Андижон шаҳридаги 15-умумтаълим мактабида ўтказилган "Энг намунали бошланғич ташкилот" кўрик- танловида Андижон шаҳрининг энг намунали бошланғич ташкилот ходимлари аниқланди.

     Бошланғич ташкилот ходимларининг салоҳияти ва малакасини ошириш ҳамда бошланғич ташкилот фаолиятини баҳолаш мақсадида ўтказилган ушбу танлов рейтингида  биринчи бешта ўринни эгаллаган  умумтаълим муассасаларининг икки  нафар ўқитувчисига касаба уюшмалари тизимидаги санаторийларга  бепул йўлланмалар  берилди.

Кўрик- танловнинг якуний босқичида Ўзбекистон таълим ва фан ходимлари касаба уюшмаси Республика кенгашининг Андижон вилояти масъул ташкилотчиси З.Абдуллаев ҳамда бошланғич касаба уюшма  ташкилотлари раислари иштирок этдилар.

Кўрик-танлов тадбирида 100 нафаргача ходими бор ташкилотлар ўртасида 1-ўрин 68-мактабгача таълим ташкилоти, 2-ўрин 54-ихтисослаштирилган давлат умумтаълим мактаби, 3-ўрин 10-умумтаълим мактаби бошланғич ташкилот раислари,  100 дан ортиқ ходими бор ташкилотлар ўртасидаги беллашувда 1-ўрин 49-мактаб, 2-ўрин 1-мактаб, 3- ўрин 48-мактаб бошланғич касаба уюшма ташкилоти раислари эгаллашди. Бошқа номинация бўйича 5 та бошланғич ташкилот раиси диплом ҳамда эсталик совғалари билан тақдирландилар.

Насибахон ТўраҚулова,

Ўзбекистон таълим ва фан ходимлари  касаба уюшмаси Андижон шаҳар бўлинмаси кенгаши раиси.

Aндижон шаҳридаги Президент мактабида дарслар хорижий мутахассислар билан ҳамкорликда ишлаб чиқилган ўқув режа ва "STEAM - таълим" дастури асосида инглиз тилида олиб борилади.

Математика, физика, кимё, биология ва ахборот технологиялари ҳамда хорижий тиллар илғор таълим услуби асосида чуқур ўргатилади. Бундай таълим тизими орқали болада креативлик, қунт, қизиқувчанлик каби қобилиятлар янада ривожланади.

2021 йилнинг октябрида фаолиятини бошлаган мазкур мактабда ҳозирда 168 нафар ўқувчи таҳсил олмоқда. Якунланган ўқув йилида мактабни 24 нафар ўқувчи тамомлади.

 Зуҳриддин УМРЗОҚОВ

КЕЧИНМА

Ватан... юрагимнинг туб-тубидаги изҳорни ошкор этмоққа ожизман.

Сенинг, боғу бўстонларинг, чаман ва гулзорларинг, обод ва озода кўчаларинг, барпо бўлаётган янги-янги биноларинг кўзларимни қувнатади. Инсонларнинг юзидаги табассум, ўғил-қизларнинг эришаётган ютуқлари, аёлларнинг жамиятда ўз ўрнини топаётганлиги, кексалар қадрланаётгани - буларнинг бари истиқлол туфайли. Бугун ҳар бир инсон янгиликлар сари қадам ташламоқда, ўзларининг орзу ва мақсадларига эришмоқдалар. Бу албатта, тинчлигимиздан, осойишта яшаётганлигимиздан нишонадир.

Бироқ бугун айрим давлатлардаги нотинчликлар қалбимизни ларзага солади. У ердаги адолатсизлик, мурғак гўдакларнинг, муштипар оналарнинг кўз ёшлари, бегуноҳ инсонлар қонининг тўкилиши юрагимизга титроқ солади. Ахир улар ҳам ҳудди биз каби эмин-эркин яшаши, ўйнаб-кулиши керак эмасми!?

Бу мудҳиш воқеаларни эшитиб, биз ёшлар мана шундай тинч ва озод юртда туғилганимизга, эмин-эркин яшаётганимизга шукрона келтирамиз. Ана шу тинчлигимизни, муқаддас она Ватанимизни асраб-авайлашга, унга муносиб фарзанд бўлишга интиламиз.

