Ҳар бир банда қилган хайрли ва яхши ишлари учун савобларга мушарраф бўлади. Кишига савоб келтирадиган эзгу ишлар гўзал амаллар ҳисобланади.

Дунёга келган ҳар бир киши яхши ва ёмон амалларни ўзи билиб ёки билмай бажаради. Орамизда ҳаттоки, қилган яхшилигининг савоби қай даражада эканлигини билмаса-да, ундан бир манфаатни кўзламаса-да, қўлдан келганча муҳтож кимсаларга ёрдам қўлларини узатувчи инсонлар жуда кўп.

Кўплаб ҳадисларда Аллоҳ таоло ҳақи йўлида ота-онага ҳурмат кўрсатиш, уларнинг ҳақларини адо этишлик, айниқса, ўзгалар ҳақига хиёнат қилмаслик сингари эзгу амалларни бажаришлик буюрилади. Эҳтимол, ана шу фазилатли амалларни ҳар биримиз кундалик ҳаётимизда ҳар куни бажариб юргандирмиз, ёхуд нафсга, шайтонга алданиб     ғафлат уйқусида қолиб уларга эътибор бермаётгандирмиз. Лекин унутмайлик, ҳаётимизда эзгу амалларни бажаришга интилишимиз лозим. Шунда энг аввало, Яратганнинг савобига эга бўламиз, қолаверса, бандалар ўртасида меҳр-оқибат, мурувват, ўзаро ҳамжиҳатлик сингари инсоний фазилатларнинг янада зиёда бўлишлигига ҳиссамизни қўшган бўламиз.

Ибн Умар (р. а.) айтадилар: Расулуллоҳ (с.а.в.) шундай марҳамат қилдилар: "Сиздан олдин яшаганлардан уч киши йўлга чиқишди. Кун ботгач, тунаш учун бир ғорга кирганларида, тоғ тепасидан бир харсанг думалаб тушиб, ғорнинг оғзини ёпиб қўйди. Шунда улар ўзаро маслаҳатлашиб: Бизлар бу жойдан фақат эзгу, яхши амалларимизни шафоатчи этиб, Аллоҳ таолога қиладиган дуоларимиз туфайлигина қутулиб чиқишимиз мумкин дейишди. Улардан бири Аллоҳ учун қилган холис амалини эслаб деди: - Менинг кекса ота-онам бор эди. Мен уларга жуда ғамхўрлик қилар эдим, кеч тушганида доимо олдин уларни таомлантириб, сўнг болаларим ва ҳайвонларимни едириб-ичирардим. Бир куни ўтин қидириб узоқларга кетиб қолдим. Бир қанча вақтдан сўнг уйга қайтиб келсам, ота-онам ухлаб қолишган экан. Улар учун сут соғдим, ҳамон ухлаётган эдилар. Ота-онамдан аввал болаларим ва ҳайвонларимни таомлантиришни маъқул кўрмадим, ота-онамни эса безовта қилиб уйғотишга кўзим қиймади. Ҳатто шундай ҳолатда тонг отди. Парвардигоро, бу ишни Сенинг розилигинг учун қилганман, йўлимизни тўсган бу тошдан бизни қутқар, деди ва шунда тош озгина сурилди, бироқ улар чиқиб кетадиган даражада эмас эди.

Иккинчи киши ҳам қилган яхши амалини эслаб деди: - Менинг амакимнинг қизи бор эди, уни ҳаммадан кўп севардим. Унинг васлидан баҳраманд бўлишни хоҳладим, аммо у бунга кўнмади. Кунларнинг бирида у йўқсилликка учради, мендан ёрдам сўрашга мажбур бўлди. Истагимга кўниши шарти билан унга бир юз йигирма динор бердим, у қабул килди. Энди мақсадимга эришаман, деб турган пайтимда у: - Аллоҳ таолонинг муҳрини ноҳақ бузишинг ҳалол эмас деди. Мен унга тегинишдан тийилдим ва уни ўз ҳолига қўйдим, пулларни ҳам қайтариб олмадим. Ё Аллоҳ, бу амалимни Сенинг ризолигинг учун қилган эдим, бизни бу қийинчиликдан    қутқар, деб айтди. Тош яна бироз сурилди.

