(30-cон) мулоҳаза

Дунёда ҳеч бир инсон меҳрсиз яшай олмайди. Ҳар ким ҳам ўз яқинлари ва дўстларидан меҳр кўришни, улар олдида ҳурмати, қадр-қиммати баланд бўлишини истайди.

Жисм учун озуқа қанчалик зарур бўлса, кўнгил учун меҳр ва эътибор ҳам шунчалик муҳим ҳисобланади. Агар кимда ким яқинларидан, дўст-у ёрларидан ўша туйғуни ҳис қилмас экан, унинг қалбини турли бўлмағур ўй-хаёллар эгаллаб олади, ўзини бутунлай ёлғиз ҳис қила бошлайди. Борган сари қўпол ва қўрс бўлиб қолганини ўзи ҳам сезмай қолади. ҳатто, тушкунликка тушиб қолиб, бирор касалликни орттириб олиши ҳам ҳеч гап эмас.

 Айниқса, бу борада болаларга алоҳида эътибор қаратиш ўта муҳимдир. Ота-она фарзандига болалигидан бошлаб, етарли меҳр бермаса, унга нисбатан эътиборсиз ва лоқайд муносабатда бўлса, қувончли кунларида ёнида турмаса, табиийки фарзанди вақтлар келиб, ота-онасига ҳам шундай жавоб қайтариши мумкин.

Орамизда шундай инсонлар борки, меъёрни унутмаган ҳолда фарзандларига доимо меҳрибон ва ширинсўз, чиройли тарбия бериб, оқил, аҳлоқ-одобли қилиб вояга етказмоқдалар. Ўша фарзандлар келажакда албатта, ҳаётда ўз ўрнини топа оладиган, эл-юртга манфаат келтирадиган инсонлар бўлиб улғайишларига асло шубҳа йўқ.

 Азизлар, меҳр ҳар қандай кўнгилга йўл топадиган, ҳар қандай оғир феълли кишини тартибга чақирадиган туйғу ҳисобланади. Энг асосийси, ҳар биримиз ўз яқинларимизга, одамларга  меҳр улашиш бахтидан бенасиб бўлмайлик. Ана шу эзгу амал бизни ҳеч қачон тарк этмасин.

Нилуфар

АБДУқАЮМОВА,

Булоқбоши саноат

касб-ҳунар коллежи ўқитувчиси.

(30-cон) Мутахассис минбари

Фарзандларимиз соғлигини муҳофа қилиш, аҳоли ўртасида турли касалликлар келиб чиқишининг олдини олиш, умуман, аҳоли саломатлигини сақлашда ўз вақтида эмлашнинг ўрни ва роли ниҳоятда катта.

  Эмлаш, яъни вакцинация - юқумли касалликларнинг олдини олишда асосий профилактик тадбир ҳисобланади. Фақат профилактик эмлаш туфайли дифтерия, полиомиелит, қоқшол, кўкйўтал, сил, паротит, грипп, қутуриш, бактериал менингит сингари қатор юқумли касалликлар билан касалланиш ҳамда ушбу касалликларнинг асоратларидан сақланиш мумкин.

Эмлашлар турли ёшларда олиб борилади. Айни кунда эмлаш  вакциналари Жаҳон Соғлиқни сақлаш ташкилоти сертификатларига эга бўлиб, хавфсиз ва яхши самара бериши  амалда ўз тасдиғини топган.

Ўзбекистон Республикасида эмлаш ишлари белгиланган тартиблар доирасида, миллий эмлаш жадвали асосида тизимли равишда, бепул амалга оширилади.  Келажагимиз эгалари бўлган болаларни эмлаш масаласига, айниқса, алоҳида эътибор қаратилади. Хусусан, вилоятимизда ҳам бу борадаги ишлар тизимли равишда олиб борилмоқда.  Ҳар бир инсон ўзини ва фарзандини     соғлом яшаши ва узоқ умр кўриши учун  юқумли касалликларга қарши эмлаши шарт. Ўз фарзандлари саломатлигига бефарқ бўлмаган ота-она албатта, фарзандини ўз вақтида эмлашдан ўтказиш учун зарур чораларни кўради. 

Агар оила бошқа яшаш жойига кўчиб кетса, яъни турар жойини ўзгартирган ёки турли сабабларга кўра эмлаш картаси йўқолган тақдирда ҳам она фарзандини қачон, қайси касалликларга қарши эмланганини аниқ билиши зарур.

