Мавлуда болалигидан тележурналист бўлишни орзу қиларди. Кинофильмлардаги журналистлар ҳаёти, айниқса, воқеа-ҳодисаларни тезкор етказиб берувчи мухбирлар фаолияти уни ўзига ром қилганди. Қизиғи, ҳали мактабга бормаган қизалоқ ҳарфларни Алифбе китобидан эмас, газеталарда чоп этиладиган теледастурлардан ўрганди. Яқинларига қайси телеканалдан, қачон, қандай кўрсатув эфирга узатилиши ҳақида маълумот бериб турган жажжи "журналист", мактабни тамомлагач, касб танлаш борасида иккиланиб ўтирмади. Журналист бўлишга, болалигидаги орзуларини амалга оширишга астойдил бел боғлади. 2006 йилда Мавлуда "Тараққиёт" телерадиокомпаниясига танлов асосида ишга қабул қилинди. Сухандонлик билан бирга, тажрибали журналистлардан тележурналистика сир-асрорларини ўрганиб, малакасини ошириб борди.

 - Бу соҳада иш бошлаганимга ҳам 12 йил бўлибди, - дейди телебошловчи, "Тараққиёт" ТРК муҳаррири Мавлуда Аҳмедова. -  Ушбу жамоа менинг биринчи ва ягона иш жойим, насиб этса фаолиятимнинг охиригача шу ерда ишлашни ният қилганман.  Ўйлаб қарасам,  вақтимнинг асосий қисми уйдан кўра кўпроқ ишхонада ўтаркан. Демак, ишхона ҳам уйим, жамоа аъзолари - оилам, журналистика эса ҳаётимдир. Ижодий гуруҳимиз аъзолари опа-синглим, ака-укам каби қадрдон бўлиб кетишган. Жамоамиз аҳил-иноқ. Энг муҳими, орамизда соғлом ижодий рақобат ҳукмрон.

Мавлуда Аҳмедова телевидениеда ранг-баранг кўрсатувлар тайёрлаш билан бирга, "7х7" газетасида ҳам долзарб мавзудаги мақолалари билан қатнашиб туради. Телерадиокомпания раҳбари Маҳмуджон Мамадалиев, марҳум журналист Абдураҳмон Тўлановларни устозлари сифатида ҳурмат билан тилга олади. Айни кунларда тиниб-тинчимаган ижодкор янги лойиҳа устида иш бошлаган.

Изланувчан ижодкор, телебошловчи Мавлуда Аҳмедованинг эзгу мақсадларга йўғрилган иш фаолиятида куч-қувват, муваффақиятлар ва ижодий баркамоллик тилаб қоламиз.

Муҳайё Исмоилова