ПИЛЛА - 2023

Пиллачилик мамлакатимиз иқтисодиётининг муҳим тармоқларидан бири, пилла эса  енгил саноат учун муҳим хом ашёлардан бири ҳисобланади. Шу боис ҳам юртимизда пиллачиликни ривожлантириш, сифатли пилла етиштириш масалаларига  алоҳида эътибор қаратилади.

Айни кунларда  вилоятиимиз туманларида ушбу мавсумда етиштирилган пилла ҳосилини йиғиб-териб олиш ишлари қизғин паллага кирган. Жумладан, Олтинкўл тумани пиллакорлари томонидан етиштирилган "кумуш тола" ҳосили омборларга топширилмоқда.

Ипак қурти боқиш, пиллачилик соҳасида ўзига хос тажриба мактаби шаклланган Олтинкўл туманида жорий йилда 3 минг 578 қути ипак қурти парваришланиб, 207,5 тонна пилла хом ашёси етиштириш бўйича ишлар олиб борилмоқда.

- Мавсум бошида туманда фаолият олиб бораётган "Гуантуан" МЧЖ шаклидаги Ўзбекистон - Хитой уруғчилик корхонаси мутахассислари томонидан мавжуд  11 та инкубаторияда 3 минг 578 қути сифатли уруғ тайёрланиб, тумандаги 495 нафар касаначи ҳамда 142 та фермер хўжаликларига етказиб берилди, - дейди "Олтинкўл агропилла" корхонаси раҳбари Ҳусниддин Қодиров. - Касаначилар томонидан 60 тонна, фермер хўжаликлари томонидан 139 тоннадан зиёд, "Гуантуан" МЧЖ шаклидаги Ўзбекистон - Хитой уруғчилик корхонаси томонидан 8 тоннага яқин пилла ҳосили етиштириш белгиланган.

Таъкидлаш керакки, пиллакорнинг бир ойлик меҳнати йилга татийди. Ипак қурти парвариши ўта нозик иш. Хона ҳароратини бир хилда ушлаб туриш, қуртларга ўз вақтида озуқа бериш, буларнинг бари айтишга осон холос. Эрта тонг тутзорга бориб барг кесиб келиш, ярим тун демасдан қурт­ларга барг солиш ўзига яраша меҳнат, машаққатни талаб этади. Бу ишларнинг ҳадисини олган пиллакорлар эса ҳақиқий миришкорлардир.

Туманнинг Ижтимоият маҳалласида яшовчи, касаначи Гулчеҳрахон ва Бахтиёржон Назировлар йигирма йилдирки, ипак қурти боқиб келади. 70 сотих тутзорлари бор. Жорий мавсумда улар 2 қути ипак қурти парваришлаб, 118 килограм пилла топширди.

- Пилла етиштириш билан шуғулланиб, кам бўлмадик, - дейди Бахтиёржон Назиров. - Бутун оиламиз билан бир ой шу иш билан астойдил шуғулланамиз. Даромади ҳам ёмон эмас. Бу йил ҳам етиштирилган сифатли пиллани кластер корхона омборига биринчилардан бўлиб топширдик, шу куниёқ пулини олдик. Энг асосийси, туман агропилла корхонаси томонидан биз - касаначиларга иш стажи ёзиб борилмоқда.

Авваллари пиллакорлар топширган пилласи учун йиллар давомида пулини ололмасдан сарсон бўлар эди. Эндиликда кўплаб туманларда бундай муаммо тўла бартараф этилган. Жумладан, "Олтинкўл зар ипаги" кластер корхонаси томонидан топширилган пилла учун ўз вақтида ҳисоб-китоб қилиш йўлга қўйилган, ортиқча оворагарчиликка йўл қўйилмайди.

Жорий йилда тумандаги "Туркис­тон" массивида 12 нафар касаначи ҳамда 16 та фермер хўжалиги томонидан 323 қути ипак қурти парвариш қилинди.

- Касаначиларимиз ўз ишининг ҳақиқий миришкорлари, - дейди "Олтинкўл агропилла" корхонасининг мазкур ҳудуддаги агрономи Зулайҳо Аҳмаджонова. - Шарифахон Эсонова, Марҳабохон Исмоилова, Одинахон Сатимова, Ҳамиджон Собиров сингари илғор касаначиларимиз ҳар йили белгиланган режани ортиғи билан бажариб, барчага намуна бўлди.

