(Фахрия)

Ошуфта кўнгиллар изҳори сенда,

Дунё тилсимлари, асрори сенда,

Жаннат гулларининг ифори сенда, -

Муҳаббат аталмиш баҳорсан, Аёл,

Сен кўклам тонгисан, наҳорсан, Аёл!

Сен буюк неъматсан, азиз, муқаддас,

Таъриф этмоқликка ҳар не сўз абас,

Кўҳна замин сенинг пойларингда маст -

Тоза ҳис, бокира туйғусан, Аёл,

Мудом эзгуликка уйғунсан, Аёл!

Сен -сурур, сен - шарор, сен - ҳаёт тоти,

Ошиқи зорларнинг мангу баёти,

Суйган дил уфқига ҳар кеча ботиб, -

Субҳидам чиққувчи офтобсан, Аёл,

Малаксиймо пари, моҳтобсан, Аёл!

Сен - онам, сен - опам, сингил, маҳваш ёр,

Қалбингда меҳр кўп, муҳаббат бисёр,

Хонадон бекаси, ҳурсан бетакрор -

Элнинг бошидаги ҳумосан, Аёл,

Чароғон юлдузли самосан, Аёл!

Номингни тилимда, сўзимда тутай,

Дийдор миннатини кўзимда тутай,

Бошга қўяй сени, ўзимда тутай, -

Давлатим, савлатим, боримсан, Аёл,

Диёнат, номусим, оримсан, Аёл!

Сен - башар онаси, ибтидо насли,

Биз интилгувчи нур, маёқсан асли,

Малоҳат, латофат, нафосат фасли -

Ҳамал дебочаси Наврўзсан, Аёл,

Қутсан, баракасан, ризқ-рўзсан, Аёл!

Нажмиддин ИКРОМИЙ