўтказилаётган тадбирлар, кўнгилочар дастурлар, спорт мусобақалари болаларда катта қизиқиш уйғотмоқда. Айниқса, вилоят Ўлкашунослик музейи, "Болалар" ва Алишер Навоий номидаги маданият ва истироҳат боғларига уюштирилган саёҳат болаларга бир олам завқ бағишлади.

Шуҳратбек КЕЛДИЕВ

(29-сон)

Чаманлар ичида гўзал раъноси,

Гуллардан яралган унинг ҳаёси,

Дунёни тўлдирар алла-навоси,

Сен ўзбек аёли - садоқат тимсоли

Ўстирар билимли ўғил-қизларни,

Дилларга хуш ёқар ширин сўзлари,

Ҳайратда қолдирар боққан кўзларни,

Сен ўзбек аёли  - гулдан иболи.

Меҳнатда собитдир тиним билмайди,

Юртнинг ҳар гўшасин обод айлайди,

Меҳр-муҳаббатни қалбга жойлайди,

Сен ўзбек аёли - фаришта мисоли.

Сен борки, табиат яшнайди абад,

Сен борки, кўнгилда яшар муҳаббат,

Дили пок, ёрига суянар  фақат,

Сен ўзбек аёли - вафо тимсоли.

Наргиза ТУРСУНОВА

(29-сон)

Вилоят ҳокимлигида  Ўзбекистон ёшлар иттифоқи вилоят кенгашининг навбатдан ташқари йиғилиши бўлиб ўтди.

Маълумки, жорий йилнинг 30 июнида Тошкент шаҳрида "Камолот" ёшлар ижтимоий ҳаракатининг IV қурултойи ўтказилган эди. Унда мамлакатимиз Президенти Ш. Мирзиёев иштирок этиб, "Камолот" ЁИҲ фаолиятига атрофлича тўхталди ва Ҳаракатни тубдан ўзгартириш, уни янги босқичга олиб чиқиш мақсадида мамлакатимиз ёшларининг янги ташкилоти - Ўзбекистон ёшлар иттифоқини ташкил этиш бўйича ўзининг таклифларини билдирди.

Кенгаш йиғилишида вилоят ҳокими Шуҳратбек Абдураҳмонов қурултойда белгилаб берилган вазифалар ижросини ташкил этиш бўйича иттифоқ ҳудудий кенгаши ва ёшлар масалалари бўйича ҳудудий идоралараро кенгаш фаолиятини йўлга қўйиш хусусида тўхталди.

Бу борада давлатимиз раҳбари томонидан жорий йил 5 июлда "Ёшларга оид давлат сиёсати самарадорлигини ошириш ва Ўзбекистон ёшлар иттифоқи фаолиятини қўллаб-қувватлаш тўғрисида"ги Фармони қабул қилинди. Мазкур фармон билан Ўзбекистон ёшлар иттифоқи фаолиятининг устувор йўналишлари белгилаб берилди.

Фармонда Ёш олимлар уюшмаси, Ногирон ёшлар билан ишлаш маркази ва ёшлар фаолиятини қўллаб-қувватловчи бошқа бир қатор марказлар ташкил этилиши, шаҳар ва туманларда, энг чекка қишлоқлардаги ёшларни уй-жой билан таъминлаш мақсадида 4 йиллик дастурлар ишлаб чиқилиши, "Мард ўғлонлар" давлат мукофоти, "Келажак бунёдкори" медалининг таъсис этилиши ва бошқа имтиёзлар кўзда тутилган.

Вилоят ҳокими Ш. Абдураҳмонов вилоят ёшлари олдида турган долзарб вазифалар хусусида ҳам тўхталиб ўтди.

Йиғилишда Кенгаш аъзолари томонидан Ўзбекистон ёшлар иттифоқи вилоят кенгашининг раиси этиб Нодирбек Юсупов, унинг ўринбосари этиб Элёрбек Абдуқодиров сайланди.