Мазкур массивда яшовчи Марҳабохон Исмоилова бу йил ўз хонадонида тўрт қути ипак қурти парвариш қилиб, юқори ҳосил олишга эришган касаначилардан биридир.  

- Бир неча йилдан буён оиламиз билан ипак қурти парваришлаб келамиз, - дейди М. Исмоилова. - Аввало, қуртга меҳр куйиш керак. У хам тирик жон. Айниқса, қурт боқилаётган хоналар озода, шинам, доимий ҳаво айланиб туриши лозим. Хатто, баргни ҳам ювиб бериш керак. Ҳар бир квадрат метрга 1 грамм қурт уруғи ёяман. Улар қанча сийраклаштирилса, ҳосил шунча мўл ва йирик бўлади.

Умуман, Олтинкўлда ўз ишининг ҳақиқий устасига айланган пиллакорлар талайгина. Шу боис ҳам, туман ҳар йили вилоятда биринчилар қатори йиллик режани бажаради.

Айни кунда нафақат аксарият касаначилар, балки фермер хўжаликлари ҳам белгиланган режани ортиғи билан адо этдилар. Жумладан, "Оқтепа" массивидаги "Турсинбой ота", "Машъал" массивидаги "Машъал меҳргиёси", "Намуна" массивидаги "Қосимжон обод ерлари", Ф. Қўчқоров массивидаги "Хуршидбек равнақ мақсад" сингари фермер хўжаликлари илғорлар сафида барчага намуна бўлмоқда.

Шу кунларда вилоятимизнинг барча туманларида пилла ҳосилини йиғиб-териш ишлари якунига етмоқда.

Фахриддин ИБАЙДУЛЛАЕВ

Жараён

Давлатимиз раҳбари Шавкат Мирзиёевнинг ташаббуси билан кейинги йилларда мамлакатимизда "Инсон қадри учун" деган устувор тамойил асосида давлат томонидан фуқароларни қўллаб-қувватлаш, уларнинг муаммоларини бартараф этиш, турмуш фаровонлигини юксалтириш масалаларига алоҳида эътибор қаратилмоқда.

Жумладан, Ўзбекистон Республикаси Президентининг 2021 йил 9 августдаги "Етим болалар ва ота-она қарамоғидан маҳрум бўлган болаларни давлат томонидан қўллаб-қувватлашнинг янги тизимини жорий этиш чора-тадбирлари тўғрисида"ги қарори асосида ана шу тоифадаги кўплаб болалар янги уй-жойлар билан таъминланмоқда.

Ушбу ҳужжат ижроси доирасида ота-она қарамоғидан маҳрум бўлган, турар-жойга муҳтож сифатида рўйхатга олинган, 18 ёшга тўлган андижонлик Муҳаббатхон Исмоилова ҳамда Азизбек Усмонов ҳам уй-жой билан таъминланди.

Кенг жамоатчилик вакиллари, нуронийлар иштирокида уларга Андижон тумани, Саддатаги маҳалласи ҳудудида барпо этилган янги уйларнинг калити ва сертификатлари топширилди.

-      Бундай эътибор ва ғамхўрликдан бошим кўкка етди, - дейди қувонч ёшларини яшира олмаган, янги уй соҳибаси Муҳаббатхон Исмоилова. - Инсон қадри улуғланаётган шу юрт фарзанди эканлигимдан фахрланаман. Насиб этса, келгусида ўзим танлаган соҳанинг малакали мутахассиси бўлиб, ушбу эътибор ва ғамхўрликка муносиб бўлишга, Ўзбекистонимиз тараққиёти, халқимиз турмуш фаровонлиги йўлида астойдил меҳнат қиламан.

Вилоятимизнинг барча туман ва шаҳарларида мазкур йўналишдаги ишлар режа асосида, тизимли давом эттирилмоқда.

Восит АХМАТХОНОВ

Оила - муљаддас маскан

Оила - жамиятнинг муҳим бўғини, қолаверса, ҳар бир инсон учун энг муқаддас гўша ҳисобланади. Шу боис ҳам мамлакатимизда оилаларни мус­таҳкамлаш, айниқса, ажрим ёқасида турган оилаларни яраштириш, уларнинг муаммоларини ҳал этиш масалаларига алоҳида эътибор қаратилмоқда.

