Мамлакатимизда янги ўқув йилининг бошланишига ҳам саноқли кунлар қолди. Шу кунларда юртимизнинг барча жойларида бўлгани каби вилоятимизнинг барча туман ва шаҳарларида ташкил этилган "Мактаб ярмарка"лари қизғин фаолият кўрсатмоқда.

Вилоятдаги туман ва шаҳарлар марказий бозорлари, 20 дан зиёд савдо мажмуалари, бир қатор маҳаллалар гузарлари ҳамда 67 та умумтаълим мактабида "Мактаб ярмаркаси" ташкил этилиб, аҳолига хизмат кўрсатмоқда.

Жумладан, Андижон шаҳридаги бозорларда, Истиқлол, Ўзбекистон кўчалари, ўн иккита маҳалла гузари, шунингдек, бешта умумтаълим мактабида ташкил этилган "Мактаб ярмарка"лари аҳоли билан гавжум. Ярмаркаларда йигирмадан зиёд савдо ташкилотлари томонидан сифатли ўқув ва канцелария маҳсулотлари, ўқувчилар либослари, сумкалари сотуви йўлга қўйилган.

- Икки юзга яқин турдаги маҳсулотлар, ўқув қуролларини савдога чиқарганмиз, - дейди "Шарқ зиёкори" МЧЖ Андижон филиали раҳбари Улуғбек Исоқов. - Аҳолига қулайлик яратиш мақсадида пластик карта орқали ҳам савдо қилинмоқда. Нархлар бозордагига нисбатан арзон, энг асосийси, маҳсулотларимиз сифатлидир.

Жорий йилнинг 10 сентябрига қадар давом этадиган мазкур ярмаркалар ота-оналарга катта қулайлик яратмоқда. Шу боис ҳам мактаб ярмаркалари харидорлар билан гавжум.

- Фарзандларимга ўқув қуроллари, сумкалар сотиб олдик, - дейди Андижон шаҳридаги 7- умумтаълим мактаби бошланғич синф ўқитувчиси Гавҳарой Fуломжонова. - Уларни ўзимиз истиқомат қилаётган Бўстон маҳалласи гузарида ташкил этилган "Мактаб ярмаркаси"дан харид қилиш мен учун анча қулай бўлди, ортиқча оворагарчилик бўлмади. Энг асосийси, маҳсулотларни пластик картага сотиб олдик, уларнинг бозордагидан нисбатан арзонлиги, ҳам сифатли эканлиги менга манзур бўлди.

Мамлакатимиз мустақиллигининг қутлуғ 27 йиллик байрами арафасида яратилган бу каби қулайликдан андижонликлар беҳад мамнун бўлмоқда.

Фахриддин  ИБАЙДУЛЛАЕВ