Аёл бир қўлида бешикни, бир қўлида дунёни тебратадиган улуғ зотдир. У ҳаётнинг гултожи, авлодлар давомчиси. Аёл ҳақида қанчалар илиқ, энг юракка яқин сўзларни айтмайлик, барибир унинг таърифини тўлақонли тасвирлаб бера олмаймиз.

Бугун юртимизда хотин-қизларнинг жамият ижтимоий-сиёсий ҳаётидаги фаол иштирокини    таъминлаш, оиладаги нуфузини кўтариш, муаммоларини бартараф этиш, умуман, опа-сингилларимизга эътибор ва ғамхўрлик борасида кенг кўламли ишлар амалга оширилмоқда. Бунинг самараси ўлароқ, юрт равнақи, халқимиз турмуш фаровонлигини юксалтиришда фидойилик билан меҳнат қилаётган аёлларимиз сафи тобора ортиб бормоқда. Кўплаб аёлларимиз самарали меҳнатларига муносиб рағбат олмоқда.  Халқаро хотин-қизлар байрами арафасида ана шундай опа-сингилларимиздан бир гуруҳи Президентимиз фармони билан қатор орден, медаль ва бошқа мукофотлар билан тақдирланди.

Балиқчи тумани ҳокимлигининг "Fалаба" газетаси муҳаррири Шаҳзодахон Каримова ҳам "Мўътабар аёл" давлат мукофоти билан тақдирланганлиги барчамизни қувонтиради.

Шаҳзодахон Каримова вилоятимизнинг фаол ижодкор аёлларидан бири. Асли касби ўқитувчи бўлса-да, у бир неча йиллардан буён туман газетасига раҳбарлик қилиб келади. Туман ижтимоий ҳаётидаги фаоллиги, қолаверса, нафақат туман, балки вилоят, республика матбуот нашрларидаги долзарб мавзулардаги мақолалари, публицистик чиқишлари билан кенг жамоатчилик эътирофига сазовор бўлди. Ижодий ишлари билан кўплаб танловларда ғолиб ва совриндорлар қаторидан ўрин олган. Жумладан, у 2008 йилда "Йилнинг энг фаол журналисти", 2018 йилда "Энг улуғ, энг азиз" танловининг республика босқичларида фахрли 2-ўринга сазовор бўлган. Шу билан бирга, кўплаб фахрий ёрлиқлар билан тақдирланган.

- Ижод соҳасини танлаганимдан, ижодкор эканлигимдан асло афсусланмайман, - дейди Ш. Каримова. - Бу иш ҳаётда ҳамиша мени фаол бўлишга ундади. Меҳнатларим, ижодим билан эл-юрт ўртасида ҳурмат, қадр топдим.  

Изланишдан чарчамайдиган, ташаббускор, серқирра ижодкорнинг фаолияти ибратга муносиб. У туманда ташкил этилган маънавий-маърифий ишлар бўйича   тарғибот гуруҳи раҳбари сифатида оилаларни мустаҳкамлаш, ажримларнинг олдини олиш, хотин-қизлар фаоллигини ошириш,   бандлигини таъминлаш, ёшлар тарбияси борасидаги тарғибот ишларида ҳамиша фаол қатнашиб келади. Кўплаб ижодкор ёшларнинг меҳрибон устозидир.

Ш. Каримова нафақат давлат, жамият ишидаги фаоллиги, балки ибратли оиланинг соҳибаси сифатида ҳам ҳурмат - эътибор топа олган. Турмуш ўртоғи билан икки ўғилни эл-юрт ишига камарбаста инсонлар қилиб тарбиялади, келинлар олиб, уларни  уй-жойли қилди. Ҳозирда у уч набиранинг севимли бувижонисидир.

Меҳнатидан, ҳаётидан бахт топиб, фарзандлар камолидан куч олиб яшаётган Шаҳзодахон Каримовага "Мўътабар аёл" мукофоти муборак бўлсин, деймиз. Унинг келгусидаги ишларида, ижодида омадлар тилаб қоламиз.

Муаззам ИБРОҲИМОВА