Феруза МАТКАРИМОВА,

Улуғнор тумани.

Дил туFёни

 (Онамнинг ҳикояси)

Ўшанда баҳор эди. Жумла жаҳон яшилликка бурканган. Кўнгиллар завққа тўлган палла. Мен сойдайин тошқин, қушдайин шошқин қизча эдим. Шундай кунларнинг бирида онам сочларимни ўришга уннаб қолди. Менинг эса дардим - кўча, дугоналарим билан ўйнаш эди. Биламан, агар онам сочимни ўришга киришса, бир соат сарф­лаб нақд қирқ ўрим қилмай турмасди. Ўйинқароқ қизча бунча пайт чидаб тура олармиди?! Аммо онам бунинг ҳам йўлини биларди. Энг қизиқарли эртакларини айтиб берарди. Мен беихтиёр кўчани унутардим. Бу гал ҳам узоқ давом этадиган узун сочли малика ҳақидаги эртак воқеалари бошландию кўчадаги беркинмачоқни ҳам, арғамчи ўйинини ҳам унутдим. Ҳатто, бир зумга уйқу ҳам элитди. Онамнинг тиззасига бош қўйганимча ухлаб қолибман. Уйғонсам сочим қирқ ўрим қилиб ўрилган. Турдим-у, дугоналаримга мақтангани шошдим.

- Ҳой, қизча, тўхта, манавини еб ол,-деганча қолди онам. Дугоналар даврасидаги қий-чувда онамнинг сўзларини эшитармидим. Бежиз айтилмаган экан: Онанинг кўнгли болада, боланинг кўнгли далада.

Ҳа, ўша кунлар ҳам ўтди. Мактаб даври тугагач, катта ўқишлар ўзига чорлади. Улкан орзулар билан пойтахтга қараб йўл олдим. Эҳ, онамга энди янада қийин бўлди. Ойда бир келганимда йиғлаб кутиб олар, йиғлаб кузатиб қоларди.

- Кўз ёшингиз нимаси, ўйнаб-кулиб,ўқиб юрибман-ку! - дейман онамга эркаланиб.

- Вой, болам-а, кенжа фарзанд суюклироқ бўларкан-да.

Ўқишни тугатмай палахмон тоши бўлиб отилдим. Энди онагинам ҳақиқий онаизор бўлиб қолди. Кун санаб, ой санаб, гоҳ тушларига овуниб, гоҳ пинҳона аразлаб йўлимга термуларди. Ўзим она бўлиб энди қадрига етай деганимда бирдан онамни йўқотиб қўйдим. Қишлоқ ҳам, ота уйим ҳам онамсиз файзсиз, ҳувиллаб қолди. У жойлар мени ҳам, исмимни ҳам унутгандек гўё. Аммо ҳамма нарсанинг давоси вақт деганларидек, қалбимга қувонч бағишлайдиган кунлар ҳам ҳаётимга кириб келди. Бироқ қанчалар шодиёна бўлмасин, у кунлар онам бор пайтдагидек нурафшон эмас.

Бегойим ЛУТФУЛЛАЕВА,

Асака туманидаги 34- умумтаълим мактаби 11- синф ўқувчиси.

YOZ

          Yoz kelmoqda entikib,

Biz kutamiz intiqib.

Dam olaylik lagerda,

Rosa xumordan chiqib.

Xayr partam,doskaoy,

Sen ham dam olgin uch oy.

Yozga muruvvat qilib,

O‘rin berdi Bahoroy.

Oh, buncha yaxshisan, Yoz,

Bag‘ringda etgum parvoz.

Sen kelmasang pishmaydi,

Bog‘imdagi g‘uj gilos.

Kuch yig‘ib yoz tanamga,

Ko‘mak berib onamga.

Oltin kuzda qaytgayman,

Ulg‘ayib dars xonamga!

Muslimaxon OYBEKOVA,

Xo‘jaobog tumanidagi 17- umumna’lim maktabning 6-sinf  o‘quvchisi.

Vatan

Vatan, ko‘ksim tog‘isan,

Qalbimning chirog‘isan.

Onamning xush ifori

Ko‘zimning qarog‘isan.

Yelka tutgan ostonam,

Baxt ulashgan koshonam.

Har chechaging,giyohim,

Qo‘lim tutgan dugonam.