Шундан сўнг учинчи киши қилган фазилатли амалини эслаб сўз бошлади: - Мен бир қанча одамларни ишлатар эдим. Ҳақларини ҳам ўз вақтида берар эдим. Аммо улардан бири ўз ҳақини олмасдан кетиб қолди. Мен унинг пулларини ишга солиб, кўпайтирдим, ҳатто тийинига ҳам тегмасдан мол, қўй, туя ва эчки олиб қўйдим, улар йил сайин кўпайди. Орадан бир неча йиллар ўтиб, у келди ва - Эй, Аллоҳнинг бандаси, менинг ҳақимни бер, деди. Мен эса: - Мана шу кўриб турганинг мол, эчки, туя, қўй ва қулларнинг ҳаммаси сеники, уларни олиб кетавер дедим. Шунда у: - Эй, Аллоҳнинг бандаси менинг устимдан кулма, деди. Мен ҳам: - Устингдан кулаётганим йўқ, ростдан ҳам улар сеники, олиб кетавер, дедим. У ҳамма нарсани олиб кетди. Парвардигоро, буларни Сенинг розилигинг учун қилган эдим, бизга бу ҳолатдан қутулишни насиб эт. Харсанг яна бир оз силжиди ва улар ғордан чиқиб, йўлларида давом этдилир. (Имом Буҳорий ва Имом Муслим ривояти).

Аллоҳ таоло барчаларимизга эзгу ва хайрли амалларни бажарадиган бандалари қаторидан жой олишлигимизни, Ўзининг шафоатига мушарраф бўлишлигимизни насиб этсин.

Баҳодиржон РЎЗИБОЕВ,

Андижон шаҳридаги "Эски Гумбаз" жоме масжиди имоми.

Мозийдан садо

Жалолиддин Румий (1207 йил Балхда - 1273, Кўня) - шоир ва мутафаккир. Тасаввуфдаги мавлавия тариқатининг асосчиси. Араб, форс ва туркий тилларида ижод қилган. Отаси Баҳоуддин Валад сўфийлар ва фиқҳ донишманди бўлган. Шу боис ҳам султон Муҳаммад Хоразмшоҳ (1199-1220) саройга таклиф этган. Лекин Валад унинг таклифини рад этиб, мактабдорлик ҳамда илмий-ижодий иш билан машғул бўлган.

Румий шахсияти камолотида шоир ва шайх Шамси Табризийнинг ўрни катта. У уч йил Румийга дарс беради: фалсафа, хусусан, сўфийлик таълимотини ўргатади. Шоирнинг ўзи ҳам бир байтида "Агар Аттор менга руҳ бахш этган бўлса, Шамси Табризий тилсим калитини тутқазди", деган. 1244 йилдан Румий устозини ниҳоятда ҳурмат қилгани учун ўз ғазалларида "Шамси Табризий", "Шамси" тахаллусларини қўллай бошлаган.

Жалолиддин Румий ўзидан улкан шеърий мерос қолдирган шоирдир. Унинг жаҳонга машҳур "Маснавий"си ўттиз бир мингдан зиёдроқ мисрани ўз ичига олади. "Девони кабир"и (Улуғ девони) қарийб қирқ тўрт минг мисрадан иборат бўлиб, унда икки минг етти юз уч ғазал жамланган. Румийнинг фалсафий ва лирик тўртликлари, рубоийлари тўрт минг мисрадан ошади. Лекин шоир қўлига қалам олиб ёзгани атиги ўн саккиз мисра холос. +олган етмиш тўққиз минг мисра, бари бадиҳа бўлиб, "котибул асрор" деб аталмиш шогирдлар томонидан қаламга олинган. Мана бир неча асрким, мазкур бадиҳалар ўқувчи ва   тингловчиларга завқ-шавқ бағишлайди, теран фикри, ажиб ҳассослиги, фавқулодда оҳангдорлиги ва шеърий шаклларнинг мукаммаллиги билан китобхонларни ҳайратга солади. Шоирнинг шеърий асарларидан ташқари, бизгача унинг ваъзлар китоби, мулоқотлар мажмуаси "Фихи-ма-фихи" ва турли кишиларга ёзган бир юз қирқта мактуби етиб келган.