Хосият СИДДИҚОВА

Вилоят ҳокимлиги ташаббуси билан Жалақудуқ туманида вилоятдаги матбуот нашрлари фаолияти самарадорлигини ошириш, илғор иш тажрибаларини оммалаштириш, мавжуд муаммоларни бартараф этиш масалаларига бағишланган семинар бўлиб ўтди.

Вилоят, туман, шаҳар ва тармоқ газеталари муҳаррирлари, республика нашрларининг вилоят мухбирлари, "Матбуот тарқатувчи" жамияти вакиллари иштирок этган мазкур семинарда вилоят матбуот ва ахборот бошқармаси бошлиғи      А. Султонов, Ўзбекистон Журналистлари ижодий уюшмаси вилоят бўлими раиси Н. Саидов, "Жалақудуқ ҳаёти" газетаси муҳаррири Ш. Хайитохунов, "Андижон матбуот тарқатувчи" масъулияти чекланган жамияти раҳбари М. Раҳимов сўз олиб, газета таҳририятлари олдида турган муҳим вазифалар, фаолият самарадорлигини ошириш, обуна ишларини ташкил этиш ва бу борада ҳамкорликни мустаҳкамлаш хусусида гапирдилар.

Иштирокчилар томонидан мазкур йўналишдаги ишларни янада юқори босқичга кўтариш  юзасидан таклиф, фикр ва мулоҳазалар билдирилди.

Якунда Ўзбекистон Республикаси Президентининг жорий йил 27 июндаги "Ўзбекистон Республикаси давлат мустақиллигининг йигирма олти йиллик байрамига тайёргарлик кўриш ва уни ўтказиш тўғрисида"ги қарори ижросини таъминлаш бўйича муҳим вазифалар белгилаб олинди.

Дилдора ХУШБАҚОВА,

жамоатчи мухбир.

(29-сон)

Андижон шаҳридаги Иқтисодиёт касб-ҳунар коллежида "Қайноналар кенгаши" жамоатчилик тузилмаси фаолиятининг муҳим йўналишлари" мавзусида семинар бўлиб ўтди.

Андижон шаҳар хотин-қизлар қўмитаси, Аёллар маслаҳат маркази ҳамкорлигида ташкил этилган мазкур семинарда маҳалла фуқаролар йиғинларининг диний маърифат, маънавий аҳлоқий тарбия масалалари бўйича маслаҳатчилари, йиғинлар қошидаги "қайноналар кенгаши" жамоатчилик тузилмаси раҳбарлари иштирок этиб, мавзу доирасидаги масалалар бўйича ўзаро фикр алмашдилар.

Тадбирда Андижон шаҳар ҳокими ўринбосари, хотин-қизлар қўмитаси раиси Н. Қосимова, "Оила" илмий-амалий маркази вилоят бўлими директори Д. Саматова, "Аёллар маслаҳат маркази" раҳбари Н. Раҳимова, "Маҳалла" хайрия жамоат фонди шаҳар бўлими раиси ўринбосари М. Саттарова сўз олиб,  "Қайноналар кенгаши" жамоатчилик тузилмаси фаолиятини самарали ташкил этиш, белгиланган тартибда иш ҳужжатларини юритиш, оилалар мустаҳкамлигини таъминлаш, қайнона-келин муносабатларини яхшилаш хусусида гапирдилар.

Семинарда "Қайноналар кенгаши" жамоатчилик тузилмаси фаолияти билан боғлиқ муҳим вазифалар белгилаб олинди.

Наргиза УлуFбекова,

Андижон шаҳар

хотин-қизлар қўмитаси мутахассиси.

Хотин-қизларнинг ижтимоий-сиёсий, маданий-маърифий нашри – "Иқбол" газетаси 1997 йилдан буён нашр этиб келинади. Айни пайтда газета А 3 форматда чоп этилмоқда.

