(15 – сон)

2017 йил - Халқ билан мулоқот ва инсон манфаатлари йили

Халқ билан мулоқот ва инсон манфаатлари йили Дастурида белгиланган вазифалар ҳар бир соҳа вакили зиммасига катта масъулият юклайди. Айниқса, халқ билан бевосита иш олиб борадиган ташкилот ва муассасалар фаолиятида мазкур жараён муҳим аҳамият касб этади.

Биз қайси соҳада фаолият кўрсатмайлик, истеъмолчи сифатида бирор бир маҳсулот харид қиламиз ёки турли хизматлардан фойдаланамиз. Сотиб олган маҳсулотимиз ёки кўрсатилаётган хизматдан кўнглимиз тўлмаса, нима қиламиз, деган савол ҳар бир фуқарони ўйлантириши табиий. Бу борада фуқароларимиз жамиятимиз хизматидан фойдаланишлари мумкинлигини билиб олишлари керак.

Шу маънода Андижон тумани Истеъмочиларнинг ҳуқуқларини ҳимоя қилиш жамияти томонидан фуқароларга "Истеъмолчиларнинг ҳуқуқларини ҳимоя қилиш тўғрисида"ги Ўзбекистон Республикасининг Қонуни ҳамда Вазирлар Маҳкамасининг 2002 йил 28 ноябрдаги "Истеъмолчиларнинг ҳуқуқларини ҳимоя қилишда жамоатчилик иштирокини кенгайтириш чора-тадбирлари тўғрисида"ги қарори мазмун-моҳиятини тушунтириш, аҳолининг бу борадаги ҳуқуқий билимларини бойитиш, истеъмол маданиятини юксалтириш борасида кенг кўламли ишлар олиб борилмоқда, кўплаб тадбирлар ўтказилмоқда. 

Ўтказилаётган тадбирлар натижасида фуқароларнинг истеъмол маданияти юксалмоқда. Жойларда ўзларига бўлаётган ноқонуний хатти-ҳаракатларга нисбатан ўз муносабатларини билдирмоқдалар ёки Истеъмолчиларнинг ҳуқуқларини ҳимоя қилиш жамиятига мурожаат билан чиқмоқдалар.

Мурожаатлар жамият томонидан ўрганиб чиқилиб, қонун талаблари доирасида ҳал этилмоқда. Жумладан, Хакан қишлоғи, Қум кўчасида яшовчи Н. Мирзаев жамиятга мурожаат қилиб,  "Водийгазтаъминот" УК Андижон туман филиали ходимлари томонидан табиий газдан қарзи борлиги, агар қарзни тўламаса, суд томонидан ундирилиши ҳақида айтишгани ва хонадон эгаси барча қарзларни тўлаганлиги, бироқ, орадан кўп ўтмасидан ҳудуд назоратчилари АСУ базасига 2 миллион сўм қарздорлик киритиб қўйганлигини баён қилиб, ҳуқуқларини ҳимоя қилишда ёрдам кўрсатишимизни сўраган.

Жамият мутахассисларининг суриштирувлари натижасида "Водийгазтаъминот" УК Андижон туман филиали ходимлари томонидан қарздорлик ноқонуний тарзда киритилганлиги аниқланиб, фуқаро Н. Мирзаевнинг хонадонига чиқарилган 2 миллион сўм миқдоридаги нореал қарздорлик қайта ҳисоб-китоб қилиниб, истеъмолчи фойдасига ҳал этилди.

Шунингдек, Андижон тумани, Хакан қишлоғи, Қоратут маҳалласида яшовчи  фуқаро А. Абиддинов вилоят Истеъмолчиларнинг ҳуқуқларини ҳимоя қилиш жамиятлари бирлашмасининг "1091" рақамли "Ишонч телефони"  орқали "Водийгазатаъминот" УК Андижон туман филиали томонидан хонадонига 700000 сўм нореал қарздорлик чиқариб қўйилгани ҳақида мурожаат қилган. Ўрганишлар давомида ушбу хонадонга 4198 м3 ошиқча газ сарфи ҳисоблангани аниқланди. Фойдаланилмаган табиий газ учун ҳисобланган нореал қарздорлик ана шу хатога йўл қўйган газ таъминоти идораси ходимларининг ойлик иш ҳақларидан истеъмолчи фойдасига ундириб берилди.

Бундай мисолларни яна кўплаб келтириш мумкин. Энг муҳими, истеъмолчилар ана шу ҳолатларга муносабат билдириб, ўз ҳақ-ҳуқуқларининг бузилишга чек қўймоқда. Жамиятимиз мутахассислари бу борада фуқароларимизга яқиндан ёрдам бермоқда. Бизнинг асосий мақсадимиз, ҳар бир мурожаатни чуқур ўрганиб, истеъмолчиларнинг ҳақ-ҳуқуқлари бузилишига йўл қўймаслик, жамиятимизда қонун устиворлигини таъминлашга ҳисса қўшишдир.

Мавлудахон АЪЗАМЖОНОВА,

Андижон тумани Истеъмочиларнинг ҳуқуқларини ҳимоя қилиш жамияти мутахассиси.