Юртнинг обод гўшалари

Юртимиздаги ўзгаришлар, ислоҳотлар самараси ўлароқ, кўплаб қишлоқ ва шаҳарларимиз йилдан-йилга обод бўлиб бормоқда. Қўрғонтепа туманидаги Суткон маҳалласи обод ва кўркам масканга айланётган ҳудудлардан биридир.

Ижобий ўзгаришлардан айни кунда 300 дан ортиқ хонадонда истиқомат қилаётган маҳалла аҳли беҳад мамнун. Маҳаллада асосан, қирғизлар, ўзбек ва бошқа миллат      вакиллари ҳамжиҳатликда яшаб келади. Шунинг учун ҳам улар баҳор байрамларини катта шодиёна билан нишонлашмоқда.

-      Маҳалла фуқаролар йиғинининг раиси Абдуқодир Ашуров ва маҳаллада иш олиб бораётган ҳоким ёрдамчиси, хотин-қизлар фаоли ҳамда ёшлар етакчиси фаолиятидан одамлар хурсанд, - дейди меҳнат фахрийси Абдумўмин ота Эргашев қишлоқ нуронийлари номидан. - Улар ўзларининг фаоллиги, олиб бораётган ибратли ишлари билан одамларнинг ишончини оқламоқда, ҳурматини қозонмоқда.

Дарҳақиқат, фуқаролар йиғини масъуллари режа асосида иш олиб боришиб, мавжуд муаммоларни бартараф этиш, одамларни ўз ҳаётидан рози қилиш борасидаги ишларни намунали тарзда адо этиб келмоқда.

Масалан, МФЙ раиси Абдуқодир Ашуровнинг ташаббуси билан Суткон қабристонида бир неча кун давомида катта ҳашар ўтказилди. Натижада қабристон ва унинг атрофи тозаланиб, ободонлаштирилди.

Насирулло Садирбеков етакчилигида маҳалла ёшлари катта асфальт йўл четларини ободонлаштириш ишларини бажаришди. Ёмғир ва қор оқибатида ўйилиб кетган йўлнинг чуқур-чаноқлари шағал билан тўлдириб чиқилди. Айниқса, мутасадди ташкилотлар томонидан маҳалла ички йўлларининг таъмирланаётганидан ҳам одамлар хурсанд.

-      Маҳалланинг фаол ёшларидан Шайбек Бакиров бошчилигидаги маҳалла йигитларига ҳамма дуода, - дейди суҳбатдошимиз А. Эргашев. - Улар неча йиллар мобайнида қаровсиз ҳолдаги автобус бекатларини таъмирлашди. Ҳатто, янги бекат қуришди.

Маҳалла хотин-қизлар фаоли Дилбархон Ғаниева етакчилигидаги аёл-қизлар ҳам ободонлаштириш ишлари, ўтказилаётга ҳашарларда фаол қатнашмоқда. Улар маҳалладаги ҳашарчилар учун турли таомлар тайёрлашиб, ўз ҳиссаларини қўшиб келишяпти.

Меҳнат фахрийлари Мунаввархон Қаландарова ҳамда Мамлакатхон Мирзаеванинг ташаббуси ва саъй-ҳаракати билан қишлоқ марказига ўтов тикилгани таҳсинга лойиқдир. Мазкур миллий ўтовларда баҳор байрамларига ташриф буюрган қишлоқ меҳмонлари ва нуронийларга дастурхон ёзилиб, дўстона иззат-ҳурмат кўрсатилмоқда.

-      2023 йилда улкан мақсадларни режалаштирганмиз, - дейди суҳбатдошимиз МФЙ раиси Абдуқодир Ашуров. - Аниқроғи, туман ҳокимлиги кўмагида жорий йилда Суткон маҳалласини туризм қишлоғига айлантириш бўйича ишлар олиб борилади. Бу ерда сайёҳлар ва туристларнинг кўнгилли хордиқ чиқариши учун зарур шароитлар яратилади. Бунинг учун маҳаллада зарур имкониятлар мавжуд. Ҳудуднинг гўзал табиати, мусаффо ҳавоси шубҳасиз, кўплаб одамларни мафтун этади.

Яқинда "Қўрғонтепа - Суткон" йўналиши бўйича автобус қатновининг йўлга қўйилганлиги ҳам аҳоли учун яратилган яна бир қулайлик бўлди. Маҳалла ҳудудидаги ички ва туман аҳамиятига молик йўлларни таъмирлаш, асфальт ётқизиш ҳам режалдаштирилган.

Маҳаланинг сўлим табиат қўйнида жойлашганлиги, мўътадил об-ҳавоси ёзнинг иссиқ кунларида ҳар қандай кишини бағрига чорлаши тайин. қишлоқ ҳудудидан Қорадарё, Андижонсой, Шаҳрихонсой оқиб ўтади. Бундан ташқари, Суткон канали ҳам ҳудудга ўзгача кўрк бағишлайди.

Умуман, янгиланиш, яшариш фаслининг илк кунларидан бошлаб, маҳаллада кўкаламзорлаштириш, ободонлаштириш ишлари қизғин олиб борилмоқда. Айниқса, Президентимиз ташаббуси билдан амалга оширилаётган "Яшил макон" умуммиллий лойиҳаси доирасида мевали, манзарали дарахт кўчатлари экилмоқда.

