Ўғрилик барча даврда, ҳар қандай жамиятда оғир жиноятлардан бири саналиб келган. Ўғриликнинг энг қабиҳи халқ, кўпчиликнинг мулкини ўғирлашдир.

Баъзи одамлар: "Бошқалар ўғирлаяпти-ку, биз ҳам олсак олибмиз-да!" дея ўзларининг хатти-ҳаракатига  баҳона излашади. Бундай ўғирлик бутун мусулмонларнинг мулкини ўғирлашдир. Баъзилар эса, озроқ ва арзон нарсани ўмаришни ўғирлик санашмайди. Ҳолбуки Пайғамбаримиз Муҳаммад (с.а.в) "Тухум ўғирлаб қўли кесилган, арқон ўғирлаб қўли кесилган ўғрига Аллоҳнинг лаънати бўлсин!" - деганлар (Имом Бухорий ривояти). Юқоридаги ҳадиси шарифлардан маълум бўладики, ўғирликнинг катта-кичиклигига эмас, балки унинг оғир гуноҳлигига эътибор қаратишлигимиз муҳимдир.

 Минг афсуслар бўлсинки, инсонлар орасида кўпчиликнинг ҳаққи бўлган электр токи, газ, ичимлик суви каби Аллоҳнинг неъматларини ўғирликча ишлатиб ёки хаққини ўз вақтида бермай юрганлар ҳам йўқ эмас. Айнан мана шу ҳолат ҳам ўзгалар ҳаққига хиёнат саналади. Бундай гуноҳ вақтлар келиб аввало, ўша инсоннинг ўзини ёки зурриётларини азобга солиши мумкин.

Билиб-билмай ўғирлик қилган киши аввало, Аллоҳ таолога тавба қилиши, сўнг ўғирлаган нарсасини эгасига қайтариб бериши шарт. Ошкор ёки пинҳона йўл билан бўлсин, фарқи йўқ, молни эгасига қайтариб бериши лозим. Шариатда мабодо молнинг эгасини ёки унинг меросхўрларини топа олмаса, бундай ҳолда савобини молнинг эгасига ният қилиб, унинг номидан тўлалигича садақа қилишлик буюрилган.

 Барчамизни яратган меҳрибон Зот ўзидан кечирим сўраб тавба қилишга буюриб, шундай марҳамат қилади: "Аллоҳдан кечирим сўранг, Аллоҳ албатта кечирувчи ва раҳмлидир" (Нисо сураси, 106-оят). Яна шуни яхши билишимиз керакки,  банданинг тавбаси Аллоҳ таоло томонидан қабул бўлишининг бир неча    шартлари бор. Биринчиси - гуноҳига пушаймонлик, иккинчиси - гуноҳларга энди асло қайтмасликка азму қарор қилишлик, учинчиси - гуноҳларни бутутунлай тарк этишдир. Демак, инсон қилган гуноҳларига юқоридаги шартларга мувофиқ тавба қилса, гуноҳлари мағфират этилади ва ҳатто, ёмонликлари яхшиликка алмаштирилади. Шунинг учун гуноҳ қилган банда ҳамиша Яратганнинг раҳмат-мағфиратидан умидвор бўлиб, яхши амаллари билан Аллоҳга чин дилдан,  астойдил тавба қилиши лозим. Шунда унинг тоғдек гуноҳи бўлса ҳам кечирилади.

Аллоҳ таоло барчамизни бу фоний дунёда ўзгалар ҳаққидан ҳазар қилиб, ҳалолу пок яшашлигимизни насиб айласин.

 Абдурашид ҚОДИРОВ,

Избоскан туманидаги "Умар Ибн Хаттоб" жоме масжиди имоми.