Юртимизда баҳорнинг ташрифи, аввало, табиат қўйнидан бошланади. Табиат қўйнида ажиб бир ҳалимлик уйғонади. Еллар эсиб, борлиқ абри найсонлар суйидан баҳра олади. Чучмомалар, майсалар бўй кўрсатиб, дов-дарахтларга яшиллик ина бошлайди.

Даштларга, яйловларга, далаларга файз киради, боғлар яшилланади, саҳролар, тоғларда кўклам нафаси кеза бошлайди. Баҳор юртимизга ана шундай уйғоқликни, яшаришни, гўзалликни олиб киради.

Бугун табиат бағридаги     уйғониш одамлар қалбига ҳам кўчмоқда. Оилаларда, маҳаллаларда ободонлаштириш, кўкаламзорлаштириш, тозалаш, орасталик ишлари олиб борилмоқда. Бу каби хайрли ишлар юртдаги ободлик кўнгиллардан бошланишини кўрсатади. Бугунги баҳорий ўзгаришлар фақат табиат бағрида, одамлар қалбидагина эмас, балки юртимиз ижтимоий ҳаётидаги яратувчилик, янгиланиш ва бунёдкорликларга ҳамоҳанг эканлиги кўзга ташланади.

Баҳор юртимизда тантаналар, байрамлар, шодиёналар фасли сифатида эътироф этилади. Баҳорнинг энг нуфузли байрами, шубҳасиз, Наврўздир. Шарқ халқлари томонидан янги йил сифатида улуғланадиган Наврўзи олам мамлакатимиздаги энг қадрли байрамлардан биридир. Ҳамалнинг биринчи куни, баҳорий тенгкунлик деб аталадиган Наврўзни халқимиз неча минг йиллардан буён улуғ шодиёна билан нишонлаб келган. Улуғ муаррих Абу Бакр Муҳаммад ан-Наршахий "Бухоро тарихи" асарида Варахша қалъаси ҳақида сўз юритганда бундай деб ёзади:

"Бу ерда ҳар ўн беш кунда бир кун бозор бўлади, йилнинг охирида эса одамлар йигирма кун бозор қилиб, йигирма биринчи куни Наврўз - янги йил байрамини ўтказадилар. Буни "Наврўз" - "Деҳқонлар наврўзи" дейдилар. Бухоро деҳқонлари (йил кунлари) ҳисобини ўша кундан бошлайдилар ва бунга эътибор берадилар".

Юқоридаги маълумотлар Наврўзнинг қадимийлигини, унинг туб негизи юртимиз тарихи билан боғлиқлигини кўрсатади. Не-не босқинлар ва тақиқлар ҳам уни халқимиз қалбидан ўчира олмаган. Шу сабабли ҳам бу байрам биз учун табиатнинг уйғониши, саховати, қадриятларимиз, урф-одатларимизни ифодаловчи байрам сифатида яшаб келмоқда.

Наврўзни халқимиз қадимдан фақат янги кун, янги йил шодиёнаси сифатида нишонлаш билан чекланиб қолмаган. Бу кун ҳаётнинг барча жабҳаларида улкан ўзгаришлар, янгиланишлар, бунёдкорликлар учун янги даврнинг бошланиши деб қаралган. Шу сабабли улуғ аждодларимиз янги кун, янги йилнинг қандай кириб келиши, қай тарзда бошланишига қараб йил давомида деҳқончилик, чорвачилик, тижорат, умуман, ҳаётнинг барча жабҳаларида содир бўладиган воқеа-ҳодисалар ҳақида маълум хулосаларини ёзиб қолдирганлар. Шу асосда "Солнома", "Наврўзнома",   "Меърожнома" каби асарлар яратилган.

Бу йилги баҳор ва Наврўз ўлкамизга қут-барака, тўкин-сочинлик, омонлик, тинчлик, фарахбахш ҳаёт олиб келсин. Улуғ айём арафасида қалбларимизда Алишер Навоийнинг гўзал байти такрорланади:

Зулфу рухсор ила коминга мени еткурсанг,

Ҳар тунинг қадр ўлубон, ҳар кунинг ўлсин Наврўз.

Зумрадхон ЖАҲОНОВА,

педагог,

Марҳамат тумани.