Фарзандларини эмлатишдан бош тортган оналар уларнинг ҳаётини хавф остига қўяди. Эмлатиш болани юқумли касалликдан асрашда муҳим жараён ҳисобланади. Ҳаётий ва илмий тажрибалардан келиб чиқиб айтиш мумкинки, фақат эмлатиш туфайли фарзандларимиз турли юқумли касалликлар ва уларнинг асоратидан муҳофазаланади. Шундай экан, миллатимиз равнақини таъминловчи, келажагимиз бунёдкорлари бўлган зурриёдларимиз соғлигига бефарқ бўлмайлик, уларни ўз вақтида эмлатиб боришни унутмайлик.

Гулзира УСМОНОВА,

вилоят ДСЭНМ

 мутахассиси.

(30-cон) Муносабат

Маҳалламиздаги бир хонадонга келин тушди. Келин кўрдига кирган маҳалланинг қиз-аёллари келинчакнинг сеп-сидирғалари кўп ва ранг-баранглигига маҳлиё бўлдилар. Аммо келин жуда ёш эканини кўрганларнинг кўпчилиги "оилани эплаб кетармикан" деган ўйни хаёлларидан ўтказди.

Минг афсуски, бир неча қишлоққа овоза бўлган тўйлари ёш оилага, унинг соҳибу соҳибасига бахт келтирмади. Ҳали чилласи чиқмаган келинчак кўч-кўронини кўтариб ота уйига қайтиб кетди. Орзу-ҳавас деб ёшгина қизни келин қилган оилада тўйдан   кейиноқ қатор муаммолар чиқа бошлади.  Нима эмиш - қиз рўзғор тутумларини яхши билмаскан, тонгда эрта туролмас, эри оила аъзоларининг кўнглини олишни эплай олмаганмиш. Келинчак ҳам ёш эмасми, қайнонасининг қаттиққўллиги, инжиқлиги, хадеб иш буюраверишидан норози бўлибди. Шундай сабаблар туфайли ёш оилага дарз кетди. 

Хўш, бундай бўлишига ким айбдор? Аслида қарс икки қўлдан чиқади. Демак, ёш келинчак оила юмушларини бажаришга тайёр эмас экан, нима учун қайнона келинини ўз қизидай кўриб,  унга уй ишларини, турмуш ва ҳаётнинг паст ва баландини ўргатмади. Наҳотки, қайнона ҳали ўн саккизга тўлмаган қиз унинг барча истакларини муҳайё этади деб ўйласа? Ахир бу ҳақда тўйдан олдин ўйлаш керак эмасмиди? Келин қайнонанинг ҳавои орзу-истаклари қурбони бўлиши керак эмас. 

Албатта, келинчак ҳам ўзининг камчиликларини билган ҳолда қайнонанинг гап сўзларини оғир олмаслиги, у кишини ўз онасидай қабул қилиб, турмушда, оилада ўз ўрнига эга бўлиш учун курашиши, барига сабр қилиб, юмушларни масъулият билан бажармоғи лозим эди.

Афсуски, ундай бўлмади. Эндигина оила қўрғонини барпо этишга киришган икки ёшнинг тақдири ва ҳаёти издан чиқди, парокандаликка юз тутди. Орадан бир йилга яқин вақт ўтса-да, на куёв томон, на келин томон муросага келишни истамаяпти. Наҳотки, ота-она фарзандлари оиласига, уларнинг тақдирига шу қадар эътиборсиз қарасалар? Эшитишимча, пулдор, амалдор қудалар ёш оилани тиклаш ўрнига бир-бирларини айбдор қилиш билан овора, бир гапдан қолиб, кудасининг айтганини қилса ҳаётдаги мавқеи тушиб кетишидан чўчиётган ота-оналар ёшлар - фарзандларининг кўнглига қулоқ тутишни ҳатто ўйлашмаяпти ҳам. Аслида бундай худбинлик сабаб эндигина ўн гулидан бир гули очилган қизнинг пешонасига ажрашган деган тамға босилгани  барчамизни жиддий ташвишга солиши керак. 

Бугун бу каби ҳолатлар ҳаётимизда тез-тез учрамоқда. Ёш оилаларнинг барбод бўлиши, норасида гўдакларнинг тирик етим бўлишига юқоридаги каби эътиборсизлик, шошқалоқлик, ёхуд ота-оналарнинг хою-ҳаваслари асосий сабаб бўлмоқда. Бундан ташқари, эрта никоҳлар туфайли ногирон болалар туғилиши кузатилаётганлиги ҳам ачинарлидир. 

