Hayot bizga ba’zida og‘ir sinovlar yuboradi. Bu sinovlar ichida OITS (Orttirilgan immunitet tanqisligi sindromi) ham bor, u ko‘pchilik uchun xavotirli va yurakni siquvchi kasallik bo‘lib tuyuladi. Ammo tarixda shunday insonlar bo‘lganki, ular bu tashxisdan cho‘chimay, hayotini mazmunli va maqsadli o‘tkazgan, millionlab odamlarga motivatsiya bo‘lishga ulgurgan. Ularning hayoti nafaqat OITS bilan yashayotganlar, balki boshqa har qanday kasallikka chalinganlar uchun ham saboq va umid manbai bo‘la oladi.

Freddi Merkuri – San’at orqali abadiylikka yetgan yurak

Freddi Merkuri — britaniyalik mashhur “Queen” guruhining asoschisi va bosh solisti, musiqa tarixidagi eng kuchli vokalistlardan biri. 1991-yil 24-noyabr kuni OITS asoratlari tufayli vafot etgan. U kasalligini hayotining oxirgi yillarida ommaga oshkor qilgan va bu orqali OITS haqida ochiq gapirish madaniyatini rivojlantirishga katta hissa qo‘shgan.

Freddi so‘nggi kunlarigacha musiqa yaratishda davom etdi. Uning “The Show Must Go On” qo‘shig‘i — bu kurash, chidam va ijodiy fidoyilik timsolidir. Freddi Merkuri o‘zining ishonchi, irodasi va iste’dodi bilan, kasallikdan kuchliroq bo‘lgan inson sifatida esda qolgan.

Magic Johnson – Kasallikdan kuch topgan sportchi

Ervin “Magic” Johnson — amerikalik basketbolchi, NBA tarixidagi eng buyuk o‘yinchilardan biri. 1991-yilda uning OIVga chalingani aniqlangach, u jamoatchilikka bu haqda ochiq e’lon qildi. Bu qarori orqali OITS bilan bog‘liq stereotiplar va kamsitishlarga qarshi kurash boshlanishiga sabab bo‘ldi.

U faol sport hayotini yakunlagach, OITSga qarshi kurashda faoliyat yurituvchi fond ochdi. Johnson sog‘lom turmush tarzini targ‘ib qilish, test topshirish va profilaktikani kuchaytirish yo‘nalishida ishlamoqda. U kasallikni yengib, sog‘lom va faol hayot kechirish mumkinligini butun dunyoga isbotladi.

 Charlz Shin – Ochiqlik orqali yengilgan qo‘rquv

Amerikalik aktyor Charlz Shin 2015-yilda OIV tashxisini ommaga e’lon qilgan. Bu qaror unga juda qiyin tushgan bo‘lsa-da, u ijtimoiy bosimdan cho‘chimadi. Shin ommaga ochiq chiqish qilgach, OITSga chalingan odamlarga nisbatan ko‘plab noto‘g‘ri qarashlarga barham berishga yordam berdi.

U sog‘lig‘ini nazorat qilishda davom etmoqda va davolanish orqali virusni bostirish holatiga erishgan. Shin o‘z chiqishlarida doimiy ravishda ruhiy holat va psixologik yordamning ahamiyatini ta’kidlaydi. Bu esa kasallikni nafaqat jismoniy, balki ruhiy jihatdan ham yengish mumkinligini ko‘rsatadi.

Charlize Theron – OITSga qarshi ijtimoiy kurash yetakchisi

Janubiy Afrikalik aktrisa Charlize Theron OITS bilan kurashda ijtimoiy faoliyati bilan ajralib turadi. U Charlize Theron Africa Outreach Project nomli jamg‘armasini tashkil qilgan bo‘lib, u orqali Janubiy Afrika yoshlari o‘rtasida sog‘lom turmush tarzini targ‘ib qiladi.

Theron jamiyatda OITS haqida to‘g‘ri bilimlar yetkazish, stigma va diskriminatsiyaga barham berish, va bemorlarni qo‘llab-quvvatlashga qaratilgan ko‘plab loyihalarni amalga oshirgan. U shunday deydi: “Muhim narsa — kasallik bilan yashayotganlarni emas, kasallikni o‘zi yengishdir.”

Yuqoridagilardan xulosa o`ilib aytish mumkinki,  umid bor joyda hayot davom etadi.

OITS — bu og‘ir tashxis. Ammo u umidning oxiri emas. Yuqoridagi insonlar bizga shuni isbotlaydi: insonning irodasi, sevgisi va orzulari kasallikdan ham kuchli bo‘lishi mumkin. Agar siz yoki yaqinlaringiz qandaydir kasallik bilan kurashayotgan bo‘lsa, biling: siz yolg‘iz emassiz. Har qanday dardga qarshi kurashda eng muhim narsa — bu ichki kuch va hayotga bo‘lgan ishonchdir.

Hayot hali oldinda. Bu hayotni to‘liq yashash sizning huquqingiz.

Oysha YO’LBARSOVA,

O’zbekiston davlat jahon tillari universiteti Xalqaro jurnalistika fakulteti 4- bosqich talabasi.