Ҳуқуқий маслаҳатхона
- Меҳнат шартномасини ходимнинг ташаббуси билан бекор қилиш қандай тартибда амалга оширилади?
Ўзбекистон Республикаси Меҳнат кодексининг 99-моддаси биринчи қисмига мувофиқ ходим номуайян муддатга тузилган меҳнат шартномасини ҳам, муайян муддатга тузилган меҳнат шартномасини ҳам икки ҳафта олдин иш берувчини ёзма равишда огоҳлантирган ҳолда бекор қилишга ҳақлидир. Огоҳлантириш муддати тугаганидан сўнг ходим ишни тўхтатишга ҳақли, иш берувчи эса ходимга меҳнат дафтарчасини бериши ва у билан ҳисоб-китоб қилиши шарт.
* * *
- Ходим ташаббуси билан меҳнат шартномасини бекор қилиш қай тарзда амалга оширилади?
Ходимнинг ташаббуси билан меҳнат шартномасини бекор қилиш тўғрисидаги ариза албатта, ёзма тарзда берилиши керак. Ходимнинг меҳнат шартномасини бекор қилиш хусусидаги оғзаки илтимоси Меҳнат кодексининг 99-моддасига мувофиқ шартномани бекор қилиш учун асос бўлиб хизмат қила олмайди. Аризанинг мазмуни ходим ҳақиқатан меҳнатга оид муносабатларни бекор қилишни истаётганлигидан далолат бериши керак. Ариза ишга қабул қилиш ва меҳнат шартномасини бекор қилиш ҳуқуқига эга бўлган мансабдор шахс номига ёзилади. Бундан ташқари, ариза уни қабул қилиб олган ходим томонидан имзоланиб, сана қўйилиши керак. Бунда ариза ёзилган сана ариза берилган сана билан чалкаштирилмаслиги лозим.
* * *
- Меҳнат шартномасини ходимнинг ташаббуси билан бекор қилиш тўғрисидаги аризани қабул қилишни рад этиш мумкинми?
Ходимнинг меҳнат шартномасини бекор қилиш ҳақидаги аризасини қабул қилишни рад этишга ҳеч бир сабабга кўра йўл қўйилмайди, Рад этиш меҳнат тўғрисидаги қонун ҳужжатлари талабларининг бузилиши ҳисобланади. Шу сабабли ходим аризасини қабул қилишни рад этиш, бошқа ҳужжатлар талаб этиш ёки иш берувчи томонидан қандайдир шартлар қўйилиши (ишда йўқ ходим таътилдан қайтишини кутиш, ўз ўрнига одам топиш ва шу кабиларни) мумкин эмас. Ариза қабул қилиш рад этилган тақдирда ходим иш берувчининг хатти-ҳаракати устидан юқори идорага шикоят қилиши ёки аризани буюртма хат тарзида почта орқали жўнатиши мумкин.
Саволларга Андижон шаҳар Давлат меҳнат ҳуқуқ инспектори
Дониёр ДИЛШОДОВ жавоб берди.