Олиб борилаётган ишлар яқин йиллар ичида албатта, ўзининг ижобий самараларини беради. Обод ва яшилликка бурканган маҳалла сайёҳ ва туристлар ташриф буюрадиган вилоятдаги энг гавжум масканлардан бирига айланади.

Сафарали АБДУРАҲИМОВ,

 Ўзбекистон Журналистлар уюшмаси аъзоси.

Муаллим мулоҳазаси

Оила бағридан мактаб остонасига илк қадам қўйган фарзанд  "ғўр", бамисоли  ғунча, энди куртак чиқараётган ниҳолдай бўлади. Бу ниҳолнинг тўғри униб-ўсиши, улкан дарахт бўлиши миришкор боғбоннинг қаровига, меҳнатига боғлиқ. Бошланғич синф ўқитувчиси ҳам ана шу миришкор боғбон каби жажжи вужуднинг қалбига йўл топади, руҳини уйғотади, билим бериб, эзгулик ва комилликка ундайди.

 Устозлар шамдек ёниб, қалбларни ёритади, одамларга зиё улашади, Иссиқ тафти, саховати, бағрикенглиги билан ёш авлодни нурли келажакка чорлайди. Шу маънода, ёш авлод тарбияси, уларга пухта билим беришда бошланғич синф ўқитувчисининг ўрни ва роли ниҳоятда катта. Бошланғич синф ўқитувчиси доимий изланиши, "Тарбиячи ўзи  тарбияланган  бўлмоғи лозим", деган шарқона фалсафий ақидага амал қилган ҳолда ўзида юксак инсоний фазилатларни тарбиялаши, билим ва тажрибасини доимий равишда ошириб бориши лозим.

Биламизки, бошланғич таълим жараёнида бола тўғри ўтириш, ручка ушлаш, чиройли ва тўғри ёзишга ўргатилади.    Рангларни фарқлаб, тасвирда қўллай олиш, ҳаттоки, чиқиндига айланган майда нарсалардан ҳам керакли буюмлар яратиш мумкинлигини ўргатади. Шунингдек, боланинг оғзаки ва ёзма нутқини ўстириш, тафаккури, дунёқараши  ва она- Ватанга муҳаббат туйғуларини шакллантириш ва тарбиялашга алоҳида эътибор қаратилади.

2023 йил - юртимизда "Инсонга эътибор ва сифатли таълим йили" деб номланди. Бу педагоглар, айниқса,  бошланғич синф ўқитувчилари зиммасига янада кўпроқ масъулият юклайди. Кўп йиллик иш тажрибамдан келиб чиқиб, бошланғич таълим сифатини ошириш учун қуйидаги уч асосий босқич дарсларга татбиқ этилса, кутилган натижага албатта эришамиз. Демак, улар қуйидагилар:

1.    Ўқувчиларни дарсга жалб қилиш, уларнинг диққати, ўй-фикрлари  барқарорлигини таъминлаш учун турли қизиқарли психологик машғулотларидан фойдаланиш.

Бу усулда муаллим дарсга ҳам фан ўқитувчиси, ҳам психолог сифатида ёндашиши талаб этилади. Сабаби, ўқувчиларнинг феъл-атвори, қизиқишларини билмаган ўқитувчи эндиликда болалар билан ишлай олмайди. Сиз дарсга  кирдингиз, ўқувчиларнинг барчаси ҳар хил хаёлда, фикрлари тарқоқ,  баъзилари хар хил ўйин билан банд. Мана шундай пайтда, ўқитувчидан кучли нотиқлик талаб этилади. ўқувчилар диққатини ўзингизга қаратиш учун психологик усуллардан фойдаланиш мумкин.

2.    Дарсларда кўргазмали қурол, илғор педагогик технологиялардан унумли фойдаланиш.

Ўқувчилар ҳар бир дарсни гўё бир санъат асаридек қабул қилиши керак. Шифокор ва психологларнинг таъкидлашича, ўқувчилар ўзи олаётган билимнинг 75 фоизини кўриш орқали эгаллайди. Шундай экан, ҳар бир дарсда турли кўргазмалар, қўлда тайёрланган кўргазмали қуроллардан унумли фойдаланиш муҳимдир.

3. Дарсга компетенциявий ёндашув. Компетенция - аниқ мақсадга йўналтирилган билим, кўникмалар, малакалар йиғиндисини амалиётда қўллай билиш технологиясидир.

 Дарс сифати ўтилган дарс ўқувчилар томонидан қай даражада самарали ўзлаштирилганлиги билан белгиланади.  Таълим сифати  ва самарадорлигини ошириш ўқитувчининг дарс давомида компетентлигига ҳам боғлиқдир. Ўқитувчи ҳамиша дарс ўтишга жиддий ёндашиши, дарсларга пухта тайёргарлик кўриши муҳим. Хуллас, у бола билан дўст бўлиб дарс ўтиши лозим.