Шоир ва мутафаккир умр бўйи диний ақидалар истибдодига қарши, инсон руҳи эркинлигини ҳимоя қилди. Салбчилар юриши ва фанатизм ҳукм сурган бир даврда у ирқи, тили ва диний мазҳабидан қатъи назар, инсонлар тенглигини ташвиқ этди.

Шоирнинг шеърлари, ваъзлари ва фаолиятида шаҳар аҳолиси қуйи табақаларнинг феодал тузумга, давлат хизматидаги диний мафкура намояндаларига қарши норозилиги акс этиб туради.Бироқ ўқувчилар хукмига ҳавола этилаётган бу китоб шоирнинг фалсафаси ҳақидаги монография ёхуд унинг шеърий бисотига бағишланган тадқиқот эмас, балки биографик романдир.

Шоир ҳали тирик экан, таъқиб ва ҳужумларга учраган, уламолар унинг асарларини дин ва шариатга зид, деб эълон қилишган. Эл орасида машҳурлиги унинг ўзини жисмоний жазодан сақлаб қолса-да, лекин фикрларини ҳам шундай бир жазодан сақлаб қололмаган. Мутаассиб руҳонийлар шоир қарашларининг диний либосидан фойдаланиб, унинг шеъриятидаги гуманистик маъноларни ортодоксал - диний руҳда талқин қилишга уринганлар.

Румий шеърияти, асосан, илоҳий ишқ билан боғланган. У ўзининг барча асарларида еру - кўкнинг соҳиби бўлмиш Аллоҳ ва унинг заминдаги халифаси ҳазрати инсонни улуғлайди. Румийнинг машҳур асари "Маснавий маънавий"дир. Асарда +уръони карим ва Ҳадиси шариф маъноларини ўзига сингдирган, инсон ҳаёти билан боғлиқ барча масалалар бадиий йўсинда баён этилган.

Ҳозирги кунда Жалолиддин Румийнинг ўзбек тилига таржима қилинган "Муҳаббат маъвоси", "Ҳикматлар", "Кўзни юмгил, кўзга айлансин кўнгил," ҳикматлари, "Етти мажлис" каби асарлари китобхонлар ҳукмига ҳавола қилинган.

Румий ижоди юксак бадиияти билангина эмас, балки мантиқ кучи, фалсафий фикрларга бойлиги билан ҳам катта таъсир кучига эга. Унинг табиат ва жамият ҳодисаларининг доимий ўсиш, ўзгаришда экани, эскининг йўқолиб, янгининг пайдо бўлиши - "дунёнинг зиддиятлар бирлигидаги зиддиятлар жанги"дан иборатлиги тўғрисидаги қарашлари, немис файласуфи Гегелнинг эътирофича, унинг диалектик усулни яратишига ёрдам берган.

Муборакхон ИСАҚОВА,

Булоқбоши тумани ахборот кутубхона маркази директори.

Мулоҳаза

Ривоят қилишларича, бир куни Луқмони Ҳаким йўлда кетаётган экан. Рўпарасидан  бир қиз келаётганини кўриб қолибди. қиз тинмай қон туфлармиш. Луқмони ҳаким  қизнинг орқасидан  кетаверибди. +он туфлаб кетаётган қиз бир хонадонга кириб кетибди.

Луқмони Ҳаким қиз кириб кетган уйнинг дарвозасини тақиллатибди. Уйдан бир киши чиқибди. - Ассалому алайкум, бир маслаҳат билан сизнинг хонадонингизга келдим.

- Келинг, нима хизмат, - дебди хонадон соҳиби алик олгач.

- Ҳозир уйга кирган қиз сизнинг фарзандингизми?- деб сўрабди Луқмони ҳаким.

- Ҳа, менинг фарзандим, - дебди ота.

- +изингизнинг қон туфлаб келаётганини кўрдим. У оғир бетоб,- дебди Луқмони Ҳаким.

