Саёҳат

Ўзбекистон Республикаси ДХХ Чегара қўшинларига қарашли Қўрғонтепа туманида жойлашган ҳарбий қисмда аскар ва зобитларнинг турли мозийгоҳ ҳамда зиёратгоҳларга саёҳатлари тез-тез уюштириб турилади. Яқинда ҳарбий қисм раҳбарияти ташаббуси билан ҳарбий хизматчилар Хонобод шаҳридаги "Фозилмон ота" зиёратгоҳида бўлишди. 

Ушбу тарихий масканнинг ўзига хос жиҳати унинг ҳудудида шифобахш булоқнинг борлигидир. Ривоятларга кўра, XIII асрда яшаб ўтган уламо,    пайғамбаримиз авлодларидан Сайид Фозилмон Деҳлавий хазратлари Аллоҳнинг иродаси ила муқаддас булоқ бўйини ўзига макон қилган. Инсонларни дину диёнатга, ҳақиқатга, маърифатга чорлаган. Ўз кароматлари билан эл орасида авлиёлик  мақомини олган. У зот вафот этгач, шу жойга дафн қилинади.

XVI аср охирида келган кучли сел натижасида Фозилмон ота мақбараси лойқа остида қолади. 1805 йилда уламо Холмуҳаммад Эшон ибн Хувайдо томонидан қабр ўрни аниқланиб, мақбара қайта тикланган.

Аскарлар бу ерда яхши ҳордиқ чиқариш билан бирга маънавий озуқа олдилар, зиёратгоҳ, юртимиз тарихига оид кўп маълумотларга эга бўлдилар.

Саёҳат аскарларда катта таассурот қолдириш билан бирга, қалбларида тарихга, муқаддас қадамжоларга ҳурмат, Ватанга садоқат туйғуларини янада мустаҳкамлади.

 Талъатбек ЎЛМАСОВ,

ҳарбий хизматчи.