ибратли аёлларимиз

- Сумбула-ю, сумбула,

Ўраб олай гул билан...

Кенг пахтазорда янграган бу яллани эшитган одам беихтиёр қулоқ тутади.

Улфатхон опа эса пахтазорга кирар-кирмас, ҳеч кимга эътибор бермай, қўшиғини баралла айтганча, ишга тушиб кетади. Лўппи-лўппи очилган оппоқ пахталарни чаноқдан эпчиллик билан териб олар экан, бир зумда этагини тўлдиради.

- Эсимни танибманки, даладаман, - дейди Улфатхон Сиддиқова. - Онам илғор теримчи эди. Унинг ёнига тушволиб кичик шойи рўмолимни тугиб, жажжи қўлларим билан пахта терардим. Рўмолим тўлиши билан дарров онамнинг этагига тўкардим. Терган  пахталаримни кўрган бригадир бобом эркалатиб мақтаб ҳам қўярди,  койиб ҳам қўярди. Лекин, боғча опам мени дарров қўлимдан ушлаб, хона ичкарисига олиб кириб кетарди. У пайтларда теримчилар болаларини далага олиб келишарди, махсус ташкил этилган дала боғчада тарбиячимиз турли шеърлар, қўшиқ, лапарлар айтиб берарди. Адабиёт, санъатга қизиқишим шу ерда уйғонган.

Пахта даласида Улфатхон опага ўхшаш кўнгилли теримчилар кўп. Энг илғорлари кунига 100-150 килограмдан пахта теради. Улфатхон опа бу борада барчасини ортда қолдиряпти. Ёши олтмишни қоралаб бораётган бўлса-да, суяги далада қотгани учун пахта териш унга чўт эмас. Ҳар йили мавсумда кўнгиллилардан бўлиб далага отланади. Бу йил ҳам кунига 160-180 килодан пахта териб, илғорлар сафида бормоқда. Ҳар сафар этак тўла пахтани тортаётган тарозибон пахтанинг чўғини кўриб "чарчамадингизми, опа", дея сўраб қўяди.

- Мени биров "пахта тергани чиқинг", деб айтиб киргани йўқ. Усиз ҳам яхши ҳақ тўланаётгани учун теримчилар тўлиб кетган. "Илғор теримчи бўла туриб нега мен имкониятимни бой беришим керак. Ҳамманглардан кўп териб, кўп пул топаман" дедим-да, этагимни белимга тугиб, далага отландим. Мана, худога шукр, теримда илғорлар қаторидаман.

Улфатхон опанинг 5 фарзанди бор. Айни кунларда унинг 3 ўғли ва 2 қизи ҳам кунига 100 -150 килодан пахта теришмоқда.

- Ўсмирлик давримдан пахта териб келаман. У пайтлари ноябрь-декабрь ойларида ҳам пахта терардик. Совуқда қўлларимиз ёрилиб кетарди. Қийинчилик кўп бўлган. Лекин, меҳнатимизга яраша ҳақ берилмаган. Бугун ҳаммаси ортда қолди. Ҳозир шароитлар яхши. Терган пахтамизга пешма-пеш ҳақларимизни оляпмиз. Иссиқ овқатлар, чойлар узилмайди. Шундай замонларга етганимизга минг шукр! - дейди илғор пахтакор.

Жорий йил вилоятимиз давлатга пахта топшириш йиллик режасини муддатидан олдин бажарди. Оқ олтин хирмонининг тез фурсатларда юксалишида эса Улфатхон опа каби моҳир теримчи аёлларнинг ҳам муносиб ҳиссалари бор.

Гулнора МАҲКАМОВА,

Избоскан тумани, Қораянтоқ қишлоғи.