Мазкур йўналишда вилоят ҳокими ташаббуси билан "Фарзандингни ота-она меҳридан маҳрум этма!" шиори остида "Оилаларни мустаҳкамлаш" ойлиги доирасида ўтказилаётган тушунтириш-тарғибот тадбирлари, суҳбат ва мулоқотлар давомида кўплаб оилалар тикланмоқда.

Вилоят ҳокимининг ўринбосари Гулнорахон Абдулла­ева иштирокида Андижон туманида бўлиб ўтган очиқ мулоқотда оила муқаддас даргоҳ экани, унинг мустаҳкамлигини таъминлашга ҳар бир инсон масъул эканлиги алоҳида таъкидланди.

Йигирмадан ортиқ ажрим ёқасидаги оила вакиллари, туман оила ва хотин-қизлар бўлими мутасаддилари, имомлар, отинойилар, маҳалла фуқаролар йиғини хотин-қизлар фаоллари,  катта ҳаётий тажрибага эга нуронийлар иштирок этган мулоқот давомида вилоят ишчи гуруҳи томонидан оилаларнинг муаммолари, ажрим сабаблари ўрганилиб, уларни яраштириш чоралари кўрилди. Натижада 10 дан ортиқ ажрим ёқасидаги оила яраштирилди, уларнинг муаммолари ҳал этилди, 16 нафар болажоннинг бахти бутун бўлди. Энди улар ўз ота-оналари бағрида улғаяди.

"Фарзандингни ота-она меҳридан маҳрум қилма!" шиори остида "Оилаларни мустаҳкамлаш" ойлиги доирасида Андижон тумани ишчи гуруҳи томонидан тумандаги Полосон ва Экин-тикин маҳаллаларида ўтказилган тадбирларда ҳам ажрим ёқасига келиб қолган 8 та оила яраштирилди.

Мазкур йўналишда Андижон тумани ишчи гуруҳи томонидан туманнинг бошқа маҳаллаларида ҳам кенг кўламли, амалий ишлар олиб борилмоқда. Мақсад ҳар бир оилани ҳақиқий бахт қўрғонига айлантиришдир.

Туманимизда оилаларни мустаҳкамлаш, оиладаги маънавий муҳит барқарорлигини таъминлаш, ажримларнинг олдини олиш борасида олиб борилаётган юқоридаги каби ишлар, албатта ўзининг ижобий самараларини беради, келгусида оилавий ажримлар янада камайишига эришилади.

Тўхтахон ТЎРАЕВА,

Андижон туманидаги "Баҳор" маҳалла фуқаролар йиғини хотин-қизлар фаоли.

Юртда тинчлик экан, қалбларда зиё,

Сендан олис кетсам, дил бўлар сиёҳ,

Ўпаман тупроғинг, кўзга тўтиё,

Ватаним, мен сени севаман жондай!

Фидолар қилмоққа жонимни тутай,

Мадҳинг куйламоққа шеърлар битай,

Сенинг қучоғингда бахтларга етай,

Ватаним, мен сени севаман жондай!

Гулларда момомнинг ислари қолган,

Кўксингда бобомнинг излари қолган,

Меҳр-оқибатни кўнглимга солган,

Ватаним, мен сени севаман жондай!

Мудом порлаб турсин нурли қуёшинг,

Она-тупроғимда омондур бошим,

Одил йўл кўрсатар ҳар дам Юртбошим,

Ватаним, мен сени севаман жондай!

Танлов

Андижон шаҳридаги 8-умумтаълим мактабида ижодий-маданий масалалар бўйича тарғиботчи Восит Аҳматхонов ташаббуси ва мусиқа маданияти ўқитувчиси Моҳинбону Қосимова саъй-ҳаракати билан 8-синф ўқувчилари ўртасида раққосалар танлови бўлиб ўтди. Мукаррампошша Умарова ва Иродахон Умаровалар раҳбарлигидаги 8-А ҳамда 8-Г синфларининг ўн икки нафар ўқувчи қизи турли куйларга рақслар ижро этишиб ғолиблик учун беллашдилар.

Танлов шартларидан муваффақиятли ўтган Моҳларой Сирожиддинова, Моҳинур Ваҳобжонова ва Райёна Насриддиновалар фахрли ўринларни эгалладилар. Ғолибларга тарғиботчи соврини -пул мукофотлари топширилди. Танловнинг барча иштирокчиларига китоблар туҳфа этилди.

Одинахон ҲАЙДАРОВА,

мактаб кутубхонаси мудираси.