Бошланғич синф ўқитувчиси бола камолоти учун дастлабки ғиштни қўювчи  меъмордир. У қанчалик аниқ, самарали иш юритса, ўқувчига берилаётган билим асоси қанчалик мустаҳкам бўлса, кейинги йилларда у пухта билим олади, малакали мутахассис бўлиб етишади. Энг асосийси, эл-юрт равнақига муносиб ҳисса қўшадиган инсон бўлиб камол топади.

Шоҳидахон  НАЗАРОВА,

Андижон  туманидаги  24-умумтаълим мактабининг  бошланғич синф ўқитувчиси.

Орамиздаги аёллар

Ҳали бомдод намозига азон чақирилмаган. Ҳатто, хўрозлар ҳам уйқуда. Ташқарида қалин туман, совуқ этни жунжиктиради. Кўчалар бўм-бўш. Сукунатни супургининг товуши бузади.

Катта йўл бўйида жойлашган уйнинг 4- қаватда яшаганим, бу ерга яқиндагина кўчиб келганим боис, пастдаги супурги овози уйимга эшитилади. Уйқум ўчди, чироқни ёқдим. Соат тонгги 5.00. Тавба, шу вақтда ким кўча супуради? Беихтиёр балконга чиқиб пастга қарадим.

Сариқ камзулли аёл катта супурги билан йўл четларини супуриб юрибди. "Кундузи супурса бўлмасмикин?", дея ўйладим.

Ўша аёлни тушда, боламни мактабга кузатаётиб ҳам, кечки пайт чиқинди ташлагани чиққанимда ҳам кўрдим. У чиқинди қутилари атрофларини тозалаб юрарди...

Суриштириб, аёлнинг ўзи билан суҳбатлашдим. Унинг исми Марғуба бўлиб, шаҳар ободонлаштириш бошқармасида фаррош бўлиб ишлар экан.

- Болаликдан ҳамшира бўлишни орзу қилардим, - деб гап бошлайди Марғуба Мадалиева. - Ҳаёт экан, турли синовлар сабаб ўқишга имконим бўлмади, кейин эса турмушга узатиб юборишди. Катта оила, бир ҳовлида тўрт овсинмиз. Турмуш ўртоғим ободонлаштириш бошқармасида дарахт кесувчи бўлиб ишларди. Хуллас, рўзғорга ёрдам бериш учун ёнига кириб ишлашни, рўзғорга ёрдам беришни истадим. Мана, ўн йилдан ошди, турмуш ўртоғим билан ишлаб, рўзғоримизни бутлаб келаяпмиз.

Кўчанинг тозалиги, саранжом-саришта ва ободлигига жавобгар биргина фаррошлар эмас. Гулчилар, дарахт кесувчилар, сувчилар ҳам бор. Аммо улар орасида энг кўп меҳнат албатта, фаррошларники. Андижон шаҳрининг биргина Бобур шоҳкўчасининг ўзига 21 нафар фаррош бириктирилган. Уларнинг барчаси ҳам Марғуба сингари тун пардасини кўтармай туриб иш жойларида бўлади.

Тан олайлик, ҳатто қуёш уйғонмасидан ўз вазифасини бажаришга киришадиган бу меҳнаткаш инсонларни баъзан пайқамаймиз, баъзан меҳнатини қадрламай, ранжитамиз. Аммо бир кун уларнинг ўрнида ишлаб кўрсангиз, бу меҳнатнинг машаққатлари, масъулиятини, об-ҳавонинг инжиқликларию кўчанинг залворли юкини ҳис этасиз. Ана шундагина бу касб эгалари ҳалол ризқ орқасидан бола-чақа боқаётганини тан оласиз!

-      Инсонлар орасида чиқиндини фақат ахлат қутисига ташлайдиган, кўчада, ҳатто тупуришга ҳам уяладиган маданиятли кишилар ва аксинча, эндигина супурилган йўлакка қанд қоғоз, сигарет қолдиғи ёки музқаймоқ қутисини ташлаб кетувчилар, писта чақиб, пўчоғини сочиб ўтувчилар ҳам бор. Начора, одамлар турлича. Бунга кўп ҳам парво қилавермайман. Лекин ҳаётда яхши инсонлар кўп. Айримлар жазирамада қўярда-қўймай  салқин ичимликлар, музқаймоқ  бериб  кетиишади. "Опалар, чарчамадингларми,  чанқамадингларми?", дея икки оғиз илиқ сўз айтиб, кўнглимизни кўтаради. Ана шундай инсонларнинг борлиги учун ҳам меҳнатимизнинг машаққатлари билинмайди,  - дейди Марғуба.

Тонг ёришмасидан иш бошлайдиган бу жувонга маҳалламиз болалари "Тонг маликаси" деб ном қўйиб ҳам қўйишибди.

Йўлни супуриш, чиқиндилардан тозалаш, умуман, вазифаси билан боғлиқ барча ишларни у масъулият билан бажаради. Меҳнатига яраша қанча маош олишини сўраганимда эса, камтарона жилмайиб: "Аллоҳ баракасини беряпти", деб қўйди.

Дарҳақиқат, ободонлаштириш   бошқармаси ишчиларига тўланаётган ҳақ улар қилаётган меҳнатларига яраша эмас. Фаррошлар 2 миллион сўмга етиб-етмай ойлик олишади. Аммо улар нолимайдилар.

