"101" огоҳлантиради!

Айрим фуқароларнинг ўзбошимчалик билан ерларни рухсатсиз эгаллаб олиб, бу жойларда қурилиш ишлари олиб бориши, ноқонуний тарзда электр энергияси ва газ тармоқларига уланиб олишлари, ёнғин хавфсизлиги қоидаларига амал қилинмаслиги натижасида ёнғинлар келиб чиқиш ҳолатлари афсуски, учраб турибди.

Ўрганишлардан маълум бўлишича, ноқонуний қурилган биноларнинг аксариятида ёнғин хавфсизлиги қоидаларига умуман, амал қилинмаган. Ҳатто, газ ва электр энергиясидан ноқонуний фойдаланиш ҳолатлари ҳам учрамоқда. Бу эса юқорида таъкидланганидек, ёнғинлар келиб чиқишига сабаб бўлмоқда. Шунингдек, жамиятимизга катта миқдорда моддий ва маънавий зарар келтирмоқда. Энг асосийси, фуқароларнинг куйиб, тан жароҳати олишига, ҳалок бўлишига олиб келаётгани янада ачинарлидир.

Бундай ноҳуш ва салбий ҳолатларнинг олдини олиш ўз қўлимизда. Бунинг учун биринчи навбатда ноқонуний қурилишларни амалга оширмаслигимиз, электр энергияси ва газ тармоқларига ноқонуний уланиб олмаслигимиз лозим. Бу билан, қолаверса, ёнғин хавфсизлиги қоидаларига қатъий амал қилиш орқали нафақат ўзимиз, оиламиз, балки атрофимиздагиларнинг соғлигини, ҳаётини асрашга, ёнғинлар келиб чиқишининг олдини олишга муносиб ҳисса қўшган бўламиз.

Азиз юртдошлар, ҳамиша ёнғин хавфсизлиги қоидаларига амал қилиб, ёнғинлар келиб чиқишининг олдини олайлик.

Абдусамад РАҲМОНОВ,

       Андижон тумани ФВБ норматив-техник бўлинмаси бошлиғи, катта лейтенант.