Янги турмуш бўсағасида турган икки ёш оила қурар экан, улар аввало, руҳан ва жисмонан соғлом бўлиши, оилавий ҳаётга тайёр - йигит ҳунарли, ишли, жойли, қиз уй-рўзғор юмушларини яхши билмоғига алоҳида эътибор қаратиш лозим. Агар йигит-қизда бундай кўникма ва жиҳатлар етарли бўлмаса, оила парокандаликка юз тутиши аниқ. Шунинг учун ҳам хонадон катталари, ота-оналар фарзандларини оилавий ҳаётга тайёрлаб боришлари жуда муҳимдир. Айниқса, эрта ва қариндошлар ўртасидаги никоҳларга асло йўл қўймаслигимиз, бунинг ортидан жуда кўп бошқа муаммолар келиб чиқишини асло унутмаслигимиз керак. Бу ишда маҳалла-кўй, кенг жамоатчилик четда турмаслиги, эрта никоҳларнинг олдини олишга қаратилган чораларни қўриши зарур. Шундагини курилажак ёш оилаларимиз мустаҳкам бўлади.

Фарида МАТКАРИМОВА,

Улуғнор тумани.

(30-cон) ўлмас қадриятларимиз.

Атлас, адрас, банорас, беқасам ва шойи каби миллий матолардан тикилган замонавий либослар барча ёшдаги ўзбек қиз-аёлларига ярашади, уларнинг ҳуснига ҳусн қўшади. Қолаверса, бу каби либослар халқимиз, айниқса, ёшларимизда миллий қадриятларга, миллий либосларимизга бўлган ҳурмат туйғуларини янада юксалтиради.

Либос нафақат, инсонга кўрк бўлади, балки унинг одоб-аҳлоқи, дунёқараши, феъл-атвори, маънавияти даражасини, умуман, қандай инсон эканлигини кўрсатувчи воситалардан бири ҳисобланади. Агар ҳаётни кузатсак, миллий урф-одат, анъана ва либосларимизни ҳурмат қиладиган опа-сингилларимизнинг аксарияти кўпчиликнинг эътиборини қозонган, жамиятда ўз ўрнини топа олган инсонлар эканликларига гувоҳ бўламиз. Улар нафақат кийиниши, балки одоб-аҳлоқи, юриш-туриши, кишилар билан ўзаро муносабатда ҳам ҳавасларга муносибдир. Тўғри, кийиниш шахсий масала. Лекин ҳар бир жамиятнинг ёзилган, ёзилмаган қонунлари, одоб-аҳлоқ меъёрлари мавжуд. Жамият аъзоси халқнинг, жамиятнинг вакили сифатида ана шу меъёрларга албатта, амал қилиши керак.

Минг афсуски, бугун очиқ-сочиқ ёки турк, араб халқларига хос тарзда кийиниб олиб, буни маданиятлиликнинг бир кўриниши, деб юрган айрим қиз ва аёлларимизнинг борлигидан кўнглимиз ранжийди. Очиғини айтганда, уларнинг тушунчаси, маънавияти ҳам ҳаминқадар, тарбияга муҳтож кишилардир.

 Яқинда издиҳомда бир аёл билан ёнма-ён ўтириб қолдим. Кун иссиқ бўлса-да, узундан узун кўйлак кийиб, бўйин, юзларини тўсиб рўмол ўраб олган бу аёлни «оғзида илми бор» деб таърифлашганди. Аёл билан суҳбатлашиб, унинг саводсиз, маънавиятсиз, одамлар эътиборида юришга интиладиган худбин аёл эканлигига ишонч ҳосил қилдим. 

Опа, нимага бундай кийиниб олдингиз, деган саволимга пинагини бузмай шундай кийинишга ҳавас киламан, дея жавоб берди.

- Бу ўзбек аёлига хос бўлмаган либоску?

- Нима бўлибди, шундай    кийинсам, бошқалардан ажралиб тураман, ҳамма менга эътибор қаратади. Бунинг нимаси ёмон!?

- Ахир, бундай кийиниш миллатимиз аёллари шаънига доғ туширади, қолаверса, ёш қизларимиз тарбиясига ҳам салбий таъсир кўрсатади-ку!

...Ўзаро суҳбат давомида билдимки, бу аёлнинг фикрлаш доираси шу қадар тор, шу билан бирга, иззатталаб, кўнгли тусаган ишни қилишга ўрганган, маънавияти қалоқ эканлигини билдим. Унинг бундай беўхшов кийинишига наҳотки турмуш ўртоғи,  яқинлари йўл қўйиб берса?

Бу каби кийиниб юриш на миллатимизга, на миллий тарбиямизга мос эмас. Шу боис ҳам опа-сингилларимизнинг бундай ҳолатларда кийиниб юришларига йўл қўймаслик учун қўни-қўшни, маҳалла, кенг жамоатчилик зарур чоралар кўриши лозим. Айниқса, бу борада биз   зиёлилар эътиборли бўлишимиз, ўзини, ўзлигини унутиб қўяётган аёлларни тўғри йўлга чақиришимиз керак. Зеро, уларнинг хатти-ҳаракати ёшларимиз тарбиясига, маънавиятининг нотўғри   шаклланишига салбий таъсир кўрсатмасин.