- Аввалгига нисбатан шароитлар анча яхшиланган, - дейди Марғуба Мадалиева. - Ходимлар ҳар уч ойда рағбатлантириб турилади. Ҳайит-байрамларда совғалар, мукофотлар берилади. Вилоят ҳокими ҳар йили 8 март байрамида биз учун алоҳида байрам ташкиллаштиради. Яхши ишлаган ишчиларга саёҳатларга, дам олиш масканларига йўлланмалар берилади. Умуман, қаерда, қандай соҳада  ишлашингдан қатъи назар, меҳнатингдан рози бўлиб, вазифангни сидқидилдан, шукроналик билан бажарсанг, албатта кўзлаган мақсадингга эришасан, топган-тутганингга ҳам барака ёғилади.

Баъзи инсонлар фаррошларга паст назар билан қарашга ўрганиб қолган. Худди фаррош одам эмасдек. Баъзилар эса яқин кишисининг фаррош, кўча супурувчи бўлиб ишлаётганидан ор қилади. Аммо билмайдики, чор-атрофни тозалаб, ораста ҳолга келтираётганларнинг саъй-ҳаракатлари туфайли кўчаларимиз, гузарларимиз файзлидир. Озодалик бор жойда хотиржамлик бўлади, бало-қазо нари кетади.

-      Фаррошлигимдан уялмайман, аксинча, фахрланаман, - дейди тонг маликаси Марғуба Мамадалиева. - Негаки, мен ҳалол меҳнат қиляпман, шу иш ортидан бола-чақа боқяпман. Ота-онам, болаларим бағримда, ҳамма нарсам етарли, шунинг ўзи мен учун энг катта бахт.

Муаззам ИБРАГИМОВА,

Ўзбекистон Журналистлар уюшмаси аъзоси.

Шаҳрихон азал-азалдан ҳунармандлар, тадбиркорлар юрти, деб эътироф этилади. Айниқса, туманда ҳунармандчиликнинг пичоқчилик, дўппидўзлик, каштачилик, миллий тўн тикиш сингари қатор йўналишларида ўзига хос тажриба мактаблари яратилган. Ҳунари ортидан даромад топиб, ўзини, юртни бой қилаётган ҳунармандлар жуда кўп.

Мамлакатимизда кейинги йилларда ҳунармандлар, уларнинг фаолиятини қўллаб-қувватлашга қаратилган кенг кўламли ишлар олиб борилмоқда. Уларга давлатимиз томонидан имтиёзли кредитлар ажратилмоқда, самарали иш олиб боришлари учун зарур шарт-шапроитлар яратиб берилмоқда. 

Айни кунда туманда 500 нафарга яқин тадбиркор ва ҳунарманд аёллар давлат рўйхатидан ўтган ҳолда фаолият олиб бормоқда. Уларнинг аксариятини ҳунарманд аёллар ташкил этади. Ҳунармандчиликни ривожлантириш орқали биргина 2022 йилнинг ўзида хотин-қизлар учун 785 та янги иш ўрни яратилди.

Тумандаги Андижонлик маҳалласида яшовчи дўппидўз, "Меҳнат шуҳрати" ордени соҳибаси Ёрқиной Тўйчиевани туманда танимаган одам топилмайди. Чунки у қўли гул дўппидўз, ўзи тайёрлаган ранг-баранг дўппилар билан Шаҳрихон довруғини  юртга ёймоқда. Энг асосийси, юзлаб ёшларга ҳунар ўргатиб, ҳунармандлар, дўппидўзлар сафини кенгайтиришга салмоқли ҳисса қўшиб келмоқда.

-      Дўппидўзлик ҳунарини раҳматли бувим ва онамдан ўрганганман, - дейди Ёрқиной Тўйчиева. - Умуман, дўппидўзлар сулоласининг тўртинчи авлодиман. Оилада беш қиз бўлганмиз, ҳаммамиз ушбу ҳунарни ўрганиб, шу ҳунар ортида ризқимиз баланд бўлди, эл-юрт ўртасида ҳурмат-эътибор топдик.

Аввал, бувим Турғуной она, кейин онам Роҳатхон аядан дўппидўзликнинг нозик жиҳатлари, сир-асрорларини ўрганганмиз. Турмушга чиқиб ҳам ҳунаримни ташламадим. Қайнонам Ёқутхон ҳожи ая ҳамиша мени қўллаб-қувватлади, кўмак берди. Қолаверса, икки нафар қизим ҳам уста дўппидўз бўлиб етишган. Улар ҳам ушбу ҳунарни давом эттириб келишмоқда. Келинларим Фаридахон, Зиёдахон, Мунаввархон ҳам дўппидўзликни пухта ўрганиб олган. Бундан  ташқари, ҳозиргача мендан ҳунар ўрганган 300 нафардан ортиқ шогирдим мустақил равишда дўппидўзлик билан шуғулланишади. 

- Инсоннинг либоси унинг ички дунёсини, одоб-ахлоқини кўрсатади, - дейди Шаҳрихон тумани ҳокимининг ўринбосари, оила ва хотин-қизлар бўлими бошлиғи Зиёдахон Бозорбоева. - Миллий либосларимиз, айниқса, ўзбекнинг дўпписи миллийлигимизни кўрсатувчи воситалардан биридир.

