Маҳалла мутахассислари фаолиятидан

Маҳалламизда 5 мингга яқин аҳоли истиқомат қилади. Уларнинг қарийб ярмини хотин-қизлар ташкил этади. Фаолларимиз, маҳалламизда фаолият юритаётган комиссиялар аъзолари томонидан оилаларни мустаҳкамлаш, хотин-қизларнинг муаммоларини бартараф этиш, оғирини енгил қилиш борасида қатор ишлар олиб борилмоқда.  Бинобарин, ҳар бир оиланинг тинчлиги, тотувлиги маҳалла осойишталиги демакдир. Оилаларнинг мустаҳкам ва барқарор бўлиши эса кўп жиҳатдан ота-онага боғлиқ. Бу жараёнда аёлнинг ҳам, эркакнинг ҳам бирдек ўрни бор.

Энг аввало оилаларда ижтимоий-маънавий муҳит барқарорлигини таъминлашга, ҳуқуқбузарлик ва жиноятчиликларнинг олдини олиш, фуқароларимиз бандлигини таъминлашга, шаръий никоҳ билан яшаётган оилаларнинг никоҳини қонунийлаштиришга, эрта ва яқин қариндошлар ўртасидаги никоҳларга йўл қўймаслик, тўй-ҳашамлардаги дабдабабозлик ва исрофгарчиликка чек қўйишга алоҳида эътибор қаратяпмиз. 

Шаръий никоҳ аёлнинг ҳақ-ҳуқуқларини таъминлашда қонуний кафолат бўлолмайди. Қолаверса, шаърий никоҳ билан боғлиқ муаммолар қатор қийинчиликлар туғдирмоқда. Масалан,  бундай оилаларда туғилган фарзандларга туғилганлик ҳақида гувоҳнома олиш, оталикни белгилашда муаммо юзага келади. Маҳалламизда ана шундай муаммо қийнаётган икки оилага ёрдам кўрсатилди. Туман ФҲДЁ бўлими билан ҳамкорликда уларнинг никоҳлари расмийлаштириб, фарзандларига гувоҳномалар олиб берилди. 

Умуман, ҳудудимизда жорий йилнинг ўтган даврида оилавий низолар билан боғлиқ ўнга яқин мурожаатлар ижобий ҳал этилди. Ажрашиш ёқасида турган, низоли оилалар билан доимий иш олиб борилмоқда. Тарғибот-тушунтириш ишлари самараси ўлароқ, бундай оилаларнинг аксариятида муаммолар бартараф этилиб, муҳит яхшиланди.

Бугун маҳаллада эътибордан четда қолган бирорта ҳам оила йўқ. Ҳудуддаги мингга яқин  оила тўла ўрганиб чиқилди, имкон қадар уларнинг муаммолари бартараф этилмоқда. Хусусан, 8 нафар оғир ижтимоий шароитда яшаётган аёлга моддий, маънавий ва психологик ёрдам кўрсатилди. Ногирон ёки ногирон фарзанди бор аёллар ҳолидан хабар олиниб, патронаж ҳамширалар томонидан доимий назоратга олинган.

Қатор оилаларнинг имконият, эҳтиёж ва талабларидан келиб чиқиб, уларга тадбиркорлик фаолиятларини йўлга қўйишлари учун кўмаклашилмоқда. Маҳалламиз аҳолиси асосан, деҳқончилик билан шуғулланади. Томорқаларда етиштирилаётган сабзавот ва полиз экинлари уларнинг даромад манбаи.

Тўй ва маросимларни ихчам, камчиқим ўтказиш борасида ҳам эътиборга молик ишлар олиб борилмоқда. Келин олиб, қиз чиқараётган қудаларнинг олди-бердиларида ортиқча сарф-ҳаражатларга йўл қўйилмаяпти. Умуман, тўй билан боғлиқ маросимлар - "оқлик бериш",  "фотиҳа", "маъзар еди" сингари тадбирлар битта қилиб, ихчам ўтказилмоқда.  Муҳими, маҳалладошларимиз тўйни ўзлари билганча эмас, балки кенг жамоатчилик билан маслаҳатлашиб ўтказмоқда.

Мен кўп йиғинларда одамларга: "Ҳой, бир умр йиққан терганингизни бир кунлик маросим учун сарфлаб юборманг, эртага ҳам яшаш керак ахир. Ўзингиз учун яшашингиз керак бўлганда, умрингиз тугаб қолмасин", деб айтаман.

Идорамиз пештоқида "Менинг маҳалламда ҳеч бир жиноят содир этилмаслиги керак", деган шиор осилган. Дарҳақиқат, бу шунчаки ёзиб қўйилган эмас. Жиноятчилик ва ҳуқуқбузарликларнинг олдини олишга нафақат шу ишга масъул кишиларгина эмас, балки маҳалланинг ёшу қариси бирдек ҳаракат қилмоқда. Айниқса, кексаларимиз ёшларга ҳалол, тўғри бўлиш кераклигини ҳар куни уқтирадилар, бу борада "Ибратли қайноналар кўпаяверсин", "Биз ҳаётдан мамнунмиз!", "Сен намунали келин бўла оласанми? каби мавзуларда тадбирлар, давра суҳбатлари ўтказиб борилмоқда. Бундай тадбирларга маҳалламиздаги намунали хонадон вакиллари, эл орасида обрў-эътибор қозонган кишилар, шифокорлар, ҳуқуқшуносларни таклиф этяпмиз.

"Ҳар бир оила тадбиркор" дастури доирасида банкдан имтиёзли кредит олиб, ҳунармандлик ва тадбиркорлик билан шуғулланаётган аёлларимиз ҳам бор. Жумладан, ҳунарманд Наргиза Болтабоева, Мадина Давронова, Умида Раззоқовалар маҳаллада хотин-қизлар бандлигини таъминлаш, қизларга ҳунар ўргатишга муносиб ҳисса қўшиб келмоқда. 

Мақсадимиз битта, у ҳам бўлса, маҳалламиз тинчлигини, ободлигини, маҳалладошларимизнинг фаровон яшашларини таъминлаш. Энг муҳими, уларни эзгу мақсад йўлида бирлаштириш, юрт равнақи йўлидаги хайрли ишларга сафарбар этиш.

Нодирахон ЙЎЛДОШЕВА,

Олтинкўл туманидаги "Топтиқ"  маҳалла фуқаролар йиғини мутахассиси.