Газета саҳифаларида асосан, аёллар, яъни, уларнинг жамият ижтимоий-сиёсий ҳаётидаги иштироки, иш фаолиятлари, илғор тажрибалари, ютуқ ва муаммолари, соғлом авлодни камолга етказишдаги оналик ва мураббийлик масаласи, шунингдек, ёшлар тарбияси, аҳолига жамиятимизда амалга оширилаётган ислоҳотларнинг мазмун-моҳиятини тушунтириш, истиқлол ғояларини халқимиз, айниқса, ёшлар онгига сингдириш сингари мавзулар кенг ёритилади.

Газетани ранг-баранг, мазмунли ва юқори савияда бўлишини таъминлаш мақсадида муштарийларнинг талаб, таклиф ва қизиқишлари мунтазам ўрганиб борилади. Шу мақсадда ҳар уч ойда бир муштарийлар ўртасида социологик тадқиқот - сўровнома ўтказилади

Газета таҳририяти Андижон вилоятидаги матбуот нашрлари орасида биринчи бўлиб 2004 йилда газетанинг веб-сайтини яратди. 2006 йилда Ўзбекистон мустақил босма ОАВ ва ахборот агентликларини қўллаб-қувватлаш жамоат фонди кўмаги билан қайта шакллантирилди. Газетанинг ҳар бир сони сайтга жойлаштириб борилади.

Газета етти йилдан буён анъанавий тарзда хотин-қизлар ўртасида "Иқбол" газетаси соврини учун теннис турнири ўтказиб келади. Турнирда ҳар йили 50-70 нафар асосан Андижон, шунингдек, Наманган ва Фарғона вилоятларидан ҳаваскор ҳамда профессионал теннисчи хотин-қизлар иштирок этади.

"Иқбол" газетаси таҳририятида 8 нафар ходим фаолият кўрсатади. Улардан 4 нафари олий маълумотли журналистлардир.

Мулоқот учун реквизитлар:

Манзил: Ўзбекистон Республикаси, 710000. Андижон шаҳри, Навоий шоҳкўчаси, 71-уй. Тел.: (0-374) 223-85-48. Эл.почта: Бу электрон манзил спамлардан химояланган. Уни куриш учун JavaScript ни ишга туширишингиз керак. Веб сайт: www.iqbol.uz

Қарор ва ижро

Вилоятимизда "Фидойинг бўлгаймиз сени, Ўзбекистон!" шиори остида

"Ёш оилалар ва қизлар" биринчи республика форуми тадбирлари бўлиб ўтмоқда.

Вилоят ҳокимлигида форум тадбирлари доирасида ўтказилиши белгиланган тадбирлар, уларнинг мазмун-моҳияти, аҳамияти ва ўтказилишига бағишланган матбуот анжумани бўлиб ўтди.

Оммавий ахборот воситалари, кенг жамоатчилик вакиллари, ёшлар иштирок этган тадбирда вилоят ҳокими ўринбосари, хотин-қизлар қўмитаси раиси Манзурахон Юнусова оммавий ахборот воситалари ва иштирокчиларга Ўзбекистон Республикаси давлат мустақиллигининг 26 йиллик байрами олдидан Ўзбекистон Хотин-қизлар қўмитаси ташаббуси билан вилоят ҳокимлиги, хотин-қизлар қўмитаси, Ўзбекистон ёшлар иттифоқи вилоят кенгаши ҳамда қатор ташкилотлар ҳамкорлигида Ўзбекистон Республикаси Президентининг 2017 йил 5 июлдаги "Ёшларга оид  давлат сиёсати самарадорлигини ошириш ва Ўзбекистон ёшлар иттифоқи фаолиятини қўллаб-қувватлаш тўғрисида"ги фармони ижросини таъминлаш, ёш оилаларни мустаҳкамлаш, қизларни юксак одоб-ахлоқ тамо-йиллари асосида тарбиялаш, уларнинг ижтимоий-сиёсий фаоллигини ошириш, касб-ҳунар ўргатиш, кийиниш ва муомала маданиятини ошириш, оилавий ҳаётга тайёрлаш, онги ва қалбини турли ғоявий таҳдидлардан ҳимоя қилиш, соғлом турмуш тарзи кўникмаларини   шакллантириш мақсадида ўтказилаётган форум, унинг мазмун-моҳияти ва аҳамияти  хусусида кенг маълумотлар берди.