Шу маънода миллий бош кийимимизни эъзозлаб, бошимиздан қўймай кийсак, фарзандларимиз онгига либослар билан боғлиқ миллий урф-одат ва   анъаналаримизни сингдириб борсак, миллий маънавият ва ўзлигимизнинг тобора чуқур илдиз отишига ҳисса қўшган бўламиз

Бугун Ёрқиной опа шогирдлари билан "Куёв дўппи", "Шаҳрихон дўпписи", "Сирға гулли", "Бодом гулли", "Ёппа гулли" дўпииларни тайёрлаб келмоқда. Дўппидўз хонадонида тайёрланаётган сифатли, бежирим дўппилар нафақат Шаҳрихон, Андижон бозорларида, балки қўшни вилоятлар, қўшни Қирғизистон бозорларига ҳам етказиб берилмоқда. 

- Дўппидўзлик ўзбек ҳунармандчилигининг ўлмас санъати, дўппи эса миллий либос, қадриятдир, - дейди Ёрқиной Тўйчиева. - Дўппи нафақат миллий  кийимимиз, балки бошқа турли вазифаларни бажариши билан ҳам аҳамиятлидир, Дўппи бошни иссиқ-совуқдан, шамоллашдан, чанглардан сақлайди. Қолаверса, қадимдан дўппи халқимизда бошнинг давлати ҳисобланган. Шу боис, халқимиз уни азалдан авайлаб-асраган, оёқости бўлишига йўл қўймаган.

Дўппига тикилган гуллар ҳам ўзига хос маъноларни англатади. Дўппининг тепа қисмидаги тўртта гул эркаклар саломатлигини тўрт томондан ҳимоялаб туришини, четларидаги ўн олти гул эса бош кийим соҳибининг серфарзанд ва оиласининг аҳил бўлиши тилагини англатади. Хотин-қизлар дўппиларидаги пат боғлами, қушлар тасвири оқилалик рамзи саналади. "Бодом" безаги эса ҳаёт ва унумдорлик тимсоли, "Илон изи" нақши эса турли балолардан асровчи тумор сифатида эъзозланган.

Ёқутхон опанинг хонадони шогирдлари, маҳалладаги дўппидўзлик ҳунарини ўрганиш истагидаги қиз-аёллар билан ҳамиша гавжум. Айни кунда 10 нафардан ортиқ шогирдга ҳунар сирларини ўргатмоқда. Моҳир шогирдларидан бири Мунаввархон Ҳалимова ҳамиша устозининг ёнида, унинг яқин кўмакчисига айланган.

Уста дўппидўз Ёрқиной опа ўтган йили яна бир ҳайрли ишга қўл урди. У Андижонлик маҳалласида жойлашган туман халқ таълими бўлимига қарашли 3- умумтаълим мактаби ўқувчи қизларига дўппидўзлик ҳунарини ўргатиш ташаббуси билан чиқди. Ўқувчи қизлар дарсдан бўш вақтларида опанинг хонадонига келиб, дўппидўзлик ҳунарини ўрганмоқдалар. 

-      Ҳукуматимизга, Президентимизга раҳмат, - дейди Ёрқиной Тўйчиева. - Юртимизда мен каби минглаб ҳунармандларнинг самарали иш олиб бориши учун зарур шароитлар яратиб берилмоқда, халқимизнинг дўппидўзлик борасидаги қадим анъаналари давом эттирилмоқда. Қолаверса, камтарона меҳнатларимиз  эътироф этилмоқда.

Дўппидўз Ёрқиной опа турли йилларда жуда кўп тадбирлар, танловларда фаол иштирок этди. "Ташаббус" танловининг туман босқичида ғолиб бўлди, вилоят босқичида совриндорлар қаторидан жой олди. Республика, вилоят миқёсида ўтказилган "Дўппи куни", Миллий  ҳунармандчиликни, туризмни ривожлантириш йўналишидаги тадбирларда, Тошкентдаги Экспомарказда ташкил этилган савдо-кўргазмаларида кўп маротаба иштирок этиб, диплом, фахрий ёрлиқ ва ташаккурномалар билан тақдирланган. Бундан ташқари, опанинг самарали меҳнатлари эътироф этилиб, 2021 йилда Президентимиз фармони билан "Меҳнат шуҳрати" ордени билан мукофотланган. 

Бугун беш фарзанд, 16 нафар набира, 4 нафар чевараси ҳамда юзлаб шогирдлари қуршовида, эъзозида умргузаронлик қилаётган Ёрқиной опанинг умр йўллари кўплар учун ибрат мактабидир. У сингари хунари, ҳалол меҳнати ортидан ризқ топаётган, юрт равнақига муносиб ҳисса қўшаётган опа-сингилларимиз ҳамиша омон бўлсин.