-  Наҳотки, - дебди ота безовталаниб. - Сиз кимсиз? +изимга нима бўлган?

- Мен ҳакимман, беморларни даволайман, - дебди.

- +изим соғаядими? - деб сўрабди ота.

Луқмони Ҳаким: - Аллоҳнинг иродаси, - дебди. Шундай қилиб орадан бор неча ўтиб, Луқмони Ҳаким бемор қизнинг ҳолидан хабар олай деб борибди. Ота чиқиб қизининг вафот этганини айтибди. Батафсил сўрагач, ўша куни иккови суҳбатлашаётганда қизи эшикни орқасида бўлгани, мудҳиш хабарни эшитиб қўрқиб кетиб, йиқилиб тушганини, қайта кўзини очмаганини, оғзидан эса, икки дона қора тут чиққанини айтиб берибди. Луқмони Ҳаким қизнинг қўрқувдан қазо қилганини, қора тут билан қон ранги бир хиллиги учун қон деб билганидан, хато қилганидан қаттиқ пушаймон бўлибди.

Ҳа, сўз шундай буюк қудратга эгаки, қалбларга малҳам, дармон бўла олади. Сўз билан асир олса бўлади, сўз билан пичоқласа бўлади, сўз билан қучоқласа, сўз билан жазоласа, сўз билан даволаса, сўз билан инсон ҳаётига нуқта қўйса бўлади. Айниқса, кўплаб шифокорларимиз нафақат дори-дармони билан шунингдек, ширин сўзларию, хуш каломлари билан ҳам даволайдилар.

Баъзи кимсалар бироз камчилиги бўлган таниш-билишларини қўполдан-қўпол бўлган чўлоқ, кўр, арвоқ, семиз, пакана каби сўзлар билан атаб, озор берадилар. Бунинг ўрнига кўзи ожиз, оқсаброқ юрадиган, озғинроқ, тўлишганроқ, паст бўйли каби нисбатан ноҳуш эшитилмайдиган сўзлар ҳам бор-ку. Бунинг учун кишида бироз андиша, бироз сўз бойлиги, бироз одоб бўлса бас.                

Шу ўринда қадимдан қолган бир ҳикоятни келтириб ўтай. Бир подшонинг тушида ҳамма тишлари тўкилиб кетганмиш. Эртасига вазирларидан тушининг таъбирини сўрабди. Бир нодонроқ вазири "Ҳамма қариндошларингиз сиздан олдин ўлиб кетар экан", дебди. Иккинчиси "Сиз ҳамма яқинларингиздан кўпроқ яшар экансиз", дебди. Подшо биринчисига юз дарра урдириб, иккинчисига юз тилло танга ҳадя қилибди. Аслида ҳар икки жавоб бир хил, лекин айтилишида озор бермайдигани рағбатлантирилмоқда.

Сўзларимиз қалбларга озор бермаслиги учун эътиборли бўлайлик. Инсон зийнати ва қуввати унинг сўзидир.

Хуршида РЕЖАПБОЕВА,

АДТИ магистратура бўлими тьютори.

Андижон давлат университетида "Конституция  янги Ўзбекистон тараққиётининг  асоси" мавзусида маънавий-маърифий тадбир бўлиб ўтди.

Ўзбекистон Республикаси Конституцияси қабул қилинганлигининг 31 йиллиги муносабати билан юртимизда ўтказилган "Конституция ҳафталиги" доирасида университет Ахборот-ресурс маркази ходимлари, география, филология факультетлари талабалари, ўқитувчи ва тьюторлари иштирокида ўтказилган тадбирда сўз олган университетнинг ёшлар масалалари ва маънавий-маърифий ишлар бўйича биринчи проректори Хушнудбек Хўжамбердиев сўз олиб, Бош қомусимиз миллий давлатчилигимиз, суверенитетимиз, шу кунга қадар эришган ютуқларимиз, ҳуқуқий-демократик давлат барпо этиш йўлидаги саъй-ҳаракатларимизнинг ҳуқуқий пойдевори эканлигини таъкидлади.