Ўзбек аёллари қадим-қадимдан ўзларининг ибо-ҳаёси, доно ва уддабуронлиги, ўзига хос   кийиниши билан дунёга донг таратган. Бугун биз халқимизнинг, момоларимизнинг ана шу жаҳатларини давомчилари бўлишимиз, бебаҳо миллий қадриятларимиз давомийлигини таъминлашимиз керак. 

Шу ўринда аждодларимиздан мерос, асрлар шиддатига дош берган иродамиз, сабр-у қаноатимиз, пок умидларимизни ифодаси бўлган миллий либосларимизга, ўзбекона кийиниш одобига беписанд қарамаслигимиз, ана шу бетакрор меросимизга, гўзал анъаналаримиз, ўзбекона одобу андишага ҳамиша ҳурмат ва эҳтиромда бўлишни унунтмаслигимиз лозим. Шундагина биз фарзандларимиз, ёшларимиз тарбиясини тўғри олиб бориб, халқимизнинг кийиниш билан боғлиқ гўзал удумлари давомийлигини таъминлай оламиз.

Муқаддасхон ҚОСИМОВА,

Андижон машинасозлик касб-ҳунар коллежи

директорининг маънавий-маърифий ишлари бўйича ўринбосари.

(30-cон) Қалб туFёни

Мен мустақил юрт - Ўзбекистон фарзандиман. Бундай гўзал ва жаннатмонанд юртда туғилганимдан беҳад бахтиёрман. Чунки юртимиз нафақат гўзал, киндик қонимиз тўкилган муқаддас гўша, балки унинг қуёшдек қайноқ меҳрли, истараси иссиқ, ширинсўз  одамлари, бу заминда ҳукм сураётган тинчлик-осойишталик билан ҳам биз учун янада ардоқлидир. 

Тинчлиги барқарор бу юрт одамлари меҳнаткаш, ҳалол, имони бут, оилапарвар ва албатта, бир сўзлидур. Жаннатмонанд ўлкамнинг  инсонларидаги бир-бирларига ҳурмат-эътибор, меҳр ва оқибатга таъриф ожиз.

Ўз кучига суянгувчи, душманга тик боқувчи, оиласини, она-тупроғини асраб авайлагувчи бу юрт фарзандларининг ғурури тоғдай баланд, бағри кенгдур. Ўзига илк Ватан бўлган,  дунёнинг бирор бир халқида бўлмаган муқаддас  бешигини қучган, ота-онаси бағрида улғайган, ёшлик сурурини сурган, меҳнат қилиб қадр топган, ўз ёрига садоқат кўрсатган, ҳалол ризқдан фарзандларига луқма едирган, уларни юрт корига камарбаста инсонлар қилиб вояга етказган, набираларини елкасида катта қилиб, кексалик гаштини сураётган улуғ ўзбек халқининг дилбанди эканлигимдан қалбим фахрга тўлади. 

Мен шу юртда туғилиб ўсдим. Боболарим ўгитини тинглаб, улғайдим. Онам менга миллий қадрият, урф-одат ва анъаналаримизни ўргатди, Ватан қанчалик қадрли макон эканлигини англатди. Отамдан имон ва эътиқодни, ғурур ва жасоратли бўлишни, меҳнатсеварликни ўргандим. Мен ҳам барча тенгдошларим каби ватанимга, жамиятимизга нафи тегадиган инсон бўлиб етишишни ният қилганман, озод ва обод Ватанимга хизмат қилиш учун белни маҳкам боғлаганман. Юртимиз ёшларига яратиб берилган кенг имкониятлардан унумли фойдаланиб, мен ҳам ўз тадбиркорлигимни йўлга қўймоқчиман. Асосий мақсадим, яхшилик ва эзгулик. Ватанимга содиқ фарзанд бўлиш.  Мен бу йўлдан ҳеч қачон ортга қайтмайман.

Гулноза РАСУЛОВА,

Қўрғонтепа индустриал педагогика коллежи ўқувчиси.

(30-cон) Ҳуқуқий маслаҳатхона

Ўз вақтида берилмаган таътилни кейинчалик олиш мумкинми?

Корхонамиз МЧЖ шаклида ташкил этилган. қатор йиллар мобайнида таътил жадваллари тузилмаган, ходимларга ушбу давр учун меҳнат таътили ҳам берилмаган. Раҳбарият ўзгарди, энди таътиллар ўз вақтида берилмоқда. Бироқ 2014-2015 йиллар учун баъзи ходимларга таътил берилмаган.

Агар таътил ўз вақтида берилмаган бўлса, ўтган йиллар учун меҳнат таътилларини бериш тартиби қандай? Таътилни икки ва ундан кўп йил ўтганидан кейин ҳам олиш мумкинми? Уларга ҳақ тўлаш тартиби қай тарзда амалга оширилади?