Фаҳриддин ИБАЙДУЛЛАЕВ,

Зуҳриддин УМРЗОҚОВ (фото)

Дил туFёни

Очиғи, кейинги йилларда мамлакатимизда хотин-қизларга кўрсатилаётган эътибор, ғамхўрлик, умуман, инсон қадрини улуғлаш борасида амалга оширилаётган ишлар юртимиздаги барча аёлларни қувонтирмоқда. Бугун мен ана шу эътиборни камтарона меҳнатларим эътирофи мисолида яна бир бор ҳис этдим. Халқаро хотин-қизлар байрами арафасида Давлатимиз раҳбарининг фармони билан    "Дўстлик" ордени билан тақдирландим, оддий қишлоқ аёлига кўрсатилган эътибордан бошим кўкка етди.

Мен юртимизнинг энг чекка туманларидан бири - Марҳамат туманидаги Оқбош маҳалласида истиқомат қиламан. Миллатим - қирғиз, 20 йилдан буён қурилишда пардозловчи бўлиб ишлайман. Шундай бўлса-да, эътибор ва эътирофга муносиб кўрилиб, давлатимизнинг юксак мукофотларидан бири билан тақдирландим.

Ҳозирда Марҳамат тумани "Марҳамат 112-қурилиш" масъулияти чекланган жамиятида пардозчи бўлиб ишлаб келаман. Тўғри, кўпчилик қурилишда сувоқчи, пардозчи бўлиб ишлаш аёл кишига хос бўлмаган касб дейиши турган гап. Лекин мен касбимни жуда яхши кўраман. Шу касбни танлаб, кам бўлмадим. Ҳалол, сидқидилдан ишладим. Ҳамиша берилган  объектларни ҳамкасбларим билан сифатли ва ўз муддатида топшириб келдик. 

Вилоятдаги жуда кўп объектлар, хусусан, турли муассасалар, умумтаълим мактаблари, боғчалар, аҳоли уй-жойлари қурилишида фаол иштирок этдим. Туманимиз, вилоятимизда бир-биридан чиройли, кўркам биноларнинг барпо этилишида қатнашганимдан, қурилиш ишларига муносиб ҳисса қўшганлигимдан, умуман, қурилиш соҳаси ҳаётимнинг ажралмас қисмига айланганлигидан фахрланаман.

Мукофот билан тақдирланганлигим, меҳнатларим эътирофидан қалбимдан кечаётган қувонч ва туйғуларни оддий сўзлар билан ифодалай олмайман. Қурувчи касбини ардоқлаб, кам бўлмадим, эл-юрт орасида ҳурмат-эътибор топдим, топаётган даромадим ёмон эмас. Энг асосийси, одамларга, юртимга фойдам тегяпти. Оилам тинч, фарзандларим бағримда. Уларнинг кўрки, камолидан куч оламан, қувонаман. Менимча, аёл киши учун бундан ортиқ бахт бўлмаса керак.

Берилган мукофот менга куч, шижоат беради. Бундан кейинги фаолиятимда кўрсатилган эътиборга, Президентимиз ишончига муносиб жавоб қайтаришга, юртимиз равнақи, ободлиги йўлида янада фаол ишлашга ҳаракат қиламан.

 Ойнагул РИСҚУЛОВА,

Марҳамат туманидаги "Марҳамат 112-қурилиш" масъулияти чекланган жамияти пардозчиси, "Дўстлик" ордени соҳибаси.

Эътибор ва эътироф

8 март - Халқаро хотин-қизлар куни муносабати билан бир гуруҳ андижонлик журналистлар, соҳа фахрийларига эҳтиром кўрсатилди.

Ўзбекистон Журналистлари ижодий уюшмаси вилоят бўлими ташаббуси билан вилоятдаги оммавий ахборот воситаларида фаолият юритаётган ҳамда соҳа фахрийси бўлган журналист аёллар иштирокида тадбир бўлиб ўтди.

Тадбирда сўз олган Ўзбекистон Журналистлари ижодий уюшмаси Андижон вилоят бўлими раиси Махпурахон Ортиқова ва бошқалар ижодкор опа-сингилларимизни байрам билан муборакбод этди. Мамлакатимизда хотин-қизларга кўрсатилаётган эътибор, уларнинг самарали фаолият юритишлари учун яратиб берилаётган кенг имкониятлар ҳақида гапирди, хусусан, матбуот соҳасида иш олиб бораётган опа-синилларимизни қўллаб-қувватлаш, уларнинг ўз ижодий имкониятларидан тўлақонли фойдаланишларига кўмаклашиш, ижодий фаоллигини янада оширишга қаратилган кенг кўламли ишлар олиб борилаётганлиги таъкидланди.

Айни кунда Андижон вилоятидаги оммавий ахборот воситаларида 70 нафардан зиёд опа-сингилларимиз самарали меҳнат қилинмоқда. Бундан ташқари, Журналистлар уюшмаси аъзоларининг 30 нафардан ортиғини ҳам  аёл журналистлар, фахрийлар ташкил этади. Улар самарали фаолияти, устозлик ўгитлари, ёш авлодни тарбиялашдаги фаоллиги билан жамият ривожига муносиб ҳисса қўшиб келишмоқда.

-      Ижод аҳлига, айниқса, биз фахрий журналист аёлларга кўрсатилган эътибордан кўнглимиз тоғдай кўтарилди, - дейди фахрий журналист Раҳимахон Абдураҳимова. - Ким бўлишидан, қайси соҳада ишлашидан қатъи назар инсон қадри улуғланаётган юртимизга кўз тегмасин. Байрамлар байрамларга улансин.