* * *

Вилоят касаба уюшма ташкилотлари бирлашмасида ташкил этилган "Мен ҳам етакчи бўламан" мавзусидаги тадбирда Ўзбекистон ёшлар иттифоқи вилоят кенгаши фаоллари, академик лицей, касб-ҳунар коллежларининг фаол ва етакчи ўқувчилари, олий ўқув юртлари талабалари, ёш оилалар ва уюшмаган ёшлар вакиллари иштирок этди.

Тадбирда давлатимиз раҳбари Шавкат Мирзиёев раҳнамолигида мамлакатимизда ёшларни қўллаб-қувватлаш, уларнинг истеъдод ва иқтидорларини юзага чиқариш борасида кенг имкониятлар яратиб берилаётганлиги, уларнинг фаоллигини ошириш, мавжуд муаммоларини бартараф этишга қаратилган кенг кўламли ишлар амалга оширилаётганлиги таъкидланди.

- Бугунги кунда ёшлар, айниқса, қиз бола тарбияси, уларнинг замонавий билим ва ҳунарларни эгаллаши, юксак маънавиятли, одоб-ахлоқли инсонлар қилиб вояга етказиш масалалари муҳим масалалардан ҳисобланади, - дейди вилоят ҳокимлиги оила, оналик ва болаликни ижтимоий муҳофаза қилиш котибияти бош мутахассиси Иродахон Махатова. - Шу маънода ўтказилаётган форум ёш оилаларни мустаҳкамлаш, ёшлар, хусусан, қизларни юксак одоб-ахлоқ тамойиллари асосида тарбиялаш, уларнинг ижтимоий-сиёсий фаоллигини ошириш, касб-ҳунарга ўргатиш, кийиниш ва муомала маданиятини, соғлом турмуш тарзи кўникмаларини, тиббий маданиятини юксалтириш, турли ёт ғоялар таҳдидларидан ҳимоя қилишга хизмат қилади. Қолаверса, уюшмаган қизлар билан олиб борилаётган ишларда самарали натижаларга эришиш, уларни иқтидорли ва фаол қизлар билан ҳамкорлигини мустаҳкамлашга, глобаллашув жараёнида "Тенгдош тенгдошга ўрнак" шиори остида намунали ва фаол қизлар фаолиятини тарғиб этишга яқиндан ёрдам беради.

Тадбирда сиёсий партиялар "Аёллар қаноти" раҳбарлари ва фаоллари, халқ депутатлари вилоят, туман ва шаҳар кенгашлари депутати бўлган, шунингдек, турли соҳаларда самарали фаолият юритаётган раҳбар ҳамда тадбиркор аёллар билан ёш оилалар вакиллари ва қизларнинг учрашуви, бевосита мулоқотлари бўлиб ўтди.

-  Муҳтарам Президентимиз "Камолот" ёшлар ижтимоий ҳаракатининг IV қурултойидаги "Жисмоний ва маънавий етук ёшлар - эзгу мақсадларимизга етишда таянчимиз ва суянчимиздир" деб номланган маърузасида "Ўзбекистон ёшлар иттифоқи давлат ва жамият учун раҳбар кадрларни тайёрлаб берадиган ўзига хос марказ бўлиши, замонавий тилда айтадиган бўлсак, ёшлар учун "социал лифт" вазифасини ўташи керак"  деган эди, - дейди Андижон шаҳридаги 3-оилавий поликлиника бош шифокори, халқ депутатлари вилоят кенгаши депутати Мухаррамхон Раҳмонова. - Бугунги мулоқотларда лидер қизларимизнинг фаоллигини, етакчилик қобилиятларини янада ошириш, тенгдошларини ўз ортидан эргаштира олиш салоҳиятларини юксалтириш масалаларига алоҳида эътибор қаратилмоқда.

