Қалбимнинг тубида исмингиз

Қалбимнинг тубида исмингиз пинҳон,

Ёдимдан чиқмайди кулгуларингиз.

Сизни хотирлайман ҳар лаҳза, ҳар он,

Биламан соф эди туйғуларингиз.

Баҳорнинг энг хушбуй чечакларида,

Гўзал  севгимизнинг бўйи таралган.

Ҳаётнинг энг маҳзун эртакларидан,

Бизнинг аччиқ қисматимиз яралган.

Оловтафт туйғулар сўнади бирдан,                                                                    

Fурур  йўлимизга улкан  ғов бўлар.

Нолиймиз  шафқатсиз тақдиримиздан

Қалб айрилиққа дош беролмай йиғлар.

Кузнинг хазонрез япроғи мисол,

ҳижрон йўлагида сўнар севгимиз.

Мангу армонимиз бўлганча висол,

Тақдирнинг измига кўнар қалбимиз.

Марҳабо АКБАРАЛИЕВА, Асака тумани.

Муҳаббатнома

Муҳаббатнинг шаробидан қониб-қониб ичдим мен,

Муҳаббатли кимсаларни жоним бирла қучдим мен.

Риёкорнинг жилвасидан бир умрга кечдим мен,

Меҳрлилар шуъласида жумбоқларни ечдим мен.

Муҳаббатдан яралгандир табиатнинг неъмати,

Муҳаббатдан яралгандир Оллоҳнинг марҳамати.

Муҳаббатсиз нодонларга йўқдир унинг ҳиммати,

Муҳаббатсиз кимса бўлмас Муҳаммаднинг уммати.

Келинг дўстлар, муҳаббатнинг машъаласин ёқайлик,

Меҳр тўла кўзлар бирла жонни жонга қоқайлик.

Муҳаббатсиз кимсаларнинг бағрига ўт ёқайлик,

Алам бирла ёнган чоғи зимдан қиё боқайлик.

Мавжудахон МАНСУРОВА, Улуғнор тумани.

Шеърият

Билмадим, мазмунсиз бу дунёларда,

Сенсиз қай ҳолатда яшар эканман.

Шеърият, мен сени дилдаги орим,

Қувончим, шодлигим, борим деганман.

Ахир сен эмасми, тор бу ҳаётни,

Менинг хаёлимда поёнсиз этган.

Сен билан юрагим, сен бор бу қалбим,

Зулматдан нур сари илдамлаб кетган.

Агар сен бўлмасанг дилдаги дардим,

Тоғлардан-да ошиб кўкка етарди.

Сенсиз бутун умрим бутун ҳаётим,

Тубсиз жар томонга қараб кетарди.

Аммо сен ўргатдинг дилдаги дардим,

Оддий сатрлар-ла енгишни менга.

Қалбни эгаллаган аламли гардни,

Шеърият, айтаман бир фақат сенга.

Оллоҳдан сўрайман сен ва мен учун,

Нурлардан яралган нурли маконни.

Сен билан шеърият бир бутун бўлиб,

Енгамиз ҳаётда яхши-ёмонни.

Сетора МУҲАММАДЖОНОВА, Пахтаобод тумани.

Кўнгил

Гоҳида ҳаётга боқади теран,

Гоҳ майда дардларга бўлади маскан,

У менинг дўстимдир, у юзсиз душман,

Менинг ҳеч кимим йўқ кўнглимдан бўлак.

Ёқалар ёнида енг кўрмади у,

Сохта жилваларда ранг кўрмади у,

Ҳеч кимни ўзига тенг кўрмади у,

Менинг ҳеч кимим йўқ кўнглимдан бўлак.

Гоҳ йўлимдан озган сарбоним ўзинг,

Қучоғида ухлар армоним менинг,

Бир кун кулармикан даврони унинг,

Менинг ҳеч кимим йўқ кўнглимдан бўлак.

Йиғлайди шодланса, аччиқ кулфатда,

Фақат ёшларини тўкар хилватда,

Яхши ҳам, ёмон ҳам ўзи, албатта,

Менинг ҳеч кимим йўқ кўнглимдан бўлак.

Тоғ эди кундан кун боряпти нураб,

Дунё бир тарафдир, у-чи бир тараф,

Шавкатингни дариғ тутмагил, ё Раб,

Менинг ҳеч кимим йўқ кўнглимдан бўлак.