Yov yo‘lamas bog‘ingga,

Masrur, shodon chog‘ingga.

Men borman yosh to‘lmagay,

Quralay qarog‘ingga.

Yulduzi - gul osmonim,

Qaynar buloq imkonim.

Jahon ichra tenging yo‘q,

Mening O‘zbekistonim!

Roziyabonu HAMIDOVA,

Ulug‘nor tumanidagi 21- umumta’lim  maktabning 6- sinf o‘quvchisi.

Ўзбекистон Республикаси ДХХ чегара қўшинларига қарашли Марҳамат туманидаги ҳарбий қисмнинг бир гуруҳ зобит ва аскарлари Ўзбекистон халқ шоири Муҳаммад Юсуф уй-музейида бўлишди.

Ҳарбий қисмда аскар ва зобитлар ўртасида маънавий-маърифий ишлар самарадорлигини ошириш, уларнинг она Ватанга муҳаббат, бурчга садоқат туйғу­ларини мустаҳкамлашга, улуғ аждодларимиз, ёзувчи ва шоирлар ҳақидаги билимларини бойитишга қаратилган кўплаб тадбирлар доимий равишда ўтказиб келинмоқда. Жумладан, халқимизнинг ардоқли ва суюкли шоири Муҳаммад Юсуф хонадонига ташриф аскарларнинг адабиётга, китоб мутолаасига бўлган қизиқишини кучайтириш билан бирга, шоир ҳаёти, фаолияти ва ижоди ҳақидаги билимларини янада бойитишга хизмат қилди.

Аскарлар шоир туғилиб ўсган хонадон, унинг уй-музейидаги экспонатлар билан яқиндан танишдилар.

Ўтказилган ўзига хос мушоирада аскарлар томонидан шоир шеърларидан намуналар ўқилди, ижодкор аскарлар ўз шеърларидан ўқиб берди.

Тадбир аскарларда унутилмас таассурот қолдирди.

Хуршиджон ФОЗИЛОВ, капитан.

Жангчи-фахрийлар фаолиятидан

Халқ депутатлари Андижон вилояти Кенгаши ҳузуридаги Жамоат фондининг молиявий кўмаги асосида Ўзбекистон жанг­чи-фахрий ва ногиронлар уюшмаси вилоят бўлими томонидан амалга оширилаётган "Янги Ўзбекистонни янгилаш ва тараққиёт омиллари" мавзусидаги лойиҳа доирасида Қуролли Кучлар фахрийлари, жангчи-фахрийлар иштирокида ёш авлодни ҳарбий ватанпарварлик руҳида тарбиялаш, ёшлар маънавияти ва ҳуқуқий билимларини юксалтириш бўйича қатор маънавий-маърифий, ҳуқуқий-тарғибот тадбирлари ўтказилди.

Ўзбекистон жангчи-фахрий ва ногиронлар уюшмаси вилоят бўлими томонидан "Ёш авлодни маънавий жиҳатдан етук ва баркамол, ватанпарвар бўлиб улғайишига кўмаклашиш" шиори остида ёшлар иштирокида чекка ҳудудлардаги умумтаълим мактабларида ўтказилган 20га яқин ҳарбий-ватанпарварлик руҳидаги ана шундай тадбирларда 7 минг нафардан ортиқ ўқувчи иштирок этди.

Шунингдек, вилоят Мактабгача ва мактаб таълими бошқар­маси билан келишилган ҳолда ишлаб чиқилган  ҳарбий спорт ўйинларини ўтказиш бўйича низом ва иш режаси асосида юқори синф ўқувчилари ўртасида ўтказилган ҳарбий-ватанпарварлик спорт мусобақаларида ўқувчиларнинг сафда юриш, сафда қўшиқ айтиш, автоматни қисмларга ажратиш, ҳарбий таълим соҳасидаги билим ва маҳоратлари, жисмонан бақувватлиги синовдан ўтказилди.

Мусобақалар ғолиблари ҳамда бир гуруҳ фаол, аълочи ўқувчиларга Ўзбекистон жангчи-фахрий ва ногиронлар уюшмаси вилоят бўлимининг фахрий ёрлиқ, ташаккурнома,  эсдалик совға - спорт анжомлари туҳфа этилди.

