Андижон шаҳридаги вилоят Қўғирчоқ театрида Зулфия номидаги Давлат мукофотига номзодлар саралаш танловининг вилоят босқичи бўлиб ўтди.

Танлов очилишида вилоят ҳокимининг ўринбосари, хотин-қизлар қўмитаси ҳамда Зулфия номидаги Давлат мукофотига номзодлар саралаш вилоят комиссияси  раиси Манзурахон Юнусова сўз олиб, мамлакатимизда ёш авлодни ҳар томонлама етук ва баркамол униб-ўсишлари, ўз иқтидор ва салоҳиятларини тўлақонли намоён этишлари учун кенг имкониятлар яратиб берилаётганлиги, хусусан, Зулфия номидаги Давлат мукофоти танлови кўплаб ёш истеъдод ва иқтидор соҳибаларини юзага чиқаришда, уларни қўллаб-қувватлаш ва рағбатлантиришда муҳим аҳамият касб этаётганлигини таъкидлаб, иштирокчиларга омадлар      тилади.

Мазкур мукофот таъсис этилгандан буён 20 нафар андижонлик иқтидорли қизлар ана шу мукофот соҳибасига айланди.

Жорий йилда мазкур танлов номзодларини саралаш бўйича таълим муассасаларида ўтказилган ҳамда туман ва шаҳар босқичларида 3 минг нафардан зиёд иқтидорли қизлар қатнашган бўлса, вилоят босқичида адабиёт, санъат, фан, таълим, спорт, жамоатчилик ва маданият каби йўналишлар бўйича 170 нафарга яқин иштирокчи ўз иқтидор, билим ва маҳоратларини намойиш этди.

Якуний натижаларга кўра, турли йўналишлар бўйича энг яхши натижаларга эришган 14 нафар иқтидорли қизлар танловнинг республика саралаш босқичида қатнашишга тавсия этилди.

-  Билим ва истеъдодимизни синовдан ўтказдик, - дейди танловнинг адабиёт йўналиши иштирокчиси М.Юсуф номидаги мактаб-интернат ўқувчиси Ирода Орифжонова. - Унда муносиб иштирок этишга, улуғ шоирамиз номи билан юритиладиган мукофот соҳибаси бўлишга астойдил ҳаракат қилдик.

Якунда танловнинг республика босқичига тавсия этилган қизлар вилоят хотин-қизлар қўмитасининг фахрий ёрлиғи билан тақдирландилар.

Мазкур танлов ёшларнинг ўз салоҳиятларини тўлақонли юзага чиқаришлари, уларда шижоат, ўзларига бўлган ишонч ва интилишни, қолаверса, она Ватанга муҳаббат, истиқлол ғояларига ҳурмат, юрт равнақи учун  фидойилик туйғуларини мустаҳкамлашга хизмат қилмоқда.

Муаззам ИБРОҲИМОВА