Андижон шаҳрининг Чўлпон шоҳкўчасида муҳташам Ёшлар маркази фойдаланишга топширилди.

Давлатимиз раҳбари Шавкат Мирзиёевнинг 2017 йил июнь ойида Андижон вилоятига ташрифи чоғида берган топшириқларига асосан бунёд этилган Ёшлар маркази очилишига бағишланган тадбирда кенг жамоатчилик вакиллари, ёшлар иштирок этди.

Кенг ва ёруғ, барча қулайликларга эга, фаоллар, семинар, конференция ва форумлар заллари, ахборот-ресурс маркази, "Yosh tadbirkorlar" коворкинг маркази ҳамда 500 ўринли асосий залдан иборат марказ биноси Андижон шаҳридаги "Қишлоқ қурилиш" масъулияти чекланган жамияти қурувчи ва мутахассислари томонидан барпо этилди. 2017-2018 йиллар давомида олиб борилган қурилиш ва реконструкция ишларига 11 миллиард сўмдан зиёд, жиҳозлаш учун 1,5 миллиард сўм маблағ сарфланди.

Энди Ўзбекистон ёшлар иттифоқи вилоят Кенгаши ҳам мазкур бинода фаолият кўрсатади, шунингдек, келгусида компьютер саводхонлиги, инглиз, рус, корейс тили, шахмат-шашка, рассомчилик, пазандалик, рақс, театр, ёш журналистлар тайёрлаш, умуман, 6 та йўналиш бўйича тўгараклар, фитнесс клуб, диний-маърифат, психологик ёрдам кўрсатиш маркази фаолияти йўлга қўйилади. Натижада қарийб 1,5 минг нафар йигит-қиз машғулотларда қатнашиш имконига эга бўлади.

- Марказнинг фойдаланишга топширилиши янги йил байрами олдидан андижонлик ёшлар учун байрам туҳфаси бўлди, - дейди Ўзбекистон Ёшлар иттифоқи вилоят кенгаши раиси Ойбек Юлдашев. - Қолаверса, марказ ёшларимизга янада кенг имкониятлар эшигини очиб беради. Биз ёшлар кўрсатилаётган бу каби эътиборга муносиб, юрт равнақи йўлида янада фаол бўлиш учун бугунгидан-да самарали меҳнат қиламиз. 

Тадбир доирасида "Ёшлар - келажак бунёдкори" дастури доирасида ўз тадбиркорлигини йўлга қўйган тадбиркор ҳамда ҳунарманд ёшларнинг эришган ютуқлари ва улар томонидан ишлаб чиқарилаётган, тайёрланаётган маҳсулотлар кўргазмалари, шунингдек, бир гуруҳ ёшларнинг истиқболли бизнес-лойиҳалари тақдимотлари ўтказилди. Ёшлар бадиий жамоалари, ёш ижодкорлар, спортчиларнинг кўргазмали чиқишлари барчада катта таассурот қолдирди.

Тадбир якунида намойиш этилган гала-концерт барчага хуш кайфият улашди.

Муаззам  ИБРОҲИМОВА