(11- сон) Юз билан юзлашганлар

- дейди Кароматхон момо СОДИҚОВА.

Марҳамат туманидаги Хўжаариқ маҳалласида ўзининг табаррук ёшини қарши олган Кароматхон момо исмли онахон истиқомат қилади.

Нафақат, фарзанд ва набиралари, маҳалладошлари эъзозида умргузаронлик қилаётган онахон билан суҳбатлашиш, дуоларини олиш ниятида унинг файзли хонадонига келувчилар жуда кўп. Юз-кўзларидан нур ёғилиб турадиган онахон меҳмонларни дуо қилишдан чарчамайди. Биз ҳам хотин-қизлар байрами билан момони муборакбод этиб, у кишининг суҳбатида бўлдик. Суҳбат давомида онахон ўзининг ҳаёт  хотираларидан гапириб берди.

- Ҳаётда не-не яхши-ёмон кунларни кўрмадим, - дейди Кароматхон момо Содиқова. - Болалик даврларимни қаҳатчилик йилларида қийинчиликлар билан ўтказдим. Бола бўлсакда онамиз билан далада меҳнат қилардик, лекин тўйиб овқат емасдик.  Ўттизинчи йиллардаги очарчилик, уруш йилларида халқимиз бошига тушган қийинчиликларни эсласам, юрагим орқага тортиб кетади. Қанча-қанча оилалар отасидан, акасидан, турмуш ўртоғидан айрилди. Илоҳим, ундай кунлар ҳеч кимнинг бошига тушмасин.

Урушнинг охирларида момо Омонжон исмли маҳалладоши билан ҳаётини боғлади. Биргаликда бахтли, саодатли умр кечирдилар. Икки ўғил, тўрт нафар қизларини бировдан кам қилмай вояга етказдилар. Ҳамиша тўғрисиз, ҳалол бўлдилар, меҳнатдан ўзларини олиб қочмадилар. Фарзандлари ҳам ота-онасидан ибрат олиб, ҳаётда ўзларининг муносиб ўринларини топдилар.

Ҳозирда 6 нафар фарзанд, 22 набира, 35 чеваранинг эъзозида умргузоронлик қилаётган Кароматхон момо фарзанд ва набиралари бахти,  юртимиз тинчлиги, тўкин ҳаётимиз учун шукрона қилиб яшамоқда.

- Инсон ҳалол, тўғрисўз, меҳнаткаш бўлса, ҳаётда  албатта ўз ўрнини, эл-юрт орасида эъзоз топади, - дейди. - Қолаверса Яратган ҳам унинг барча эзгу ниятларини ижобот қилади. 

Халқимизда  "Қариси бор уйнинг-париси бор" деган нақл бежиз айтилмаган. Кароматхон момо сабаб оиладаги, қариндош-уруғлар ўртасидаги ўзаро ҳурмат, меҳр-оқибат, борди-келдига ҳавасингиз келади. Ўзларининг ҳаёт йўллари, доно насиҳатлари билан бизга ибрат бўлиб яшаётган Кароматхон момодай оналаримиз бор бўлсин. Улар бор экан, ҳаётимиз ҳамиша файзли ва чароғондир.

Шаҳло ХУСАНОВА, Марҳамат тумани.