Тадбирда янги таҳрирдаги конституциямизда Ўзбекистоннинг беш устуни, яъни суверен, демократик, ҳуқуқий, ижтимоий ва дунёвий давлат эканлиги қатъий белгилаб қўйилганлиги айтиб ўтилди. Янги Конституциямизнинг мазмун-моҳияти, унга киритилган қўшимча ва ўзгартиришлар ҳақида маълумотлар берилди. 

Тадбир давомида янгиланган конституциямиз моддалари бўйича савол-жавобларда талабалар конституцияга оид билимларини синовдан ўтказдилар. Шунингдек, бош қомусимиз ҳақида билдирилган фикр ва мулоҳазалар, мулоқотлар, уни мадҳ этувчи шеър, куй ва қўшиқлар барчага хуш ва байрамона кайфият улашди.

Маънавий-маърифий тадбирда фаол иштирок этган бир гуруҳ талабаларга университет ахборот-ресурс маркази директори Зуҳриддин Эгамбердиев ташаккурнома ва эсдалик совғалар топширди.

Мамлакатимиз бош қомусини тарғиб этиш, шарафлаш ҳар бир фуқаронинг, айниқса, янги Ўзбекистонни барпо этишда фаол иштирок этаётган талаба ёшларнинг муқаддас бурчи эканлиги алоҳида қайд этилди.

Тадбир иштирокчиларнинг конституцияга оид билимларини оширишга, унга бўлган ҳурмат-эҳтиром туйғуларини мустаҳкамлашга хизмат қилди.

Муфаззалхон ХОДЖАЕВА,

АДУ ахборот-ресурс маркази илмий-услубий бўлим кутубхоначиси.

Китоб тарҒиботи

Андижон давлат педагогика институти ахборот-ресурс марказида "Ёшлар тарбиясида китобнинг ўрни" мавзусида маънавий-маърифий тадбир бўлиб ўтди. 

Институт Педагогика факультети мактабгача таълим йўналиши ҳамда ахборот-ресурс маркази доимий фойдаланувчилари бўлган талабалар, тьюторлар иштирок этган тадбирда китобнинг инсон камолотидаги ўрни ва роли, айниқса, ёшлар тарбиясидаги аҳамияти ҳақида атрофлича сўз юритилди. 

Тадбирда ахборот-ресурс маркази ходимларининг "Китоб ва ёшлар тарбияси", "Талабалар ўртасида китобхонликни ошириш - муҳим вазифа" сингари қатор мавзулардаги маърузалари тингланди.

Иштирокчилар томонидан маърузалар ҳамда талабаларнинг китоб ўқишга бўлган қизиқишини ошириш, мутолаа маданиятини юксалтириш, китобнинг жамиятдаги ўрни ва ролини ошириш борасидаги ишларни янада юқори босқичга кўтариш юзасидан таклиф, фикр ва мулоҳазалар билдирилди.

Институт ахборот-ресурс маркази томонидан ўтказиб келинаётган бу каби тадбирлар китобхон талабалар сафининг кенгайишига, маънавий-маърифий ишлар самарадорлигини оширишга хизмат қилмоқда.

Муножотхон НИЗОМОВА,

АДПИ ахборот-ресурс маркази  илмий-услубий бўлими бошлиғи.

Андижон шаҳридаги Ёшлар марказида Зулфия номидаги Давлат мукофотига номзодлар саралаш танловининг вилоят босқичи бўлиб ўтди.

Мамлакатимизда иқтидорли қизларни қўллаб-қувватлаш, ўз иқтидор ва салоҳиятини тўлақонли намоён этишлари учун кенг имкониятлар яратиб берилмоқда. Жумладан, Зулфия номидаги Давлат мукофоти танлови ҳам 14 ёшдан 30 ёшгача бўлган кўплаб иқтидор соҳибаларини юзага чиқармоқда.

Жорий йилда вилоятда мазкур танлов номзодларини саралаш бўйича туман ва шаҳар босқичларида 450 нафардан зиёд иқтидорли қизлар қатнашган бўлса, вилоят босқичида адабиёт, санъат, фан, таълим, маданият, спорт ва жамоатчилик фаолияти йўналишлари бўйича 113 нафар иқтидор соҳибаси ўз имкониятини синовдан ўтказди.

