(16 - сон)  касблар фестивали

Андижон олимпия захиралари коллежида "Касб-ҳунар билан келажак сари" шиори остида ёшлар форуми бўлиб ўтди.

Ўзбекистон Республикасининг «Ёшларга оид давлат сиёсати тўғрисида»ги қонуни ҳамда «Халқ билан мулоқот ва инсон манфаатлари йили» дастурида белгиланган вазифалар ижросини таъминлаш мақсадида  вилоят ҳокимлиги, ўрта махсус касб-ҳунар ва халқ таълими бошқармалари ҳамкорлигида ташкил этилган мазкур форумда кенг жамоатчилик вакиллари, ота-оналар ҳамда умумтаълим мактаблари, академик лицей ва касб-ҳунар коллежларининг 14 минг нафарга яқин битирувчилари иштирок этди.

Тадбирда вилоят ҳокими Ш. Абдураҳмонов сўз олиб,  мамлакатимизда ёшларнинг ҳар жиҳатдан пухта билим олишлари, касб-ҳунар эгаллашлари ҳамда ўз иқтидор ва салоҳиятларини тўлақонли намоён этишлари учун кенг имкониятлар яратиб берилаётганлиги, бунинг самараси ўлароқ, ҳар жиҳатдан етук ва фаол ёшлар сафи тобора ортиб бораётганлигини таъкидлади.

 - Айни кунда вилоятдаги 740 та умумтаълим мактабида 430 минг, 129 та академик лицей ва касб-ҳунар коллежларида 128,5 минг нафардан зиёд ўқувчи таҳсил олади, - дейди Андижон вилояти ўрта-махсус касб-ҳунар таълими бошқармаси бошлиғи вазифасини бажарувчи Фурқат Бузруков. - Жорий йилда 42 минг нафардан зиёд ўқувчи мактабни, 41 минг нафардан ортиқ йигит-қиз академик лицей ва коллежларни тамомлайди. Ташкил этилган тадбир 9-синф битирувчиларига академик лицей ва коллежлардаги мавжуд шарт-шароит, имкониятлар билан танишишлари, коллеж битирувчиларининг иш берувчилар билан бевосита мулоқот қилишларига имконият яратди.

Таъкидлаш керакки, айни кунга қадар вилоятдаги касб-ҳунар коллежлари битирувчилари билан корхона ва ташкилотлар ўртасида амалиёт ўташ ва ишга жойлашиш бўйича тўрт томонлама шартномалар тузиш якунига етказилмоқда. Унга кўра, битирувчиларнинг аксарияти ўз мутахассисликлари бўйича амалиёт ўтаб, малака ва тажрибаларини оширмоқда.

- Мен тўрт томонлама шартнома асосида "Агробанк"нинг вилоят филиалида амалиёт ўтаяпман, - дейди Андижон банк коллежи битирувчиси Жавоҳир Мамасолиев. - Малакали мутахассислар кўмагида соҳа ишини пухта ўрганишга ҳаракат қиляпман. Коллежни тамомлаб, шу ерда ишлаб қолишни ўз олдимга мақсад қилиб қўйганман.

Тадбирда ўрта махсус касб-ҳунар таълими тизимидаги таълим муассасаларининг имкониятлари, мавжуд мутахассисликлари, моддий-техника баъзаси, ўқиш, касб-ҳунар ўргатиш борасидаги шарт-шароитлари амалий кўргазмалар орқали намойиш этилди. Умумтаълим мактаблари битирувчиларига коллежлар фаолияти тўғрисида кенг маълумотлар берилди.

Шунингдек, форумда касб-ҳунар коллежлари ўқувчилари ўз мутахассисликларини қай даражада эгаллаганликларини ўзлари тайёрлаган тикувчилик, қандолатчилик, саноат маҳсулотлари кўргазмалари орқали намойиш этди.

Форум доирасида ташкил этилган меҳнат ярмаркасида вилоятдаги 44 корхона ва ташкилот 185 та бўш иш ўринлари билан иштирок этди. Ярмаркада кўплаб коллеж битирувчилари мутахассисликлари бўйича ишга жойлашиш учун йўлланма олди.

Нигора ЎРМОНЖОНОВА, жамоатчи мухбир.

Суратда: тадбирдан лавҳа.