Андижон шаҳридаги Ёшлар саройида "Зукко китобхон" танловининг вилоят босқичи баҳслари бўлиб ўтди.

Аҳоли, хусусан, ёшларнинг маънавиятини, китоб ўқишга бўлган қизиқишларини, китобхонлик ва мутолаа маданиятини ошириш орқали уларнинг билим ва тафаккурини бойитиш, интеллектуал салоҳиятини юксалтириш мақсадида ўтказилган танловнинг вилоят босқичида 74 нафар зукко китобхон иштирок этди.

- Вилоят миқёсида онлайн тест тартибида ёш китобхонлар ўртасида ўтказилган танловнинг қуйи босқичларида 625 нафар йигит-қиз қатнашди, - дейди Ёшлар ишлари агентлиги Андижон вилояти бош­қармаси бўлим бошлиғи Назирахон Убайдуллаева. - Энг юқори натижага эришган 74 нафар иштирокчи танловнинг вилоят босқичида туман, шаҳар жамоалари таркибида ўзларининг билим, иқтидор ва салоҳиятларини намойиш этишди. 

Қизғин ва муросасиз баҳслар, савол-жавоблар асосида ўтган танловнинг вилоят босқичи якуний натижаларига кўра, Булоқбоши тумани жамоаси 1- ўринни қўлга киритди. Иккинчи ўрин Пахтаобод тумани, учинчи ўрин эса Қўрғонтепа тумани ёш китобхонларига насиб этди.

Ташкилотчилар томонидан танловда ғолиб бўлган жамоа 6 миллион сўм, иккинчи ўринни олган жамоа 4,2 миллион сўм, учинчи ўринни олган жамоа 3 миллион сўм, шунингдек, барча иштирокчи жамоа­лар 300 минг сўм миқдоридаги пул мукофоти билан тақдирландилар.

Фахриддин ИБАЙДУЛЛАЕВ

Жараён

Ўзбекистон Республикаси Ички ишлар вазирлиги Қоровул қўшинларининг Андижон шаҳридаги ҳарбий қисмида "Янги Ўзбекистонда эркин ва фаровон яшайлик!" шиори остида "Уч авлод учрашуви" тадбири бўлиб ўтди.

Ички ишлар вазирлиги тизимида "Ватанга ва халққа сидқидилдан хизмат қилиш - олий бурчимиз!" шиори остида ўтказилган "Маънавият ойлиги" доирасида ташкил этилган тадбирда Андижон шаҳар педагогика коллежи ўқувчилари, ўқитувчилари, ҳарбийлар, ички ишлар тизими фахрийлари иштирок этдилар.

 Тадбирда сўз олган ИИВ Қоровул қўшинлари қўмондонининг тарбиявий ва мафкуравий ишлар бўйича ўринбосари, полковник Даврон Ашуров, ИИВ Фахрийлар кенгаши аъзоси, истеъфодаги генерал-майор Ҳабибулло Ҳожиматов ва бош­қалар томонидан Ватанимиз тинчлиги йўлида хизмат бурчини масъулият ва садоқат билан адо этаётган ҳарбийларнинг фаолияти, фахрийларнинг мазмунли ҳаёт йўллари ёш авлод учун ибрат эканлиги алоҳида таъкидланди. 

Тадбирда юртимиз тинчлиги ва осойишталиги йўлида сид­қидилдан хизмат қилган ва қилаётган авлод вакиллари ёшларга соҳанинг ўзига хос машаққатлари, хизмат билан боғлиқ хотиралари ҳақида гапириб бердилар.

Ёшларнинг кекса авлод вакиллари билан дилдан суҳбати, айниқса, ўқувчиларда унутилмас таассуротлар қолдирди. Тадбирда ўқувчи ёшлар ўзларининг қизиқтирган барча саволларига батафсил жавоблар олдилар.

Якунда бир гуруҳ фахрийлар, шунингдек, Андижон шаҳар педагогика коллежи хотин-қизлар кенгаши раиси Маҳбубахон Исроилова тадбир ташкилотчилари томонидан фахрий ёрлиқ ва эсдалик совғалар билан тақдирланди.