- Зулфияхоним издошлари қаторидан жой олиш юртимиздаги ҳар бир қизнинг орзуси, ҳар бир қиз ўз ютуқлари билан ана шу номга сазовор бўлиш учун ҳаракат қилади, - дейди танловнинг жамоатчилик йўналиши иштирокчиси Насибахон Ибрагимова. - Танловда бир неча йилдан буён иштирок этаман. Имкониятларимни яна бир бор синовдан ўтказдим. Иқтидорли қизлар кўп, лекин ижоди, фаолияти энг муносиб бўлган иштирокчиларгина  танловнинг кейинги босқичига йўлланма олади.

Якуний натижаларга кўра, йўналишлар бўйича энг яхши кўрсаткичларга эришган иқтидорли қизлар танловнинг мамлакат саралаш босқичида қатнашиш учун тавсия этилди.

Танлов доирасида иқтидорли қизлар томонидан тайёрланган  ҳунармандчилик маҳсулотлари, амалий ва тасвирий санъат намуналари кўргазмалари ташкил этилди.

Фахриддин ИБАЙДУЛЛАЕВ

Дил туҒёни

Устоз. Бу сўз айтилганида, кўз олдимизда ўқувчисига меҳр-муҳаббатли, унга таълим-тарбия бериш йўлида фидойи, маънавиятли, маърифатли улуғ зот намоён бўлади. Бизнинг порлоқ келажагимиз учун қайғуриб яшаётган, билим бераётган, барча инсоний фазилатларни қалбимизга сингдиришга ҳаракат қилаётган заҳматкаш устозлар олдида ҳамиша қарздормиз. 

Ҳозирги кунда мамлакатимизда юртбошимиз ташаббуси билан биз ёшларга яратиб берилаётган кенг имкониятлар келгуси ютуқларимиз учун катта заминдир. Айниқса, бугун мактабларимизда бизнинг пухта билим олишимиз, бирор касбни ўрганишимиз учун зарур барча шароитлар яратилган. Мактабларимиз, синф хоналаримиз замонавий жиҳозлар билан таъминланган. Бундан ташқари, хоҳлаган хорижий тилни ўрганишимиз учун барча имкониятлар бор. Биз ёшлар ана шу имкониятлардан тўғри, унумли фойдалана олсак, ёрқин келажагимиз учун мустаҳкам пойдевор қўйган бўламиз. Бу йўлда касбига садоқатли, тиниб-тинчимас, билимли шогирдларни тарбиялаётган устозларимиздан беҳад миннатдормиз.

+ирқ йилдан буён ўқитувчилик касбини улуғлаб келаётган устозимиз Ёқутхон ая Мирзаева юртимизнинг энг фидойи рус тили ва адабиёти фани ўқитувчиларидан биридир. Устозимиз фаолияти давомида катта ютуқларга эришди. У киши ўзининг илмий мақолалари билан  халқаро конференцияларда иштирок этиб, кўплаб сертификатларни қўлга киритган. Республика  миқёсидаги кўплаб илмий-амалий конференциялар иштирокчиси бўлган Ёқутхон ая 2017 йилда "Йилнинг энг яхши фан ўқитувчиси" танловида фахрли ўринни эгаллаган.

- Узоқ йиллик фаолиятимда жуда кўп ёшларга таълим-тарбия бериб, уларнинг жамиятда, ҳаётда ўз ўринларини топишларига ёрдам бердим, - дейди устозим Ёқутхон Мирзаева. - Ҳозир шогирдларим эришган ютуқларни кўриб бошим кўкка етади, армоним йўқ. Шундай бўлса-да, бугунги кунда ёшларга яратиб берилаётган кенг имкониятларни кўриб, беихтиёр ёшлигим қайтиб келсайди, дея ўйлаб қоламан. Ўқувчиларимга ана шу имкониятлардан унумли фойдаланинг, мақсадингиз сари олдинга интилинг, албатта, орзу-мақсадларингизга эришасиз, деб айтишдан асло толмайман.

