Фаол ёшларимиз

Ўзбекистон имкониятлар мамлакати, юртимизда интилиб ҳаракат қилган инсонга, айниқса, ёшларга ўз салоҳиятларини намоён этишлари учун кенг имкониятлар яратиб берилмоқда.

Андижон давлат университетининг бошланғич таълим йўналиши 2-босқичида таҳсил олаётган Гулираъно Ашурбекова ана шундай имкониятлардан фойдаланиб, эзгу ишга қўл урди: ўзи яшаётган уйда болалар боғчаси ташкил этди. Юртимизда кичкинтойларни соғлом ва билимли қилиб вояга етказишга алоҳида эътибор қаратилаётганлигини ҳис қилган Гулираъно оила аъзоларининг молиявий кўмаги билан уй боғчаси ташкил этиб, уни бугунги кун талабларига мос равишда жиҳозлади. Ҳозирда Етмишмерган маҳалласидаги 30 нафарга яқин бола Гулираънонинг боғчасида тарбияланмоқда. Улар билан рус ва инглиз тилларида ҳам машғулотлар олиб борилади. Сўзлашга қийналадиган болалар билан логопед  мутахассис алоҳида сабоқлар олиб боради.

Айни пайтда маҳалладан икки нафар аёл ҳамда оила аъзолари ёрдамида фаолият юритаётган Гулираъно келгусида ўз фаолиятини кенгайтириб, маҳалладаги тенгдошлари, уйда ўтирган аёлларни иш билан таъминлаш ниятида. Ёшлик ғайрати ва шижоатидан куч олиб, юртимизда ёшларга берилаётган имкониятлардан      илҳомланган Гулираъно Ашурбекова ватанига муносиб бўлишга ҳаракат қилаётган ёшлар сафида бўлишга интилмоқда.

Одинахон АБДУСАМАТОВА,

Хўжаобод тумани.