(19 - СОН)

Андижон шаҳридаги "Тошкент премиум" тўйхонасида Андижон, Булоқбоши, Жалақудуқ, Шаҳрихон, Хўжаобод, Қўрғонтепа туманлари ва Андижон шаҳрида истиқомат қилувчи 7 жуфт келин-куёвнинг  никоҳ тўйи бўлиб ўтди.

Йил дастурида белгиланган вазифалар ижросини таъминлаш, халқимизнинг қадим ва ўзига хос қадриятларига ҳамоҳанг бўлган хайрли ишлар кўламини кенгайтириш, инсон манфаатларини ҳимоя қилиш мақсадида Ўзбекистон Касаба уюшмалари федерацияси, вилоят ҳокимлиги, хотин-қизлар қўмитаси ҳамда бошқа қатор ташкилотлар ҳамкорлигида ўтказилган никоҳ тўйлари миллий анъана ва урф-одатлар асосида ташкил этилди.

 Андижон шаҳридаги байрамона безатилган муҳташам "Тошкент премиум" тўйхонасида келин-куёвлар карнай-сурнайлар садолари остида кутиб олинди. Тўй тадбирида  келин-куёвларнинг қариндош-уруғлари, маҳалла фаоллари, меҳнат фахрийлари, кенг жамоатчилик вакиллари иштирок этди.

- Президентимиз раҳнамолигида ташкил этилган мазкур тўйлар ижтимоий кўмакка муҳтож инсонларнинг кўнглини кўтаришга, ҳаётларига ўзгача файз ва мазмун киритишга хизмат қилмоқда, - дейди Шаҳрихон тумани ҳокимининг ўринбосари, хотин-қизлар қўмитаси раиси Фаридахон Турдиева.- Тадбир давомида келин-куёвлар, уларнинг ота-оналари, яқинлари юзида қувонч, мамнунлик, ҳаётдан баҳтиёр эканликлари ўз аксини топди.  Энг муҳими, мазкур тадбир ҳар бир фуқаро давлатимиз ва ҳукуматимиз эътиборида эканлигининг ёрқин намунаси бўлди.

Хайрия тадбири унутилмас лаҳзаларга бой бўлди, ёш оилаларга Президент совғаси - замонавий ётоқхона мебеллар тўплами, вилоят ҳокимлиги ва бошқа хомий ташкилотларнинг совғалари топширилди. Шунингдек, келин-куёвларга никоҳ узуги, тўй сарполари туҳфа этилди. Тўй келин-куёвлар, ота-оналари қалбига бир олам қувонч бағишлади.

- Ёлғиз аёлман, фарзандим Жамолиддиннинг никоҳ тўйини ўтказдик, - дейди Булоқбоши туманидаги "Нур замин" маҳалла фуқаролар йиғинида яшовчи Иқлимхон Хайитова. - Кам таъминланган оилалар, уларнинг фарзандларига кўрсатилаётган эътибор ва ғамхўрликдан беҳад мамнунман. Бунинг учун барча оналар номидан Президентимизга чексиз миннатдорчилик билдираман.

Шунингдек, Андижон шаҳри ва Андижон, туманида истиқомат қилувчи 17 нафар болажоннинг суннат тўйи ҳам ўтказилди.

Тўй болалар ҳам  карнай-сурнай садолари остида миллий анъаналаримиз асосида кутиб олинади. Тантана давомида болажонларга вилоят ҳокимлиги, хомий ташкилотларнинг совғалари, турли мавзулардаги китоблар тўплами ҳамда Халқ банки бўлимлари томонидан ҳисобига 1 миллион сўмдан маблағ қўйилган омонат дафтарчалари топширилди.

Эзгуликка йўғрилган мазкур хайрия тадбирлари кўплаб фуқароларнинг кўнглини тоғдай кўтарди, уларга қувонч ва шодлик улашди. Қолаверса, юртдошларимиз қалбида меҳр-оқибат, саховат, одамийлик, эзгулик каби фазилатларни янада мустаҳкамлади.

Тадбирларда Андижон вилояти ҳокими Ш. Абдураҳмонов иштирок этди.

        Иродахон МАХАТОВА,

вилоят ҳокимлиги бош мутахассиси.