Баҳс-мунозара, савол-жавоб тарзида ўтган тадбирда қизларнинг ижтимоий-сиёсий фаоллигини, етакчилик қобилиятларини оширишга қаратилган машғулотлар ўтказилди, уларнинг самарали иш юритишлари бўйича зарур тавсия ва маслаҳатлар берилди.

- Ўтказилган мулоқот ва   машғулотлар менда катта таассурот қолдирди, - дейди Андижон машинасозлик касб-ҳунар коллежи ўқувчиси, Ўзбекистон ёшлар иттифоқи вилоят кенгаши фаоли Мумтоза Мадаминова. - Раҳбар ва депутат аёллар билан суҳбатларда мен ва тенг-дошларим фидойи бўлиб меҳнат қилиш, етакчиликнинг ўзига хос жиҳатлари хусусида кўп маълумотларга эга бўлдик. Бу бизнинг келгусидаги етакчилик фаолиятимизда албатта, ёрдам беради.

Тадбирда иштирокчилар томонидан мазкур йўналишдаги ишларни янада юқори босқичга кўтариш, самарадорлигини ошириш юзасидан таклиф, фикр ва мулоҳазалар билдирилди.

Тадбирда қатнашган ёшлар ўзларини қизиқтирган барча саволларга депутат ва раҳбар аёллардан батафсил жавоблар олди.

* * *

 Андижон давлат университетида бўлиб ўтган "Фан ва таълим - келажак пойдевори" мавзусида илмий-амалий конференцияда вилоятимиз "Олима" уюшмаси аъзоси бўлган олима аёллар, олий ўқув юртлари профессор-ўқитувчиларининг илм-фан соҳасида илмий-тадқиқотлар олиб бораётган ёш олималар, иқтидорли қизлар билан мулоқоти бўлиб ўтди.

- Айни кунда вилоятдаги олий таълим муассасалари ҳамда илмий марказларда 150 нафарга яқин олима фаолият юритмоқда, - дейди вилоят "Олима" уюшмаси раиси, педагогика фанлари доктори Шоҳидахон Юсупова. - Уларнинг 12 нафар фан доктори, қолганлари турли йўналишлар бўйича фан номзоди соҳибаларидир. Хусусан, Ханифа Солихова, Тўхтахон Муҳитдинова, Лолахон  Саидбоева, Салима Мирзаева, Шоҳида Шаҳобиддинова, Дилоро Набиева, Махфуза Юсупова сингари фан докторларининг тилшунослик, тиббиёт, педагогика, қишлоқ хўжалиги йўналишларидаги илмий, амалий тадқиқот ва инновацион ишланмалари мамлакатимиз илм-фани ривожида салмоқли ўрин тутади.

Дарҳақиқат, биргина 2016 йилда вилоятда 7 нафар олима фан доктори ва доцент илмий даража ҳамда унвонига сазовор бўлди. Бу борада "Олима" уюшмаси вилоят бўлими томонидан иқтидорли қизларнинг илмий-интеллектуал салоҳиятларини намоён этишлари  амалий ёрдам кўрсатиш, илм-фан билан шуғулланаётган хотин-қизлар фаолиятини қўллаб-қувватлаш, илмий изланиш ва ютуқларини кенг тарғиб этиш борасида эътиборга молик ишлар олиб борилмоқда. Жумладан, олий ўқув юртлари, илмий марказлар билан ҳамкорликда амалга оширилаётган илмий ва маърифий лойиҳалар, ўтказилаётган семинар ва кўрик-танловлар, олималарга услубий ва маънавий кўмак берилаётганлиги уларнинг илмий изланишлари самарадорлигини ошириш, амалиётга татбиқ этишда муҳим аҳамият касб этмоқда.

