Мутахассис минбари

Ўзбекистон Республикаси Президентининг 2019 йил 5 февралдаги “Ўзбекистон Республикасида 2022 йилда аҳолини рўйҳатга олиш концепциясини тасдиқлаш тўғрисида”ги фармонига асосан Ўзбекистон Республикасида 2020 йилда аҳолини рўйхатга олиш жараёни ўтказилиши белгиланган эди.

Бироқ, жорий йилда дунёда рўй бераётган коронавирус пандемияси сабабли бир қатор давлатлар аҳолини рўйҳатга олиш муддатларини келгуси йилларга кўчириш чораларини кўрди. Жумладан, мамлакатимизда ҳам ушбу тадбирга тўлақонли тайёргарлик кўриш, сифатли ва шаффоф ўтказиш мақсадида Ўзбекистон Республикаси Вазирлар Маҳкамаси томонидан 2020 йил 11 ноябрда “Ўзбекистон Республикасида 2023 йилда аҳолини рўйҳатга олишга тайёргарлик кўриш ва уни ўтказиш чора-тадбирлари тўғрисида”ги қарори қабул қилиниб, республикамизда аҳолини рўйҳатга олиш тадбири 2023 йил 1-25 ноябрь кунлари ўтказилиши белгиланди.

Шунингдек, қарорга асосан синов тариқасида аҳолини рўйҳатга олиш тадбири 2021 йил 1-25 ноябрь кунлари Андижон вилоятининг Хўжаобод тумани, Тошкент вилоятининг Юқори Чирчиқ тумани, Хоразм вилоятининг Хива шаҳри ҳамда Тошкент шаҳрининг Яшнаобод туманида амалга оширилади.

Аҳолини рўйхатга олишни ўтказиш 3 босқичда амалга оширилади. 1-босқичда аҳолини рўйхатга олиш тадбирини ўтказишга тайёргарлик кўрилади, 2-босқичда бевосита аҳолини рўйхатга олиш тадбири ўтказилади, 3-босқичда эса аҳолини рўйхатга олиш тадбирининг бирламчи материаллари маълумотлари жамланади, электрон базага киритилади, кодлаштириш, назорат, таҳрир қилинади ва  натижалари эълон қилинади.

Давлатимиз раҳбари Фармонига кўра, аҳолини рўйхатга олишни ўтказиш бўйича ваколатли орган — Ўзбекистон Республикаси Давлат статистика қўмитаси, Республика комиссиясининг ишчи органи, деб белгиланган.

Х. ҲАМРАҚУЛОВ,

Андижон вилояти статистика бошқармаси бўлим бошлиғи.