Лойиҳа доирасидаги тадбирларни ўтказишда лойиҳа координатори, истеъфодаги подполковник М.Қодиров, Қуролли Кучлар фахрийлар кенгаши раиси, истеъфодаги полковник М.Холиқов,  истеъфодаги майор Г.Камолов, ички ишлар фахрийси, капитан У.Долимов фаоллик кўрсатдилар. Ҳарбий соҳада ва катта ҳаётий тажрибага эга бу фидойи инсонларнинг кўмаги билан тадбирлар жуда самарали ўтди.

Шунингдек, ўтказилган тадбирларда туман, шаҳар ҳокимлари ўринбосарлари, мудофаа ишлари бўлимлари, "Нуроний" уюшмаси вакиллари, Мактабгача ва мактаб таълими бўлимлари ҳарбий таълим услубчилари, ёшлар етакчилари ҳам иштирок этдилар.

Лойиҳани амалга ошириш, мониторинг қилиб бориш, тадбирларни мазмунли, қизиқарли ва самарали ўтказишда Халқ депутатлари вилоят кенгаши  ҳузуридаги Жамоат фонди раиси Зардуна Исмоилованинг тавсия ва маслаҳатлари биз учун жуда фойдали бўлди.

Лойиҳани муваффақиятли амалга ошириш, лойиҳа тадбирларини самарали ўтказишда ижтимоий шерикчилик асосида яқиндан ёрдам кўрсатган ҳамкор ташкилотлар - Ўзбекистон "Миллий тикланиш" демократик партияси вилоят кенгаши раиси Х. Омоновга, ННТ ташкилотлари миллий ассоциацияси вилоят худудий бўлими раҳбари А.Узоқжоновга, Ўзбекистон Қуролли Кучлари фахрийлари кенгаши вилоят бўлими раиси М.Халиқовга  миннатдорчилик билдирамиз.

       Раҳимжон УСМОНОВ,

Ўзбекистон жангчи-фахрий ва ногиронлар уюшмаси вилоят бўлими раҳбари.

"101" огоҳлантиради

Айни пайтда юртимизнинг, шу жумладан, вилоятимизнинг қайси ҳудудига борманг, кенг кўламли қурилиш, бунёдкорлик ишлари олиб борилаётганлигига гувоҳ бўласиз.

Қурилишлар хайрли иш. Лекин янги қурилаётган биноларнинг лойиҳага асосан қад кўтариши, меъёрий техник талабларга риоя этилиши ҳамда биноларда ёнғин хавфсизлиги нормативларининг бажарилиши ҳам муҳим аҳамият касб этади.

Ҳар бир иншоот битказилганидан сўнг қабул қилиш комиссияси мутасаддилари юқорида таъкидланган ҳолатларнинг бажарилганлигига алоҳида эътибор қаратиши лозим. Айниқса, ўқув юртлари, турар жойларнинг электр таъминоти ҳамда газлаштириш талабларининг қонуний, лойиҳавий бажарилганлиги муҳим саналади. Чунки амалиётда келиб чиқаётган ёнғин ҳодисаларининг асосий қисмига ана шу жиҳатларга етарли эътибор қаратилмаганлиги сабаб бўлмоқда. Шунингдек, қабул қилишда мутахассислар меъёрий талабларнинг бузилмаганлиги, биноларга бориладиган ёнғин ўчириш машиналарининг ҳаракатланиш йўлакларининг мавжудлиги, сув манбаси ва захира сув билан таъминланганлиги, объектлардаги ёғоч конструкцияларнинг ёнишни қийинлаштирувчи хусусиятларга эга махсус воситалар билан ишлов берилганлиги, лойиҳада кўрсатилган хабар берувчи қурилма ва мосламалар билан жиҳозланганлигига эътибор қаратишлари лозим бўлади.

Топширилган янги объектларда юқорида таъкидланган меъёрлар бажарилмаса, фавқулодда портлаш ва ёнғин ҳодисалари келиб чиқиши, натижада инсонларнинг мол-мулки нобуд бўлиши, энг ачинарлиси, одамларнинг ҳаёти хавф остида қолиши мумкинлигини асло унутмаслигимиз зарур.

Муҳаммаджон ҚЎЗИБОЕВ,

Андижон шаҳри ФВБ инспектори, катта лейтенант.