Б. Абдуллаева, ҳисобчи.

- Ўзбекистон Республикаси Меҳнат кодексининг 143-моддасига кўра, йиллик асосий таътил биринчи иш йили учун мазкур иш берувчида 6 ой ишлангандан кейин берилади. Таътил ҳар йили, шу таътил берилаётган иш йили тугагунга қадар берилиши лозим. Ишлаб чиқариш тусидаги сабабларга кўра жорий йилда таътилни тўлиқ бериш имкони бўлмаган алоҳида ҳолларда, ходимнинг розилиги билан таътилнинг 12 иш кунидан ортиқ бўлган қисми кейинги иш йилига кўчирилиши мумкин, шу йили ундан албатта, фойдаланилиш лозим.

18 ёшга тўлмаган ходимларга йиллик таътилни, шунингдек, Меҳнат Кодексининг "Меҳнат шароити ноқулай ва алоҳида тусга эга бўлган ишлар учун бериладиган йиллик қўшимча таътил" деб номланган 137-моддасида кўрсатилган йиллик қўшимча таътилларни бермаслик таъқиқланади.

Йиллик асосий таътил иккинчи ва ундан кейинги иш йиллари учун таътиллар жадвалига мувофиқ иш йилининг исталган вақтида берилади. Бироқ бунда ишнинг мароми ва шахснинг қулай вақтда таътил олиш ҳуқуқи ҳам бузилмаслиги лозим.

Меҳнат Кодексининг 145-моддасига мувофиқ, агар таътилдан фойдаланишга тўсқинлик қилувчи сабаблар таътил бошлангунга қадар келиб чиққан бўлса, ходим билан иш берувчи ўртасидаги келишувга биноан таътилдан фойдаланишнинг янги муддати белгиланади. Бундай сабаблар таътил даврида келиб чиққан ҳолларда таътил тегишли кунлар сонига узайтирилади ёки ходим билан иш берувчининг келишувига биноан таътилнинг фойдаланилмай қолган қисми бошқа муддатга кўчирилади.

Агар ходим белгиланган муддатда таътилнинг бошланиш вақти тўғрисида ўз вақтида хабардор қилинмаган ёки унга таътил бошлангунга қадар таътил вақти учун ҳақ тўланмаган бўлса, таътил ходимнинг аризасига мувофиқ бошқа вақтга кўчирилади.

Агар қонунни бузган ҳолда маъмурият ходимга бир неча йил мобайнида таътил бермаган бўлса, у таътил олиш ҳуқуқини йўқотмайди, чунки меҳнат қонунчилигида таътил бериш талаби бўйича даъво қилиш муддати белгиланмаган. Шу муносабат билан иш берувчида ходимга барча фойдаланилмаган ҳақ тўланадиган таътилларни бериш мажбурияти сақланади.

Бундан аввалги иш даврлари учун йиллик таътиллар     навбатдаги календарь йил учун таътиллар жадвали доирасида ёки ходим билан иш берувчи ўртасидаги келишув бўйича берилиши мумкин.

Бунда ўртача ойлик иш ҳақини ҳисоблаб чиқариш тартибининг (Вазирлар Маҳкамасининг 11.03.1997 йилдаги 133-сон қарори билан тасдиқланган) 1-бандига мувофиқ таътиллар вақтига ҳақ тўлаш учун ўртача ойлик иш ҳақи ҳисоблаб чиқариш кунидаги тарификация бўйича белгиланган иш ҳақи ёки лавозим маошидан келиб чиққан ҳолда уларни ҳисоб-китоб давридаги тарификация бўйича белгиланган иш ҳақи ёки лавозим маошидан ошган сумманинг биринчи йил ишловчиларга ўн иккидан бирига, ўрта махсус ва ҳунар-техника ўқув  юртлари ўқитувчилари учун ўндан бирига оширган ҳолда ҳисоблаб чиқарилади. Бунда тарификация бўйича белгиланган иш ҳақи ёки лавозим маошидан ошган суммаларга ишбай асосида ишлаб топилган қўшимча иш ҳақи, мукофотлар, қўшимча тўловлар, иш ҳақига қўшимча ҳақлар ва ижтимоий суғурта бўйича бадаллар ҳисобланадиган бошқа тўловлар киради.

Иш берувчида бундан аввалги йиллар учун ходимга таътиллар бериш мажбурияти борлигини ҳисобга олиб, ходим календарь йил мобайнида турли иш йиллари учун бир нечта таътилдан фойдаланиши мумкин.

 Саволга Андижон шаҳар бандликка

кўмаклашиш маркази

Давлат меҳнат ҳуқуқ инспектори

Донёрбек  ДИЛШОДОВ

жавоб берди.

