Munosabat

Xozirgi rivojlanib borayotgan davlatlar qatorida munosib o‘rin egallab kelayotgan yurtimiz yangi saylov jarayoni arafasida turibti. Saylovlar - bu har bir fuqaroning jamiyat hayotiga ta’sir o‘tkazishi va o‘z kelajagini belgilashi uchun muhim imkoniyatdir. Saylovda ovoz berish orqali biz nafaqat bugungi va ertangi kunimizni shakllantiramiz. Shu bilan bir qatorda saylovlarda ishtirok etish huquqimiz orqali davlat va jamiyatning muhim masalalarida bilvosita ishtirok etishmizga imkon beradi. Yangi O‘zbekistonda “O‘z kelajagim uchun ovoz beraman” shiori fuqarolarning saylovlarda ishtirok etishdagi mas'uliyatini va ahamiyatini ifodalaydi. Ovoz berishning ahamiyati, fuqarolik burchi va jamiyatning taraqqiyotiga ta’siri haqida so‘z yuritamiz ekan bu jarayonda saylash huquqiga ega bo‘lgan fuqarolarni huquqlaridan oqilona foydalanishga chorlab qolamiz.

Ovoz berish har bir fuqaroning asosiy siyosiy huquqlaridan biridir. U demokratik jamiyatlarda hokimiyatni shakllantirishning eng muhim vositasi bo‘lib, har birimizga o‘z fikrimizni bildirish imkoniyatini taqdim etadi. Har bir ovoz davlat boshqaruvida o‘z o‘rniga ega bo‘lib, xalqning irodasini ifodalaydi.

Saylovlarda ovoz berish - bu nafaqat huquq, balki burch hamdir. Fuqarolar o‘z kelajagini belgilashda ishtirok etmasa, siyosiy jarayonlarning rivojiga ta’sir o‘tkazish imkoniyatidan mahrum bo‘ladi. Shu sababli, ovoz berish - bu jamiyatdagi har bir kishining mas’uliyati.

Bugungi yoshlar ertangi kunning rahbarlari, mutaxassislari va jamiyat yetakchilaridir. Ular kelajakka befarq bo‘lmasliklari kerak, chunki har bir saylov ertangi kundagi ijtimoiy, iqtisodiy va siyosiy hayotning rivojlanish yo‘nalishini belgilab beradi. Yoshlar o‘z fikrlarini va qarashlarini saylov orqali ifoda etib, davlat boshqaruviga ta’sir ko‘rsatishlari mumkin.

Yoshlar nafaqat kelajakka, balki o‘zining bugungi hayotiga ham mas’uldir. Shu boisdan, ularning siyosiy faolligi va ovoz berishga bo‘lgan munosabati jamiyatdagi o‘zgarishlarga katta ta'sir ko‘rsatadi. Bu jarayonni anglagan yoshlar o‘z huquqlaridan foydalanib, jamiyatni ijobiy tomonga o‘zgartirish uchun imkoniyatga ega.

Har bir ovoz jamiyatning rivojlanishida o‘z ahamiyatiga ega. Saylovlarda faollik siyosiy barqarorlikni ta'minlash, qonuniylikni mustahkamlash va davlat boshqaruviga nisbatan ishonchni oshirishga xizmat qiladi. Ovoz berish orqali fuqarolar davlatning siyosiy kursini belgilashda bevosita ishtirok etishadi.

Ovoz berish natijasida davlat boshqaruvi organlarida yangi islohotlar amalga oshirilishi mumkin. Shu sababli, har bir fuqaro saylovlarda faol ishtirok etish orqali jamiyat taraqqiyotiga hissa qo‘shishi mumkin. Buning uchun saylov oldi kampaniyalarida qatnashish, nomzodlarning dasturlarini o‘rganish va o‘z qarorini xolisona qabul qilish lozim.

Ovoz berish jarayonining adolatli va shaffof o‘tkazilishi fuqarolarning ishonchini ta’minlash uchun juda muhimdir. Saylovlar jarayonida har bir fuqaro o‘z ovozining adolatli sanalishiga ishonch hosil qilishi kerak. Bu esa davlat hokimiyatining qonuniyligini va fuqarolarning davlat boshqaruviga ishonchini oshiradi.

Saylovlarda kuzatuvchilar va mustaqil komissiyalar ishtirok etishi, saylovoldi kampaniyalarning shaffofligi va nomzodlar o‘rtasida teng raqobatning ta’minlanishi, saylov natijalarining qonuniyligini kafolatlaydi. Shu tariqa, har bir fuqaro o‘z ovozining haqiqiy ta’sir kuchiga ega ekanligini his etadi.

Xulosa o‘rnida aytishimiz mumkinki “O‘z kelajagim uchun ovoz beraman” - bu nafaqat shior, balki har bir fuqaroning jamiyat oldidagi burchi va mas'uliyatidir. Har bir ovoz - bu bizning kelajagimiz, farzandlarimiz va davlatimizning ertangi kuni uchun qo‘yilgan qadamdir. Shu sababli, har bir fuqaro o‘z huquqidan to‘liq foydalanishi va saylovlarda faol ishtirok etishi zarur. Fuqarolarning faolligi demokratik jarayonning asosini tashkil etadi va davlat boshqaruvini yanada adolatli va samarali qilishga hissa qo‘shadi.

I. ALIJONOV,

AndMI Intellektual boshqaruv  va  kompyuter tizimlari fakulteti tyutori.