Нафақат бераётган таълим-тарбияси, балки ҳаёти, фаолияти ҳамда ўгитлари билан бизларга ибрат бўлиб келаётган Ёқутхон ая Мирзаева сингари устозларимиз ҳамиша омон бўлсин.

Жасмина МАМАРОЗИҚОВА,

Марҳамат туманидаги 31-ДИМИ 9-синф  ўқувчиси.

Она ҳамма учун энг қадрли зот. Лекин ҳамма аёллар ҳам яхши она деган номга лойиқ бўлавермайди. Фарзандини тўғри тарбиялаган, билимли, одоб-ахлоқли қилиб ўстирган, ота-онага ҳамиша раҳмат олиб берадиган фарзандни вояга етказган аёлларгина яхши она ҳисобланади. Чунки бола тарбиясида онанинг ўрни ва роли жуда каттадир.

18 ноябрь - Ўзбекистон Республикаси Байроғи қабул қилинган кун муносабати билан Жалақудуқ туманидаги 32-умумтаълим мактабида ўтказилган тадбирда ана шундай аёлларга эҳтиром кўрсатилди.

Байрам тадбирига мактабда таълим олаётган энг фаол,   ораста, билимли, тарбияси ибратли, оқила ўқувчи қизларнинг оналари таклиф қилинди. +изларини намунали қилиб тарбиялаётган муҳтарама оналарга ҳурмат-эҳтиром кўрсатилди, уларга мактаб маъмуриятининг "Ташаккурнома"лари топширилди.

-      Тадбир давомида намунали фанлар олимпиадаси, турли танловлар  ғолиби бўлган ўқувчи қизларнинг тақдирланганидан, эътибордан ҳам ўқувчилар, ҳам оналар беҳад хурсанд бўлдилар,- дейди тадбир иштирокчиси Маҳбуба Маматқулова.

Ўзига хос байрам тадбири нафақат ўқувчи қизлар, балки уларнинг оналари қалбида ҳам унутилмас таассуротлар қолдирди.

 Дилбарой ТУРСУНОВА,

мазкур  мактабнинг 9-синф ўқувчиси.

ТарҒибот

Коррупция ҳар қандай давлат ва жамият ривожига жиддий салбий таъсир кўрсатувчи, таҳдид солувчи мураккаб ижтимоий-сиёсий, иқтисодий ҳодисадир. Ушбу иллат мамлакатнинг ривожланишини секинлаштиради, ҳукумат тизимини издан чиқаради, демократик институтлар фаолиятига путур етказади. У сайлов жараёнларига салбий таъсир қилиб, қонун устуворлигига жиддий зиён етказади. Шу билан бирга, унинг таъсири остида фуқароларнинг ижтимоий адолатга, хақиқатга ва давлат органларига ишончи йўқолади.

Ҳар қандай жамият учун коррупцияга қарши курашиш энг долзарб масалалардан бири ҳисобланади. 2003 йил 9 декабрда БМТнинг Коррупцияга қарши конвенцияси имзоланганлиги ҳам фикримизнинг исботидир. Шу ўринда таъкидлаш жоизки, юртимизда ҳам коррупциянинг олдини олиш ва унинг илдизларига барҳам бериш борасида кенг кўламли ишлар амалга оширилмоқда, кўплаб тадбирлар ўтказилмоқда. Хусусан, юртимизда ўтказилаётган "Коррупцияга қарши кураш ойлиги" доирасида Ўзбекистон Республикаси Фавқулодда вазиятлар вазирлиги тизимида ҳам ушбу иллатнинг олдини олишга қаратилган  тарғибот тадбирлари бўлиб ўтмоқда.

Вазирликнинг тегишли буйруғига асосан, Андижон вилояти Фавқулодда вазиятлар   бошқармаси шахсий хавфсизлик бўлими ходимлари томонидан Андижон тумани ФВБ 6-Ё++ ҳарбий хизматчилари иштирокида коррупцияга қарши курашиш бўйича профилактик тадбир ўтказилди. Тадбирда  шахсий   хавфсизлик бўлими ходими томонидан коррупциянинг келиб чикиши сабаблари, омиллари ҳақида кенг маълумотлар берилди, унинг аянчли оқибатлари ҳаётий мисоллар орқали тушунтирилди.

