Қучоғига баҳорлари ярашади,

Сабо эсган наҳорлари ярашади.

Ватанимга шайдо бўлган дунёларнинг,

Тенгсиз, деган баҳолари ярашади.

Заминига мажнунтоллар қилар таъзим,

Тинчлигининг ўзи байрам, энг зўр базм.

Парвозларга отлансам гар оқ йўл тилаб,

Ўқиб турган дуолари ярашади.

Ўтмишлари келажакка пойдевор юрт,

Баркамоллик чўққисига харидор юрт.

Минг аламлар бўлса ҳамки бундай элга,

Жондан бўлган жудолари ярашади.

Манглайига бахтдан тумор тақиб олган,

Дўстларининг юрагига ёқиб қолган.

Бахтнинг қуши қўниб турган ҳур диёрга,

Олим, шоир, даҳолари ярашади.

Садоқат НЕЪМАТОВА