(30-cон) 2017 йил - Халқ билан мулоқот ва инсон манфаатлари йили

Жорий йилнинг 12 июль санаси мамлакатимиздаги сиёсий партиялар учун тарихий кунга айланди. Шу куни Ўзбекистон Республикаси Президенти Шавкат Мирзиёев раҳбарлигида Парламент палаталари, сиёсий    партиялар, Ўзбекистон Экологик ҳаракати, халқ депутатлари вилоят, туман ва шаҳар кенгашлари фаолиятининг таҳлили ҳамда истиқболдаги вазифаларига бағишланган онлайн йиғилишда бу борадаги ишларни янада юқори босқичга кўтариш юзасидан  муҳим ва долзарб масалалар атрофлича муҳокама этилди.

Йиғилишда Юртбошимиз сиёсий партияларнинг бугунги кундаги фаолиятига танқидий баҳо бериб, шиддатли ривожланиш даврида фуқаролик жамиятининг ушбу тизимлари замон билан ҳамнафас иш олиб бормаётганликларини кўрсатиб ўтди.

Давлатимиз раҳбарининг: "Бугун замоннинг ўзи сиёсий партияларнинг иш услубини тубдан ўзгартириш, уларнинг аҳоли, электорат билан мулоқотини тизимли йўлга қўйишни талаб этмоқда. Энди "мудраб ётган" сиёсий партиялар уйғониши лозим. Улар баландпарвоз гапларни четга суриб, аниқ амалий ишлар билан одамларимиз, сайловчилар ишончини қозониши, уларнинг қалбидан жой олиши керак" деган сўзлари менимча, ҳар бир партия аъзоси фаолияти учун дастуриламал бўлади.

Жорий - Халқ билан мулоқот ва инсон манфаатлари йилида сиёсий партиялар ва уларнинг фаоли, аъзоси ўзининг аниқ белгиланган режасига мувофиқ, амалий ишларни олиб бориши кераклиги айни кундаги долзарб масалалардан биридир. Дарҳақиқат, аслида депутат халқ билан мулоқотда унинг вакили сифатида одамларнинг, хусусан, ўз партияси электорати манфаатларини илгари суриши, сайлов дастурида белгиланган вазифалар ижросини таъминлаш учун астойдил ҳаракат қилиши, ташаббускорлик кўрсатиши лозим. Уларнинг ана шу саъйи-ҳаракатлари замон шиддатига, ислоҳотлар самарасига, фуқаролар талаби ва юрт равнақи билан ҳамоҳанг бўлиши керак. Президентимизнинг ўринли эътирозидан сўнг нафақат парламент, сиёсий партиялар, балки биз депутатлар ҳам  фаолиятиимизни талаб даражасида олиб бориш учун зарур чораларни кўришимиз кераклигини тушуниб етдик. Энди янгича руҳ билан ишлаб, фаолиятимизни такомиллаштириб, тубдан қайта ташкил этамиз ва самарадорлигини оширишга жиддий эътибор қаратамиз.

Танқид - келажак меваси! Президентимиз томонидан билдирилган эътирозлардан тўғри хулоса чиқариб, бўлажак сайловларга қадар партиямизнинг дастурий мақсадларига эришиш, электоратимиз ишончини қозониш учун  астойдил меҳнат қилишимиз лозим. Хусусан, партиямиз сайлов платформасида илгари сурилган мамлакатимиз тараққиёти, иқтисодий салоҳиятини юксалтириш борасида амалга оширилаётган ислоҳотлар давомийлигини таъминлаш, тарихий, маданий, бой маънавий-аҳлоқий қадрият ва анъаналар асосида жамиятимизда юксак ҳуқуқий ва сиёсий маданиятни мустаҳкамлаш, маънавий юксалишга эришиш, миллий қадриятларимизни асраб-авайлаш, мазмунан бойитиш, ёш авлодни халқимизнинг бой маданий ва маънавий меросига ҳурмат руҳида тарбиялаш  масалаларига устивор аҳамият қаратилган.

Шунингдек, партиямиз дастурида халқимизнинг ўтмишини ўзида мужассам этган миллий қадриятларимиз намунаси ҳамда халқимизнинг бебаҳо мулки ҳисобланган маданий мерос объектларини ҳимоя қилиш, уларни янада обод масканларга айлантириш, ички ва халқаро туризмни ривожлантириш масалаларига кенг ўрин берилган. Жумладан, вилоятимиздаги мавжуд  маҳаллий ва республика аҳамиятига молик 400 га яқин тарихий ва маданий мерос объектлари ички туризм-ни ривожлантириш борасида кенг имкониятларга эга. Айни кунда партиямиз томонидан мазкур йўналишда ҳам муайян ишлар олиб борилмоқда.

