МУЛОҲАЗА
Бугунги кунда фуқаролар, айниқса, ёшлар томонидан содир этилаётган ҳуқуқбузарлик ва жиноятчилик ҳолатлари таҳлили шуни кўрсатадики, ана шундай ҳолатларнинг юзага келишига кўпинча юртдошларимиз, ёшларимизнинг ҳуқуқий билимлари етарли эмаслиги, бу борада улар зарур билим ва тушунчага эга эмасликлари сабаб бўлмоқда.
Ёшларимизнинг ҳали тўлиқ шаклланмаган онг ва тафаккурига қатор хориж давлатларида содир бўлаётган воқеа-ҳодисалар, интернет орқали тарқалаётган, миллий маънавиятимизга ёт ғоялар, ваҳшийлик ва зўравонликни тарғиб қилувчи видео тасмалар, "оммавий маданият" кўринишлари салбий таъсир этаётганлиги албатта, бугун барчамизни ташвишлантиради. Бундай ҳолатларнинг олдини олиш, ёшлар тарбияси эса асло кечиктириб бўлмайдиган муҳим вазифалардан бири ҳисобланади.
Ана шундан келиб чиқиб, туман судлари томонидан жорий йилда ҳамкор ташкилотлар билан биргаликда маҳаллалар, меҳнат жамоалари, таълим муассасаларида ижтимоий-маънавий муҳит барқарорлигини таъминлаш, аҳолининг ҳуқуқий билимларини бойитишга қаратилган турли тадбирлар ўтказилиши бўйича режалар белгилаб олинган.
Ўтказиладиган тадбирларимизда аҳоли, хусусан, ёшларнинг ҳуқуқий билим ва тушунчаларини ошириш, миллий қадриятларимиз, халқимизнинг ўзига хос урф-одат, анъаналарини кенг тарғиб этиш, миллий мафкура ва маънавиятимизга салбий таъсир этувчи омиллар, "оммавий маданият" кўринишлари, диний ақидапарастлик ғоялари таъсиридан сақланиш, салбий ҳолатлар келиб чиқишининг олдини олиш масалаларига алоҳида эътибор қаратилади.
Агар биз, умуман, кенг жамоатчилик мазкур йўналишдаги зарур тарғибот-тушунтириш ишларини ўз вақтида олиб бормасак, ёшларимиз тарбияси, маънавияти издан чиқиши, содир этилаётган ҳуқуқбузарлик ва жиноятлар ортиши, бу ҳолат вақтлар ўтиб тузатиб бўлмас оқибатларга олиб келиши мумкин.
Шу боис, бу ишга нафақат ҳуқуқ-тартибот, маънавият, таълим соҳаси вакиллари, балки ота-оналар, зиёлилар, умуман, кенг жамоатчилик жиддий эътибор қаратиши керак. Шундагина биз ёшларимизни ҳар хил салбий иллатлардан ҳимоя қила оламиз. Қолаверса, чиройли тарбия олган, ҳуқуқий билимдон, бирор касб, ҳунарни бошидан тутган, салоҳиятли ёшларимиз, шубҳасиз, келажакда ота-онасига, устозларига раҳматлар келтирадиган, юрт равнақига муносиб хизмат қиладиган инсонлар бўлиб камол топади.
Нодирбек МИРЗАЖОНОВ,
Жиноят ишлари бўйича Булоқбоши туман суди раиси.