Дилнозахон ҲОШИМОВА, Бўз тумани.

Янги йил ташрифи

Дилда қувонч, ҳаяжон,

Шодликларга тўлар дил.

Бахт улашиб бир жаҳон,

Кириб келди Янги йил.

Оқ либосга бурканар,

Бутун олам, дала, қир.

Кўм-кўк арча безалар,

Кириб келди Янги йил.

Пок нияту тилаклар,

Изҳор этар бу кўнгил.

Орзу, истак юксалар,

Кириб келди Янги йил.

Жарангласин шўх кулгу,

Юракдан кетсин хижил.

Юртни қопласин ёғду,

Хуш келибсан, Янги йил!

 Машҳура БОТИРОВА

Янги йил кечаси

Уй тўрида безанган арча,

Кўнгилларга қувонч улашар.

Тўпланишиб кекса-ёш,барча,

Эзгу тилакларни тилашар.

Қорбобони кутар интизор,

Катталар ҳам бола сингари.

Гўё унда бир мўъжиза бор,

Бошлар гўё бахт қасри сари.

Олиб келгин  қувонч ва омад,

Бутун дунё аҳлига йилим.

Инсоният бўлсин саломат,

Шунда яшнар менинг ҳам дилим.

Мадинабону АСЛИДДИНОВА, Балиқчи тумани.

Кетаман

Соғинч саҳросида бир ўзим ёлғиз,

Ҳижронли тунларда сени кутаман,

Бахтни ҳис қилолсанг агарда менсиз,

Майлига азизим, сендан кетаман.

Биргина бахтлиман, десанг кифоя,

Сен учун азобим ичга ютаман,

Оллоҳдан бир сенга тилаб ҳидоят,

Майлига азизим, сендан кетаман.

Юрагим азобга макон бўлса ҳам,

Орзулар саробдек ҳазон бўлса ҳам,

Соғинчдан қароқлар намга тўлса ҳам,

Майлига азизим, сендан кетаман.

Кетаман ортиқ сўз сўрамайман, бас,

Армоннинг қўлидан ожиз тутаман.

Мафтунингга айланиш бўлиб бир ҳавас,

Майлига азизим, сендан кетаман.

Мафтуна ТўЛАНБОЕВА, Жалақудуқ тумани.

Адашган кўнгил

Қалбим синди, бўлиб чил-чил,

Кўзларимда аччиқ кўз ёш.

Сўзламоққа ожиз бу тил,

Ёрим бўлдингми, бағритош?

Ишонибман сўзларингга,

Билмай орзум сароблигин.

Алданибман кўзларингга,

Сезмай ҳолим хароблигин.

Майли, бари қисматда бор,

Ўзга севги керакмас менга.

Сенда борми виждон ёки ор,

Ёлғончилар ёр бўлсин сенга.

БИБИХОНИМ, Бўз тумани.

Сен мени ўйлайсан

Қуёш ботиб кетди уфққа,

Кўринади туннинг қораси.

Юзларимга ранги синиққан,

Борлиқнинг тушади сояси.

Совуқ хона. Феврал. Орзиқиш-

Тоғларни юборса қулатиб;

Сен ўт қалаб ёқасан олов,

Нигоҳингга кўчар сурати.

Мен эса сўзларни ўйнайман,

Оқ қоғоз устида парчалаб.

Совуқ қиш бағрига кўнмаган,

Юрагим ёнишдан чарчамас.

Баҳорни эслатиб оловлар,

Осмонга кетади туташиб.

О, ота мен нени ўйлайман,

Сен мени ўйлайсан, шубҳасиз.

Зулхумор ОРИФЖОНОВА

Қиш

Қиш фаслига гўзаллик қўшиб,

Покиза ранг, орзу ёғади.

Илҳом олар ижодкор жўшиб,

Қор валсидан роман ёзади.

Бахти кулган келинчаклардай,

Оппоқликка бурканган атроф.

Янги йилнинг арафасида,

Ризқ ёғади, орзулардай соф.

Мадинабону ҲАБИБУЛЛАЕВА,

Избоскан туманидаги  34-умумтаълим мактаби ўқувчиси.