Иззатулло ПОЗИЛОВ,

Андижон тумани ФВБ инспектори, лейтенант.

Ёзгу таътил арафасида Булоқбоши туманидаги 2-умумтаълим мактабида "Китобим - қуёшим" деб номланган тадбир бўлиб ўтди.

Мактабнинг 3-"А" синфи раҳбари Жамилахон Омонова ташаббуси билан ўтказилган тадбирда синф ўқувчилари, ота-оналар, ўқув маскани устозлари иштирок этишди. Ўқувчилар томонидан китоб ҳақидаги шеърлар, ҳикматли иборалар айтилди. Китоб мутолааси, билимсизликнинг нохуш оқибатларига оид саҳна кўринишлари намойиш этилди.

Мактабда умуман, якунланган ўқув йили давомида адабий учрашувлар, қизиқарли мушоиралар, давра суҳбатлри мунтазаб ўтказиб борилди. Тадбирларнинг қизиқарли ўтишида мактабнинг "Ниҳол" раққосалар дастасининг ҳиссаси катта бўлмоқда. Зиннура Нуриллаева, Хосиятхон Исмоналиева, Ойдиной Камолдинова, Муслима Жўрабекова, Ойша Эсонбоева, Камола Мадаминова, Муниса Рустамова каби раққосаларнинг чиқишлари ҳар бир тадбирга юқори кўтаринкилик бағишлади.

Мактабда ташкил қилинган "Истеъдод" тўгараги аъзолари Муҳаммадазиз Солижонов (шеърият), Ҳадятилло Расулов (рассомчилик), Гулҳаё Фозилова (сухандонлик), Сарвиноз Камолдинова (ифодали ўқиш)лар турли танловларда муваффақиятли қатнашиб, тенгдошларига намуна бўлишди. Улар эришган ютуқларда мактабнинг мусиқа маданияти ўқитувчиси Шаҳноза Аҳмадбекованинг ҳиссаси катта бўлмоқда.

Умида ЭГАМБЕРДИЕВА, 

Булоқбоши туманидаги 2-умумтаълим мактабининг ижодий-маданий масалалар бўйича тарғиботчиси.

Таълим даргоҳларида

Жорий ўқув йилининг сўнгги кунларида Андижон шаҳридаги 11- умумтаълим мактабида"Билимлар мамлакатида" деб номланган тадбир ўтказилди.

Ўзим раҳбарлик қилаётган  1- "Б" синф ўқувчилари, уларнинг ота-оналари, мактаб директори О. Чен, бошланғич синфлар ҳамда маънавий-маърифий ишлар бўйича директор ўринбосарлари М. Дадабоева, М. Муталибова ва бошқа бир гуруҳ  ўқитувчилар иштирок этган мазкур тадбир ўқув йили якуни бўйича ҳисобот тарзида ташкил этилди.

Ўқувчиларим йил давомида олган билимларини намойиш этишди. Хусусан, алифбе,  она тили ва ўқиш саводхонлиги, математика, инглиз тили, мусиқа маданияяти ва бошқа фанларга оид шеър, қўшиклар айтишиб, рақслар ижро этдилар. Бундан ташқари, ўқувчилар томонидан улуғ аждодларимизнинг ҳаёти ва фаолиятига оид саҳна кўринишлари намойиш этилди. Шунингдек, чиройли ёзув, технология, тасвирий санъат, табиий фан бўйича ўқувчиларнинг ўзлари ясаган буюмлари, чизган расмлари кўргазмаси барчада катта қизиқиш уйғотди.

Мактаб директори Ольга Чен синф ўқувчиларини биринчи синфни муваффақиятли якунлаганликлари, эришган ютуқлари билан табриклади. Келажакда улуғ аждодларимизнинг муносиб издошлари ва давомчилари бўлиб, ватанига содиқ фарзандлар  бўлишларини тилади. Ўқув йилини муваффақиятли тамомлаганлиги учун ўқувчиларга мақтов ёрлиқлари топширди.

Тадбир нафақат ўқувчиларда, балки меҳмонларда ҳам катта таассурот колдирди.

Моҳидилхон ҲОЗИРОВА,

 Андижон шаҳридаги 11- умумтаълим мактаби ўқитувчиси.