Илмий-амалий конференция ишида вилоятимиздаги кўплаб иқтидорли қизлар фаол иштирок этди.

- Мен устозларим кўмагида "Хорижий тилларни ўқитишда янги инновацион технологиялардан фойдаланишнинг лингводидактик ҳамда  лингвокультурологик асослари" мавзусида илмий-тадқиқот ишларини олиб боряпман, - дейди Андижон давлат университети Хорижий тиллар факультети талабаси Хуршида Аъзамжонова. - Бугунги илмий-амалий конференцияда мазкур илмий-тадқиқот ишим ҳақида устозларим, тенгдошларимга кенг маълумотлар бердим ва уларнинг илмий иш юзасидан фикр-мулоҳазаларини билиш имконига эга бўлдим.

Юртимизда, вилоятимизда мен ва мен каби кўплаб ёшларнинг ўз имконият ва салоҳиятларини тўлақонли юзага чиқаришлар учун яратиб берилаётган кенг имкониятлардан беҳад мамнунман. Ўз ўрнида биз талаба ёшлар юртимизга муносиб бўлишга, ўзимизнинг аъло баҳоларга ўқишимиз, фаоллигимиз, одоб-ахлоқимиз, тенгдошларимизни эзгу ишларга етаклашимиз билан Ватанимиз равнақига ҳисса қўшиш учун бор имкониятларимизни ишга соламиз.

Анжуманда ёш иқтидор соҳибаларини қўллаб-қувватлаш, ижодий, илмий-тадқиқот ишларини олиб бориш, мазкур йўналишдаги муаммоларни бартараф этиш юзасидан зарур тавсия ва маслаҳатлар берилди.

 Шунингдек, анжуман доирасида ўтказилган қизиқарли савол-жавоблар, илмий-ижодий мулоқотлар, китоб акцияси тадбири, олималар, ёш қизлар муаллифлигида чоп этилган янги китоблар тақдимоти барчада катта таассуротлар қолдирди.

- Китобни ўзига дўст тутган инсон ҳаётда ҳеч қачон қоқилмайди, - дейди тадбир иштирокчиси, АДУ қошидаги 2- академик лицей ўқувчиси Садоқат Солижонова. - Қолаверса, мунтазам китоб ўқийдиган инсон билимли, одоб-ахлоқли, юксак маънавиятли шахс сифатида жамиятда нафақат ўз ўрнини топа олади, балки, унинг  фаол аъзосига айланади. Шу маънода биз ўқувчи ёшлар ҳам нафақат   дарсликларимизни, балки бадиий, илмий, маънавий-маърифий мавзулардаги   китобларни мунтазам ўқиб боришимиз, тенгдошларимизни, айниқса, уюшмаган ёшларни ҳам китоб мутолаласига қизиқтиришга ҳаракат қилишимиз лозим. 

*  *  *

Ҳафта охиригача давом этадиган форум доирасида вилоят "Баркамол авлод" болалар ижодиёти марказида ёшларни касб-ҳунарга йўналтириш мақсадида "Ким нимага қодир?" мавзусида маҳорат дарслари, ўқувчи қизларнинг ижодий кўргазмалари, Андижон олимпия захиралари коллежида ёш оилаларни мустаҳкамлаш,    соғлом турмуш тарзини тарғиб этиш, кун тартибини оқилона режалаштириш, тўғри овқатланиш, зарарли одатларни бартараф этиш, шахсий гигиена қоидаларига риоя қилиш, ёшларнинг тиббий маданиятини юксалтиришга қаратилган  машғулотлар, спортнинг бир неча тури бўйича мусобақалар ўтказилади.