Коррупция иллатига қарши муросасиз бўлишимиз лозимлиги, ҳар бир ходим ўз бурчини ҳалол ва тўғри адо этиши, коррупцион ҳолатлар келиб чиқишининг олдини олишга масъул ва бурчли эканлиги алоҳида қайд этилди.

Х.АБДУЛЛАЕВ,

Андижон тумани ФВБ бошлиғи ўринбосари, подполковник.

Огоҳлик!

Бугунги кунга келиб, гиёҳвандликнинг қамрови шу даражада кенг қулоч ёйдики, ушбу иллат бутун жаҳон жамоатчилигини ташвишга солмоқда. Таҳлилларга кўра, кейинги 20 йил давомида кўплаб мамлакатларда гиёҳванд моддалар, шунингдек, психотроп наркотик моддалар истеъмол қилувчи гиёҳвандлар сони кўпайиб бормоқда.

Айтиш керакки,   гиёҳвандликка чалинган беморларда кузатиладиган энг асосий белгилар, бу - гиёҳванд моддага қарамлик ва истеъмол қилувчи асаб тизимининг шикастланишидир. Янада ачинарлиси, гиёҳванд кимса хуруж тутганда оғуни олиш учун кўзига кўринган нарсани бериб юборади, унинг ақли ишламай қолади. Ана шундай ҳолатда у ҳеч кимни, ҳатто ота-онаси, яқинларини ҳам аяб ўтирмайди. Шу боис ҳам, гиёҳвандликка ружу қўйган шахс яшайдиган хонадонда кўпинча фожиали ҳоллар рўй беради.

Тўғри, гиёҳвандликка қарши кураш борасида юртимизда кенг кўламли ишлар олиб борилмоқда. Яширинча олиб бориладиган гиёҳвандлик ҳамда психотроп наркотик моддалар савдосига тўсиқ қўйиш учун дорихоналар, ноқонуний дори савдоси билан шуғулланувчи бозорлар, массажхона, сауна ҳамда тунги клублар қатъий назоратга олинган. Ушбу иллатнинг олдини олиш бўйича тарғибот ишлари олиб борилмоқда. Шунга қарамасдан жамиятимизда гиёҳвандликка тўла барҳам беришга эриша олмаяпмиз. Бу эса мазкур йўналишдаги ишлар самарадорлигини оширишни тақазо этади. Гиёҳвандликка қарши ҳамма - ота-оналар, маҳалла фаоллари,  корхона ва ташкилотлар масъуллари ҳамжиҳатликда, биргаликда курашиши керак. Бу балойи азим - оғуга ёшлар кўпроқ мубтало бўлаётганлигини ҳисобга олиб, эътиборни кўпроқ ёшларга қаратиш, умумтаълим мактаблари, ўрта ва олий таълим муассасаларида  тарғибот ишларини кучайтириш, мутасаддилар масъулиятини ошириш муҳимдир.

Энг муҳими, гиёҳвандлар, гиёҳванд моддалар истеъмол қилишга иштиёқи бор кишиларнинг гиёҳванд моддалар савдоси билан шуғулланувчи шахслар билан муомала қилишига йўл қўймаслик лозим.  Шу йўл орқали ана шу йўлга кирган ёшлар соғлом ҳаётга қайтмоқда. Инсоннинг энг гўзал орзу-умидларидан мосуво қиладиган, эзгу мақсадларидан айирадиган гиёҳвандлик балосига қарши ҳамма бирдек курашиши лозим. Акс ҳолда, аср вабоси бўлган ушбу иллат ҳаётимиздан мустаҳкам жой олиб, жондан азиз дилбандларимизни домига тортаверади. Бунга эса асло йўл қўйиб бўлмайди.

Санжарбек МЎЙДИНОВ, вилоят Транспортда ХТБ ЖҚГ катта тезкор вакили, майор.

Мирзоҳид ҲАКИМОВ,

вилоят Транспортда ХТБ ХПБ катта инспектори, капитан.