Қизларнинг спорт билан шуғулланиши уларнинг нафақат соғлом бўлиши, балки гўзал, қадди-қомати тўғри ўсишида муҳим аҳамият касб этади.

Андижон олимпия захиралари коллежининг ўқувчиси Мубина Халилова ҳам болалигидан спортга қизиқди, соғлом ҳаёт кечириш, қолаверса, спорт орқали жаҳонга танилиш истагида ёнди, оиласи, мактаби ва маҳалла-кўйи шаънини улуғлашни истади. Бу истак уни спортда улкан ютуқларга эришишига ундади.  Мана бир неча йилдирки, у спортнинг сузиш тури билан шуғулланиб келади.

- Мубина илк маротаба     машғулотга келган кунни яхши эслайман, - дейди мураббийи Умиджон Дадабоев. - Ўшанда унинг машқларни тўғри бажаришга ҳаракат қилаётгани, интилиши ва кўзларидаги иштиёқни кўриб, келгусида истеъдодли спортчи бўлиб етишишига ишонган эдим.

Ёш ва иқтидорли спортчи Мубина учун 2017 йил муваффақиятли якунланмоқда. Сузиш бўйича ўсмирлар ўртасида Ўзбекистон чемпионатининг ғолиби бўлди. Яқинда пойтахтимизда бўлиб ўтган республика кубоги мусобақаларида ҳам фаол иштирок этиб, турли масофаларга сузишда совринли ўринларни қўлга киритди.  Умуман, у ҳозирга қадар тўрт карра мамлакат чемпиони, бир неча бор Ўзбекистон кубоги соҳибасига айланди.

- Неварам спорт билан шуғулланиб, ана шундай ютуқларга эришаётганидан беҳад хурсандман, - дейди Мубинанинг бувиси Роҳилахон Халилова. - Турли мусобақаларда ғалаба қозонганида фахрланиб кетаман, кўзларимда қувонч ёшлари қалқийди. Унинг юқори натижаларга эришишида мураббийларининг ҳиссаси катта, қолаверса, бу натижалар Юртбошимиз раҳнамолигида ёшларнинг ўз имкониятларини тўлақонли юзага чиқаришлари учун яратиб берилаётган кенг имкониятлар самарасидир. 

Кўп карра мамлакат чемпиони 13 ёшли Мубина Халилованинг кўкрагида ўттиздан ортиқ медаллар порлаб турибди. У яқин кунларда Ўзбекистон ёшлар терма жамоаси таркибида Россиянинг Волгоград шаҳрида ўтказиладиган ўқув-йиғин машғулотларида иштирок этиш учун жўнаб кетади. Айни кунда у мураббийи ёрдамида маҳоратини янада ошириш учун маш-ғулотларда астойдил қатнашмоқда.

Ватан ва миллат ғурурини қалбига муҳрлаб олган Мубина сингари ўғил-қизлар  жаҳон спорт майдонларида юртимиз шуҳратини янада юксакларга кўтариш учун дадил одимлаб бораётганлиги қалбларимизни фахрга тўлдиради. Ана шундай эзгу ва хайрли  ниятга эришиш осон эмас албатта. Келажакда қатор халқаро мусобақалар, олимпиада ўйинларида ғолиб бўлишни ўз олдига мақсад қилиб қўйган иқтидорли ёш спортчи Мубинага бу йўлда омадлар тилаймиз. 

Баҳромжон ЗОКИРЖОНОВ

Суратда: ёш спорт юлдузи М. Халилова.