Сожида САИДОВА

“Nihol” o‘quvchilarni ijod bo‘stoniga chorlamoqda

Andijon shahridagi 8-umumta’lim maktabida faoliyat ko‘rsatayotgan “Yosh kitobxon” va “Nihol” to‘garaklari mashg‘ulotlari iqtidorli o‘quvchilarnining ijodiy bilim va salohiyatiini yuksaltirishga, ular o‘rtasida kitobxonlik madaniyatini oshirish, adabiyotga muhabbat uyg‘otishga yaqindan yordam bermoqda. O‘quvchilarni ijod bo‘stoniga chorlamoqda. Shu bois, maktabda ijodkor yoshlar safi tobora kengayib bormoqda. Quyida e’tiboringizga adabiy to‘garak a’zolaridan bir guruhining she’rlaridan namunalar havola etamiz.

Vosit AНmad,

Andijon shashridagi 8-umumta’lim maktabining ijodiy-madaniy masalalar bo`yicha targibotchisi

MO‘JIZALI KITOB

Orzu-umid, ishonch va iymon,

Faqat undan topadi inson,

Taratadi saxovat nurin,

Yoritadi inson shuurin.

Meni nurga yetkazgan nima?

Jaholatdan qutqargan nima?

Sevib o‘qir kishi bobma-bob,

Shudir ilm kemasi-kitob.

Inson uchun kerakmi boylik,

Olmos, gavharu toshlar,

Shunday qilib o‘tadi yoshlik,

O‘shanda ishlaydi boshlar.

Chindan topasan boylikni shunda,

Agar kitob o‘qisang kun-u tunda,

Lek yurmagin vaqtni ketkazib,

Kitob boylikdir, bilsang unda.

Sevara BOQIYEVA,

11-sinf o‘quvchisi.

ESKI MASKA

Unda bahor edi,

Bitta maskam bor edi,

Bugun u menga qarab,

Yangisin ol,dedi.

ONAMNI QIDIRIB

She’r yozdim o‘tirib,

Oq qog‘ozni to‘ldirib,

She’rim ketdi yugurib,

Onajonimni qidirib.

Mushtariybegim HALIMOVA,

6- sinf o‘quvchisi.

QIZG‘ANCHIQ

- Koptogingni berib tur,

Ukam bilan o‘ynayman,

-Ho, o‘zim-chi, o‘zim ham,

O‘ynayman, deydi Aziz.

-Qizg‘anchiq ekansan-ku,

O‘rtog‘iga der G‘ani.

-Uka, uydan olib chiq,

O‘zimizning koptokni.

Kumushoy NURDINOVA,

5- sinf o‘quvchisi.

ONAMGA

Quvonchlari armon bo‘lmasin,

Lobar yuzi aslo so‘lmasin,

Tashvishlarga to‘lib qolmasin,

Sen onamni yig‘latma, hayot.

Sochlariga oqlar tushmasin,

Ko‘zlariga yoshlar to‘lmasin,

Hayotidan ma’no ketmasin,

Sen onamni yig‘latma, hayot.

Qancha dard bo‘lsa menga bo‘lsin,

Qancha azob bo‘lsa menga bo‘lsin,

Oy yuzi doim gulgun bo‘lsin,

Sen onamni yig‘latma , hayot.

Mohichehra HABIBULLAYEVA,

5- sinf o‘quvchisi.

Тенгдошларим бундай саволга хаёлан жавоб берган бўлсалар керак. Мен бугун  айнан шу саволга жавобимни  қоғозга тушуришга жазм қилдим.             

Ҳаёт йўли шу даражада тезлик билан давом этаркан. Бу ёруғ оламга илк бора боққанимга ҳам ярим асрдан ошибди. Йиллар ўтган сари ёшлигимиз ўтган кўчалардан ўтсам бир оз дақиқага бўлса ҳам ўша беғубор болалигимиз хаёлимдан ўта бошлайди. Ҳатто ёшинг улғайган сари энг кичик манзараларни ҳам эслар экансан...

"... Мана бу кўчада илк бора қадам ташлаб юрганимда дадам қўлимни ушлаб етаклаганди. Бу ерда катта мажнунтол дарахти бўларди... Кесиб юборишибди" деб хаёлан ўзим билан гаплашиб кетяпман.

Бу эса мактабим, биринчи китобимдан бошлаб кейинги  дарсликларим, синфдош ва мактадошларим, бир-бир кўзларим олдига келади. Ўқувчилик йилларимда эришган ютуқларим, ота-онамнинг қувончи ҳануз кўз ўнгимда. Айниқса, опалик мақомига эришиб, сингилларим ва укамни боғчага, мактабга олиб борганларим...    Олийгоҳда ўқиган давримнинг хотира саҳифалари эса бир дунё.  

