тадбир

Мозийгоҳ ҳар бир халқнинг тарихи, турмуш тарзи, урф-одатлари, қадриятларидан ҳикоя қилувчи маскандир. Инсон ўз юрт тарихи ҳамда дунё   халқларига оид маълумотлардан хабардор бўлиш, бу борадаги билими ва савиясини ошириш, ўзлигини англаш учун ҳам мозийгоҳларга саёҳат қилиб туриши мақсадга мувофиқдир.

Ўзбекистон Республикаси ДХХ Чегара қўшинларига қарашли Қўрғонтепа туманидаги ҳарбий қисм хизматчиларининг Андижон вилояти тарихи ва маданияти давлат музейига саёҳати ҳам ана шу мақсадда ташкил этилди.

Аскарлар мозийгоҳда "Кўҳна ва навқирон Андижон" ҳамда "Водийнинг табиати, ўсимликлари ва ҳайвонот дунёси" экспозицияларини мароқ билан томоша қилдилар. Шунингдек, улар мозийгоҳ бисотида сақланётган таниқли рассомлар ва халқ амалий санъати усталарининг асарлари билан ҳам яқиндан танишдилар.

Ушбу тадбир аскарларнинг тарихимизга, тарихий қадриятларимизга бўлган ҳурматини ошириш билан бирга, қалбларида Ватанга муҳаббат, юртга садоқат туйғуларини янада  мустаҳкамлашга хизмат қилди.

Талъатбек ЎЛМАСОВ,

ҳарбий хизматчи.