МУҲАББАТ

Муҳаббат, о жоним муҳаббат,

Жонимда жаноним муҳаббат.

Сендан айро тушолмас кўнгил,

Қалбимда армоним муҳаббат.

Сени дедим - сени изладим,

Давраларда ёниб сўзладим.

Овчи отиб ярадор этган,

Жайрон каби нажот кўзлагум...

Тақдирингни бир умр боғла,

Қўй жабр этма, асра, ардоқла.

Гулга тўлсин - нурларга тўлсин,

Кўнгил деган азиз бу боғлар.

Муҳаббат, о жоним муҳаббат,

Жисмимда жаноним муҳаббат.

Кел, ўзингдан бегона тутма,

Сирдош-қадрдоним муҳаббат!

ШИРИНЛИГИНГ, ШАКАРЛИГИНГ

Мубтало этмиш мени ширинлигинг, шакарлигинг,

Маҳлиё этмиш мени ширинлигинг, шакарлигинг.

Дўст бўлиб қолдим сенга танҳо қадрдонинг ўзим,

Ошино этмиш мени ширинлигинг, шакарлигинг.

Сўзлагум сен ҳақда дилдан дилрабо қалбимдасан,

Дилрабо этмиш мени ширинлигинг, шакарлигинг.

Шул эрур оҳангларим, гоҳ бенаволар ичра шўҳ,

Сернаво этмиш мени ширинлигинг, шакарлигинг.

Дўстларим йўқлар мудом  бахт шу уларнинг кўнглига,

Муддао этмиш мени ширинлигинг, шакарлигинг.

Мубтало шайдо Фарид бир умрлик ошно,

Доимо этмиш мени ширинлигинг, шакарлигинг.

ВАТАН

Турдим сенинг қучоғингда -

Сенинг қучоғингда юрдим.

Кенг муаттар боғларингга,

Қулоч ёзиб югурдим.

Оёқларим толар бўлса,

Ҳордиқ олиб ўтирдим.

Тўймай минг бир рангларингга,

Хонишингни тинглаб жим.

Дард нимадир ҳеч билмадим,

Қувватлар олди таним.

Эй ҳабибим, эй табибим,

Онажоним - Ватаним.

Фарид УСМОН.