Фан ойлиги

Маълумки, февраль ойида вилоятимиздаги умумтаълим мактабларида математика-информатика фани ойлиги доирасида турли тадбирлар, очиқ  дарслар ўтказилди.

 Марҳамат туманидаги 32-умумтаълим мактабида ҳам қатор тадбирлар ташкил этилди. Жумладан, математика фани ўқитувчиси Ханифахон Олимова ташаббуси билан 5-синф ўқувчилари ўртасида ўтказилган "Билимдон ёшлар" интеллектуал-заковат беллашуви ана шундай тадбирлардан бири бўлди.

Х. Олимова математика фанини ўқитишда илғор педагогик технология ва илғор ўқитиш услубларини фаолиятига кенг татбиқ этиб келаётган мактабнинг тажрибали ўқитувчиларидан биридир. Унинг ўқувчилари фан олимпиадалари, турли танловларда юқори натижаларни қўлга киритиб келмоқда. Айниқса, унинг раҳбарлигидаги "Ёш математик" фан тўгараги   машғулотларида ўқувчилар фаол иштирок этиб, фан сирларини пухта эгалламоқда.

Фан ойлиги доирасида ўтказилган беллашувда жамоаларнинг чиқишлари нуфузли ҳакамлар ҳайъати томонидан баҳолаб борилди.  Якуний натижаларга кўра, 5- А синфининг "Билимдон" жамоаси ғолиб деб топилди.

Беллашувнинг ғолиб ва    совриндорлари, тадбирнинг фаол иштирокчилари мактаб маъмурияти томонидан фахрий ёрлиқ ва эсдалик совғалар билан тақдирланди.

Ёрқиной ЭШМУРОДОВА,

мазкур мактаб ўқитувчиси.