Уйимизнинг олдидаги болалар майдончасида болалик давримда ҳамма ўйнаган ўйинларимиз ўртоқларимнинг овози билан эслайман. Айни шу майдончада тўпланиб, дарс қилишларимиз "кино лента"сидай хаёлимда  айланаверади.

Айниқса, ота-онамиз бизни  жуда қўллаган эканлар. Мана бир мисол, кеча дугонам билан эсладик. Мактабнинг юқори синфларида ўқиганимизда 4-5 нафар синфдош қизлар пул йиғиб, дўкондан ул-бул нарса олиб, навбат билан бир-биримизникида турли хил овқат, пишириқларни пиширишни ўрганардик. Албатта, пиширган таомимиздан насиба, деб уйга ҳам олиб келардик. Мана энди тушуняпман бу ота-онамга қанчалар  қувонч олиб келганини...

Хотиралар шу даражада кўпки, ёзсанг алоҳида китоб бўлади. Лекин ёшлик давримизда қанчалар бахтли бўлганимизни  жуда кеч тушунар эканмиз.

Нима учун болаликка қайтгимиз келади? Бу саволнинг жавобини топганга ўхшайман. Тенгдошдошларимиз, яъни боғчадош, синфдош, курсдошларимиз ва маҳалалада бирга ўсган ўртоқларимиз билан узоқлашиб бораётганимиз сабабли уларни соғинганимиз учун болаликка қайтгимиз келади.

Бугунги кунда шаҳримизда қурилаётган иншоотлар ва ободонлаштириш-кўкаламзорлаштириш ишлари бетакрор, гўзал кўринишга ўзгаряпти. Албатта бу яхши. Лекин бизнинг болалигимизда қадам босган кўчаларимиз, ўқиган биноларимизни топа олмай қоляпмиз. Бамисоли ёшлигимизнинг саҳифалари ёпилгандай.

Энг асосийси, оғири бугунги кунда ота-онамизнинг бағрида эмаслигимиз, уларнинг ҳар тонг соғиниб уйғонишимиз экан.

Ирода МАХАТОВА

ТаҚдимот

Ўзбекистон Республикаси ДХХ чегара қўшинларига қарашли Булоқбоши туманидаги ҳарбий қисм бир руруҳ аскар ва зобитлари  ташаббуси билан тумандаги Учтепа маҳалласида яшовчи, Иккинчи жаҳон уруши иштирокчиси Абдуғани ота        Ғопиров хонадонида бўлди.

Файзли бу хонадонда ҳарбийлар, маҳалла фаоллари, ёшлар иштирокида иккинчи жаҳон урушида фашизм устидан қозонилган ғалабанинг 78 йиллигига бағишланиб, ёзувчи ва шоира Умида Эгамбердиеванинг "Орамиздаги тирик афсоналар" номли китоби тақдимоти ўтказилди.

Мазкур китоб қаҳрамони, ўзининг юз ёшини қарши олаётган  Абдуғани ота ғопиров иштирокчиларга ўзининг уруш хотираларини гапириб берди.

-        Уруш даҳшат, у миллионлаб одамларни бевақт ҳаётдан олиб кетди, - дейди Абдуғани ота.                  - Фарзандларимиз, ёш авлод ҳеч қачон уруш кўрмасин, дея тинч ва фаровон ҳаётимизга шукроналар келтирди, дуолар қилди.

Китоб муаллифи Умидахон Эгамбердиева ҳарбийлар ва ёшларга китобнинг яратилиш тарихи ҳақида гапирди, асарнинг маънавий, тарбиявий аҳамияти ҳақида фикр ва мулоҳазаларини айтиб ўтди.

-        Абдуғани ота сингари тирик афсоналарнинг ҳаёти, умр йўллари биз ҳарбийлар, ёшлар учун ибрат мактабидир, - дейди ижодкор У.Эгамбердиева.             - Жанггоҳларда мардлик намуналарини кўрсатган, эл-юрт равнақи йўлида фидоийлик ила меҳнат қилган ана шу инсонлар билан ҳамиша фахрланамиз.

Қизиқарли ўтган тадбир иштирокчиларда унутилмас таассуротлар қолдирди.

Бобуржон ОЛТИБОЕВ,

лейтенант.