Мамлакатимиз ижтимоий-сиёсий ҳаётидаги энг муҳим масалалардан бири бўлган ёш авлодни истиқлол ғоялари,    халқимизнинг миллий қадрият, анъана ва урф-одатларига ҳурмат руҳида тарбиялаш, уларнинг қалбида она Ватанга муҳаббат  туйғуларини мустаҳкамлаш борасида ҳам партиямиз томонидан кенг кўламли тарғибот-тушунтириш ишлари олиб борилмоқда.

Бундан ташқари, хотин-қизларнинг жамиятда тутган ўрнини ошириш, аёлларни ҳуқуқий, ижтимоий, иқтисодий, маънавий-ахлоқий жиҳатдан қўллаб-қувватлаш, хотин-қизлар бандлигини таъминлаш, тадбиркорлигини ривожлантириш масалаларига ҳам партиямиз алоҳида эътибор қаратиб келмоқда. Бунинг самараси ўлароқ, вилоятимизда аёллар, хотин-қизлар ҳар соҳада фаолликларини намоён этиб, халқ фаравонлигига ва Ватан тараққиётига ўзларининг муносиб ҳиссаларини қўшмоқдалар. Бу борада   партиямиз аъзоси бўлган фаол хотин-қизлар фаолияти ҳам алоҳида эътирофга сазовор.

Аёл аввало, авлодлар давомийлигини таъминловчи муқаддас зот. Шу маънода бўлажак оналаримиз - ёш қизларимизни ҳар томонлама мукаммал шахс қилиб тарбиялашда барчамиз эътиборли бўлмоғимиз даркор. Аввало, мустаҳкам оилани бунёд этишда қизлар тарбиясига эътиборли бўлиш бугунги кунда барчанинг масъулиятли вазифаси бўлмоғи керак. Замонавий, фаол ва етакчи аёлларни тарбиялаш учун оилада, жамиятда  соғлом маънавий  муҳитни шакллантиришимиз зарур. Бу борада хотин-қизлар қўмиталари, ҳамкор ташкилотлар билан биргаликда маҳаллаларда, меҳнат жамоаларида, таълим мууассасаларида ўтказилаётган турли тадбирларимиз, давра суҳбатлари ўзининг ижобий самараларини бермоқда. Хотин-қизлар билан боғлиқ салбий ҳолатларнинг олди олинмоқда.

Партиямиз томонидан хотин-қизлар бандлигини таъминлаш, ёш қизларни турли ҳунарларга ўргатиш, ҳаётга тайёрлаш, оилаларни мустаҳкамлаш борасида ҳам эътиборга молик ишлар олиб борилмоқда.

Давлатимиз раҳбари маъруза давомида халқ олдида намуна кўрсата олган депутатларга "адолатли депутат", "халқпарвар депутат", "меҳнаткаш депутат" дея ишонч билдириш орқали уларни қўллаб-қувватлаш ҳақидаги фикрлари ҳам алоҳида эътирофга сазовордир. Бу ҳам албатта, депутатларнинг ўз вазифасига бўлган ҳурматини кучайтиришга, зиммасидаги масъулиятни сидқидилдан бажаришга ёрдам беради.

Бир сўз билан айтганда, йиғилишда Юртбошимиз тўхталиб ўтган ҳар бир масала бўйича партиямиз фаоллари ўз олдига аниқ вазифалар белгилаб олди. Бундан буён ана шу вазифаларни тўла-тўкис бажариш  орқали юртимиз равнақини янада юқори даражага кўтариш, халқимиз турмуш фаровонлигини юксалтириш, партиямиз электорати ҳуқуқ ва манфаатларини ҳимоя қилишда фаол иштирок этамиз ва ўзимизнинг муносиб ҳиссамизни қўшамиз.

Садбархон МАМИТОВА,

Ўзбекитон "Миллий тикланиш демократик партияси" фаоли, халқ депутатлари вилоят Кенгаши депутати.

(30-cон)

Борлиғим, борлигим, ўзинг Ватаним,

Чаманлар ичида чиройинг тенгсиз.

Дунёда қанча юрт довруғи баланд,

Аммо мен барибир яшолмам сенсиз.

Сен менинг боғимсан, мен бир ниҳолинг,

Бағрингда яшнайман, меҳрингдан қониб.

Қуёшинг тафтида мангу исинай

Сенинг муҳаббатинг, ишқингда ёниб.

Азиз тупроғингга олтин тенг келмас,

Алишмам сийм-у зар, тиллога ҳеч ҳам.

Меҳрингнинг қиёси йўқ онам мисоли,

Сен елка тутасан бўлиб меҳрибон отам.

Орзуим, умидим сен билан бирга,

Ҳамиша обрўйинг юксакка етсин.

