(45-сон, 2016 й. мулоҳаза)

Халқимизнинг маънавий мероси, энг катта бойлиги - авлоддан-авлодга ўтиб келаётган миллий урф-одатлар, анъаналар, тўй ва    бошқа маросимларидир. Истиқлолдан кейин ана шу миллий ва маънавий бойликларимизни қайта тиклаш, бойитиш борасида улкан ишлар амалга оширилди.

Аммо бугунги кунга келиб айрим кишилар томонидан ана шу анъаналаримизга нисбатан ҳурматсизлик билан қараш, ўзини кўз-кўз қилиш мақсадида турли янгиликлар киритиш ҳолатлари дилни хира қилади. Хусусан, кейинги  вақтларда баъзи тўй, маърака, оилавий тантаналар ва бошқа маросимларнинг ортиқча дабдабабозлик, исрофгарчилик билан ўтказиш иллатлари илдиз отиб бораётганлиги кенг жамоатчиликни ташвишга солмоқда. 

Бу каби ҳолатларнинг олдини олиш борасида Ўзбекистон мусулмонлар идораси Андижон вилоят вакиллиги томонидан зарур чора-тадбирлар кўрилиб, кенг кўламли тарғибот-ташвиқот ишлари олиб борилмоқда. Жумладан, тўй билан боғлиқ маросимларни ихчамлаштириш, ортиқча исрофгарчиликка, дабдабага йўл қўймаслик, тўйдан кейинги "мазар бериш" одатларини қисқартириш, маърака ва бошқа тадбирларни ихчам ўтказиш юзасидан отинойиларимиз ҳар бир маҳаллада аёллар билан суҳбатлар ўтказмоқда.

Шундай бўлса-да, айрим опа-сингилларимиз "ташаббуси" билан янги-янги иллатлар илдиз отмоқдаки, бу миллий қадриятларимиз давомийлиги ва софлигига раҳна солмоқда. Шу ўринда бугун     урфга айланаётган янги оилада чақалоқнинг дунёга келиши билан боғлиқ маросимлар - қиз томоннинг куёвга берадиган суюнчи пули, оиласидагиларга қилинадиган сарполар, бешик тўйининг ҳашамлари  сингари иллатларнинг илдиз отаётгани ҳеч кимга сир эмас. қадриятларимизга зид бу каби ҳолатлар туфайли қудалар, икки оила ўртасида турли низолар келиб чиқаётгани ҳам бор гап. Хали йўргакдан чиқмаган гўдакка келин томонидан велосипед, кольяска, болалар ётоқхонаси учун мебеллар жамланмаси, ўзиюрар машина каби совғаларнинг олиб келинишидек қабиҳ иллат айрим кишилар, асосан, аёлларимиз томонидан урфга айлантирилаётганлигини асло оқлаб бўлмайди. Бунга кимнингдир қурби етади, кимдир эса қарз-ҳавола кўтариб шу ишни қилаётгани эса саводсизликдан ўзга нарса эмас.

Бу сингари кўнгилсизликларга чек қўйишда, энг аввало, фаол хотин-қизларимиз, отинойиларимиз ташаббус кўрсатишлари зарур. Зеро, бундай иллатлар ҳаётимизда чуқур илдиз отмасин.

Мана шундай иллатларнинг илдиз отишига, ортиқча сарф-ҳаражатларга йўл қўймаслик, тўй ва бошқа маросимларни тартибга солиш учун жамиятимизнинг ҳар бир фуқароси, айниқса, муҳтарама аёлларимиз астойдил курашишлари лозим. Бу каби ҳолатлар ҳаётимиздан файз-баракани кўтаради. Қолаверса, оилаларимиз мустаҳкамлиги, фарзандларимиз бахти фақат сепу сидирға, мол-дунёга боғлиқ эмаслигини ҳар биримиз яхши англашимиз керак.

Муқаддасхон МАМАДАЛИЕВА,

Ўзбекистон мусулмонлар идорасининг  Андижон вилоят вакиллиги ходимаси.