Фикр

Юртимизга гўзал ва бетакрор баҳор фасли ташриф буюрди. Дарахтлар куртак ёзиб, қир-адирларда бойчечаклар очилмоқда.

Ариқ бўйларида ялпизлар ва майсалар бўй кўрсатиб, наврўз келишидан дарак бермоқда. Бу байрам сабаб олам-олам қувонч, янги орзу-ҳаваслар ва эзгу истаклар қалбларимизда жўш уради. Халқимиз ҳар йили наврўзни интиқлик, кўтаринкилик ҳамда ўзгача тайёргарлик билан кутиб олади. Бобо ва момоларимиз ушбу ёруғ кунларга, соғ-саломат етиб келганларига шукрона келтириб, Ватанимиз тинчлиги, фаровонлигини тилаб, дуо қиладилар. Ёшларга ҳаёт гўзаллигининг, осойишта кунларнинг қадрига етишликни уқтирадилар.

Ушбу байрамда гина-кудуратлар унутилади, бева-бечоралар, хаста ва муҳтож кишилар, яқин қариндошлар, ёши улуғ отахону онахонларимиз ҳолидан хабар олиниб, уларга меҳр-мурувват кўрсатилади.

Шунингдек, наврўз байрамини ўзгача шукуҳда қарши олиш мақсадида барча маҳалла ва кўчаларда ободонлаштириш, кўкаламзорлаштириш ишлари олиб борилади. Наврўз кунлари кўча-кўйда шаҳар ва хиёбонларда, қир-адир ва яйловларда сайллар уюштирилиб, миллий ўйинларимиз халққа намойиш этилади. Бундан ташқари, арқон тортиш, оқ теракми, кўк терак, тўптош ва шу каби турли халқ ўйинлари, айтишувлар, куй-қўшиқлар авжига чиқади. Момоларимиз, онахонларимиз томонидан дошқозонларда шифобахш таом - сумалак қайнайди. Дилбар келинчаклар ва лобар опа-сингилларимиз баҳорий таомлардан кўк чучвара, кўк манти, кўк сомса, турли пишириқлар тайёрлашади.

Бу каби анъаналар давомийлиги миллий қадриятларимизни улуғлаш билан бирга, ўзбек халқи орасида меҳр-оқибат ришталарини янада  мустаҳкамлайди. Ҳар бир юртдошимиз, айниқса, биз педагоглар ана шу анъаналарни ардоқлашда, жаннатмонанд ўлкамизни кўз қорачиғидек асраб-авайлашда фидойи ва ибрат бўлишимиз лозим. Зотан, миллий қадриятлари бардавом халқ ҳеч қачон завол топмайди.

Муяссархон

САЙФУТДИНОВА,

Асака туманидаги

14-умумтаълим

мактаби ўқитувчиси.