У кулганда яшнайди олам,

Кетар қалбдан ғам-ташвиш, алам,

Мудом таъриф айлаган қалам,

Асл бахтнинг меҳвари - аёл.

Тунларини бедор ўтказган,

Ташвиш келса, кулиб кетгазган,

Сизни бизга Оллоҳ етказган,

Садоқатнинг меҳвари - аёл.

Душманга ҳам яхшилик қилар,

Маъсум дилнинг бошини силар,

Кимдир билмас, кимлардир билар,

Саховатнинг меҳвари - аёл.

Бетоб бўлиб ётиб қолса ҳам,

Қул ушлашиб ғамлар келса ҳам,

Фарзандини кўрса бас бекам,

Матонатнинг меҳвари - аёл.

Оиласин асрар ёмондан,

Бало-қазо, туҳмат, гумондан,

Нолимайди асло замондан,

Адолатнинг меҳвари - аёл.

Асли унга эгилмаган ким?,

Аслзода, малика, хоним,

Сизу бизга тарихдан маълум,

Тожу-тахтнинг меҳвари - аёл.

Муслимахон МАМАТОХУНОВА