Бобо ва момомлар қўли дуода,

Минг йиллик армонлар қалбни тарк этсин.

Ойгул НАЖМИДДИНОВА

(30-cон)

Бугунги кунда мамлакатимизда ёшларнинг ўқиб, пухта билим олишлари учун кенг имкониятлар яратиб берилган. Ана шундай имкониятлардан унумли фойдаланиш мақсадида шу кунларда кўплаб ёшлар олий ўқув юртларига кириш учун  тест синовларига астойдил тайёргарлик кўрмоқда.

Вилоятимиздаги мавжуд 4 та олий ўқув юртига кириш учун 68 минг 64 нафар абитуриент ҳужжат топширган бўлиб, умумий ҳисобда 1 ўринга 17,5 талабгор тўғри келади. Тест синовларидан муваффақиятли ўтган ёшларнинг 2912 нафарига белгиланган квоталар бўйича  талаба бўлиш бахти насиб этади.

Жорий йилда бакалавр йўналиши бўйича Андижон давлат университетига 23 йўналишда 1 минг 422 та қабул квотаси берилган. Андижон машинасозлик институтига 935 нафар, Андижон тиббиёт институтига 520 нафар, Андижон қишлоқ хўжалик институтига 1000 нафар талаба қабул қилиниши белгиланган.

Маълумки, олий таълим муассасаларига кирувчилар учун қатор имтиёзлар тизими яратилган. Шулардан бири муддатли ҳарбий хизматни ўтаб, тегишли тавсияномага эга бўлган фуқароларга олий таълим муассасалари бакалавриат таълим йўналишларига ўқишга киришда тест синовлари натижалари бўйича тўплаган балининг 50 фоизи миқдорида қўшимча балл бериш имтиёзи белгиланганлигидир.

Абитуриентлар учун яратилаётган яна бир муҳим янгилик - бу 2017-2018 ўқув йилидан бошлаб тўлов-контракт пулининг оширилган ставкаси бўйича қўшимча қабулни амалга ошириш жорий этилганлиги бўлди. Бундай шаклдаги қабул учун квота белгилашда аввало таълим муассасаларининг имкониятлари ҳисобга олинади.

Шунингдек, ўтиш балидан паст тўплаган, аммо 68 баллдан кам бўлмаган абитуриентлар учун уларнинг оширилган контракт пулини тўлаш истагидан келиб чиқиб, кетма-кетлик тартиби сақланган ҳолда тўлов-контракт пулининг оширилган ставкаси бўйича қўшимча қабул қилиш амалга оширилади.

Талабалик остонасида турган барча ёшларимизга тест синовларида омад ёр бўлишини тилаймиз!

Муроджон ТЎХТАНАЗАРОВ

(30-cон)

Вилоятимиздаги барча болалар оромгоҳларида бўлгани каби Хўжаобод туманидаги "Боғбон" ормгоҳида ҳам болажонлар мириқиб дам олмоқда.

Жорий мавсумда 450 нафар бола дам олиши белгиланган мазкур оромгоҳда болажонларнинг кўнгилли хордиқ чиқаришлари учун зарур барча шароитлар яратилган.

Одинахон Болтабоева раҳбарлик қилаётган оромгоҳда турли хил спорт ҳамда фан тўгараклари ташкил этилган бўлиб, улар дам олаётган болаларнинг билимларини янада бойитишга, таътилни қизиқарли ва мазмунли ўтказишларига хизмат қилмоқда. Бундан ташқари, бош тарбиячи Дилфузахон Тоҳирова етакчилигида фаолият кўрсатаётган 24 нафар тарбиячи ва мураббийлар томонидан  ўтказилаётган турли қизиқарли тадбирлар, кўнгилочар дастурлар, спорт мусобақалари болажонларнинг мазмунли дам олишларини таъминламоқда.

- Оромгоҳда мазза қилиб дам оляпман, кўплаб дўстлар орттирдим, - дейди Андижон шаҳридаги 19-умумтаълим мактаби ўқувчиси Мубина Каримова. - Ўртоқларим билан "Мушоира кечаси", "Эртаклар - яхшиликка етаклар", "Қувноқ болажонлар" сингари тадбирлар ҳамда қатор спорт мусобақаларида қатнашиб, билимларимизни, саломатлигимизни мустаҳкамладик. Бизнинг мароқли дам олишимиз учун мана шундай қулай шароитлар яратиб берганликлари учун барча ташкилотчиларга  раҳмат айтаман.

Айниқса, оромгоҳга Ўзбекистон ёшлар иттифоқи фаоллари, ёзувчи ва шоирлар, санъаткорлар ташрифи болажонларга бир олам қувонч улашмоқда.

Дилафрўз Раҳматжонова.