(4- сон) Тўйхат ўрнида

Шоир қалби ҳамиша беором. Унга шеър ёзиш истаги ҳеч тинчлик бермайди. Айниқса, тунлари кўзга уйқу инмайди. У тонга қадар қоғоз ва қалам билан сирлашиб чиқади. Уларнинг ҳаёт тарзи шундай.  Гоҳ илҳом соғинчи, гоҳ ижод завқи юракларини тўлқинлантиради. Ана шундай тўлқинлар ичра яшаб, бугун ўзининг 75 ёшини қарши олаётган Эркин Охунд вилоятимизнинг сермаҳсул ижодкорларидан биридир. У ярим асрдан зиёд бўлган ижод йўлини босиб ўтди.

Эркин Охунд Тошкент давлат университетининг журналисика факультетида таҳсил олди. Темир йўлда ишчи, Республика Матбуот қўмитаси бошқармасида муҳаррир, "Ёш ленинчи" (хозирги "Туркистон") газетасида адабий ходим, Ўзбекистон телевидениесида муҳаррир вазифаларида фаолият юритди.

Ҳозирда кексалик гаштини сураётган шоирга истиқлол чин маънода илҳом берди. Чунки унинг аксарият тўпламлари   мустақиллик йилларида чоп этилди.  Жумладан, 1995 йили "Қаҳрамонлик балладаси", 1999 йили "Онам, онажон", 2000 йили "Янгиқишлоқ", 2001 йили "Куйганёр" шеърий тўпламлари   нашрдан чиқди. Ижодкор кўп йиллик самарали меҳнатлари учун "Ўзбекистон Республикаси Мустақиллигига 25 йил" эсдалик нишони билан тақдирланди.

Яқинда Эркин Охунднинг 75 ёшга тўлиш муносабати билан Андижон қишлоқ хўжалик      институти қошидаги 2-академик лицейда ижодий учрашув бўлиб ўтди. Тадбирда ижодкорлар, лицей  ўқитувчи ва ўқувчилари иштирок этди. Ижодий учрашувда сўзга чиққан Маънавият тарғибот маркази Андижон тумани бўлими раҳбари Фазлиддин Расулов, Ўзбекистон ХДП Андижон тумани Кенгаши раиси Ҳакимжон Муллажоновлар шоирнинг ҳаёти ва ижодий фаолияти ҳақида сўз юритдилар. Шундан сўнг шоир ўқувчиларга янги шеърларидан ўқиб берди, мустақиллик, тинчлик ва ҳотиржамлик, халқимиз эришаётган ютуқлари, ёшлар учун яратиб берилган кенг имкониятлар ҳақида гапирди.

  Лицей ўқувчилари томонидан шоир ижоди асосида тайёрланган бадиий чиқишлар, унинг ҳаёт ва ижодига оид савол-жавоблар барчада катта таассурот қолдирди.

Хосият НИГОР.

* * *

Қуйида шоир ижодидан намуналар эътиборингизга ҳавола этилади.

ВАТАН

Биз замоннинг фарзандларимиз,

Замон - Ота, макон - Онадир.

Хар қандайин шароитда ҳам,

Ватан ишқи дилда ёнадир.

Ватан - умр, Ватан бу - тақдир,

У Аллоҳнинг буюк инъоми.

Муққаддасдир доимо Ватан,

Бор-ки кимнинг қалбда иймони.

Бахтни баҳам кўришайлик, кел

Янги йил, сен янги достонсан,

Сен менга Ер, менга Осмонсан,

Менинг ҳаётимга посбонсан,

Кел, азизим кўришайлик, кел,

Бахтни бахам кўришайлик, кел.

Майдонингда отни ўйнатсам,

Сўйламаган тилни сўйлатсам.

Бўйларингга бўйим бўйлатсам.

Кел, азизим кўришайлик, кел,

Бахтни баҳам кўришайлик, кел.

Мен ошиқман сенга азалдан,

Айтиб қўяй сенга аввалдан,

Ширин дейман сени асалдан,

Кел, азизим кўришайлик, кел,

Бахтни баҳам кўришайлик, кел.

Сен чечаксан кўксимда унган,

Сен юлдузсан куйдирган, куйган,

Сен ҳур қизсан суйдирган, суйган,

Кел, азизим кўришайлик, кел,

Бахтни баҳам кўришайлик, кел.

Пойларингга гуллар сочарман,

Фақат, сенга кўнгул очарман,

Fайрат билан тўлиб тошарман,

Кел, азизим кўришайлик, кел,

Бахтни баҳам кўришайлик, кел.

Эркин ОХУНД.