Фахриддин  ИБАЙДУЛЛАЕВ

Суратларда: форум тадбирларидан лавҳалар.

З. Умрзоқов олган суратлар.

Семинар

Андижон индустриал педагогика коллежида "Янги ўқув йили - янги марралар сари" мавзусида амалий семинар бўлиб ўтди.

Тадбирда муҳтарам юртбошимиз Шавкат Мирзиёев етакчилигида мамлакатимизда ёшлар, уларнинг камолоти, пухта билим олиши ва касб-ҳунар эгаллашлари учун кенг имкониятлар яратилганганлиги, шунингдек, ўрта махсус таълим муассасалари моддий-техника баъзасини мустаҳкамлаш, таълим-тарбия, касб-ҳунар ўргатиш жараёнларини давр талаблари даражасида олиб бориш борасида кенг кўламли ишлар олиб борилаётганлиги таъкидланди.

Ўзбекистон Республикаси Президентининг 2017 йил 14 мартдаги "Ўрта махсус, касб-ҳунар таълими муассасалари фаолиятини янада такомиллаштириш чора-тадбирлари тўғрисида"ги қарори ижросини таъминлаш, янги ўқув йилига пухта ҳозирлик кўриш масалаларига бағишланган мазкур семинарда бошқарма тасарруфидаги таълим муассасалари директорлари, уларнинг ўқув ва хўжалик ишлари бўйича ўринбосарлари иштирок этди.

- 2017-2018 ўқув йилида таълим муассасаларимизда 103 ихтисослик бўйича мутахассислар тайёрланади, - дейди  вилоят ўрта махсус, касб-ҳунар таълими бошқармаси бошлиғи    Фурқатбек Бузруков. - Айни кунларда вилоятимиздаги  академик лицей ва касб-ҳунар коллежларида янги ўқув йилига пухта ҳозирлик кўрилмоқда. Хусусан, ўтказилган семинар бу борадаги илғор иш тажрибаларини оммалаштиришга, соҳа ходимларининг билим ва малакаларини янада бойитишга ёрдам берди.

 Иштирокчилар дастлаб коллеж радиоси фаолияти билан танишдилар, сўнг жорий йилда мазкур таълум муассасасига ўқишга қабул қилинган ўқувчиларнинг қасамёд қабул қилиш маросимида иштирок этди. Шунингдек, "Томорқа дастури" бўйича йил давомида олиб борилган ишлар акс эттирилган видеороликлар, махсус ва умумтаълим фанлари ўқтувчиларининг "Мустақиллик" ва "Хотира" дарс машғулотлари ҳамда уларнинг янги ўқув йилига тайёрлаган иш ҳужжатлари кўриб чиқилди.

Шундан сўнг мавзу бўйича қатор маърузалар тингланди. Иштирокчилар томонидан маърузалар ҳамда мазкур йўналишдаги ишларни янада юқори босқичга кўтариш, самарадорлигини ошириш юзасидан таклиф, фикр ва мулоҳазалар билдирилди.

Иштирокчилар ўзларини қизиқтирган барча саволларга мутахассислардан батафсил жавоблар олди.

Наргиза ХУШВАҚОВА,

вилоят ўрта-махсус, касб-ҳунар таълими бошқармаси бош мутахассиси.

Суратда: тадбирдан лавҳа.

Эртага вилоятимизда “Фидойинг бўлгаймиз сени, Ўзбекистон!” шиори остида “Ёш оилалар ва қизлар” I республика форуми тадбирлари бошланади.

Бугун вилоят ҳокимлигида форум доирасида ўтказилиши белгиланган тадбирлар, уларнинг мазмун-моҳияти, аҳамияти ва ўтказилишига бағишланган матбуот анжумани бўлиб ўтди.

