Марҳамат туманидаги 5-сон болалар мусиқа ва санъат мактабида "Самарбону шеърияти: ўзбек адабиётининг ёрқин саҳифаси" деб номланган адабий, маънавий-маърифий тадбир бўлиб ўтди.

Маърифатпарвар шоира Самарбону таваллудининг 180 йиллигига бағишланиб Марҳамат туман ҳокимлиги, хотин-қизлар қўмитаси, Ўзбекистон Ёзувчилар уюшмаси вилоят бўлими, "Турон" ўқув маркази ҳамда "Иқбол" газетаси таҳририяти ҳамкорлигида ташкил этилган мазкур тадбирда шоир ва ёзувчилар, адабиётшунослар, шоиранинг авлодлари, ёш ижодкорлар, адабиёт ва шеърият ихлосмандлари, шунингдек, қўшни Фарғона ва Ўш вилоятларидан меҳмонлар иштирок этди.

Биз биламизки, ХIX аср ўзбек адабиётининг вакиласи Самарбону Ўшда туғилган, Марҳамат туманининг Ўқчи қишлоғида яшаб, ижод қилган. Ўзининг гўзал ғазалларини жамлаб, девон тузган.

Кейинги йилларда шоиранинг ҳаёти ва ижодини ўрганиш, кенг тарғиб этиш, шу орқали ёшларнинг адабиётга, шеъриятга бўлган қизиқишларини ошириш, шоира ҳақидаги билимларини бойитиш борасида қатор ишлар олиб борилмоқда.

Тадбирда сўз олган Ўзбекистон Ёзувчилар уюшмаси вилоят бўлими раҳбари Хуршида Қўчқорова, ёзувчи Соҳибахон ҳошимова, Андижон давлат университети доцентлари Назокат Жалолова, Дилдора Абдуллаева, ўшлик шоира Фарида Абдураимова, "Иқбол" газетаси муҳаррири Фахриддин Ибайдуллаев, "Турон" ўқув маркази раҳбари О. Хусанов адабиётга, ижод аҳлига кўрсатилаётган эътибор, шоира ҳаёти ва ижодининг ўзига хос қирралари, тадбирнинг мақсад ва аҳамияти хусусида гапирдилар.

  Марҳамат туманидаги 24-, 25-умумтаълим мактаблари ўқувчилари томонидан намойиш этилган бадиий дастур, ўқилган шеърлар, саҳна кўринишлари барчада катта таассурот қолдирди.

Тадбир доирасида ҳаваскор шахматчилар ўртасида турнир, ёш мусаввирларнинг ижодий ишлари кўргазмаси ташкил этилди.

Якунда бир гуруҳ фаол иштирокчилар ҳамда шахмат турнири ғолиблари ташкилотчилар томонидан китоблар жамланмаси билан тақдирландилар.

Тадбир шоира Самарбону ижодини ўрганиш, тарғиб этиш билан бирга, ёшларнинг адабиётга, шеъриятга, китоб мутолаасига бўлган қизиқишини оширишга хизмат қилди.

Шаҳло ХУСАНОВА