Шунингдек, Журналистлар уюшмаси вилоят бўлими ташаббуси билан бир гуруҳ ижодкорлар уйида бетоб ётган, кекса журналистлар Махпиратхон Тожихалилова, Ҳабибахон Абдураззоқова ҳамда Мушаррафхон Охунованинг хонадонида бўлиб, уларнинг ҳолидан хабар олинди, уларга байрам совғалари топширилди.

Сожида САИДОВА

Андижон шаҳридаги "Navruz Mall" кўнгилочар савдо мажмуасида "Миллий либос - миллий ифтихор" шиори остида миллий ва замонавий либослар намойиши бўлиб ўтди.

8 март - Халқаро хотин-қизлар куни муносабати билан вилоят ҳокимлиги, Оила ва хотин-қизлар, Дин ишлари бўйича қўмиталарнинг Андижон вилояти ҳудудий бошқармалари томонидан Андижон шаҳар оила ва хотин-қизлар бўлими, вилоятдаги олий таълим муассасалари, умумтаълим мактаблари билан ҳамкорликда хотин-қизлар ўртасида ўзбекона кийиниш маданиятини тарғиб қилиш, миллий анъана, урф-одат ва қадриятларимизни улуғлаш, ёш авлодни ана шу қадриятлар асосида тарбиялаш, ёшлар орасида кийиниш маданиятини шакллантириш мақсадида ўтказилган тадбирда кенг жамоатчилик вакиллари, маҳаллаларнинг Хотин-қизлар фаоллари, талабалар, ёшлар иштирок этдилар.

Ёшларнинг миллий либосларимизга бўлган ҳурмат ва ифтихор туйғуларини янада мустаҳкамлаш, ана шу йўналишдаги ишлар самарадорлигини ошириш, вилоятда иш олиб бораётган дизайнер ва мутахассисларга кўмаклашиш, бу борадаги илғор тажрибаларни ўрганиш ва оммалаштириш мақсадида ташкил этилган тадбирда атлас, адрас, банорас, беқасам ва шойи каби миллий матолардан тикилган замонавий либослар барча ёшдаги ўзбек қиз-аёлларига ярашиши, уларнинг ҳуснига ҳусн қўшиши, қолаверса, бу каби либослар  халқимиз, айниқса, ёшларимизда миллий қадрият ва миллий либосларимизга бўлган ҳурмат туйғуларини янада юксалтириши таъкидланди.

Андижон давлат университети, тиббиёт, педагогика, чет тиллар, қурилиш ва иқтисодиёт, қишлоқ хўжалиги ва агротехнологиялари институтлари талабаларининг, шунингдек, туман ва шаҳарлардан келган дизайнер ва модельерлар томонидан 150 дан ортиқ турдаги мавсумбоп, ранг-баранг, замонавий ва миллий либослар намойиш этилди. Миллий анъаналар, ўзбекона қадриятларни ўзида мужассам этган ушбу либослар барчага манзур бўлди.

Агар ҳаётни кузатсангиз, миллий урф-одат, анъана ва либосларимизни ҳурмат қиладиган, ўзбекона кийиниб юрадиган опа-сингилларимизнинг аксарияти эл-юртнинг ҳурмат-эътиборини қозонган, жамиятда ўз ўрнини топа олган инсонлар эканликларига гувоҳ бўламиз. Улар нафақат кийиниши, балки одоб-ахлоқи, юриш-туриши, кишилар билан ўзаро муносабатда ҳам барчага ибрат бўлади. Бугунги ёшларимиз ана шулардан ибрат олиши, миллийлик - ёшларимизнинг кўрки, ҳамма ҳавас қилиб қарайдиган сифатларидан бирига айланиши керак.

Тадбирда вилоят Сартарошлар ассоциацияси ташаббуси билан ўтказилган соч ўриш, турмаклаш мусобақасида иштирок этган қизлар ўзларининг бу борадаги иқтидор ва маҳоратини намойиш этди.

Вилоят маданият бошқармаси санъаткорлари, умумтаълим мактаблари ўқувчилари ҳамда жажжи қизалоқлар томонидан ижро этилган куй, қўшиқ ва  рақслар тадбирга ўзгача файз бағишлади.

Наргиза УЛУҒБЕКОВА,

Андижон шаҳар ҳокимининг ўринбосари, оила ва хотин-қизлар бўлими бошлиғи.  

Байрам тадбири

Андижон шаҳридаги "Тошкент премиум" тантаналар    саройида 8 март - Халқаро хотин-қизлар кунига бағишланган  тантанали байрам тадбири бўлиб ўтди.

Аёл борки, олам мунаввар, аёл борки, ҳаёт гўзал ва мафтункор. Инсон, оила, аёл тушунчаларини бир-биридан ажралган ҳолда тасаввур этиб бўлмайди. Аёлларни, қизларни баҳорга қиёслашади, баҳорни уларга. Гўзаллик, нафосат, янгиланиш, ҳаёт давомийлиги баҳор ва аёл тушунчаларида уйғунлашиб кетади.