Оммавий ахборот воситалари, кенг жамоатчилик вакиллари, ёшлар иштирок этган тадбирда вилоят ҳокими ўринбосари, хотин-қизлар қўмитаси раиси Манзурахон Юнусова оммавий ахборот воситалари ва иштирокчиларга Ўзбекистон Республикаси давлат мустақиллигининг 26 йиллик байрами олдидан Ўзбекистон Хотин-қизлар қўмитаси ташаббуси билан вилоят ҳокимлиги, хотин-қизлар қўмитаси, Ўзбекистон Ёшлар иттфоқи вилоят кенгаши ҳамда қатор ташкилотлар ҳамкорлигида Ўзбекистон Республикаси Президентининг “Ёшларга оид  давлат сиёсати самарадорлигини ошириш ва Ўзбекистон Ёшлар иттифоқи фаолиятини қўллаб-қувватлаш тўғрисида”ги фармони ижросини таъминлаш, ёш оилаларни мустаҳкамлаш, қизларни юксак одоб-ахлоқ тамойиллари асосида тарбиялаш, уларнинг ижтимоий-сиёсий фаоллигини ошириш, касб-ҳунар ўргатиш, кийиниш ва муомала маданиятини ошириш, оилавий ҳаётга тайёрлаш, онги ва қалбини турли ғоявий таҳдидлардан ҳимоя қилиш, соғлом турмуш тарзи кўникмаларини шакллантириш мақсадида ўтказилаётган форум, унинг мазмун-моҳияти ва  аҳамияти  хусусида кенг маъмумотлар берди.

Йиғилишда Ўзбекистон Ёшлар иттифоқи вилоят кенгаши раисининг ўринбосари, Э. Абдуқодиров, вилоят матбуот ва ахборот бошқармаси бошлиғи А. Султонов ва бошқалар форум доирасида тадбирларни юқори савияда, уюшқоқлик билан ўтказиш, кенг тарғиб этиш, оммавий ахборот воситаларида ёритиш масалалар юзасидан ўзларининг таклиф, фикр ва мулоҳазаларини билдирдилар.

 Журналистлар, иштирокчилар тадбирларни ўтказилиши бўйича ўзларини қизқтирган барча саволларга батафсил жавоблар олдилар.

Ф.ИБАЙДУЛЛАЕВ

*     *     *

Вилоятимизда “Ёш оилалар ва қизлар”

I республика форуми доирасида қуйидаги тадбирлар ўтказилади:

1.                “Мен ҳам етакчи бўламан” мавзусида ёшларнинг ижтимоий-сиёсий фаол, депутат ва раҳбар аёллар билан учрашувлари. Тадбир вилоят касаба уюшма ташкилотлари бирлашмасида 8 август куни бўлиб ўтади.

2.                “Таълим ва фан” мавзусида илмий-амалий конференция. Шунингдек, китоб акцияси, янги китоблар тақдимотлари. Тадбирлар 9 август куни Андижон давлат университетида бўлиб ўтади.

3.                Ёшларни касб-ҳунарга йўналтириш мақсадида “Ким нимага қодир?” мавзусида маҳорат дарслари, кўргазмалар ташкил этилади. Тадбир 10 август куни вилоят “Баркамол авлод” болалар ижодиёти марказида бўлиб ўтади.

4.                “Соғлом турмуш тарзи – саломатлигимиз гарови” мавзусида акция. Акция доирасидаги тадбирларда соғлом турмуш тарзини тарғиб этишга, шунингдек, кун тартибини тўғри режалаштириш, тўғри овқатланиш, зарарли одатларни бартараф этиш, шахсий гигиена қоидаларига риоя этиш, ёшларнинг тиббий маданиятини оширишга қаратилган  машғулотлар, спорт фестивали доирасида эса спортнинг бир неча тури бўйича мусобақалар ўтказилади. Тадбирлар 11 август куни Андижон олимпия захиралари коллежида бўлиб ўтади.

Вилоятимизнинг барча ёшларини форум тадбирларида фаол иштирок этишга чақирамиз.