(52- сон, 2016 й.) Дил туFёни

Инсон бошига иш тушмагунча, тинч ҳаётининг қадрига етмас экан. Баъзида ўйланиб қоламан. Қайси айбим учун тақдир мени бунчалар жазолади. Балки бунга эътиборсизлигим сабаб бўлгандир.

Мактубимни таҳририятга жўнатишдан олдин анча ўйландим. Кейин кўнглимдагиларни баён этсам уларни ўқиб ёки эшитганлар, ўзларига тегишли хулосани чиқариб олар, деб ўйладим.

Ҳар бир инсоннинг ҳаётда ўз жуфти бор бўлади. Қиз бола вояга етганда уни сўраб-суриштирувчилар кўпаяр экан. Ўшанда энди 18 ёшга тўлгандим. Мени бир оиланинг якка-ю ёлғиз ўғлига сўраб келишди. Йигит чет давлатга бориб ишлар экан. У билан учрашдик. Уй-жойлари, оила аъзолари ота-онамга маъқул келди. Улар бой-бадавлат хонадонда кам-кўстсиз яшайди дея тузукроқ сўраб-суриштирмай тўйга рози бўлишди. Мен ҳам уларни раъйини қайтармадим.

Тўй куни ҳам белгиланди.. Барча меҳмонлар айтилган, тўйхона билан келишилган. Келин либос ҳам сотиб олинган, хуллас тўйга барча нарса тахт эди. Тўйга икки кун қолганда, уйимизга икки аёл келди. Тўйнинг ширин ташвишлари билан уларга эътибор бермагандим. Ўша икки аёл бўлажак куёвболанинг маҳалласидан экан. Маълум бўлишича, куёв бўлмиш йигит чет давлатдан қайтганида тузалмас дардга гирифтор бўлганини ота-онамга етказишибди. Шу куни тўй тўхтатилди. Ҳамманинг оғзида ҳар хил гап. Кимдир тушунади, кимдир холимга ачинади, яна бошқаси эса "фотиҳаси бузилган қиз бахтсиз бўлади" дейди.

Йигитнинг ота-онасини мен тушунаман. Улар ҳам фарзандининг бахтини ўйлашган. Бироқ менинг тақдирим-чи? Наҳот қиз боланинг қадр-қиммати йўқ бўлса? Наҳот оила пойдевори ёлғонлар асосида барпо бўлса?

Эҳтимол, тақдиримга шундай бўлишлик ёзилгандир. Нима бўлганда ҳам бундан ҳафа бўлмадим. Аксинча, кўнгилсизликнинг, ҳаётим барбод бўлиши мумкинлигининг олди олинганидан хурсанд бўлдим. Шу ўринда ота-оналарга айтардимки, қизингизни бойлик ёки орзу-ҳавас деб, сўраб-суриштирмай, қандайлигини билмаган инсон билан ҳаётини боғламанг. Азиз фарзандингизнинг орзу умидларини барбод қилманг.

Қизнинг дил сўзларини оққа кўчирувчи:

Нодира АКРАМЖОНОВА.