Оила ва жамият устуни, ҳаётимизнинг файзи ва кўрки бўлган хотин-қизларни эъзозлаш, уларга ҳурмат ва эҳтиром кўрсатиш халқимизнинг азалий қадриятларидан ҳисобланади.

Ватанимиз тараққиётида, оила ва жамият ҳаётида хотин-қизлар муҳим ўрин ва мавқега эга. Вилоятнинг барча туман ва шаҳарларнинг илғор вакилалари иштирокидаги "Аёл борки олам мунаввар!" деб номланган байрам тадбирида мамлакатимиз ижтимоий-сиёсий ҳаётида хотин-қизларнинг ўрни, роли ва нуфузи тобора ортиб бораётганлиги, опа-сингилларимизни қўллаб-қувватлаш, уларнинг фаоллигини ошириш, турмуш фаровонлигини юксалтириш борасида кенг кўламли ишлар олиб борилаётганлиги таъкидланди.

Андижон вилояти ҳокими Шуҳратбек Абдураҳмонов муҳтарам опа-сингилларимизни баҳорнинг илк гўзал айёми билан муборакбод этди.

Байрам тадбирида жамият ва давлат ҳаётида фаол иштирок этаётган, ташаббускор, самарали меҳнати билан оилаларни   мустаҳкамлашга, оналик ва болаликни муҳофаза қилиш ишига муносиб ҳисса қўшган, соғлом авлодни ватанпарварлик ва истиқлол ғояларига садоқат руҳида тарбиялаш, жойларда маънавий-ахлоқий муҳитни соғломлаштириш ва миллий қадриятларимизни кенг  тарғиб этишда ибратли фаолият олиб бораётган бир гуруҳ илғор хотин-қизлар "Мўътабар аёл" кўкрак нишони, вилоят ҳокимининг фахрий ёрлиғи ҳамда эсдалик совғалари билан тақдирландилар.

Тадбирнинг бадиий қисмида таниқли санъаткорлар томонидан ижро этилган баҳор, аёл, унинг бахти, юрт мадҳи, тинчлик, севги ва садоқатни мадҳ этувчи рақс, куй ва қўшиқлар барчага байрамона кайфият улашди.

Фахриддин  ИБАЙДУЛЛАЕВ

Халқаро хотин-қизлар байрами арафасида мамлакатимиз Президенти фармонига асосан, юртимизнинг энг иқтидорли қизларидан бир гуруҳи Зулфия номидаги Давлат мукофоти билан тақдирланди.

Ушбу нуфузли мукофот билан тақдирланганлар орасида вилоятимизнинг икки нафар иқтидорли қизи - Феруза Абдукаримова ва Дурдона Мухторхўжаева ҳам бор.

Ўқишда, ижодда, жамоат ишларида фаол, Юнус Ражабий номидаги ўзбек миллий мусиқа санъати  институти "Профессионал таълим" факультети "Анъанавий ҳонандалик" таълим йўналиши талабаси Феруза Абдукаримова ўзи таҳсил олаётган соҳанинг етук мутахассиси бўлишга интилиши, қолаверса, ўзбек мумтоз қўшиқчилик санъатини кенг тарғиб этиб келаётганлиги кенг жамоатчиликнинг эътибор ва эътирофини қозонган.

Д.И.Менделеев номидаги Россия кимё-технология университетининг Тошкент шаҳридаги филиали 2-босқич талабаси Дурдона Мухторхўжаева ҳам илм-фан йўналишида юқори натижаларга эришаётган андижоннинг иқтидорли ёшларидан бири. У  вилоят, республика, халқаро фан олимпиадаларида ғолиб ва     совриндорлар қаторидан ўрин олган. Венгрияда бўлиб ўтган Халкаро кимё олимпиадасида кумуш медали соҳибаси бўлиб, юртимиз шарафини муносиб ҳимоя қилган.

Иқтидорли қизларимизни юксак мукофот билан муборакбод этамиз.

Сен Момо Ҳавонинг наслидан бир из,

Вафо-садоқатнинг жонли тимсоли.

Сен ўша, онажон, мўътабар, азиз,

Меҳрдан мунаввар бахти, иқболи.

Агар хонадонда бўлмасанг бир кун,

Кунми-тун, фарқига бўлмагай бориб.

Сени излар дастлаб нигоҳлар мамнун,

Келганда ҳаётий ташвишдан ҳориб.

Бизлар билан мудом елкама-елка,

Қадам-бақадам сен босиб илгари -

Комил фарзандларни қўшасан элга,

Йўллайсан мунаввар истиқбол сари.

Андижон аёли, деган нисбатни,

Оқлайсан меҳнатинг, ибратинг билан.

Юксакка кўтариб элу миллатни,

Ғурурдасан, тақдир-қисматинг билан.

Турсуной каломи нодир, сафоли,

Байтида юртию севгиси ширин.

Сиёсатхон учун дала шамоли

Қандай азиз эди, ҳаётбахш, саррин.

Қайси бир таърифга сиғар мақоминг,

Ҳаётидан мамнун муниса аёл.

Дилларга ишқ ила битилмиш номинг,

Улуғликка мангу мезон бўлиб қол.

Икромжон АСЛИЙ